قررت اتهور غدا..

[بروق حايل]

جائكم البيان التالي:
بحمد الله ونته نحن بروق حائل وفي هذه الليله المباركه قررنا ان نكشت بكره بالبزارين الى احدى البران والاشاعيب او الفياض المناسبه
وقد اخذنا خيمه لابأس بها ولدينا العده والعتاد لهذه الرحله ابتداء بالملح وانتهاء بالخاروف
ولجهلنا بالمناطق الجميله بهذه الديره قررنا الاستعانه بالوجوه الغانمه لتحديد الموقع المناسب
وحيث ان رحلتنا الى المساء فقط
نأمل التعاون معنا وجزاكم الله خيرا
على الجهات المعنيه انفاذه
ولكم فائق الاحترام والتقدير

اخوكم بروق حائل

[شاهد عيان]

بزارين مممممم فكرة حلوة بس الخوف من أن يذبحهم البرد !
تروحون وترجعون بالسلامة

[ابن البكيرية]

نتمنى لكم كشتة سعيدة ،،
مادامك بحايل ترى ( عقده ) زينه ، وانتبه لاتقرب للشعبان

[جبال اجاء]

اللقب بروق حائل وعلى كلامك منت من حائل لانك تقول قررت اتهور

يا اخي مافيها تهور ولا شي اذا انت تبي ترجع قبل المغرب ترا ما يحتاج خيمة

على العموم انصحك بشعبان عانقة اللي شمال حائل 15 كم على طريق حائل جبة

بعد ما تتعدى قرية نقبين بحوالي 4 كم على اليسار تلقى شعبان وطلح وبطاحي حمراء

وترا في محطة نقبين كل شيء حطب واغراض الرحلات حتى الفواكه تلقاء فيها

[بروق حايل]

الله يحييكم ويسلمكم جميع
صحيح بحايل بس مو من حايل الاصل يعني ضروف العمل
والخيمه اخذتها بس عشان احس نفسي برحله بريه
وهذي نقبين ناويها ناويها مايبيلها كلام
يا انا يانقبين
تسلمون على الباسينق يالنشاما

[ربع 91]

الله يحفكم بحفضه ونتبه للبزاااارين

وعليك بالاذكار

وكل عام ونتم بخير


اخوك
ربع 91

[* Storm *]

بالتوفيق وانا اخوك

[الشمالي 2010]

الله يكون بعونك واحلى شي خلك قريب من الرعيله او عانقه ولو ان الاجواء هاللحين ممطرة وبارده وماتصلح للبزران

[ابوعدي]

احسبك بتروح للربع الخالي على القرار والتهور....
لكن الله يونسكم بالعافية وخذه مني نصيحه حايل اي جهة تروح تلقى الاماكن اللي تفتح النفس والشباب ما قصروا وانصحك تروح للمناطق القريبه للجبال اذرى من غيره وقريبه للديره ( _ عانقة _ نقبين -طريق جبه كله اماكن زينة على يسارالخط الى خمسين كيلو وانت واختيارك تبي الشور رح الى المغواة فيه شعيب يفتح النفس وقريب الا وسط حائل وهدوء وما حولك احد وانت متجه للبوابة حقت منتزه المغواة ثاني فتحه رصيف ادخل يمين لجهة الطلح وامش بجنب الطلح(باره) لما توقف بالمصك وافرش الفرشه علشان الصفار معك وشفت الجو برد وما ينجلس ترجع من قرب والله يونسك بالعافية وانتبه اذا الجو مغيم هج عن الشعبان لا تصير قوي