سرهيد جانا الليل والكيف ما دار=مدري علام انفوسنا مستحيره
انا ادري ان البال لاويه باصرار=من ضيقته دلا يزود تعصيره
بين الحنايا يمشي منشار نجار=ينوش معلوق الفؤاد بنشيره
على وفاة اللي تقافا عن الدار=سلمان بن فوزان راح بمسيره
بين النصايب ما تمسّيه الانظار=عليه من بطحا النشيفه زبيره
ما زاد من عمره ولو ربع مقدار=مقسوم والقبّار شفنا حفيره
عليه موق العين بالخد نثّار=هذي طبيعه ما عليها معيره
راح الرفيق من الشغاميم الاخيار=في منتدى مكشات من كل ديره
ما له حساس ولا وجودن وديّار=في مظلماتن ربي اللي خبيره
حدر الثرى فوقه مشاجير واغبار=وانفاسنا لجله تزايد زفيره
سبايبه نوجس بالاكباد مزّار=يودع تريف البال فوق الحصيره
حقيقه ان الولف بالناس عزّار=حين الفراق يصير ناشف غديره
كما الغصون اللي عثت فيها الامطار=جاها الضما بالصيف وامست كسيره
تسفي عليها الريح واغبارها ثار=تشوف من فوق السوافي ذريره
حياتنا كالقاع لاجاه مبذار=يمضي زمان وينصرم بالدهيره
نرجي عساه يحال عن واهج النار=في عالي الفردوس يلقى بشيره
عسى يكون بسيحتن فيها الانهار=واقصور والحور الكواعب كثيره
يوسف الخليفة ( أبو عبد الله )