وش جربت من الجيوب ؟؟

[sa3d]

اول جيب سلق نيسان موديل 99 وكان ماشاء الله ممتع جدا في البر وخاصه النفود وكان يطلب قطع غياروالصراحه الوكاله كرهوني في السياره بسبب الخدمه وبعيتي له كانت بسبب صرفيه البنزين بالعربي مايزبن في البر..

بعد شاص 2003 بس ديزل الصراحه موتر ماعليه اروح الصمان وارجع واروح مره ثانيه وانا ماعبيت بس اتعبني مايمشي في الخط ولاقد طلب شي اللهم لك الحمد وموتر ينشد فيه الظهر وبعدها بعناه..

بعدها شاص 2009 بريمي بس هالمره بنزين واتوقع الي يجرب الشاص مره مايقدر يستبدله بموتر ثاني لان من ناحييتي اعتبره السياره الاولى في البر...وهاذا الي عندي

[التعـ King ـديل]

الجيوب اللي سقتها ولا احد يقول متعصب نيسان بقول الحق

ربع 89 حلو وخفيف بس ماارتحت فيه

سوبر سفاري 91 من احلا المواتر اللي سقت خفه وعزم

سوبر سفاري 92 من احلا المواتر خاصه انه جلد ودفلك وحركات

باترول قناص ( مواصفات قطريه ) 97 موتر خفيف وكان رفيق دربي سفر وديره

باترول جي ال 98 من احلا الموديلات واكثرها صبر

سوبر سفاري 98 فخامه + قوه وخفه

سوبر سفاري 2002 فتك ماعليه كلام

سوبر سفاري 2005 مااقدر اقول غير ان الجيب نيساني وبس

باثفيندر 2005 ابداع وقوه وخفه

جي اكس ار 2003 مع احترامي بطه ثقيل بالحيل

جي اكس 2004 هدد حلو بس عيبه مطبه قاسي

برادو 2004 بصراحه كل موديل عن اللي قبله يزداد حلاوة بعيني

[Mekshaati@]

ماشاء الله عليكم يا شباب وعلى تفاعلكم خبرات مفيدة و ثمينة وذكريات ممتعة مع الجيوب .

وأشوف الأغلب منكم لحد الأن يفضل الباترول ويشهد له.

مشكورين أخواني على مروركم فرداً فردأ ..

حفظكم الله من كل سوء وبارك لكم في جيوبكم .

وتقبلوا فائق إحترامي وتقديري.

[ابودعسان]

انا بالنسبه لي
اول موتر سقته قبل 17 سنه كان للوالد ومازال عندي من حبي له
لاند كروزر 83 صالون جلس معي 6 سنوات ايام الطهبله صح ثقيل بس اغليه
بعده ددسن 91 ثم 2003
حاليا باثفندر 2005 خفه وطرب

[غربي هواوي]

بالنسبة للسيارات والونيتات حدث ولا حرج
اما الجيوب

1- ربع تويوتا موديل 91
2- لاندكروزر gxr2002 حاليا معي

[آل زايد502]

يعطيك العافيه على الموضوع
اول سياره ياطويل العمر ربع تايوتا 89 ميزته خفيييف بس يكسر الظهر ومطبه قاااااااسي
والي بعده سلفرادو 2001والله انه عز المواتر بس مشكلة طبلونه 160

[Mekshaati@]

ابودعسان

غربي هواوي

آل زايد502

مشكورين أخواني على تفاعلكم وردودكم.

[سيف الظفير]

جمس 8100 2006
شاص 2008
والحين جيب باترول سوبر سفاري موديل 99 ولكن خااااص وحصري موتر مكمل ومجهز للمقناص بأغراض قيمتها فوق 15000 ريال والحمد لله ممشاه 160.000

[مخاوي الذيابه]

المواتر اللي جربتها ..
1- ونيت جمس 2005 قطعه 25<<<ما شاء الله تبارك الله

2- شاص 2006 خليجي<<< ما يحتاج مدح ..

3-اف جي 2009<<<ممتاز جميع النواحي لكن عيبه الضيق بداخل السيارة..

4- باترول سوبر سفاري 2009 <<< لا إله الا الله هذا يقول ما احد حولي ...

[BATH 2003]

موضوع رائع جدا

سيارات الدفع الرباعي اللي جربتها:

بليزر موديل 80 مكينة 400 راحة و قوة لاكن خرابات و مشكلة الحرارة

باثفايندر موديل 2003 راحة و قوة لاكن برضو خرابات و بالأخص حساس منظم الهواء

يوكن 2001 مريح و وسيع لاكن حساس

باترول ربع 1992 و بصراحة تم اضافته لدفتر العائلة لايشتكي كثير و قطع غيارة رخيص و معقول و متوفر بكثره و اللي عنده خلفيه بسيطة في الامور الميكانيكية او الكهربائية (( او عضو في مكشات )) بيستمتع في وقت فراغة بتصليحه في البيت .
و سواقته مريحه و خفيف و عيبه الشنطه صغيره لاكن الحل ( تركيب السله ) آآه كم عشقت هذه السيارة.

[غربي هواوي]

مشكور اخوي على الموضوع

ويعطيك الف عافية

[س ل ي م ا ن]

اللي سقتهن(حقات الوالد)

باترول 97 صالون موتر ولا كل المواتر تمنيت أنه ماأنباع
لاندكروزر 2003 بريمي بطه يعني بعد ماتطلع رجلك من الكبوت يمشي


باثفندر2003 وهو موتري حاليا موتر لايعلا عليه لكن يبي أحد يعرفله

[Mekshaati@]

الله يعطيكم العافية يا شباب على التفاعل مشكورين وجزاكم الله خير

[NissaN 1990]

باترول موديل 90 أربع أبواب gl بالخط ماهو راسي ويرده الهواء والطلعات وبالبر ممتاز
جمس صالون دفرنسين بسراحه مافيه قصور وقوي ومطبه زين ونفسه طويل خط وبر
جيب باترول باب واحد موديل 95 بسراحه قوي وعملي بس بالخط لك عليه
جيب باترول فتك موديل 2002 بسراحه ممتاز ولا يعلى عليه بالخط وبالبر

واللي تحت أستخدامي الآن الجمس الصالون والباترول ال 2002

والجيوب عموماً من 2002 وفوق ممتازه بالبر وبالخط مافيه مثلها وخفيفة نفس بس ماهي مثل ال GMC من ناحية التجربه الأمريكي قوي ونفسه طويل ومركبه مريح ،،،

[GX-R 2001]

انا قد جربت جي اكس ار 97

ونيسان باترول 99

وجيب جي اكس ار 2001 <<<جيبي ماشاء الله عليه عزم

وجيب الوالد جي اكس ار 2010

وولد عمي شاص 2009

وعمي الثاني في اكس ار 2009