لاتفوتك قصة الكشته مع خكاريا

[عليان الليل]

[mover]ترقبو قصة عليان عند الامريكان......................................... ....................قريبا[/mover]
هذي سالفة ولا عاده الله بغت تصير جريمه
نويت اكشت انا واربعة من اخوييا يم الحفر وزهبنا كل شي
لكن واحد من هالخويا قال فيه ثنين يبي يروحون معنا المهم محد قال شي قلنا جبهم
المهم حركنا ومعنا جمس يم الحفر
مادريت انا ان هالثنين الي جو خكاريا
وصلنا الحفر ماعندنا خلاف يم الصداوي ونصبنا الخيمه كان الوقت مسيان
بلشنا بهالخكاريا مايعرفون يقضون الحاجة بالبر وانتم كرامه
ولازم نوديهم لمحطة والامسجد على بعد عشرين كيلو
ماهي مشكلة. كان يم الخميس وكان بشهر ذي الحجه والشتا بادي يطلع
واول الشهر يعني النجوم مايحتاج على كيف كيفك
عيو الخكاريا ينامون برا من الخوف
ماهي مشكلة . وقت النوم غيرو ملابسم تزهبا للنوم
ماهي مشكلة . كان معي رشاش كلنا رمينا الا هم خايفين
ماهي مشكلة.
بس الشي الي رفع ضغطي وخلان بغيت ارمي هالخكاريا وقطعهم بالرشاش
يوم اصبحنا . جوك على مراية الجمس وكل واحد معه فرشه يكد شعره وكريم يدهن به وجهه عن الشمس
واجيك والله واقض الخيمه ونضف العفش وعلى الرياض يعني ما قعدنا اربع وعشرين ساعة
وارجو من كل واحد قرا هالقصة لو هو محلي وش يزين بهم

[السمح]

أنا لو مكانك أخدمهم من العيون الثنتين ولا سووا كذا إلا لأن أبوانهم وأصحابهم ما علموهم من الصغر على البر .. أبساعدهم ماداموا معي .. ولكن في المرة القادمة إنتبه ياعليان من تروح معه ومن يجي معك .. وأكيد أكيد ماراح أتورط مع مثل هالأجناس مرة ثانية .. وخلك تستاهل وأظن إن عدم إكمالك الرحلة جاء مناسباً ، على الأقل أفضل من تقطيهم بالرشاش

[القصبي]

سلام عليكم
هلا يخوي ياعليان الليل
انا والله العظيم لو ان ذولي معي كان ابصبر واصبر الين تقفل معي اما يدهن شعرة مدري وجهة في البر
طيب وش اللي جايبك للبر مدام انك منتب كفو للبر او علشان يقال انك راعي بر
انا لو ذولي معي وزققوها معي اول شي طول الله عمرك بمشي واخليهم في البر خلهم يروحون للرياض مشي علشان يصيرون رجاجيل
وشكرا

[معرب الخال]

والله لو أني مكانك يا عليان كان اجربعهم بهالجمس ألين يحرمون يطلعون البر مره ثانية

اجل تقول يكد شعره ويحط كريم هذا الي ناقص المهم اذا بغيتوا تطلعون وخذتوهم معكم دقوا علي على شان اوريك فيهم

والرقم خذوه من الإستعلامات

[حد السيف]

Originally posted by القصبي
سلام عليكم
هلا يخوي ياعليان الليل
انا والله العظيم لو ان ذولي معي كان ابصبر واصبر الين تقفل معي اما يدهن شعرة مدري وجهة في البر
طيب وش اللي جايبك للبر مدام انك منتب كفو للبر او علشان يقال انك راعي بر
انا لو ذولي معي وزققوها معي اول شي طول الله عمرك بمشي واخليهم في البر خلهم يروحون للرياض مشي علشان يصيرون رجاجيل
وشكرا

وش اللي صبرك ووصلك الى الصداوى مارقلت اللى معك وعرفت وشهم من طيور اللة يهديك بس
من اول محطة روز الرجال بة ومابة قل هونا واول شي حطهم على مدخل شارعهم قل تراني صيفة



محبك اخيك
حد السيف

[راعي مرات]

عليان000


الله يسعدك000


هذي يا أخي فرصك لقيت من تضحك عليه في البر وتهبل به أنا لو محلك أبا أهبل بهم وأخليهم محل تندر إلين يضبطون وصدقني يبون لهم مثل ها الطلعة مرتين ويعجبونك00لأن الشاعر( بركات الشريف) يقول/

الهقوة إنك ما تجي دون أهاليك *** وما ذكر عود الورد يثمر بتنباك

يعني الله يعينك تدربهم ( تصقرهم) 0000


لاهنت على هذه القصة000

[برق شلع]

