وش جربت من الجيوب ؟؟

[ابوصالح77]

في الحقيقة اللي جربت واجد ،
واللي ملكته والملك لله من غير الصغاير والدداسن :
1- شروكي كلاسيك 2001 (أتوماتيك) هبوب ريح ، لكن هده التردد للدوام بعد مانقلت لأن المسافة طويلة ، وبعد مابعته صار عندنا مأتم في البيت (يقولون: ياسفابه متعودين عليه)
2- بساط الريح ( باترول ربع سلقه 97) موتر برية .
وبعد ما بعته صار عندنا فرح ( يقولون: أحسن متضايقين فيه ) ,
3- معي الآن 2006 Gx( قير عادي) موتر مشهود له .
الله يطرح فيهن البركة
لكن يحن قلبي للباترول

[بنز560]

بعض الردود اشك ان فيه صغار تحت العمر 15

[مسريان]

ما لقيت أفضل من الاند كرورز 6 سلندر قير عايدي 98 إلى 2007 بأي مواصفات كانت ..

ويفضل درايش هندل بعد .. أوووه

وأخس جيب فالعالم من ناحية الصيانة بعد الامريكي هو الباثفندر ( اللعين )

ولكن ما جربت الفتك لكن من خلال تجارب الزملاء أنه ممتاز لكن ما ينغـزى به ..

الباثفندر اغث موتر الحمدلله اللي فكني منه اذا عشقت الدبل تقول مولع في كومة سمر وسط الكبوت تقبع الحرارة
طبعا المكينة 3.5
والقير اذا احتر مع الجر خرب التبريد وخبط مهبووووووووووووووول من جد صيانته غثيثه
واسأل كمبيوتر البريدي اذا شافه قال فكني منه حتى فحصه صعب

[Mekshaati@]

وعليكم السلام ورحمة الله وبركاته


كل الشكر لك أخي صاحب الموضوع

وهذا موضوع ذو صلة ...


لمن جربوا سيارات الدفع الرباعي ... ضع خلاصة تجربتك هنا



وبالنسبة لي .. فتجربتي اقتصرت على الباترول موديلات 91 و 95 فقط

وفي الحقيقة أنها سيارات تبرد الخاطر ويعتمد عليها بعد الله

ولا أستطيع أن أقارنها بمواتر أخرى لأني لم أجرب غيرها

يا هلا فيك أخوي المشرف ثعل البرد للأسف
لم أطلع على موضوعك قبل طرح هذا الموضوع
وأعتذر عن الخطأ وأرجوا من المشرف إغلاق الموضوع ودمجة في الموضوع الأصلي للاخ ثعل البرد.
ولكم جزيل الشكر.

[m1m2m3m4m5m6]

ههههههههههه انهاني بالضربة القاضيه ؟؟
انا ما ادري تحسب اني موكل من شركة تويوتا بالدفاع عنها وان مستقبلي بينتهي اذا ما اثبت وجهة نظري ؟

تدري وش الزين من مصلحتي ,,,؟؟؟ ان كـــــــــــــــل الناس تكره اللاندكروزر ولاعد تشتريه وتنطله في المعارض عشان تطيح قمته واطق لي بدال الواحد ثنين,,

لكن حسافه الناس عندها عقول وتعرف اللي يستاهل ان الدراهم تساق له سوق ,,
اذا كنت تفهم يا مدمن مدري مروج فتك فأظن ان رغبة الناس في منتج دليل على نجاحه ,,,

[((ابوملاك))]

والله صعب تعدها بس اللي ادكر

جي اكس ار 2006

جي اكس ار 2001

شاص

فورد وانيت 96

جي في اكس ار احمر موديله بالتسعينات بس كم مدري

ددسن

ددسن دبل دفرنسين موديل 85 ديزل

جيب ناتيفا ميتسوبيشي 2004

جيب فورتشنر 2010

جمس 2004

جمس دينالي 2005

نسيت

ددسن غمارة

وجيب لاند 85 <<ايام عزه

وجي اكس ار فضي بالتسعينات موديله

اوريون 2009

هايلكس 2002

هايلوكس قديمه <<< ايام عزه

كامري 2004 سبورت

تيرسل 99 << ايام عزه

يارس 2010

يارس 2009

اكسنت

جي اكس ار 2005

اوبترا

ابيكا

بريفيا تويوتا

باترول

عقبال ما اسوق الاف 15 والاف 22



ملاحظه : انا اسوق من يوم انا صغير

[قلب شقاوي]

سياره واحد ولاغيرها..

جيب ربع ( فيبر او ثلث ) موديل 85 .. شراه الوالد الله يحفظه من الشركه . اصفار والى الحين موجود

الجيب له عشر سنوات معاي ولله الحمد ..

