رحلة من الدمام إلى تبوك لأول مرة ومعنا عائلة , أحتاج مشورتكم ياأحبة

[هاوي geed]

السلام عليكم ورحمة الله

أيها الأحباب أتمنى أنكم بخير ..
ناوين نسافر من الدمام إلى تبوك , صلة رحم وتمشية ..
خصوصا ان الاجواء هناك في الليل جميلة ..
ولكن لم يسبق لنا السفر إلى تبوك ..
وأيضاً معنا عائلة وتعلمون أنه يختلف عن الرحلة الشبابية ..
في الرحلة الشبابية يمديك تغامر أو أحيان تجازف ..
ولكن الرحلة العائلية لا , فيها احتياطات كبيرة وكثيرة جداً ..

المطلوب ياأعزتي أبي أأمن الطرق للسفر من الدمام إلى تبوك ..
بدون لفات وبدون مقطعة ولا شوارع مسارين ولا شوارع بعارين
الزبدة الدلال يبيلها انتباه واحتياط قدر الإمكان ..
والتوكل على الله وحده ..
ونفعل السبب باستشارتكم ..

تحياتي لكم أعزائي

ـــــــــــــ
أشكر اخوي اللي اعطاني هاليوزر عشان استشيركم , لأن تسجيلكم مغلق ..

[ابوعمرالفاروق]

عليكم السلام ورحمة الله وبركاته:
أفضل طريق وفي نفس الوقت هو الأقصر 0
الدمام- ابوحدرية- النعيرية -حفرالبا طن -رفحاء-عرعر-سكاكا-دومة الجندل-ابوعجرم-ميقوع-فجر-مثلث تبوك المدينة(تاخذيمين لتبوك) الطريق حوالي 1650كم تقريبا وقد ينقص في حدود 40-50كم
مصحوبين بالسلامة والطريق أغلبه مزدوج وفيه بعض الأعمال التي تجعلك تسير في مسار واحد
وهناك طرق أخرى

[طلعة التمياط]

اهلا وسهلا فيك الطريق ياطويل العمر من الدمام على حفر الباطن وعلى رفحاء وهجرتى الحبيبة طلعة التمياط ومانسامحك اذا مريت وما جيتنا تريح وتقهوى الله محييك باى وقت وبعدها على عرعر وعلى الجوف ومن الجوف على تبوك هذا الطريق الامن وفيه تواجد لامن الطرق على طول هذا الطريق وللمعلومية من رفحاء وحتى الجوف مسافة مايقارب 450كم الطريق مزدوج سايدين وعلى كذا يطلع لك طول الطريق من الدمام وحتى تبوك تقريبا 1700 كم وتاصل بالسلامة ان شاء الله موفق

[ابوعمرالفاروق]

يوجد طريق من سكاكا عن طريق صوامع الغلال لدومة الجندل وهو طريق زراعي بالأصل ولكنه مزدوج في الغالب يوفر تقريبا 18 كم ويبدأ من غرب سكاكا ويسمى بطريق الصوامع والقنيطرة

[هاوي geed]

اخي ابوعمر الفاروق الله يبارك فيه وطلعة التمياط الله يوفقه وقناص الهملة الله يسدده
حياكم الله وأشكر لكم مشاركتكم ..
اخوي طلعة التمياط الله لايهينك والله نتشرف بالرياجيل امثالك ولكن والله تعرف لاانمسك الخط ماودك الاتوصل
جعلك تسلم ياالطيب ..

بالنسبة للطرق اللي قلتوها ماأعرف فيها شي والله وكل المدن اللي ذكرتوها ماقد جيتها ..
من النعيرية فما فوق ..

فيه شين سهل قد سمعت فيه مدري وشاريكم فيه لاهنتوا :

دمام - رياض - القصيم - حايل - تبوك

؟

[سلطان الأحساء]

اخي ابوعمر الفاروق الله يبارك فيه وطلعة التمياط الله يوفقه وقناص الهملة الله يسدده
حياكم الله وأشكر لكم مشاركتكم ..
اخوي طلعة التمياط الله لايهينك والله نتشرف بالرياجيل امثالك ولكن والله تعرف لاانمسك الخط ماودك الاتوصل
جعلك تسلم ياالطيب ..

بالنسبة للطرق اللي قلتوها ماأعرف فيها شي والله وكل المدن اللي ذكرتوها ماقد جيتها ..
من النعيرية فما فوق ..

