البدوي .... مسكن وسط الخط

[خشم الحصان]

الاخوه الغالين
السلام عليكم
بعض من الكشاته الله يهديهم اذا طلعو الي البر وخاصه في الليل وبذات في النفود او الدهناء تلقاهم مابين الارض والسماء جلدي بهالموتر تقول شايفين هلال العيد يبون يعلمون الناس وياخذون البشت ويالخمس ميه اللهم يكافي ولا في سباق رالي للسيارات مغير تقول الموتر صابونة مسك في بانيوم اذا طاحت من يدك وانت تفرك روحك
والمشكله انه مايشوف الا قد مقدار نور سيارته وشوي ولا الدرب منتهي في مراح الحلال ومجفلهم او ناحر بيت الشعر ثم خذ لعلعه وصياح ورا هالبدوي نازل في وسط الخط ضاقت به الدنياء مالقاء الا الخط ينزل فيه لاياخيي البدوي مانزل في وسط الخط لانه مع كثر روحاته وجياته صار خطه مطروق وانت يالحبيب تحسبه خط (ام رجوم النقيان) غاديه عويناتك تقول عداد بنزين مره يم الخط ومره يم الجهاز (القرمن ) خايف لا تضيع وناسي ان رجيلتك علي البنزين ولا تهدي والليل علي مايقلون اعمي يعني ارفق ياخيي وسق بركاده حتي لا تصدم بيت الشعر او البعارين ولا تدوش الصخال والغنم
ثم بدال ماتروح تكشت تروح في خريطها . مانيب اقول الركاده زينه حتي في النهار
اخوكم
خشم الحصان

[سنتافي]

السلام عليكم ورحمة الله وبركاته



معليش آسف انا عارف ان موضوعك جاد بس كل ما اتخيل المواقف اتقلب من الضحك ودك عاد وانت تزبط القهوه الا وواحد قاشع لك الخيمه من وراك والله ازمه من جد الظاهر انه فكرة نقاط تفتيش فوق النفود مفيده . (عشان كل ما ذا الا وهم مغيرين طقم عساكر جدد) عاد همك البعارين يعني الموتر يخرب موهب مشكله اهم شي البعير لايجيه شي

عويناتك تقول عداد بنزين مره يم الخط ومره يم الجهاز (القرمن ) خايف لا تضيع وناسي ان رجيلتك علي البنزين

وانت الصادق امبير ضغط المكينه

اكرر اعتذاري مره اخرى لك اخوي خشم الحصان

[خشم الحصان]

الاخ الغالي
سنتافي
السلام عليكم
مشكور يالغالي علي مرورك والمشاركه بس هذا الوقع الي يحصل وانا الي جبرني علي كتابة هالموضوع انه حصلت مع واحد وانا معه العام يعني من شدة سرعته كن الشجر عيون قطط نمرها بسرعه ولا ردنا الا هاك البعارين بس الله الي ستر كان بينهم مسافه وستر الله وعذرك مقبول يابعدهم
اخوك
خشم الحصان
الا مير ابنشدك هالي كنهن مسحات مرسدس وشو ذالي يتقلبون

[بركان]

اخوي خشم الحصان
والله ان كلا مك صحيح
بس ما كل يدرك ان هذا الخط هو من صنع هذا البدوي وبالتالي هو ملكه خاصة عندما يقترب من مرابعه.

يا اخوي عيب هالخطوط انها توهق اذا ضاع الواحد .
مره كنا في الحجره حول حفر الباطن ويا هي ارض قشرا ضعنا ونبي نطلع لم الاسفلت وندور خط سيارات بين الحجر الحاد ثم نطيح على قولتك بخط سيارات شوي الا منتهي بحوش غنم ومسكة فرامل على كيف كيفك يجفل منها البدوي قبل غنمه وبعارينه. ثم نعيد الكره مرة اخرى عاكسين خط البدوي بس المشكله ان اتجاه الخط عكس اتجاهنا.

تحياتي.

