فقط لمن ذهب للنفود الكبير .....

[Tr-]

السلام عليكم ورحمة الله
اخواني المكشاتيين حياكم الله كلن بأسمة
اخواني لدي استفسار عن النفود الكبير لمن ذهب اليه

الصراحة الكثير خوفني من النفود الكبير الكل يقول خطر وانا والله ما اعرف فيه شي
ابي ادري وشو النفود الكبير ؟ وش المشاكل اللي تواجة الكشاتة هناك ؟
ما هي المتطلبات للذهاب للنفود الكبير ؟ ( يعني وش احتاج ) المعلومات اللي زي كذا لأني والله متخوف ولا لي في البر كثير

والله ما حطيت هالموضوع الا والله اني محتاج هالمعلومات

مشكورين

[محمد الشاوي]

النفود الكبير فعلا يعتبر الذهاب إليه مغامرة لمن لا يعرف التعامل معه

وبعضهم يعتبره أكثر وعورة من الربع الخالي وأنا لست من هؤلاء

وقد ذهبت للنفود أكثر من عشر مرات وذهبت لأغلب القلبان الموجودة في وسطه قبل أن يخرج طريق الجوف السريع

أهم شي تكون تعرف وين تمشي ومن الخطأ النزول للنقر العميقة


وفي رأيي أن تذهب في رحلتك الأولى للنفود مع طريق الجوف السريع وادخل فقط إلى جبل العليم الذي يبعد 15 كم فقط عن الطريق السريع ويوجد ردمية تصل إليه


ويمكنك التجول في محيط الجبل وأرى أن لا تتعمق بعيدا عن جبل العليم

كما يمكنك الدخول ايضا مع ردمية الأبرق وهي على يسار المتجه إلى الجوف ( قبل العليم بـ 25 كم تقريبا )


ستجد المتعة هناك ويمكنك بعد ذلك الحكم على النفود الكبير واتخاذ القرار المناسب في الرحلات الأخرى .

[Tr-]

اخوي محمد بارك الله فيك
معلومات مفيدة الصراحة

طيب وش المطلوب للروحة هناك ؟ يعني يحتاج صيج للغرازات لأن يقولون الغراز في النفود الكبير قوي
ابي معلومات أكثر وتفاصيل اكثر خصوصاً ان ودي امسكها نفود

ودي بأكثر المشاكل اللي تواجه الكشاتة هناك اجمالا وزي كذا

انتظركم والله لا يخلينا منك اخوي محمد

[قاصد الصمان]

الغراز امره سهل خفف الكفرات وامش وما عليك الجو بارد

لكن احرص على البنزين هو اللي تحتاج له ويمكن يوقف الموتر من غلاقه

ويجب ان تضع لك خط سير تمشي عليه مع اخذ الاحتياطات اللازمة والتشييك

على السيارة وان تكون معكم اكثر من سيارة

[ابو ساره 999]

السلام عليكم ورحمة الله وبركاته اخوي الغالي اسمع من اخوك هالنصيحه البر وناسه وطرب اذا تبي تروح اي محل بس قبل هذا كله انا اوصي اللي يبي يطلع بدون اي منغصات انشاء الله فهذا يحتاج 3 امور رئيسيه اللي يكملهن ويتوفق ماعليه انشاء الله الا العافيه الاول والمهم الرفقه الطيبه اللي فيهم الشخص الكبير والرزين والمجرب لاغلب الامور ثانيا العده الكامله من الى ولا تحقر شي صغير تقول ماراح احتاجه خذ كلش معك وثالثا وهو عمود الرحلات الناجحه باذن الله عن تجربه طويله وهو اذا تبي تطلع محل بعيد واول مره تقنص له او تكشت يمه اقل شي يكون معكم عدد 3 سيارات مكمله من الى واخيرا وليس اخرا الورد اليومي فهو المنجي بعد الله من كل شر تقبل مرور اخوك ابو ساره

[صبر]

أخي العزيز

الأخ محمد الشاوي عطاك الزبدة

دامك أول مره

أولا - لازم يكون معك سيارة أخرى وثلاث سيارات هذي غرض روق واهي أفضل شي

ثانيا - أختر الخوة الطيبة وهذا مهم جدا

ثالثا - روح مع الخط السريع وتمش في حائل همن جبه همن النفود وخلك حول الخط ولا تبعد ومر على معالم النفود كالعليم
وأعتقد سوف تشبع رغباتك بدون تعمق وهناك وسوف تشاهد النفود وتحدد أنت قدرتك

رابعا - وهو مهم التخطيط المسبق والمدروس

لازم تجمع معلومات كافية وخرائط وما إلى ذلك وكلها متوفره هنا في مكشات

[ذيب عالية نجد]

السلام عليكم
أمنية حياتي الذهاب للنفود الكبير التي بإذن الله سوف أزورها يوماً ما
أخي الإخوان ماقصروا معك من ناحية النصائح وسأزود عليها خصوصاً إذا كنت ستذهب لمكان لم تزره من قبل أو فيه نوع من المخاطرة الله يحمانا وإياك ومن يقراء أهم شيء أن تخبر أي شخص من عائلتك بالأماكن التي ستزورها أو ممكن الذهاب لها لكي لاقدّر الله إذا حصل شيء مثل تغريز أو أعطال يمكّن الباحثين من تحديد المنطقة التي ممكن أن تكون متواجد فيها
هذا مالدي
تحياتي لك

[الاصلي]

