أفيدوني في هذه العلبة الحمراء (صورة )

[يازين البر]

بسم الله الرحمن الرحيم

قبل اسبوع كنت طالع من الطائف على طريق الرياض السريع ووقفت أعبي بنزين

وأعطاني عامل المحطة علبة حمراء وقال هذا تصبه في تانكي البنزين ينضف البخاخات وسعره 15 ريال (وأنا إذا جا الشتا أو رحت لمناطق باردة يبدا موتري يقطع وبعض المرات يرمي إذا كنت أمشي 120 مثلا ورفعت رجلي عن البنزين ) موتري باترول فتك 2002 وقالوا لي البخاخات يمكن فيها وصخ

أنا أخذته منه بس ما سويت فيه شي قلت أبستشيركم أول أكيد بتجيبون العلم

وهذي صورته



هل فعلا ينضف وإلا خرابيط وغش تجاري ويأثر على السيارة

أرجو منكم الفائدة

[a-s-i3]

والله وانا أخوك جربته في السيارة ومشيت عليها 116 كلم ورجعت حسيت ان الموتر أحسن شوي في عزمه من اول

[أبو لينا]

إذا بغيت تجربة غير صفاي البنزين اول لأنة اذا كان في الصفاي تراب تراة بينتقل للبخاخات ويخربهن عليك لأن المادة الي انت تتحط عبارة عن مادة زيتية وتسهل عبور اي مادة موجودة بالصفاي

[NEWASSER]

السلام عليكم
حيا الرجال
وصحيح هي منظف لمواصير البنزين والبخاخ وفي بعض الوكالات تحطه كل خمسين الف كيلو تضيف العلبه على نص التانكي وتمشي به مشوار وبتلقي فرق ان شاء الله
بس العلبه هذي اظنها تجاريه روح لمحل قطع غيار او اي وكاله وخذ الاصليه
وبالتوفيق ان شاء الله

[هارون97]

انا جربت ولكن خسارة حولي 1000ريال لا لا تقربة خربت قسمات التوانكي

[ابوراس الدحمي]

والله ياخوي انا احاول اتجنب وضع مثل هذه المواد لان لوفيه مشكلة رح تكون في الصفايات مثل ما قال اخونا الغالي ابو لينا او البخاخات او الطربمة خاص للسيارات
القديمة (وجهة نظر تؤخذ وترد)
لكن ان كان ولابد فتأكد على الاقل انه حاط للك علبة جديدة لما يفتحها تسمع كسرة الغطا (غطا مختوم )
وياليت كنت اقدر اساعدك بطريقة افضل
تحياتي

[جيب شراع]

الله يهديك بس
انحشششش هاذي دمار للبخاخات
وتسبب عطل ومشاكل للمكينة

[سكب]

اخي الحبيب
واحد حط لجيب شروكي والله يخلف لالالالالالالالالالالالالالالالالالالا تحط
تحياتي

[satam1389]

تبي نصيحتي نصيحة مجرب
والله جربتها وراح فيها الموتر والسبب محطة التسهيلات قام العامل يزن علي تراها زينه وصدقته وقامت السيارة تقطع
هذه تجربتي وربما غيري جرب ونفعت معه
تحياتي

[abo-lma]

انحشــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــ



أرمهــــــــــــــــــــــــــــــــــــــــــــــ ـــا على طول يدك

دمار شامل للسيارة

[غربي هواوي]

مالك ومال عوار الراس

[ابولولو]

اولا القيمه تقريبا 8ريال عند الي يبعون الزيوت وفيه اصلي وتجاري وفيه للبخاخات وفيه للكلبلتر ومثل ماقالو الاخوان الاعزاء كلام فاضي وخساره تبي تنظف الباخخات فكهن علي اوصول عند فني فاهم واخسر شوي وتاخذ شغل صح هذي نصيحه لوجه الله

[جيبي جايزلي]

سمعت من كذا مكنيكي يقول الماده هاذي تخرب اصلح الكلبليتر والله اعلم

[سوبر VTC]

دام موترك مابه الا العافيه

لا تخرب المكينه و تفتح باب مسكر

اليوم ماتدري وش الاصلي من التجاري

و بعدين صح انه تنظف المواصير و البخاخات

لكنه تسبب سدد للبخاخات و يبدا الموتر يقطع

لو كان موترك تقول انه مهب صافي ممكن انك تحطه

موفق و رحله سعيده ترجع بالسلامه

[محمدالمحيسن]

نصيحه لاتفرغه بالتانكي

يبي يصفى يومين ويرجع اخس من اول

ابحث عن المشكله لو تكلفك شوي افضل

وجهة نظر وكلك نظر