انا كد صارلي موقف مع خكاريه ولا يهونون الخكاريه اللي معك 00يوم قمنا الصباح
قصدي قمت انا لانهم ماناموا لقيت اثنين منهم قاعدين يفرشون اسنانهم وواحد قاعد يحط كريييم ضد الشمس يقول ان خدوده احمرت من الشمس وزي ماسويت اخذت فوق تحت من محطة الشرق لااوسط اللي بلينه ولا اذن الظهر الا ونا مقبل على ببيتنا بالقصيم000
---------------------------

بس قهر لوسويت فيهم مقلب يعني لو قطعت بهم الدهنا ولا رحت يم ضلعان تبوك ودخلت للديسه والا وادي ضم والله ان تزوغ ابصارهم ويعرفون الكريمات والفرشات00

[الحاتمي]

عليان الليل
ليش ترجع من الكشته بسبب هالخكاريه؟؟
ليش ما وديتهم لفندق الخليوي اللي بمدخل الحفرعلى اليسار وخليتهم
يكشتون بالفندق وكملت كشتتك وانت راجع تمرهم وتوديهم لاهلهم
ولا تنسى تقول لاهلهم لا يخلونهم يكشتون مره ثانيه لان الذيب بغى ياكلهم
بس حظهم انه اكل كريماتهم وبلاويهم....
وش رايك باللي طلع معنا نصيد ضبان الصيف اللي راح
ومعه شي اسمه لامبيلومدري لابيلو سالته وش هذا قال
حق تشقق الشفايف؟؟
اخذته منه وجدعته بالقدر مع الكبسه.......
تحياتي عليان

[شاهد عيان]

موضوع رائع ..

وعندي لكم سالفه :
مرة رحنا لعرق المظهور عند قبه بالقصيم ودخلنا بالنفود مسافة 30 كيلو عن الخط ومعنا واحد من الأجناس المذكورة أعلاه ...

وضعنا الأغراض وجاء وقت النوم قام المذكور وأخذ فرشة الأسنان والمعجون وبدأ بفرك الأسنان ..
رفيقي شاف الحاصل وقال لي أمسكه خلنا نوريه الشغل ... هو علم أننا نبي نمسكه ثم ركض وحنا وراه وراه وراه .... وأسمع خويي يقول الولد بدأ يزبد !!
تعب من المشي وشفت وجهه مت من الضحك صاير وجهه كله معجون أسنان وصديقي يقول لي ماقلت لك الولد بدأ يزبد !!

والداعي الذي خلانا نلحقه إنه كل شوي يغسل أديه ثم وجهه ثم كملها بمعجون الأسنان !!

[عليان الليل]

شكرا لكم جميعا..
ياخوان المشاركة هذي تقريبا له سنتين او اكثر
لكن من الحوادث نستفيد..
تحياتي..

[المري]

مرحبا أخوي عليان الليل..

المفروض انك تصبر عليهم وتكشت المده اللي انت تريد ماهو علشانهم علشان


خويك اللي جابهم معه لانهم اكيد يعزون عليه.. فيلزم انك تحشمهم وتقدرهم


الين ترجعون للديرة....


أنا الى جاتني غلطة من رفيقي *** ادمح الزلة ولا قوله شي
مؤاخذه لو يعترض في طريقي *** اشيله زلاته ولو كان مخطي

الله اعلم انه هو الشاعر-محمد الخس.


وتقبل تحيات اخوك / المري

[ابو عايد]

ولكن في المرة القادمة إنتبه ياعليان من تروح معه ومن يجي معك .. وأكيد أكيد ماراح أتورط مع مثل هالأجناس مرة ثانية .. وخلك تستاهل وأظن إن عدم إكمالك الرحلة جاء مناسباً ، على الأقل أفضل من تقطيهم بالرشاش

هذي يا أخي فرصك لقيت من تضحك عليه في البر وتهبل به أنا لو محلك أبا أهبل بهم وأخليهم محل تندر إلين يضبطون وصدقني يبون لهم مثل ها الطلعة مرتين ويعجبونك00لأن الشاعر( بركات الشريف) يقول/

الهقوة إنك ما تجي دون أهاليك *** وما ذكر عود الورد يثمر بتنباك

يعني الله يعينك تدربهم ( تصقرهم) 0000

لاهنت على هذه القصة000

مشكور اخوي عليان الليل....!!!

