&& .. رابطة ملاك سيارات الدفع الرباعي بجميع انواعه وموديلاته .. &&

[العزوم]

الســلام عليكم ورحمـة الله وبركـاته

اخواني في رابطة ملاك الدفع الرباعي .. الله لا يهينكم

ابي شوركم ونصيحتكم في ونيت فورد f250

لاني هاليومين ادور لي موتر حوض (مستعمل) و طاحت عيني على موتر فورد ونيت نظيف موديل 2005

وما عندي اي خلفية عن (الونيت فورد) من ناحية ( خراباته , قطع غياره , تحمله , صرفية البنزين , ممشاه في الخط ,..الخ )

وياليت لو تفيدوني بالفرق بينه وبين ونيت الجمس من ناحية (قوة تحملهم , اسعارهم , ..الخ )

وما استغني عن نصايحكم بشكل عام عن الموتر نفسه ..

وأعذروني على الاطالة ..

اخوكم

حياك الله اخوي

انا بوضح لك تجربتي الاولى لو انها قديمه شوي من 1416هـ مع الفورد الونيت طبعا حجم 250 xl 1990 بدون دبل كان استعمال شركة وانا المالك 4 كل اللي اعرفهم ماحد مدحه خذ عذاريب ماله قطع خراباته كثير انواع الاحباط مع اني مجرب انواع من قبل نادره مثل( جاكوار - رنج روفر-دودج سيدان - امبريال - سكاي لاين جي تي) ماله قطع ابدا بالسعوديه المهم اول شي صكوه عين الفورد الاحمر وصدمت بالمطر في سيارة البلديه ماكمل معي يومين صلحته وكرفته 9 سنوات ماتعطل الا مره وحده والسبب كويل صغير صار يحمي ويفصل الكهرب غيرته 35 ريال والقطع الاستهلاكيه عند الجبيل او التوكيلات وبعض المحلات صحيح ماهو متوفر مثل الجمس والتويوتا لكن عز الله انه كذا دفرنس واحد ومايخلي مكان وطلع مكسيكي بعد يعني الناس خصوصا بدول الخليج تعودت على شي وماتحب تغيره او تجرب غيره خوفا من الفشل

تحياتي

[العزوم]

السلام عليكم

اولا اشكر الاخ صاحب الموضوع
عندي سيارة فورد رنجرغمارتين 99صنع امريكي طبعا حجم وسط وارغب طرح بعض الاسئله حولها /
1-هل يمكن تبديل الماكينه من 4 سلندر الى 6 نفس مكينة الاكسبلورربدون تغيير القير؟؟
2- السياره بدون دبل هل يمكن تحويلها دفع رباعي من نفس نوعيتها؟؟

مازلت انتظر الاجابه من الخبراء

[زمزم 100]

مازلت انتظر الاجابه من الخبراء

أخوي كم سعة المكينة هل هي نفس مكينة المازدا ؟

[العزوم]

أخوي كم سعة المكينة هل هي نفس مكينة المازدا ؟

لاتختلف عن المازدا

صناعة الارجنتين مكتوب على الباب والمكينه 2.6 بخاخ بس الغريب 4 سلندر و8 بواجي فسقه

[harth_10]

بسم الله الرحمن الرحيم

السلام عليكم ورحمة الله وبركاته

اسعدني كثير الاطلاع على الموضوع ولو انه قديم بس حبيت اشارك ببعض ما عندي عن السيارات خاصه الدفع الرباعي

