هل تعجبك مثل هذه الرحلة ....صوره واحده فقط ...!!!

[ذيب الداهية]

يعطيك العافية أخوي محمد موضوعك جد رائع
الظاهر والله العالم توهم منزلين العفش وداقين الحيمة بدليل الرجال الي واقف في يمين الصورة يشد الرواق

سلبيات
عندك جراكل الماء هذي مالها داعي منطله في كل جهة يجبون لهم من البراميل الكبار وصلى الله وبارك
الشويب الي جالس يحوثر عند مشب النار شكله بردان المفروض جيبن معه فروته !!
شف فيه واحد معلقن شرباته على حبل الخيمة غلط لو يجي هواء ويطيرهن !!
أغلب الكشاته اذا طلع للبر يترك باب السيارة مفتوح غلط مما يؤدي الا دخول الغبار والأتربة للطبلون
مثل الي في الصورة تاركين باب الهايلكس مفتوح !!
شف الزوالي الي مجدعه ورى الخيمة غلط نزل الي تحتاجه لو جى مطر فجاءة انحاست الدنيا
ناظر الجو فيه خيال المفروض يسون جالستهم جو الخيمة لآسمح الله وهبت رياح وأمطار قوية ولاهم في مأمن داخل الخيمة ..
بس وسلامتكم

أيجابيات
يزين جوهم

[magoode]

طلعه ولااحلى

والجو كلااااااام ..

[أبا مجاهد]

الشايب وده يشب الضو بالقرب من البطانيه

<<بالمناسبه الواحد اذا كان فاضي تجيه فلسفه غير طبيعيه

[ذيبان حريملاء]

هلا فيك أخوي

الآخوآن مآقصرو فى توضيح آلسلبيات والأيجابيات

تشرفت بمروري من هنــا

[فرغالي]

ماشاء الله الوضع صح بس فيه مشكلتين
1-الجو غيوم يعني لو نزل مطر مايمديكم تدخلون العفش والخيمه مافوقه شراع
2- موقع السيارة فيه خطوره لو سمح الله دحدرت

وشكرا على الصوره الجميله

[الناب]

وهل هو في أحلى من التخييم
في أرض صحرى وشيل وحط ونصب خيمه 4*6

وتنزيل أغراض والفرشات وشيل السرندل إلي يقص الظهر

أما أحيل أغلب الشباب ما عاد يعترفون بمثل هالرحلات
كلهم همهم أنهم يقولون رحنا الصمان وشفنا الخضار
وفي كل فيضه ما ياخذ له نص يوم

جميل التنويع والأحب إلى قلبي التخييم في أرض جردا قفرا
ونصب الخيم وإلخ

الله يبارك فيك لكن ربعك إلي في الصوره ينقصهم ترتيب أشوي
موفق خير
أخوك
بن فهد

[جـرح الشمـال]

ماشاء الله جو حلو
والاخوان ماقصروا بينوا السلبيات

[العماري10000]

الإيجابيات يكفيك الجو والمكان الزين والنفود الممطور
السلبيات عدم الترتيب والرجال اللي قاعد قدام الشايب ليه مايشتغل والشايب الله يطول بعمرة قاعد يشب النار

[قاصد الصمان]

لاتعجبني مثل هذه الرحلة

فما احلى من الرحلة الخفافية في كل شي

وهذه الرحلة فيها :

من الايجابيات :

حسن اختيار المكان ،الاجواء الجميلة ، وجود خيمة في مثل هذه الاجواء ، العدد منا سب للرحلة ، شبة النار

السلبيات :

خيمة غير منا سبة في حجمها للعدد لكبرها، كثرة الحوسة (دبات ماء ، الفرشات كثيرة بدون داعي لها ، العفش كله منثور على الارض مما يصعب ترتيبه ويحتاج الى سيارة دينا لنقله، اسطونة غازكبيرة (ممكن الاستغناء عنها باحد الدبات الصغير المتوفرة ) خصوصا وان القدور اللي معهم صغيرة الحجم .

[معدي المرقاب]

حلوه مشااء الله يسدك هالجو ينسيك كل شي ..........وهم شي ان المكن يكون كما كان

[ذئب الدهناء]

السلام عليكم

السببيات منها


كثرت العفش


سياره واحده وهايلوكس


الخيمه حجم عائلي


المكان منخفض والجومطير



الايجابيات000000000يكفي انها كشته

[العزوم]

انا اتوقع قصدك التخييم في مكان واحد والاستمتاع بالمكان حوله خصوصا في النفود عند المطر
وهذا حسب الاشخاص في الرحله اذا كان معكم كبار سن مثل اللي في الصوره الله يمتعه بالصحه والعافيه
فهم يتعبون من كثر التنقل بالسياره في البر ويكفيهم شبة النار والسوالف عن الماضي ووصف ماكانت عليه الارض والصيد الموجود فيها الخ

تحياتي

[المتحـ2007ـد]

الطلعه خباااااال مع هذا الجو وش خليتوا

ما شاء الله عليكم

وصوره تغني عن الف صوره

يكفي الجو والارض توها ممطوره تغطي عن كثير من العيوب اللي ذكروها الاخوان

كل الشكر لك اخوي والله يعطيك العافيه

[العتل]

الخيمة ليش مبنية مادام جميع الفرشات والاغراض منثره في الخارج

[ساري_1]

عدم الترتيب في الجلسه

العزبه وضعها غير منطقي في كل مكان والجيكات يمكن في جيك بنزيم قريب منهم

وتقبل مروري