بسم اله الرحمن الرحيم
السلام عليكم ورحمة الله وبركاته
أنا بإخوان يالرياض عندي باترول 99 SGLE نظيف ولله الحمد وتحت إيدي ماأحد يسوقه غيري والى الان ماشي ولله الحمد175000 من أول ماطلعته من الوكاله عام99 حسيت فيه رجه بسيطه جدا بعض الاحيان وخصوصا الصباح تكون الرجه لثواني معدوده وتروح وديته للوكاله وهو تحت الضمان وقلت فيه رجه جلس عندهم الموتر يوم وأخذته منهم ولا كأنه تغير شئ على ماأذكر وعموما كانت الرجه ماهي مقلقه في ذلك الوقت.. الان المهم من يوم الجمعه الماضي صليت الجمعه وطالع على طريق خريص أمشي تقريبا 100-120وفجأه بدأ الموتر ينتفض والدركسون يرقل رقل كأن مسامير الدركسون والاذرعه والمقصات وكل مسمار بالسياره تبي تفكك (أعتقد أني أكلت المطانيج اللي تكون في بعض الخطوط) أو (إني وطيت غرفة تفتيش )(الله يكرمكم)الصراح خفت وإرتعت وهديت بدون عقل واللي زاد روعتي كان معي عيالي الذكور الله يصلحهم (وتخيلت أشياء الله يحس الخاتمه)والخط مليان تريلات.والحمد لله هديت وجات سليمه واصلت مشواري والرجه على خفيف وكذلك وأنا راجع من مشواري الرجه على خفيف (والصراحه أنا كنت أمشي مهدي من الخوف واللي شفته).
مع العلم أن الكفرات والجنوط سليمه ونظيفه وكذلك الجلد.
سألت وبحثت بالمنتدي ودلوني عيال الحلال الى عدة سبل وأشخاص لإصلاح الرجه:
إتصلت على الاخ عبدالرحمن اليوسف ميكانيكي ولكنه للأسف لايرد على الجوال.
إتصلت على يماني ميكانيكي وجدت رقمه بالمنتدي ولكن جواله مقفل من يوم أمس.
إتصلت على أبو صالح التركي أمس الاثنين والحمد لله وجدته ووصف الورشه ورحت له وفك الفليورات ولا حصلنا الوردات أو الوجيه اللي بها أربع فتحات في مكانها . وينها الله أعلم (يمكن الوكاله شايلتها يوم أقولهم عن الرجه أول ماطلعت الموتر) مع العلم أني متأكد 100% ماحد لمس موتري سواء ميكانيكي أو غيره إلا وأكون موجود مع الموتر طوال الوقت. قالي أبو صالح التركي أجل بنخرط القاعده حقت الرمان قلت له إصبر شوي ماني مستعجل (والمشوره زينه بهذه الامور لأن الخراب ماهو واضح ومكان محدد أبشاور وأردلك.
اليوم الثلاتاء على الدائري الشمالي هبلت بي الرجه (امشي وراء التريلات اللي محمله ويالله تزحف ومهدي بالمره).
الان ياإخوان أبغى رأيكم ومشورتكم.
والله يحفظ الجميع من كل شر
أدري إن القصه طويله لكن كنت أحاول أوصل الفكره قدر الامكان إلى القارئ.
والسلام عليكم
رد مع اقتباس
المشاركة الأصلية كتبت بواسطة ابومحمد 16
