السلام عليكم ورحمة الله وبركاته
إخواني أعضاء منتديات مكشات
مريت بتجربة متعلقة بمكيف سيارتي اليوكون 2001 وحبيت أشارككم المشكلة و الحل
قبل يومين كنت في سفر وما كنت مشغل المكيف لإعتدال الجو لكني لاحظت إني بمجرد ما أحاول أنزل الزجاج أو أرفعه أو أكبس للسيارة اللي قدامي بالنور العالي تشتغل لمبات الطبلون كلها وترجع تطفى والسيارة يطيح عزمها للحظة ويرجع وتوقعت إن عندي مشكلة في الدينمو لكن المشكلة الأكبر إني ماسك خط ومافيه مهندسين حولي وباقي عالمغرب ساعة تقريباً وباقي عالطائف 120 كم
يسرها الله سبحانه ومشت الأمور تمام طبعاً بدون ما أستخدم أي كهرباء ولا أنوار ووصلت الطائف وبعد ما توجهت لأقرب كهربائي افادني بأن الدينمو يحتاج تغيير وبعد مفاوضات وشد وجذب بخصوص السعر ( قيمته 750 ريال ) والضمان طلب مني الكهربائي تجربة دينمو موجود عنده للتأكد من المشكلة وبعد تجربة الدينمو استمرت المشكلة واعتذر الكهربائي عن تشخيصه الأول ونصحني بالتوجه لورشة لفحص السيارة بالكمبيوتر
وعند توجههي للورشة وقبل ما يبدأ الميكانيكي فحص السيارة لاحظ إن إصبع البطارية الموجب محلول وماهو مشدود زين وبعد ما شده قال لي جرب السيارة والأنوار والحمدلله كان الخلل كله محصور في إصبع البطارية
كملت طريقي بعدها باتجاه جدة وطبعاً الجو حار واحتجت المكيف ويوم شغلت المكيف لاحظت إن الهواء اللي يجيني هواء حااااار جداً علماً إن المكيف ماشاء الله كان بحالة ممتازة من أول واللي لاحظته إن فتحة إدخال الهواء الخارجي ما تقفل مهما حاولت أقفلها
ومريت على كهربائي بعد مكة وبعد ما فحص المكيف قال لي المكيف ممتاز ومليان فريون وتبريده ممتاز بس عندك مشكلة في وصول الهواء البارد للكابينة ولذلك بافصل لك خراطيش السخان عشان يوصل لك الهواء البارد ورفضت هذا الحل رغم عدم حاجتي للسخان بس كلامه ما كان مقنع بخصوص الحل
وصلت بحمدالله لجدة ( بعد ما انطبخت في السيارة ) ودخلت على الانترنت وبحثت عن المشكلة وبعد عناء في البحث و القراءة وجدت ضمن أحد ردود الأخوان إن حل المشكلة يكمن في فصل إصبع البطارية الموجب وإعادة توصيله بعد فترة 15 دقيقة لأن هذي مشكلة في برمجة المكيف
فعلاً جربت الحل هذا وتفاجأت بنجاحه ولله الحمد و المنة
الخلاصة .... لا تأخذ بكلام أول كهربائي أو ميكانيكي تروح له وابحث عن حلول في الانترنت وراح تلاقي بإذن الله ولذلك طرحت المشكلة و الحل لعل غيري من الإخوان يستفيد ويوفر جهده وماله
15 نوفمبر 2015 - 16:514 نوفمبر 2015 - 21:27
 |
رد مع اقتباس