لي بعض الملاحظات على كل المشاركين وهي ان الجميع يكتب عن البر بصفه عامه او يخصص في الصحاري او الرمل ولا يوجد ذكر للجبال وخاصه من اهل المناطق الجبلية مثل الجنوب وتهامه وغيرها انا تجولت بصفتي رجل احب المقناص ومقناصي كان في الوبران والقهد والحجل حسب ما هو موجود في منطقتنا انا طبعا من سكان الطائف يعني على حد المناطق الجبلية ندخل الان في السيارات طبعا هي كثيرة تكاد لا تحصى ولكن للجبال خاصه وللبر عامة اتكلم عن اهل المقناص او اهل البر غير عن محبي التطعيس واعجب بكل صدق عن هذه الهوايه التي لا يجني منها صاحبها الا الخسارة يشتري سيارة بمبلغ وقدره من اجل يطلع الطعس هذا وينزل من الطعس هذا ثم العوده للورش وصلح يامهندس ودفع دراهم بدون اي فائدة مرجوه لو ان الرجل مضطر كون سكنه في منطقه رمليه او عمله في منطقه رمليه نقول هناك داعي لذلك لكن اطلع من بيتي ومدينتي للصحراء عشان اطعس اعتقد ان من يفعل ذلك يحتاجل له مرقاع بين اذانيه (( مكوا يكوي وسط راسه بين الاذاني عشان لا يمسح ولا يرج )) عموما ارجع للسيارات عندنا نوعين فقط لا غير هي الدارجه في المنطقه ومنها نوع ثبت بقوة لا يكاد بيت يخلو من جيب تويوتا سواء مقناص او لظروف المنطقه ولا يعيش فيها سيارات افضل من تويوتا جيوب فقط بانواعها طبعا بحكم المنطقة جبليه وهناك مشكله كبيرة مع الكفرات العريضه مع الحجارة لذلك الكفرات الصخيفه الحجرية هي التي تعيش في المنطقه وتصبر على الحجارة كذلك العقاب وهو جمع عقبة اي طريق ترابي بين الجبال ومعروف هذا لدى الجميع جبال شاهقة ويفتح فيها طرق وهي وعره جدا ومرعبه وخطيرة والغلطه معناتها الموت المحقق وكم من راس من الرجال راح في هذه الطرق ولم يثبت ويصبر على المنطقه وعلى السواقين مثل جيوب تويوتا سواء ربع او شراع او فيبر قلاص او صوالين جي اكس والشاص عند اخواننا اهل تهامه ومن الطريف ذكره للفائدة مره من المرات زمان قبل ما يقارب 20 سنه كان معي جيب ربع مصندق تويوتا موديل 84 ونزلت انا وخويي للمقناص في تهامه من طريق عقبة في ديار ثقيف ترعه المهم وصلنا تهامه بعد تعب وعناء من الطريق وقساوة السيارة لان الربع زيك زي اللي راكب حمار قاسي بالحيل يوم قربنا من المنطقه المراد المقناص فيها بديت اشم ريحة بنزين في السيارة واشوف التانكي ينقص بشكل غير اعتيادي وقفت واخذت لفه على السيارة لقيت تنقيط على الارض من جهة الماكينه فتحت الكبوت لقيت الامر الجلل المرعب فعلا في منطقه منقطعه وين ووين تلاقي بيت او ناس ناهيك عن ورش او خدمات ومعنا سلاح ومشكله كبيرة وسيارتنا من يوديها للبلد اقصد الطائف وبيني وبين الطائف وديان وشعاب وجبال مشكله كبيرة المهم المنطقه فيها سوق عبارة عن محطه وقود صغيرة وغرفتين دكاكين تبيع بعض الحاجيات لاهل المنطقه والسوق هو يوم الاربعاء فقط وعشه وصندقه عبارة عن قهوة لمرتادي السوق وصلنا السوق ووقفنا في القهوة وكان العامل فيها سوداني شافنا اغراب عن المنطقه ويظهر علينا التعب والحيرة رحب بنا الرجال ولم يكن في القهوة غيرنا جاب براد الشاي وجلس معنا المهم سالته هل يجي للمنطقه عن طريق الساحل طبعا سيارات كبيرة سواء دينات او لواري كبيرة قال تجي بس نادرا وليش تسأل عن هذا قلت له ياخي سيارتي خربت ومحتار كيف اوصلها للبلد انا من اهل الطائف وسيارتي خربانه وخطر امشي بها كذا ممكن تولع في اي لحظه لان البنزين يصب صب على جنب المكينه طرنبة البنزين مكسورة كسر وليس تهريب او عطل ضحك السوداني وقال مشكلتك بسيطه قلت له كيف قال عندي طرنبة بنزين من الوكاله تعجبت من كلامه قلت له ايش تقول قال اقول لك طلبك موجود اخذني بيدي لغرفه صغيرة بجوار القهوة عباره عن محل بنشر ومستودع صغير فتح المستودع وذهلت حيث ان به رفوف من خشب نصها غبار واذا بقطع غيار جيوب تويوتا فقط لا غير من الى جميع ما تحتاجه الماكينه وانفرج عني الهم وانزاح وبشرت خويي قلت له ابشر بمركز عبداللطيف جميل في هذي المنطقه قلت له غير لي الطرنبه الان نزل تحت السيارة وفك مسمارين للطرنبه وجابه مشطوبه من وسطها وجاب الجديدة من الوكاله اصليه وركبها في خمس دقائق وهو تحت السيارة قال انت عندك مساعدات خلفيه مفضخه قلت له من الفرحه غيرها فكها وغيرها قال عندك جلود سست تعبانه قلت له غيرها غيرها بالاصليه من بلادها وعطيته حقه وحبيت خشمه من الفرحه رجعت سيارتنا جديدة وجاهزه للمغامره والمقناص وقلت في نفسي لو معي موتر غير تويوتا وش كان سويت لو معي نيسان او رنج روفر او اي سيارة اخرى دفع رباعي غير تيوتا كان قعدت بها ههههههههههه لذلك اخواني الكرام يجب على من يرغب في شراء سيارة دفع رباعي عليه ان يراعي امور مهمه جدا ولا يغفل عنها