[أبو يوسف]

المشكله هالاجناس آفه للمياه اللي معك

لأنه اي غبار يجي ايدينه يغسل الايدين والرجلين والوجه ويمكن يتروش بعد

مره واحد طلع معنا من هالجنس
حرمناه الماء الا الضروري يعني ذليناه علشان الماء
وطلب بالليل ماء بكاس نحسبه بيشرب
اثاريه بيفرش سنونه
قلنا مابدهاش
وصلت لكذا
اخذنا المعجون وتحت كفر السيارة
والارض نفود

يعني قابلني ان طلع المعجون سالم


اخوي عليان ولا يهونون الباقين
لاتطلع الا مع ناس تعرفهم زين
الا بالطلعة الخفافية يوم واحد او نهار



تحياتي

[مكشات]

هلا اخوي عليان الليل
والله يعوضك عن ذيك الرحلة برحلة أجمل وأكمل ..
قصتك ذكرتني بصديق قديم الله يذكره بالخير .. هالصديق كلما مشينا للبر ومعنا من هالنوعية ينبسط عليهم ..
يجي لمي يبيني أساعده بالتخطيط والتنفيذ - وأنا على الشيلة ذيك الأيام - وخذ يامقالب خصوصا بالليل ..
نتيجة هالمقالب أحد أمرين :
إما يتعدلون ويصيرون أهل بر فعلا ..
أو يتوبون عن الرحلات ..
على سبيل المثال لا الحصر :
أول شيء نخلي السوالف بالليل كلها رعب برعب عن الذيابة والعقارب والأفاعي لين يتخمرون
بعدين يبدأ شغلنا ..
مرة أخذنا لي غاز طويل دفناه وخلينا طرفه تحت وسادة واحد منهم ، وخذ من هالأصوات .. مرة صوت واحد يمشي ، ومرة صوت شيء يعوي وأشكال وانواع من اللي فعلا تشيب بالراس ..
صحيح نبتلش فيهم وبردة فعلهم .. لكن كلما حسينا إن الوضع تأزم . أرخينا عليهم شوي ..
ملاحظة :
مسألة إستخدام فرشاة الأسنان في البر ما اعتقد فيها شيء بالعكس ليت لنا جلد على مثل هالأمور ..
المشكلة الحقيقية لما يكون رفيقك بالرحلة سلبي .. يعني مايساعدك بالطبخ والنفخ والإحتطاب وما إلى ذلك .. خله إيجابي معك ومايهم إعتناؤه بنفسه ..
تحياتي

[عبد الله الفايز]

مشكور أخوي عليان على الموضوع والقصة الطريفة.....
عندي شوي ملحوظات على الموضوع وتعليقات وإضافات الشباب
1- صحيح أن اختيار الرفيق مهم جدا ولا تسمح لمن لايناسبك طبعه أن يكون رفيقا لك
2- ودي أن نتفق على تعريف للرجولة في الكشته وكذا تعريف الخكرنة
هل الرجولة في المكاشيت 1- الصبر على التعب 2- خدمة الرفيق بما تستطيع 3- التنازل عما تستطيع من حقوقك خدمة للمجموعة 4- الإيثار في المكان والطعام والشراب 5- تقديم مصلحة المجموعة على المصلحة الفردية 6-الترفع عن إيذاء الآخرين من أعضاء الرحلة أو غيرهم بأي شكل بالكلام أو الفعل أو الإفساد أو التعدي على الحقوق أو الممتلكات 7- النظافة وحسن المظهر وقبل كل هذا الالتزام بالخلق الإسلامي الرفيع

وهل يدخل في الرجولة 1- قذارة الثياب وتتشققها 2- الرائحة الكريهة من الفم 3- الأيادي المتسخة 4- الشفاه المشققة 5- الشعر المنفوش المبعثر ؟؟؟؟؟
الخكرنة هل هي
1- نظافة الثياب2- الرائحة الطيبة من الفم والجسد 3- دماثة الخلق 4- حسن المظهر عموما
وبالتالي فإن من كانت هذه صفاته أقصد ثوبه نظيف وفمه نظيف ورائحته جميله هو خكري يجب أن يحرم من البر والخروج والاستمتاع ...؟؟؟؟
وجهة نظري التي أومن بها أن الخكرنة هي
1- الميوعة والتشبه بالنساء 2- التكاسل والاتكال على الآخرين وعدم المشاركة في أعمال الرحلة 3- عدم إعطاء المجلس حقه من حسن الحديث وحسن الإنصات 4- التذمر وعدم الصبر على مشقة الرحلات ......
ولا أرى أية علاقة بين العناية الشخصية بالجسد والخكرنة إلا ماكان زائدا عن حده وتحول إلى ميوعة وتشبه بالنساء
قد يقول بعضكم إن من صفات الرجولة الخشونة ..... نعم نعم نعم ..... ولكن ماالفرق بين خشونة الرجولة وخشونة القذارة.... ؟؟؟؟؟؟؟؟
أقول قولي هذا وأستغفر الله تعالى لي ولكم................ وسامحوني إن كنت سويت شوي زحمة والخط فاضي