فيه شين سهل قد سمعت فيه مدري وشاريكم فيه لاهنتوا :

دمام - رياض - القصيم - حايل - تبوك

؟

انا مشيته حوالي 3 مرات والطريق طيب جدا

على علمي قبل تقريبا 8 شهور المشكله من حايل الى مفرق تبوك تقريبا مسافة 450كم الى 500 كم خط واحد وابراج الجوال ضعيفه شوي
لا جيت حايل لازم عبي تانكي البنزين فل الفل اتوقع المحطات قليله جدا جدا

وبالتوفيق

[basel2222]

السلام عليكم
اخى الكريم نصيحة ابتعد عن طريق الشمال الطريق زحمة والطريق فية تحويلات وربما تلف
المهم افضل طريق ودائما امسكة

الدمام - الرياض - القصيم - حائل سريع يعنى الطريق من الدمام الى حائل الطريق سريع سيدين في كل سيد ثلاث حارات
الطريق من حائل الى لفة الجهراء جهراء الشمال ماهى جهراء الكويت سيد واحد وسيع ياخد 4 سيارات بالراحة مافية زحمة والمحطات متوفره
تطلع من حائل على طريق المدينة ثم تاخذ طريق موقق وتبتل سيده تجيك عده بلدات ومن اشهراها الشملى
المسافة من حائل الى تبوك حوالى 700 كلم والطريق ممتاز من كبري الجهراء الى تبوك الطريق جديد سيدين
واى سؤال انا في الخدمة
من سكان الخبر واعمل في تبوك

[اتحرى الخير]

توصل بالسلامه ان شاء الله
بس الطريق اللي من الحفر لرفحاء اوله ماهو زين ..وفيه بعارين تقطع الخط بعض الاحيان ,, وطريق ممل وتزهق منه ,,<<من كثر ما جيته
خذ الطريق الونس ,,
( الدمام ,, الرياض , بريدة , حائل وبعدها تروح يسار كنك رايح للعلا ,, تمر بالشملي ياما توصل لكبري الجهراء ,, بعدها تاخذ يمين تمشي مسافه تجيك تيماء وبعدها تمشي مسافه تجيك القليبه يجيك مفرق الجوف يمين اتركه وابتل سيدا
لتبوك وتوصل بالسلامه ,,
نصيحه يالاخو المسافه طويله وماهي هينه ووراك عايله ,, فلا ترهق نفسك يمديك توصل لحايل وتريح لك يوم واليوم الثاني تمشي لتبوك وشيك على السياره وحافظك الرحمن ..هذي نصيحه

[fahd999]

اولا تروح وترجع بالسلامة
الإخوان ما قصروا وبأعطيك رأيي:
لا تذهب مع خطوط كأنه مزفلته لك لحالك اعظم خطر
خلك مع الناس والخطوط السريعة المعروفة والآمنة والخدمات متوفرة
الدمام - الرياض= 450 كم تقريبا
الرياض - القصيم = 350كم تقريبا
القصيم - المدينة = 500كم تقريبا
المدينة - تبوك = 700 كم تقريبا لم اذهب معه ولكن اول لوحة وانت طالع من المدينة لتبوك تقول 700كم ولا ادري عن ازدواجية الخط او الخدمات
الإجمالي تقريبا 2000كم

[غرة سهيل]

ان شاء الله ترافكم السلامه

اخوي طريق القصيم زين واخذ قسط من الراحه بحائل تمام الطريق كله سيدين

الا اللهم بين موقق وكبري الجهراء سيد واحد والمشي به بالنهار اهيئ والطريق مكتف

[adel090]

وجه لحائل طريق سريع مثل ما قالوا الاخوان بعده انت بخيار من خيارين

طريق موقق الشملي تبوك أو طريق الجوف دومة الجندل ثم تفرق يسار لتبوك

الطريقين تقريبا نفس المسافة

وأنصحك تريح بمدينة حائل

وتأصل بالسلامه

[الجنيدى2010]

بالتوفييييييييييييييييييييييييق

[abojamsh]

تروحون وترجعون بالسلامه

[محترف عالمي]

موضوع مفيد جدا.
وبهواي اروح يم الدمام

[رحال ملهم]

هذا الطريق الافضل للعائلة
الدمام - الرياض - القصيم - حايل الى هنا ماعليك خلاف الطرق مزدوجه وبها محطات

عندما تدخل حايل تجيك لوحة تبوك يسار اطلع وواصل طريقك
بعدها راح يجيك الخط واحد فقط لين تاصل كبري المثلث يمين تبوك سيدة العلا يسار المدينه
عب بنزين من مفرق المثلث وواصل مسيرك لين تيماء وبعد واصل تبوك حدود 300 كيلو


وتاصل بالسلامه