1- هل السيارة متوفره بكثرة في المنطقه ؟ وهل لها قطع غيار متوفره ؟
2- عندنا مثل يقول اشتر كنك بايع ويقصد بهذا انك تشتري سيارة او اي شي يكون مرغوب في المنطقه من اجل لو اضطريت للبيع سلعتك تكون ماسكه سعرها
3- صرفية البنزين + حرارة الموتر + قوة وصلابة الموتر هذه امور مهمه خاصه في منطقتنا تعتبر مناطق حارة بمعنى السيارة اللي تسخن ابعد عنها وفر منها فرارك من الاسد لان عمرها قصير وخرابها كثير

انا هنا لا اروج لتويوتا لا والله ولكن بكل صدق اثبت وجوده بقوة الجيب التويوتا والدليل الى الان هناك جيوب تويوتا من موديل 80 الى الان تعمل وشغاله زي الحلاوة شرط تركبه من السعوديه الى لندن ما تخاف انك تتعطل كان عندي سيارة ايام النشاط وحب المقناص اليوم انا شايب يالله حسن الختام ما عاد اقدر على البر والمقناص يادوب حول البيت داخل البلد فقط لاغير المهم كان عندي موتر جيب جي اكس موديل 97 شريته بسعر 89 الف ريال شبه جديد ماشي الفين كيلو فقط لا غير وكديته ست سنوات بدون اي مشاكل اغير زيت وكفرات واعبي بنزين فقط لا غير عمره ما دخل ورشه اللهم الا اغير بواجي فقط او فلاتر وبعد ست سنوات بعته بسعر 95 الف ريال قسم بالله يا اخوان ثم شريت جيب تويوتا فيبر قلاص موديل 2003 كديته ثمانية سنوات ولم يدخل ورشه قط من فضل الله زي اخوه بس غيار زيت وكفرات وفلاتر فقط لا غير كلفني مشتراه سعر 100 الف ريال وبعته بسعر 100 الف ريال قسم بالله يا رجال طبعا شريت سيارات كثيرة سواء جموس او سيارات صغيره اشري بسعر مثلا 100 الف ابيع بعد كم سنه بنص القيمه وهنا نلاحظ ميزة الجيوب خاصه تويوتا المواتر هذي تفتقد للرفاهيه والراحه ولكن هذه ضريبة محبي المقناص والمناطق الوعرة ولا تجتمع ابدا رفاهيه وراحه مع وعورة منطقه ابدا

