بالنسبه للمحافظه على التنده من المخوش والتخفيس
مثل ماقالوا لك الاخوان اشتر لك الكيس اللي ينحط فوق السله ولكن
عندي لك فكره ... وهي تحط بأرضية الكيس قطعة بلاكاشه ( خشبه )
يكون سمكها 1 سم ... وبإذن الله راح تحفظ لك التنده من الخفس
لأن الكيس يبي يحفظ لك التنده من المخوش وماهب حافظها لك من الخفوس
والحل الثاني بدل السله الخلفيه
اشتر لك عربيه صغيره ( قلص ) تركبها على هوك الموتر واسعارهن بالرياض حلوه ومناسبه
ومن مميزات العربيه او القلص :
مايثقل على الشاص حق السياره ولا على الياي ولا على المساعدات مثل السله الخلفيه
ولا تحرمك العربيه من الباب الخلفي حق السياره ولا تحرمك من استخدام الاستبنه
عند الحاجه لاسمح الله ... والعربيه فكها سهل جدا وماياخذ معك وقت
وتربطها بأي عمود عند السكن اللي تسكن فيه .
هذا الكلام من واقع تجربه لي ارتحت كثيرا مع العربيه والحمد لله على كل حال
والله يسهل دربك وتروح وترجع بالسلامه واهم شي لا تسرع