[فارس تمير]

بعيد عن التعصب ,,,
ما طلع حتى الآن من جميع السيارات مكينه تتحمل وعمليه جدا جدا مثل مكينة 4500 تويوتا التب افتخر اليابانين بكتابة 24 بلف على السياره اللي في الجكسارات وفي الربوع والشاصات ,,,

صحيح

بالنسبه للباترول لاينكر نشاطه الا جاهل او متعصب ويساعده في تفوقه على الجكسار خفة وزنه بالنسبه للجكسار,,

غير صحيح للأسف
وواحد من الشباب معه فتك 2009 متقاوم الاسبوع الماضي مع جكس 2007
وراح الجكس عليه بتقريبا بماصورتين ... وراعي الفتك ولد خالتي وهو ناقلي

لكن لا تقارن المكينه ابدا ابدا بعمر وعمليه مكينة 4500 ,,, وحتى توضيبها تكون ارخص مكينة التويوتا ,,,

بدون نقاش

بشكل عام جيب التويوتا الى 2007 اكثر عمليه وارخص قطع غيار واكثر تماسك من الفتك,,, حتى في مسكة السعر تجد التويوتا يمشي 200 و300 الف وماسك سعره,,,

بالمنابة أحد الاصدقاء شاري 2009 فتك رجعه للوكاله 3 مرات مرتين لوزن الكبوت والرفارف والشمعات << تصدقون انها جايه من وكالتها ما وزنت ؟؟؟
والثالثه وهي الطامة رجعة عشان عمود الدبل يطلع صوت ؟؟؟

لا تنسى تعامل الوكالة السيء والمشهورين بطوال مدة جلوس السيارة لديهم ..

وللعلم موتره مامشا 10 الاف كيلو,,, ولهوب راعي جور على الموتر,,

من هذا يتبين انه حتى لو تفوق افتك في النشاط على الجكسار خذا لايدل تفوقه بشكل عام على الجكسار,,,

غير صحيح وسبق قلت لك

هذي عيوب الفتك ونتمنى نشوف عيوب اللاند للي يعيبونه,,
رجاءا اللي بيتناقش يتكلم بعقل ووقائع ولا يقول عكس الكلام ويظن انه جاب شي مفيد,,,

من عيوب للااند انه موب دفرنس من قدام

تدري بكم يعدلون فحجة الدفرنس وفحجة الفليور >> مجرد خاطرة

مقصات اوفليوروكالة((وحد من العيال فحص موتره عن البريدي بعد80الف كليو قال له ركب وجلب
وكلام فاضي مع ان الموتر 2006 يعتبرجديد)راعي الموتر موجود ياليت شركنا)
من تستخدمة شوي وانت تسمع صوت القرقعة في بطن الموتر !!!!!!

ما قد سمعنا بالقرقعة في غير النيسان ..

ولا واسعار قطع الغيار ماهي لم قلم
يعني العكس عند موزع الوكالة 1600ريال !!

للأسف تتكلم من خشمك ؛ أنا سائل عن عكس الاند بـ1150 وشاريه من التشليح
بـ200 ريال يعني أن ما علي طلب لقلة خرابه (صح ولا لا!)

ركبة ماتجي الا مع المقص كامل والمقص بـــ1500 اللي تحت فقط
ويالله عندك
ربطات الدفرس معروف عند اهل الاند وعندك دودات الدركسون للي تصلح ولا تنجح
ولا فية احد من اهل الاند الا يعرف تهرب الدودة
عموما
الباترول اريح بالخط ولافية كلام وراسي
والاند وقفه وله نطرة عند الناس
لكن الباترول الان انتشر حتى انك تدخل المعرض
ولا تلقى الا بطلعت الروح
وكل موتر له عيوب وله اجابيات
ونحن مجرد مستهلكين
يعني الموتر الزين نحول علية لوهوصنيصني بتكشت عليها طيب !!

عموماً حبيت أوصل أفكار فقط .. ليس ألا

بعض الناس يظن انا نبحث عن المشاكل فيزودها ويلعب لعبته بالمجادل

[m1m2m3m4m5m6]

على طاري فحجة الدفرنس 99% من اللي يعدلونها يعدلونها بالنار .. ومع ادنى مطب ترجع اردى من اول ...

الا ان كانك يراعي الفتك بتشتري جرم دفرنس كامل وفوق الالف وخمس او اكثر بعد.. وتنفض دفرنسك كاااااامل من كرونه وعكوس ورمانات وخرابيييط الدفرنس كامله وتركبها على الجرم الجديد والله يعينك على قيمة شغل اليد ...

غير ان نظام الفليور ازين تعليق للسياره وازين في الوعر وآمن باذن الله..

[عمرولدعلي]

1- باترول 91 ديزل ( حلو لولا خراباته )
2- فتك 2008 ( ممتاز لولا كثرة الأصوات والتخبيطه )
3- تاهو 2008 ( أحسن أحد بس لو ينطح المطاليع )
4- فوتشنر 2009 ( له أسبوع والحمد لله ممتاز جداً خف ومتانه )

[Mekshaati@]

مشكورين يا اخوان على الاضافة

[خالد الشمري20]

السلام عليكم ورحمة الله وبركاته

أول جيب شريته شروكي 94 قير عادي ما شاء الله تبارك الله

خفيف

حجمه مناسب

نشيط وقوي ما شاء الله تبارك الله

خدمني بالبر والكشتات شتاء وصيف

والتغاريز 4 مرات وطلع بدون سحب الا مره طيل 6 سنوات على كثر المكاشيت

.

[john silver]

اللي ينغزابه فالخليج على قو الحر وقل الصيانه الكروزر بلامنازع بعده يجي النيسان الفتك الـ 6 لكن خراباته بزود وقطعه نار تقل الماني مب ياباني

[Mekshaati@]

اللي ينغزابه فالخليج على قو الحر وقل الصيانه الكروزر بلامنازع بعده يجي النيسان الفتك الـ 6 لكن خراباته بزود وقطعه نار تقل الماني مب ياباني

صادق اللاند مامثله