عموما انا الان زي اللي ماتت ام عياله بدون جيب وابي استشيركم وش اشتري طبعا ما عاد فيها مقانيص ولا هم يحزنون ان خرجت للبر ممكن السيارة الصغيرة توصل للمنطقه المطلوبه اقصد الارض سهله لا رمال ولا حجار بس في طرف البلد نخرج للبر ونشب النار ونعيش مع الذكريات وابي بعد هذا العمر اجعص ابي سيارة جعصه شخصيه رفاهيه للبلد وللبر ابي تكنولوجيا من نفقيشن وانت طالع وامامي كثير من السيارات ابي شوركم لا هنتم

اكسبلورار او تويوتا برادو او نيسان اكستيرا او اكاديا او ايدج او مورانو او مدري والله كثرت السيارات ذات الدفع الرباعي المدلعه ولا ادري وش اخذ الفلوس ما تهمني يهمني الراحه والجعصه والتكنلوجيا وشرط اساسي موتر للبلد والسفر والبر بدون خراب او مشاكل مع العلم انني رجل محافظ على السيارات لا افحط ولا اطعس ولا اسابق ولا غيره ولا احب اسمع في سيارتي اي قرقعه حتى لو بسيطه حريص حريص حريص بالحيل

شورو علي لا هنتم

[جيب 2008]

جزاكم الله خير جميع على هذه الردود المفيدة عن الدفع الرباعي

[mhammed]

اخواني الاعزاء
السلام عليكم ورحمة الله وبركاته

ارجو منكم الافادة اعزائي . عندي مشكلة في سيارة اكسبلورر 2004 صوت طقطقه تزود مع السرعه كشفت عليها فكوا سير المكينه و مازال الصوت موجود قالو ان الصوت داخل المكينة ممكن يكون جنزير او حاجة ثانية مع العلم ان السيارة واقفه لها سنه تقريبا وزيتها ممتاز قبل التشغيل بعد الوقفه و بعد ما مشيت عليها بعد يومين تقريبا صار فيه تهريب زيت في الجهة اليمنى من المكينة وع العلم ايضا ان حرارة السيارة طبيعيه تحت النصف
اتمنى افادتي عن المشكلة او ورشه متخصصة في سيارات فورد اكسبلورر

وهل تغييره في غير الوكالة ممكن

وجزاكم الله خيرا

[أبو نشوان]

السلام عليكم ورحمة الله
الله يمسسكم بالخير انا الآن تعرفت على هذا الموقع الرائع وأنا من عشاق الرنج روفر وخاصة القديم
معي رنج موديل 98 من حوالي عشر سنين وقيلة رنج 90 وقبلة لاند روفر الصندوق مع الوالد من عام
1390ه.
الي يجرب ركوب الرنج روفر ساخي صعب يركب سيارة ثانية مريحة وقوية وترة ماهو صحيح ان صيانتها متعبة
بس الوكيل السيف الله يسامحك هو الى عقد الموضوع لكن والله انها سهلة واكثر من مره اصلحة بنفسي في البر ودق سلف وامشي
حبيت أشارك معكم يالوجيه الطيبة
والي يحب ياسىال عن أي شئ بالرنج للموديلات القديمة تراني جاهز بالي أعرفة
الله يوفقكم

[ابوفاااايز]

اخواني ويش رايكم في البليزر القديم موديل 1984م..
من قد جرب هذا النوع من الدفع الرباعي...

