15 نوفمبر 2015 - 16:514 نوفمبر 2015 - 21:27 منتديات مكشات


لمتابعة "الأحوال الجوية والرحلات" عبر جوال مكشات أرسل الرقم 1 إلى 809207 (اتصالات) - 601259 ( موبايلي )

::::::: تابعونا على تويتر مكشات :::::::


مرحبا بكم في منتديات مكشات

::::::: تطبيق مكشات للأجهزة الذكية :::::::


تفعيل العضوية

إرسال كود التفعيل

مركز تحميل الصور

باحث قوقل لمكشات

الرصد الجوي

رادارات المناطق

إستعادة كلمة المرور

تنبيه : منتديات مكشات تمنع عرض أو طلب الأسلحة أو الذخائر بكافة أنواعها ، كما تمنع طرح مواضيع عن أي أسلحة عسكرية
صفحة 1 من 2 12 الأخيرةالأخيرة
النتائج 1 إلى 15 من 22

الموضوع: ديوان الشاعر / يوسف الخليفة ( أبو عبد الله )

  1. #1
    تاريخ التسجيل
    Dec 2007
    الدولة
    الرس
    المشاركات
    11,607

    ديوان الشاعر / يوسف الخليفة ( أبو عبد الله )

    قصيدة بدون نقط وبدون تنوين عدد ابياتها ( 124 ) بيتا


    الله الواحد عدل كل العلل=مهلك امم عاد مع كل الملل
    وطى ادم للوطا مع حوا حل=سار هالعالم على حكم الودود
    الحكم اول ولا حط الولد=سوا ملكه والسما ما له عمد
    اوحى للرسول طه والمسد=ملكه وكلام له ما له حدود
    مالك العالم حواهم والملا=للعلو الله عداه وعلا
    حط للحرد الولد وسط السلا=طور اطوار الاوادم ورع وعود
    ادم وحوا هداهم للسعد=ما لهم والد ولا صاروا لاحد
    حرم اكله وادم اسرا له عهد=مال ادم واهمل لكل الوعود
    راح لمحول الوطا وامسى لعسار=العصى والرمل له حامل ودار
    واعسر الاحوال للكد وعمار=وارسل المارد عدوه اللدود
    صار للعالم صورها والاساس=طول هالساعد مكرر له مساس
    كما عامود السكك له صدر وراس=الله المولى عطاه اسم وردود
    طلع العالم رحامه والعمام=والحمو واولادهم والسام وحام
    هو اساس الحال لو هو للعدام=كله اولاد الملا لادم ردود
    والرسل هم احملوا هم الامم=ادوا امر الواحد العدل الحكم
    حطموا كل العلل رسل الهمم=داروا الحماد والحصى لهود
    صاروا سدال العلا حل وسدل=واحملوا كل الحكم معها العدل
    كالحمام الحلو لطار وهدل=امسوا الرسل لهالعالم عمود
    الهوا هام لهواهم والحمام=والسطع لاح لحلاهم كل عام
    حالهم للدوم ولله الدوام=عطوا الورد الحمر احلا حصود
    كما هود وصالح وموسى ولوط=معهم محمد وهو حد محطوط
    وكل واحد حوله اعداد ورهوط=حرم الله على كلهم الدود
    دام هالاسلام اعوام ومداد=حل طول الدهر واحواله صماد
    كما ورد الحوا لحل الحصاد=كما حلو الما ملا كل السدود
    حل عصر مطور لعلم المواد=ولد ادم سار كالحر لهداد
    طار كالحوام حصل هالمراد=هالاوادم طوروا علم الصعود
    ما احلا هملول المطر حل وهطل=سال وساح وراح لطلاح ومهل
    سار للرس وحصى حره وحل=ساح للدحمول وادروع وعدود
    حام وهام وحار ممطور الرهام=المطر سال لحصاها والهدام
    طال دروه للحماد وللرمام=ساح ماه لكل دوح وروى عود
    الهوا عطه سرا للروح راح=والرعد دوا الصدا والسطع لاح
    والرهام السود للامواه ماح=دار دوار الهوا لحس الرعود