اخوي احرص انك تاخذ معك قارمن وكنود ضروري
الله يستر عليك

[عاشق بطولة]

السلام عليكم ورحمة الله وبركاته.
أخوي من ناحية خوفك من النفود الكبير امسحه من رأسك . خذ العلم مني وانا اخوك انا رحت للنفود اربع مرات والخامسه ان شاء الله في العيد . من ناحية قول البعض انه وعر جدا هذه وجهة نظر خاصة بهم لكن اعلم حفظك الله اني في روحاتي رحنا مع باترول ديزل وبنزين وهايلوكس وددسن والحمد لله ما عانينا من شي بس اللهم الهايلوكس غرزت ثلاث مرات ( كلهن استهبال من الشباب ) لكن ضع في كفرات الجيب 15 وكفرات الدفرنس الواحد (هايلوكس او ددسن ) على 10 وبإذن الله راح تدعيلي .
مع العلم ياخوي حنا داخلين مع جهت الحيانية شمال تربه تقريبا ب 100 كيلو ثم دخلنا يم النفود الى نقرتنا تقريبا 60 كيلو . (لكن لابد انك تكون نوعا ما حذر ولا تنسى القارمن والكنود ). أتمنا رحلتا لك موفقه،،،،،،،، تحياتي

[يوسف 206]

السلام عليكم
اخوي انا ذهبت للنفود الكبير قبل خروج طريق حائل الجوف
انا انصحك انكم تروحون سيارتين افضل
بعدين اذا مسكت السريع استمر بامشي حتى ينتهي الارطى ويبداء الغضى وانصحك لاتدخل مع الارطى لأنه اكثر تغريز ويصعب المشي فيه ادخل مع الغضى اسهل للسياره

[اهل الردات]

والله ان مابها شي ولا تخوف انا من اخذ اهل حائل كل خميس اخذ هاهلي لمها ونام هناء يالى السبت

[محمد الشاوي]

اخوي محمد بارك الله فيك
معلومات مفيدة الصراحة

طيب وش المطلوب للروحة هناك ؟ يعني يحتاج صيج للغرازات لأن يقولون الغراز في النفود الكبير قوي
ابي معلومات أكثر وتفاصيل اكثر خصوصاً ان ودي امسكها نفود

ودي بأكثر المشاكل اللي تواجه الكشاتة هناك اجمالا وزي كذا

انتظركم والله لا يخلينا منك اخوي محمد

طبعا لا بد من تنزيل الهواء إلى 20 أو 15 لكي يسير الموتر مرتاح ويمكن ماتحتاج الدبل أبدا مع إن الأفضل تخفف الهواء وتمشي بالدبل الخفيف ( أريح للموتر )

وإذا أردت إحداثيات ووصف أو أي شيء فأرسل رسالة على الخاص وسأكون حاضرا بكل ماتريد إن شاء الله .

[سهيل تميم]

ماقصروا الاخوان

وبالنفود اذا كنت منت متعود عيها نصيحتي لك لا تغامر ..يعني امشي مع الطريق الاسهل بالنفود

واهم شي الاجهزه وخزن احداثيات مدخلك ..ومثل ماقالو الاخوان لاتروح بأقل من سيارتين..

[المكشات]

أما اللي يقول لا تخاف من النفود هذا متساهل ولا يتورط إلا المتساهل أو انه بطراف النفود ويحسب انه قطعها

أنا جيت النفود وقطعتها شرق - غرب

والله ما ينتهاون بها خصوصاً منطقة (حفر ابن رخيص وماحولها ) وهي أوعر مناطق النفود

بالنسبة للبنزين فيه بنزين (بيع تنك) بمنطقة تسمى (نقذة) بقلب النفود شمال حفر الرخيص وهي على اسمها نقذه
أوعر منطقة بالنفود هي ما بين نقذة وحفر بن رخيص وهي منطقة تسمى السدود

وصايا لا تتهاون بها :

- سيارتين على أقل تقدير، واذا جيتوا مناطق الوعر لا يدخل الثاني لين يطلع الأول عشان ما تنشبون جميع برباضة.
- ثريا أو آيكوم.
- ماطور هوا. واستبنتك تصير متفقدها.
- تانكي ماء كبير شوي.
- جارمن مع احداثيات العدود والقلبان وبيع البنزين .. أو خبير بالمنطقة يكفيك.
- عزبتك كثر بها من الاكل الجاف (النواشف) احتياطاً.

أما الحطب لا تاخذ معك حطب .. على قفا من يشيل


أما المتعة فهي والله براسي متعتها لها حول الثلاث سنين

موفّق

[تركي الضرغام]

السلام عليكم
أنا كان لي زياره قبل 4 سنوات
وكان دخولنا من جهة تربه حايل على عذفاء على الحيانيه ما شفنا شي يخوف بالعكس أرض شرحه ونقر واسعه وحطب يالله من فضلك بس قليل تشوف أدمي من كبر الأرض
أنا أقول الأشياء للي تحتاجها هي أكثر من سيارة أجهزة قارمن أحتياطيه وجهاز ثريا للأتصالا عبر الأقمار الصناعية
وفيه أمامن بالنفود يقال أنها خطر ؟ ؟ ؟ ؟ ؟ إذا دخلت من وسط حايل وطلعت على النفود الكبير يقال والذمه على الراوي أن النقر كبار بالحيل والدروب محيوسه من الوايتات الدفع الرباعي لأصحاب الحلال