[ابو بدر 110]

السلام عليكم ورحمة الله وبركاته
يسعدني ويشرفني بالانضمام لرابطة ملاك الدفع الرباعي من جميع السيارات .واشكر الاخ سعد الاحمد لاهتمامه بمثل هذي المواضيع .واسأل الله العلي القدير ان يكون هذا الاجتماع على خير وان يكون فيه منفعه ومصلحه للجميع .
انا عندي شفرولية تريل بليزر 2007 ولله الحمد ماشية معي تمام والحمد لله .
لكن عندي مشكلة في الغالب تجي .
وهي ان الدبل احيانا يشبك من حاله تلقائياً .
اول مره ولعة لمبة الدبل الخفيف H4 . وزر الدبل على H2 وقمت بتحريك الزر للدبل الخفيف ثم رجعته على وضعه الاساسي H2.
والمره الثانيه شبك معي لحتى الدبل الثقيل .وقمت بنفس الطريقة حركة زر الدبل لحتى البدل الثقيل ثم ارجعته للوضعه الاساسي . طبعاً في جميع الحالات اذا حركة الزر ورجعته يفصل الدبل ويرجع طبيعي .
طبعاً حصلتي معي اربع مرات .
وديتها لمكانيكي وفك الدقمه وشغلات قدام عند الكفر الايمن ولكن طلعت سليمه .
ارجو افادتي ولكم جزيل الشكر .

[المصور مروان]

أنا املك كيا سورينتو موديل 2013 نصف فل حجم المكينة 3500 سي سي القوة 274 حصان تقريبا الدبل اوتو . سيارة رائعة وعزمها قوي وهي من فئة أوفر كروس . في الرمل ما شاء الله يمشي لكن يفضل أنك تنسم الكفرات لكن لا توقف في منطقة رباضه أذا غرز ما يطلع من نفسه

[طالب شايب]

أخوي harth_10
أنت المفروض ما تسأل عن السيارة التي تبيها .
ما شاء الله عندك تجارب ومغامرات مع التويوتا
.. بالنسبة للسيارة انت ما بيصلح لك ولا بيوالفك الا التويوتا .. اذا تقدر خذلك لاندكروزر .. واذا ما تقدر فالبرادو ازين .. ولا اذا تبي موتر خفيف خذلك فورتشنر .. والله يطول بعمرك .. ويعينك على طاعته
والسلام عليكم

[طالب شايب]

يا شباب الفزعة تكفون ابي لي موتر ومحتار بين الهايلكس الدبل والربع والاكستيرا
طبعا انا ساكن في الجنوب وفي النماص بالتحديد ابي موتر يرقا الجبال والعقبات
ويشيل العزبة والاخويا .. فوش رايكم انا اللي رادني عن الهايلكس الدبل عزمها ما ادري كيف يمشي في الجبال ولا لا .. افيدوني وجزاكم الله خير

[nayf01]

معقوله ماشاركو معكم حقين يسوزو

انا جرب جيب يسوزو 82 4سرندل
وصله وحده في البر والبلد وصرف المحروقات صفر
لكن في الخط 120 فقط وعند التغريز ضعيف جدا

ثم جربت ونيت تيربو 4 سرندل اخذته من الوكاله ومشى معي 12 سنه ماوقف في الورشة ومشيه 400الف كيلو الا مرتان لتبديل صوفة المكينه

وهي على يدي ولاركبت اقصد منها
وعندي لند كروزر 2008 تعطل فيه القير مره والان حساس ادبل مره تولع المبه ومره تطفي

[nalghilan]

ممكن استفسارات !!!

1- ليه ما فيه رحلات برية زي ما هو موجود في بعض الدول القريبة منا؟
2- عندنا شباب وطاقات وخبرات , هل هي طاقات مهدرة ؟
3- الفن في التجهيزات والامكانيات عندنا بالخليج جدا كبيرة , لماذا نستوردها من الخارج ؟

في انتظار تعليقاتكم اهل المرجلة والطيب