    الدحول لماها عده كالسطل=حولها كل المحادر له مهل
    ساح دوه درهم الما للدحل=احلا حاله والله المولى ودود
    واعطى ورد سهولها حلو السوار=مدهل الحرد ومعه سار الحوار
    حوا والعرعر ملا رمل وسمار=هل معه الطل واسهود ومهود
    كوم حصد دار للحوم ولعى=حول لرمله على الحال ورعى
    مد لاوسع دوه وراح وسعى=دار حول الطلع واطوال الورود
    والحدر حول على طلح وسمر=على راك الدوح والعود الحمر
    ساطع الصدر وهوا العود وطمر=ما احلا لحم كرورها لصار سود
    وام سالم مع هكا الحمر طمور=لسمع حسه حدا السمع السرور
    الهوا لا صرد ولا حم الحرور=والورل هام لحماها هاللدود
    حام حول اولادها هد وهمد=اودع لروح ام سالم للكمد
    ما له الا الواحد الله الصمد=والورل راسه على العسر محدود
    والكرك حام وملا رمل السهل=صاح حلو الحس ما لحسه ملل
    لحمه الاسود كما حلو العسل=اول وروده على سعد السعود
    والرهو حوم على الما والحماد=للسواد وللحمار وكالرماد
    اهلا اهلا مع وطاه الكل صاد=السلاح اطلوع ملحه كالرعود
    احد راح لهامل الدو الحلو=راحوا لصحصح على عده مرو
    حلو ماها كما معسول الحسو=امرحوا والعصر ساروا للسدود
    الكرك الاكحل اسرع واطردوه=صار حول المرمى حدوه ورموه
    طاح واحد واطردوه وكسروه=طاردوها كما حراس الحدود
    المسا عسعس وراحوا واسهروا=لموا الاعواد وارطا ولعوا
    واحمسوا لحم الكرك عاد امرحوا=والدلال ولام واوساع وركود
    حطوا المسمار لاحداها عطر=ما احلا ماها مصدره هطل المطر
    مع هل الكار الهوا مال وحدر=ما حداهم حامل لمسراه كود
    السهر طال السهر حل الكرا=سحمها له حوم واهلاله سرا
    واللموع ركود وارسومه عرا=ما وطا لسهالهم اهل الملود
    كل واحد لو حكى طول السمر=علمهم ما هو ملل موسع صدر
    واحملو لولو سواحل مع درر=اهل حلو العلم للطولا صعود
    حملوا كور العدو رطل ورطول=مدوا الطولا هل العلم العدول
    هم ورود الرمل واطلوع السهول=كلهم للعدل حراس واسود
    والرسول محمد الطاهر امام=حامل المسك المعطر والحسام
    راس هالاسلام سطاع العسام=هو رسول الله سطاط الحسود
    عم علمه اهل روما مع مصر=ارسل الله له الاسراء والعصر
    والمسد والملك حاملها عمر=رسمها الطاهر حوا الكسر ومدود
    ام والوالد لهم سمح الاولاد=حاكهم وارسم لهم حلو الوداد
    عد وادمح كل الاعمال الحداد=عامل الوالد على سهل الردود
    واوصل الارحام مادحك العدل=واصلك حاكم على العالم كمل
    الله اكد وصلهم ما هو همل=حصل الاعمال واعمل للحود
    لسأل معدوم لهله مدها=وادعم احوال العسار وردها
    واسرع لمعسر كدح مع كدها=واحرص لدعم وعطا ما له حدود
    ما رداه المرء لو هو عود دور=العمر حده على حال العسور
    ما له الا سمح حاله والسرور=لو عطا للحر او راح لصرود
    عامل العامل على سهل الكلام=واكرمه لصار مكمل للدوام
    حده الله للعمل راد الطعام=والعسور احوالها للحال سود
    لسرا راس الهوا والعلم مال=اسلك المهد العدل اسما عدال
    واسأل العالم حرامه والحلال=واركد لدارك الا صار الصدود
