استفسارات الطرق البرية

[جمران]

بسم الله الرحمن الرحيم
السلام عليكم عليكم ورحمة الله وبركاته
نظرا لكثرت الاستفسارت عن الطرق والدروب مؤخرا وتشتتها بين الخيام رأينا من الافضل حصرها
في موضوع واحد مما يسهل على الجميع الرجوع اليها وجعلها مرجعا لمن اراد الاستفادة
والسؤال عنها
فنامل من الجميع التكرم بطرح مالديهم من استفسارات عن الطرق البرية هنا
مع التكرم ايضا بعدم فتح اي موضوع جانبي يتعلق بالاستفسار عنها
وسيقوم المشرفون بنقل جميع الاستفسارت هنا
وفق الله الجميع

[فتى شنه]

يالربع ابي اقرب خط وافضل من ناحيه محطات البنزين والخدمات والمسافه


لان باطلع عرعر ولا ادري وش احسن خط


انتظركم

[مسافر1]

هلا بك أخي الكريم ..
لكن موقعك اين ؟
حتى نستطيع وصف أفضل الطرق ..

[فتى شنه]

موقعي الرياض يالذيب

[الفررخ]

هلا وغلا اخووي فتى اطلع من الرياااض الي الحفر ومن الحفر لعرعر اتوقع افضل شئ


ووتقبل وودي ..........

[مسافر1]

طريق الرياض القصيم السريع
ومن ثم الدخول مع المجمعة وسلوك طريق الحفر ومن عند مفرق البطيحانية يسار قبل الحفر بـ 110كم تتجه إلى رفحاء بعد ذلك إلى عرعر ..
وهذا أقرب
أو الاتجاه مباشرة إلى الحفر يعد ذلك طريق رفحاء ومن ثم عرعر ..
بالتوفيق ..

[فتى شنه]

بيض الله وجيهكم بس كم المسافه تقريبا

[الشاعرالاطرم]

وعليكم السلام ورحمه الله وبركاته


المسافة من الرياض الى عرعر 1100 كم
والطريق من الرياض الى المجمعة ومن ثم طريق حفرالباطن سيدين وفيه مفرق من البطيحانية يسار الى لينه رفحا سيد واحد ومن رفحا الى عرعر سيدين يزود عن الخط الاخر 80 كيلو تقريبا

والخط الثاني من المجمعة الى الحفر ومن الحفر الى رفحاء ومن ثم عرعر وهذا الخط من الرياض الى عرعر سيدين فيه بعض التحويلات بين الحفر ورفحاء والمحطات واجدوتمر على قرى وهجر كثيرة

ونتمنى لك السلامه

[الراسي231]

السلام عليكم
ترى ما فيه فرق بين المسافات
المسافة واحدة تقريبا
بين انك تروح مع البطيحانية او تروح مع الحفر
انا ماشي كل الطريقين اكثر من مرة
والمارية
اذا لفيت مع طريق البطيحانية تجيك لوحة رفحاء 356
واذا طولت الى الحفر يبقى على الحفر 90 واذا توجهت الى رفحاء يبقى 280
فيكون مجموع 90+280= 370
فيكون الفرق بين الطريقين 14 كيلو
فما فيه فرق واجد
وتوصل بالسلامة

[المعاون]

السلام عليكم
ارجو الافاده اذاكان يوجد طريق
بري واضح بين بريده و الزلفي
ولا اقصد عن طريق خط الرياض
المدينه ...... ولكم جزيل الشكر

[الكايف 1]

وعليكم السلام ورحمة الله وبركاته :
الاخ العزيز /// المعاون
هل انت تبحث عن أختصار للمسافه أو اي طريق ترابي ولو كانت مسافته بعيده وهوشاق تقريباً .

[نشوان التميمي]

السلام عليكم ورحمة الله وبركاته
اعزائي ادارة واعضاء هذا الموقع الرائع
الذي يجمع اهل الطيب والكرم والنخوة والعلوم الغانمة

سمعت انه يوجد طريق مختصر الى محافظة الخفجي
من احد مخارج طريق الرياض القصيم السريع
واظنه من مخرج الحسي ؟
فمن يتفضل علينا ويخبرنا عن هالطريق ؟
وعن مساره؟
وعن الديار التي يمرها ؟
وعن المسافة من مخرج الحسي الى محافظة الخفجي ؟

وجزاكم الله خير ووفقنا الله وياكم للخير .

[راعي نوق]

حياك الله يالتميمي

الطريق اللي تسال عنه ليس هو طريق الرياض و القصيم

وإليك وصف طريق الخفجي من الرياض

@ أطلع من الرياض متجهه لرماح وبعد رماح أتجه لشوية وبعد شويه أتجه للرفيعة وبعد الرفيعة أتجه للصداوي وبعد الصداوي أتجه للخفجي

المسافة بين الرياض والخفجي مع الطريق المذكور أعلاه في حدود 450 كم تقريباً تزيد أو تنقص حاجة بسيطة

ولك أطيب الأمنيات

[وثاب]

وانت على طريق الرياض القصيم وانت بأتجاه الرياض عقب محطة العتش يبي يجيك كبري ولوحه مكتوب الصمان خذ معها يسار واستمر الين ما تاصل مخيمات الثمامه يبي يجيك ملف يسار روضة التنهات رح معه تمشي لك مسافه الين ما يجيك دوار يمين رماح والرمحيه رح يمين مع الدوار الين ما تاصل رماح وبعد رماح أتجه لشوية وبعد شويه أتجه للرفيعة وبعد الرفيعة أتجه للصداوي وبعد الصداوي أتجه للخفجي

[الطرقي -1-]

صبحت بالخير يالي تنشد العلم الوكاد ولا قصور بالي ردو الخط من الرياض الى رماح الى الرمحيه الى الرفيعه الى قريه العليا تقطعه وانت رايح بوجهك الى ان يقطعك خط النعريه و حفرالباطن فيه محطه اقبالك وفيه خط اقبالك بجنب المحطه اقطع الخط ومش بالخط الي قبالك الى ان يقطك على خط القاعده السفانيه خذ يمين الى ان يقابلك الخط السريع الخفجي الكويت و ابوحدريه خذ يسار الى الخفجي تجيك الخفجي على اليمين مهي بعيده وهذا اقرب خط من الرياض وان كانك تبيه من خط الرياض القصيم معى العتش كنك تبي الرفيعه وتاصل بالسلامه