[خشم الحصان]

الاخ الغالي والحبيب
بركان
السلام عليكم
حياك الله يابعدهم ياخيي هذا من كثر ماطالعون في الجهاز وتاركين الحبيب يحط رجله .
انا من يوم شفتك علي البحر وهاك الوزره (الوزار) ونازل بجهازك تبي تعرف منسوب البحر وانا قايل هالرجال مهوب هين
يبي يجيب العيد يوم من الايام والحمد لله انك ماثرت وبركنتها علي خويك يالغالي الخطوط ياخيي ماتوهق الي يوهق كيس الحب و زمزميت الشاهي وزود عليهم الهجيني
مشكور ياحبيب علي مرورك الله يغفرلك وعلي المشاركه الله يرفع قدرك
اخوك
خشم الحصان
اجل فرامل( نطيح على قولتك بخط سيارات شوي الا منتهي بحوش غنم ومسكة فرامل على كيف كيفك يجفل منها البدوي قبل غنمه وبعارينه.)
اجل الغنم صارت بيض من االروعه.................ياروعه انت

[سنتافي]

السلام عليكم ورحمة الله وبركاته

الا مير ابنشدك هالي كنهن مسحات مرسدس وشو ذالي يتقلبون

هذي ابتسامات تبطحت من كثر الضحك

انا من يوم شفتك علي البحر وهاك الوزره (الوزار) ونازل بجهازك تبي تعرف منسوب البحر وانا قايل هالرجال مهوب هين

عاد اخوي من جد البدوي يزعل لا مشيت في ممشاه ياخوي لو انا مازعلت هذي اجر مثل اجر اماطت الاذى عن الطريق اذا منب غلطان بس على قولتك الدرعمه الزايده شينه

[أبو يوسف]

تنبيه في محله اخوي

وفعلا الجواد توهم
والسرعة لا ضرر ولا ضرار
مهب الواحد يمشي بالجادة ميه وعشرين
يتركد ويمشي ثمانين او سبعين
حتى لو جدع السيارة ما تقلب


مشكور اخوي خشم الحصان
... ومع التحية

[خشم الحصان]

الاخ الحبيب
ابو هديل
السلام عليكم
الله مير محييك يالغالي والله يغفرلك ويرفع من قدرك ياخيي الحين الواحد دلي يخاف انه يرقد في الخبب الي بين النفود الخوفه من هال مايرفعون رجلينهم عن دعسة البنزين بلي وانت في امن الله رويقد ومنسهل وقاعد طالع في النجوم الي تيبن لك قدرت الله سبحانه ثم يجيك هالمطفوق ولاه طاب عليك تقول جاثوم بس من النوع الي يودي الي القبر وان كانه امداه يمسك فرمل طل عليك مع الدريشه ثم قال اههههه اسفين شباب بس اسفين
ودك ياخيي تجمع كم عقرب وتحطها بين جلده وثوبه علشان يعرف وشلون يسوق في البر ولا لو قدر الله وصدمك متي الين يجيك المرور الحين ماجاك وانت في وسط الرياض ةيبي يجيك وانت في قلع ودران
عموم الله مير محيك ومشكور علي المرور والمشاركه
اخوك
خشم الحصان

[ابو ايمن]

شكرا لك ياخوي خشم الحصان

عز الله ان كلامك صحيح ولا يهونون الاخوان .

الدرعمة شينة والسهوة شينة .

بس بيني وبينك .

لو البدوي يخلي اتجاه الخط كأنه يمر من جنب البيت والحلال .

ثم يسوي مفرق ..

علشان إذا جاء واحد(ن) مسرع مايتدرعم بالحلال .

والله ان البدوي ذكي وشلون راحت عليه هذي .

مع الشكر والتقدير لكل المشاركين .

[خشم الحصان]

الاخ الحبيب
ابو ايمن
السلام عليكم
اخوي الغالي الحين اقول البدوي حط له خط من كثر مايمر عليه وش تبيه يسوي يحط لوحه تحذيريه ولا يحط سفتي ولا يحنط له بعير ميت في المفرق الا نرفق والهون ابرك مايكون لئن الواحد طالع يتمشا مهوب طالع يسابق والبدوي ذكي صحيح بس الي يسوق مخروع والقلب داله بين السواليف وروعة الضيعه
عموم مشكور يابعدهم علي مرورك والمشاركه الله يثيبك ويغفرلك ذنوبك
اخوك
خشم الحصان