    سمع سموعك صلاحه والسلام=عوده حلو المسامع والكلام
    والحلال احلا الحدا وهدل الحمام=مسلك الاسلام ما حدك لكود
    واكرم الاسماح هم اهل السرا=لدركوا دارك مع العصر وورا
    اعمل الوالم طعام اهل الكرا=عطهم الداسم عسى عمرك ركود
    حط حرك حامل لمحماه دس=هده للحم السعد دور وعس
    لمسى مسروع الهوا ما دار حس=لمسى ما حرك على صحراه عود
    العلوم الكلح ما له مرسى رمل=ما لها حامل مع المسك وعسل
    له طروح الدو هامل كالسمل=ردها عود السلم عود محدود
    والسهر ما له مع الراكد مدار=لحدا راس المولع حار ودار
    كالحمام المهرع لحوم الحرار=هام راس المرء لولس للهود
    صامل العلم الله اعطاه العدال=سار كالصارم على المعسور صال
    ما له الا رماح مدوها طوال=حرها الصارم على راس الحسود
    وردك امسى درعك ورادم حماك=احرص وحطه سلاحك مع سواك
    واسال المولى مع اولك ومساك=وارسم لمسراك مصدار وورود
    واسلم وسلم على كل العموم=واحمل الود ومع المسلم رحوم
    وارسم سلوم العطا حلو العلوم=واحسم امرك لصرم وامسى لكود
    وامسك السر وعلى سرك ردام=اودعه صم الحصى ما له علام
    سكره وارسم على سوره عسام=اسلك وحصل حواسم كالاسود
    سر معاهم واسلك السلم السماح=ما لهم لك والهوا للكل لاح
    واصلح احوالك عساها للصلاح=وادمح وسامح لحد الحال سود
    وارحم الكهل العدوم وساعده=وارعى حاله وامدحه مع والده
    واحمل حموله مسالك وارده=اكد حسوس السماح لكل عود
    اسلح اللهاد ملاد العلوم=هامس الاوهام اكال اللحوم
    حامل الحرمل معاها طلع دوم=الهمل ما له معالم او حدود
    وارسم لحالك معالم له عماد=له حساس وله صدى صاعد وساد
    واحمل الورد الحمر ما هو عراد=وارسم لروحك سماح وله صمود
    واسما ما للمرء علمه والعمل=والردا لحار هامل كالحمل
    والا ما ساوا حطامه لو هلل=واعمل لدار السعد عله ركود
    الله الكامل كمل علمه وكاد=له مرد الروح ولحلمه مداد
    لعدل حالك حلاها والمراد=واسعد احوالك لسددها الودود
    الملا لو هم عصوا مع كل عام=وارهوا الاموال اكله والحرام
    ما هدم لله لو كوم الرمام=امره الحاسم هو الله محمود
    ما حرم احدى الملا طاعم وماء=كل اكل الله حطه والهواء
    حاكر طحال وكلا معها دماء=مادد العالم مطرها والرعود
    الرحوم الله والله الحكم=علمه الواسع حوا روح وعدم
    مد حلو الماء لحموط وسلم=اروى رس الدو مع كل السدود
    هو احاط العالم لكله ملك=حط للما كل لولو مع سمك
    والوطا سرا على رمله رمك=والمها والمهر مطعام الاسود
    واحمد العالم على كل الطعام=العطا واسع وهو مد الركام
    هل هامل ماه مع روس الرهام=الحصى محمر رسمه معها سود
    والموحد اسعده دوم وعطاه=سره الله احرسه وامسى معاه
    الله الواحد هو حماه ودواه=السلام ارساه كالصلد العمود
    والملا كله مع العالم عدم=كل الاسما هالكه عم ورحم
    كل عامر دار وارده الهدم=الا هالواحد هو الله الودود
    حاط علمه كل واحد ما سهى=عالم الاسرار وارحام المهى
    لم هالعالم ولا حار ولهى=والصراط الكل لمروره ورود


