علاج كفاخ الطير

[خصيم الوقت]

السلام عليكم ورحمة الله وبركاته

يربع بنشد كم هل للكفاخ علاج:what:


واذا انهصرت ريشه من الجناح وش السوات

[ميراج]

الأخ خصيم الوقت السلام عليكم ورحمة الله وبركاته

وش طيرك حر ولا شيهان ولا وكرى

فرخ ولا وحش ولا بيتى كامل ولا مثلوث

يكفخ على يدك ولا فى غمارة السياره ولا على الوكر

الرجاء شرح الوضع بالتفصيل حتى يتسنى للأخوه الصقارين مساعدتك

تحياتى

[خصيم الوقت]

اخوي ميراج شكرا على مداخلتك

اطيرونا اخوك فرخ شيهانه جبليه تكفخ على يدى اذاحست بشي يضايقها

وخصوصا الا نقلتها خارج الغرفه وايضا اذاعلفتها وحطيتها على الوكر

[ميراج]

الأخ خصيم الوقت السلام عليكم ورحمة الله وبركاته

فرخ شيهانه جبليه

1- كثر النقل وإذا شفتها ترفع رأسها بى تكفخ برقعها ولا تفك البرقع حتى تهدأ وكثر من المناسر إثناء النقل

لاتفك البرقع وهى على الوكر فترت التدهيل نهائياً

2 - بعد التدهيل يفضل وضع الطير على الوكر بدون برقع وتدعيه من الوكر بعلف وتخليه على الوكر بدون

برقع وتروح عنه لمدة 5 دقائق وتجيه مقبل على الطير والعلف بين فى يدك وتجلس قريب منه وتنسره وتعيده

على الوكر وتكرر هذه العمليه 3 مرات بعد ذالك وفى نفس اليوم تجيه وانت مخبى العلف فى يدك وتنقزه

وتنسره كرر العمليه كل ما مريت عليه ولا تشيل الطير من على الوكر إلا والعلف فى يدك إذا تعبت من التدهيل

وبغيت تحطه على الوكر برقعه ولا تخليه بدون برقع نهائيا حتى يتعلم الطير ويصيد

3 - علف الطير فى السياره كم مره والسياره واقفه ثم والسياره تمشى

4 - وأنت فى المقناص عش الطير فى السياره ومرحه على التكايه بدون برقع يفضل تكون التكايه مرتفعه

راجع موضوعى فى المواضيع المميزه كيف تدهل طير قرناس وحش طرح الشبك

تقبل تحياتى

[خصيم الوقت]

شكراً لك اخوي ميراج عزالله انك ماقصرت


هذا ما تعود ناه من اخوانا المشرفين الكرا م

[هاوي مقناص]

بسم الله الرحمن الرحيم.................


شكرا لك اخي خصيم الوقت علي الموضوع الرائع ،

والشكرررررررر موصولا لا اخينا ميراج علي تسهيل الامر .


اخوكم :الخشـــف

[خصيم الوقت]

شكراً لك اخوي الخشف


بس ماقلتولي انهصار الريشه كيف اعد لها ابي اجابت واحد مجرب



وشكرا

[ميراج]

اخوى خصيم الوقت السلام عليكم ورحمة الله وبركاته

بالنسبه لنهصار الريشه إذا كان الأنهصار فى ريشه ناشفه يمكن تعديلها بواسطة منشفه قطن وماء حار

تبلل المنشفه وتلف على الريشه وتسحب بتجاه الريش عدة مرات بدون ظغط على الريشه

أحيانناً تنجح وأحيانناً لازم تقص وتوسر

تحياتى

[خصيم الوقت]

السلام عليكم ورحمة الله وبركاته


لاتبعد ونا اخوك ولا يهونون الربع


الطير بدايظبط معي بس المشكله الين حطيته فوق يدي ونسرته وعين من الله خير

وبرقعته وحطيته على الوكراجيه بعد خمس دقايق الا وهوجنب الوكروهي مره وحده يسويها

وبعدين يركد وكذالك اذابرقعته وخليته على يدي اشوي ما اد ري هل هومع مرورالوقت يتعود

واسفين على الئطاله تحملونا وشانسوي مبتد ئين

[المري]

مرحبا اخوي خصيم الوقت

صحيح دائما الفرخ كثير الحركة بالبرقع بس بعد ايام ان شاء الله انها تتعود


وخلها دائما عندك وقريب من الصوت الناس يعنى خلها تحس انك عندها اربع وعشرين

ساعة...

وانتبه لاتخليها بدون برقع علشان ماتعبث على نفسها..


اخوك / المري

[خصيم الوقت]

شكراً لك اخوي المري على تفاعلك معنا

وعلى جهودك اطيبه في هاذ المنتدى الهداف


مع تمنياتي لك بتوفيق

[ميراج]

اخوى خصيم الوقت طيرك ينزل من على الوكر ببرقعه لأنه جائع زود علفه شوى

وبعدين عليك بالميزان تراه زين يبين لك علفك مناسب ولا لا وترى القصر مره مهوب زين

الطير اللى يعلم وهو حاله زينه أحسن من اللى يدهل ويعلم على هزل

موفق اخوى عسى فالك الحبارى

[$عاشق الحرة$]

بسم الله الرحمن الرحيم

السلام عليكم ورحمة الله وبركاته

مساكم الله بالخير يا خوان

ماعليش اخوي خصيم الوقت ابي اشاركك بكم سؤال إذا سمحت

اولاً : ماهو التنسير

ثانياً : وشو الميزان اللي توزن عليه الطيور ووين ينباع وكم سعره ؟

كثرناها عليكم لاكن مثل ماقال خصيم الوقت مبتدئين

تقبلوا فــائــق إحترامــــي

اخـــوكمــــ ،، ــــ :

عـــاشــــق الحـــــرة