توانك لاتصدأ

[نمر مكشات]

اخواني الاعزاء
السلام عليكم

لي مده و أنا ادور على ورشه تفصل توانك ماتصدي
للجمس( ونيت)
اتجهت للورش المعروفه بالتوانك اللي ماتصدي لاكن للأسف كلهم افادوني انهم يفصلون توانك بس ما يضمنونها عن الصدأ (يمكن تصدأ)؟

واتجهت لأستيل و الالمنيوم

بس ودي تدلوني على الورشة اللي تفصل توانك مظبوطة و اذا حصل رقم تلفون لورشة تفصل توانك
بحائل او القصيم او الرياض

[خالد030]

القصيم عندك مصنع الوادي بالرس وبالرياض ورشة المميز

[سوبر VTC]

و عليكم السلام و رحمة الله

فيه محل مجمع الصمان بصناعيه الرواف

يفصل استيل 80 لتر اللي تبي

اعتقد سعره ب500تقريبا

و فيه محل رحلات المبارك حول مصنع الببسي يجيب توانك المنيوم

و فيه مصنع خزان الوطني عند كوبري الهديه

حق الدائري الشرقي لبريده

بعد كوبري الفروسية و انت متجه جنوب

احد الربع قبل شهر اخذ منهم تانكي فيبر مستطيل 80لتر بسعر 350ريال

تصميمه بطران جدا ووذف

الطعم مادري عنه او حتى الضمان

موفق

[عاشق السيل]

بالنسبة للرياض فيه ورشة اليحيى بحي السلام يفصلون توانك ألومنيوم وأنا أضمنها لك إنها ماتصدي لأنهم يلحمونها برضو بالألومنيوم !!!

أنا مفصل تانكي من خمس سنين ولله الحمد ماشفت أي مشاكل ،،، وبالتوفيق يالغالي ......

[نمر مكشات]

الله يجزاكم خير و ما قصرتوا

بس ابغى وصف او تلفون للورش اللي ذكرتوا

كيف اوصل لها

[البانيلي]

سلام

ورشة الضحيك في صناعية عنيزة فصلت عندهم تانكي عادي

له الحين اكثر من خمس سنوات ما صدا ( لا اله الا الله )

بـ 250 ريال 80 لتر اعتقد أو اكثر

[نمر مكشات]

الله يجزاكم خير

[نمر مكشات]

للأسف ياشباب لم اتدل على اي ورشه من اللي ذكرتوها

ممكن تفيدوني اكثر

[بن نويشر]

بدلك على ورشة تتجهم إليهم مباشرة ، أنا عندي خزان المنيوم ملبس (ستيل) ضد الصدأ من ثلاث سنوات وهو عندي ومن أروع ما يكون ، وأشرب منه وأخدر الشاي منه ..

والوصف كتالي:-

الرياض - الطريق الدائري الشرقي - مخرج 16 بإتجاه الشرق - تمسك الطريق على طول ... ثم أحسب ثاني محطة بنزين بعد الشركة الوطنية للزراعة (نادك) - تلف من عندها يمين وتصير المحطة على يسارك - عد ثالث شارع على اليمين تلف معه - امش على طول حتى تجيك ورشة رقمها ((38)) على اليمين مقابلة مسجد كبير .

فصل عندهم ولا تشاور وبإذن الله تدع لي ...

وضحت الفكرة ولا لا ؟؟؟

[نمر مكشات]

جزاك الله خير