    يوسف الخليفة ( أبو عبد الله )

  2. #2
    تاريخ التسجيل
    Dec 2007
    الدولة
    الرس
    المشاركات
    11,607

    رد: ديوان الشاعر / يوسف الخليفة ( أبو عبد الله )

    وادي الرمة الشهير من بدايته إلى نهايته


    بسم الله والصلاة والسلام على رسول الله والحمد الله حمدا كثيرا طيبا مباركا فيه وبعد:


    يعتبر وادي الرمة الشهير من أهم الوديان في الجزيرة العربية حيث يمتد من سفوح المدينة المنورة والحرات القريبة منها مارا بالعديد من الأماكن والمعالم الجغرافية والتضاريس المتنوعة من جبال وسهول ، فيبدأ من الحرات الوعرة فيسيل ويتجه شرقا فيتغذى من روافد كثيرة منها وادي الرقب على حدود الحرة الذي يتجه شرقا ثم إلى الشمال الشرقي حتى يلتقي وادي الرمة عند قرية الثمامية حتى يأخذ مسلكه باتجاه نجد فيتغذى من وادي الجفن الذي يتغذى من جبال الشمط وغيرها متجها نحو الشمال الشرقي مستقبلا العديد من الروافد
    فيلتقي وادي الرمة جنوب شرق عقلة الصقور حيث نشاهد العديد من الجبال البارزة هناك كجبل قطن وطمية
    كذلك من روافده وادي الجرير الذي يتجه إليه شمالا محاذيا نفود العريق فيتصل به العديد من الروافد مثل :
    وادي ساحوق ، ووادي طلال ، والبحرة ، والمياه إلى التقائه بوادي الرمة حيث يمر بعد ذلك بكل من عطا وعطي وبعده وادي الداث الذي يلتقي مع وادي الرمة عند قرية القيصومة حيث تطل عليه جبال أبانات الأحمر والأسمر ، وبعده وادي النساء الذي ينحدر من جبل خزاز وغراب ودرعان غرب دخنة حتى يصب في وادي الرمة عند مزارع البدائع ، ووادي الرشا رغم أنه الآن ينتهي عند نفود الشقيقة لكنه في الأيام المطيرة كان أحد روافد وادي الرمة وهذه أهم الروافد الجنوبية البارزة
    ومن حيث الروافد الشمالية لوادي الرمة فهناك وادي القهد الذي ينحدر من جنوب جبال أجا ووادي الشعبة الكبير الذي ينحدر من جبال أجا وسلمى ورمان حيث يلتقي وادي الرمة إلى الشرق من سمراء الحاجز ثم وادي المحلاني الذي ينحدر من جبال حبشي وغيرها حيث يصب في الرمة قريبا من عقلة الصقور ، ووادي أبو نخلة المنحدر من الرحى والإصبعة فيلتقي مع وادي الرمة غرب مدينة الرس وعندما تجتمع جميع هذه الروافد وتلتقي مع وادي الرمة تذهب معالم هذا الوادي الكبير تحت نفود الثويرات في شرق القصيم وبعد التيسية شرقا يظهر وادي الأجردي الذي يعد جزءا من وادي الرمة لم تغطيه الرمال باتجاه الشمال الشرقي حيث يختفي في نفود الدهناء وبعد الدهناء يظهر وادي الباطن باتجاه الشمال الشرقي مرورا بمدينة حفر الباطن ثم الرقعي على الحدود السعودية مع الكويت والعراق ويستمر محاذيا حدود الكويت مع العراق إلى أن يصب في شط العرب .


