مندي الدجاج كلام كبييير .. ((تم تجربة البرميل المتنقل بنجااااح))

[السفير14]

السلام عليكم ورحمة الله وبركاته ..

صباحكم / مسائكم .. ورد وياسمين اخواني الاعزاء

والله من زمان عنكم ,, يا جعلي ما افقدكم

حقيقة ما شاء الله تبارك الرحمن الخيمة مليئة بانواع الطبخات ,,

وكل طبخة تقول (( الزود عندي )) ..

وهنا حبيت اضع مشاركتي بين يديكم علها تحوز على رضاكم واستحسانكم ,,

ولكن قبل البدأ :

احب اشكر اخوي mo7taj (( ابو اسيل )) ,,

بيض الله وجهه وما قصر صراحة ,, كلف على نفسه شرى البرميل وارسله للمنطقة الشرقية ..

فله مني جزيل الشكر والامتنان ,,

ولا هي غريبة على رجال الحجاز ,, من غير قصور بالمناطق الثانية

فكلهم على العين والراس ..

وهذا الموضوع اهداء لي كل من :

1- الاخ العزيز والغالي / سرهيد .. ويعلم الله انك ما غبت عن البال .. ودايم تكسب دعوات مني

فالله يجمعيني واياك وجميع المسلمين في فردوسه الاعلى

2- الاخ العزيز والغالي / mo7taj .. لا حرمك الله الفردوس ووالديك

3 - الاعضاء المحترمين وفقهم الله الى كل خير ,, وجعل نصيبهم الفردوس

نرجع لموضوعنا ..

بما اني من هوات المندي وخاصة اذا كانت لحيماااات ..

(( ياااوك والله كلام كبييير )) ,,

وخبركم الحين فصل الصيف .. والواحد يدور الاماكن المرتفعة في البر
( راس النفود )

فاحتجت برميل مندي متنقل ,, وقلت لازم اخذه الله لا يعوق بشر

فكان لي الشرف بمحادثة اخوي ابو اسيل وما قصر جعله سالم ..

وارسله للدمام ..

[وللعلم يوجد برميل ثابت ولكن يستخدم في فصل الشتاء ,,

- لانه في ارض منخفضة - ]

وما شاء الله ما فرقته عن البرميل الثابت

وما دريت الا دق علي موظف الشحن الساعة 4:30 امس وقال عندك طرد ,,

قلت ابشر بسعدك ,, وانقز له .. الا ما شاء الله هذا البرميل .. وانا اخذه

واكلم الربع وما شاء الله ما قصروا وافقوا ,, ومشينا ..

وبما ان هذي اول طبخة في البرميل الجديد قررنا ان العشا يكون دجاج ..

(( خبركم ممكن البرميل يكون فيه تنسيم ولا شي ))

ويخرب المندي ,,

فقلنا نخليها على دجاج ,, ولا نجيب العيد في اللحيمات

المهم مالكم بالطويلة ,,

توجهت للبر مع رجال(ن) شرواكم ..

وشبينا الحطب بالبرميل الجديد كما في الصورة ,, ((وتم وضع غطا لعمل تيار هوائي))

ثم ((خمرنا)) الارز وجهزنا البهارات مع الملح و الدجاج

وبعدها وضعنا الارز في القدر واضفنا الماء ثم اضفنا البصل والطماطم

واضفنا الزبدة

وبعدها الملح

وضعنا ( معلاق ) الملابس على القدر - للحمل -

وهذا شكل القدر بعد الاكتمال ..

وهذه ((بنات المذن)) الله يخليهن لنا

ولقطة للبرميل من الداخل ويظهر الكرسي

وهنا بعد وضع الدجاج والارز

وهذه صورة المزيون بعد تغطيته ,, ووضع القصدير احتياط لـ اي تنسيم

واخذنا بريق شاهي الى ان حان موعد الصفر ,, والكل يترقب النتيجة

والحمد لله النتيجة رائعة ولا يوجد فرق عن البرميل الثابت ولله الحمد

الدجاج قمة ما شاء الله

والارز .. شيء لا يوصف

وهذه الصور النهائية

في الختام اتمنى ان يكون الموضوع حاز على رضاكم ,,

اخوكم .. ابو عبدالرحمن

والسلام عليكم ورحمة الله وبركاته ..

[صقر قحطان505]

اله يقلع ابليسك انا ميت جوع وتحط صور تشهي زي هاذي الله يجزاك خير على الصور وجعله بالعافيه

[سبران2009]

بيض الله وجهك والله أمتعتني بموضوعك الرائع وعندك أسلوب تشويق ماشاء الله عليك والطبخة والله إنك شهيتني الله يصلحك تخبر مابه مطعم فاتح ذا الوقت

تقبل مرور أخوك / سبران 2009

[شهاب2020]

الله يعطيك العافيه

[ابو هلال2008]

يااليت تعلمنا وش نوع البرميل وكم طوله وعرضه وين المكان الي تحصله فيه

[السفير14]

اله يقلع ابليسك انا ميت جوع وتحط صور تشهي زي هاذي الله يجزاك خير على الصور وجعله بالعافيه

امين ..

وشرفني مرورك اخي الغالي صقر قحطان ,,

[السفير14]

بيض الله وجهك والله أمتعتني بموضوعك الرائع وعندك أسلوب تشويق ماشاء الله عليك والطبخة والله إنك شهيتني الله يصلحك تخبر مابه مطعم فاتح ذا الوقت

تقبل مرور أخوك / سبران 2009

ووجهك طال عمرك ..

وخل عنك المطاعم .. طب الثلاجة والله يخلي الجبن والخبز ..

[بن شمروخ]

ماشاء الله تبارك الله

شغل تمام والله .... ويازين شغلك على الرز >> ماشاء الله باين عليه طعم ...

قواك الله
تقبل مروري/

[ألأطلسي]

لوسمحت بارك الله فيك فضلا ممكن تسال خويك اللي في الحجاز وين احصل اللي يبيعون البرميل الله لايهينك انت واياه واكون شاكرالك

[الضرغام11]

ماشاء الله شغل مضبوط والبرميل شكله عملي وخفيف يصلح للكشتات الخفافيه..


ماقصرت على الطبخه وبالعافيه..

[AxR979]

ما شاء الله طبخة و لا احلى .. بس مهب كن الدجاج ما استوى مرة ؟

[النمرالأليف]

شرواك الطيب وبيض الله وجهك على هالطبخة ودمت بود

[وسيع البنايد]

مبروك الافتتاحيه ومندي طيب

[Somebody]

سلمت يمناااك ولا عدمناك

شغل مرتوب وجميل

ولكن فيه ملاحظه بسيطة القدر غطى الجمر بصورة كاملة ولذلك الدجاج
لم يكن محمر بالشكل المعتااد وخبرك الدجاج زفرته في جلده واذا الجلد ما تقمر رااح يكون
زفر.

وهذي مشكلة البرميل الصغير ما يمكنك من الاعداد الجيد.

تسلم يمينك مرة اخرى

تقبل التحيه

[دهران]

الأخ الغالي / السفير14

الرجاء المرور على هذا الرابط

ننتظر المزيد من هذه الطبخات الجميلة .


وتقبل أعذب وأرق تحية .