    فهذه نبذة مختصرة لوادي الرمة الشهير فسنوات مضت بعضها ليس بالبعيد شهد جريانا استمر عدة أيام حيث توالت عليه الأمطار الغزيرة وفي الفترة ما بين 1402 إلى 1407هـ حصل له جريان جيد إثر الخيرات المتتالية فلقد وقفت عليه بنفسي مرة من المرات عند جسر النبهانية بالقرب من قرية القيصومة فعندما وصلت هناك أهالني ذلك الموقف حيث بقي على سقف الجسر تقريبا ذراع ويصله الماء فلم أمكث مليا حتى سمعت صوتا غريبا لفت نظري فوق الجسر فعندما صعدت إلى فوق لأرى ما يحدث رأيت الماء يصفق أعلى الجسر كأنه يحاول العبور من فوقه فإذا بالدوريات تخلي المكان لكن ولله الحمد هدأ سريعا وستر الله وإلا لو استمر زيادة وقت لجرف الجسر بأكمله رغم طوله وقوته وهناك مشاهد أخرى في سنوات أخرى يطول الحديث لذكرها لعل بعضكم شهدها أو سمع عنها .


    نسأل الله أن يعيد علينا سنوات الخير وأن يغيث البلاد والعباد.
    وصلى الله على نبينا محمد وعلى آله وصحبه وسلم والسلام عليكم ورحمة الله وبركاته


    ( وادي الرمة )



    بديت باسـم الحـي فـراج الاكـراب=رب البشر عـلام الافصـاح والغيـب
    اللي بسط للخلـق صمـدات واتـراب=جعل علـى الاقفـار نقـع ومساريـب
    وبارض الجزيره وادي الرمه انسـاب=تلقـى لـه بكـل النواحـي مجاذيـب
    يمشي على حصبا الحزم كنـه الـداب=درهم رجيسـه بيـن ذيـك الدواريـب
    مبداه في شرق المدينـه مـن هضـاب=ومنهاته بشـط العـرب عنـده يغيـب
    من سفح الابيض بين عسرات واشطاب=في داخـل الحـره سـواة المثاعيـب
    تصافقـت يمـه محاجيـر واشـعـاب=تلقا لهـا بيـن الرجايـب مضاريـب
    اليا ارزمت مزن النشو والضحى غـاب=وابروقهـا بيـن المثانـي شلاهـيـب
    وقمعه غدا مثل الزوابـع لـه ارهـاب=وارهامهـا دلـت تـدانـا بتخلـيـب
    وكـوم البـرد يقعـد نهـارن ولا ذاب=والنـو يلسـب مشرفـات المراقيـب
    وتوالت سنين الحيا مـا بـه اجـداب=من مقدم الخيـر ادرجـن الدواعيـب
    محايـرن تسقـي مـدا كـل مسهـاب=يجري صريفه بيـن ذيـك الخناتيـب
    فرايـع الـوادي ثلاثـن لـه حسـاب=ام الطيـران وملسـا والنيهـا ترتيـب
    بيـن الرفايـع مدهـل ثعـال واذيـاب=اكليـل والعاقـر رفاعـن شخانـيـب
    وروافـد الرمـه غـذت كـل صبـاب=تلقـا لهـا بالـدو شـق ومساحيـب
    وادي الرقب من ضلع شقما لـه ادراب=مـن الثماميـه بهـا مرتـع الـذيـب
    يمر مع ذيك الصحاري والاجذاب=جبال واديارن ربوعه زنانيب
    طميه وضلع الحضر كنه الناب=معها بدن وابدين ذيك المهاضيب
    نذكر عجاجان اللي باقي ولا عاب=تسرح معه في ما مضى شمخ النيب
    وقرى الحليفه والعجاجه والاجواب=ويضا النحيتيه وبيدن مخاصيب
    من بعدها وادي الجفن باقي مـا شـاب=من ضلع افيعيه مـع الشمـط تجذيـب
    يمشي شمالن شرق مـع كـل مجـذاب=وليـا وطـا العقلـه تسايـل بتجنيـب
    ثـم الهميليـه جـرا بكـل مثـعـاب=من مبتـدا سمـرا الشفيعـا تشاعيـب
    ثم الجرير اللـي مـداه اتعـب ركـاب=من المشف اللي غـذا وادي دريـب
    والداث رافد يحوي اشجـار واعشـاب=يسيح مـن دون الهضـاب الغرابيـب
    يمر ابانات الحمر واسمر ارقاب=ويضا عطا واعطي طينن وربريب
    والنبهانيه مع خلا الرس ضراب=وياطا العنيب ما بقاعه طحاليب
    وادي النسا من بين درعان واغـراب=من غرب دخنه كالضـروع المحاليـب
    ثم الرشـا وادي لـه السيـل مـدلاب=يصـب باعـروق الرمـال المكاثيـب
    هـذي اهـم رفـود واديهـا مجنـاب=واما الشمال نقـول مغذاهـا وانجيـب
    الاول اللـي لـه مسيـل وتسـحـاب=وادي القهد من عند اجا لـه مداليـب
    ثم وادي الشعبه من ضلوعـن قـراب=من يم اجا وسلمى وروسن مصاعيـب
    السيل من رمان ينساق محلاب=ينزل على مجراه ما به دغاليب
    بارض المحلاني مع قطن واديـه جـاب=سيلن درو يجري كمـا دفقـة الشيـب
    وابو نخله عنـد الرحـى لـه تلسـاب=لصـار نـوه كالغـروب المزاعـيـب
    ثم البدايع بين الاطعاس هراب=يروح وحده من شمالن على زريب
    ثم يسقي عنيزه على النفد رساب=وجنوب بريده بين الانفاد واخبيب
    وليا كملـت كـل الروافـد بالاسبـاب=يغيب حـدر النفـد لا شكـن او ريـب
    تحت الثويرات اختفى ما لـه قضـاب=شرق القصيم بليا حـوض ومقاضيـب
    عقب الدهنا يظهر مـع البيـد ذهـاب=ويسمـى بالباطـن ولا فيـه تعريـب
    يجري مع الرقعـي وداعـن بترحـاب=طاش الخليـج نهايتـه وادي الطيـب
    الله من يومن جـرى يطـرب طـراب=من عالـي الحـره جروفـه تناهيـب
    تضوي عليه النود فـي كـل الاقطـاب=مزونهـا مثـل الهضـاب المشاهيـب
    تشرب رفيعات الشجـر عرقهـا طـاب=ومن الروي يظهر خضـار العياسيـب
    يـوم الزبيـدي يحضـره كـل جـلاب=والاقط وافـر مـع نجـوع وجلاليـب
    ما ينزل الهاشل بلـد عكـف الاشنـاب=الا يشـوف الخيـر بيـن المعازيـب
    وقتن به الخـرب يتـوارا بالارجـاب=والحـر الاشقـر يلفعـه بالمخالـيـب
    يوم القطـا ينـزل مجاويـز واسـراب=فيهـا الارانـب بالدعايـب لواعيـب
    دنيا تـرا مـن يقتفـي جرتـه خـاب=مـا فيهـا غيـر المايلـه والعذاريـب
    وصلاة ربـي عـد مـا يفتـح كتـاب=على النبي الهاشمي خيـر مـن جيـب



    يوسف الخليفة ( أبو عبد الله )

  3. #3
    تاريخ التسجيل
    Dec 2007
    الدولة
    الرس
    المشاركات
    11,607

    رد: ديوان الشاعر / يوسف الخليفة ( أبو عبد الله )

    قصيدة بسبب تأخر الأمطار



    الوسم خلص وانعدم هطل الامطار =ولخشوم مزنن بالمغيب انتحرا
    عشنا ثلاث سنين من عج لغبار=يالله من سو المعاصي انتبرا
    مرت بنا الايام باشباط لاذار=والبرد يصرد لو نجي وانتذرا
    وليا تطلا المرزم بعدة اشبار=في شهر اغسطس ذقنا بالقيض حرا
    واخذت لي مع دو الاشجار مشوار=فيه الذعيذع بالعثامير يذرا
    قفرن دميثن ما وطا فيه ديار=من عام الاول والمطامين غبرا
    ولا بقا به غير مقلول الاشجار=بقايا عشرق بالدواعيب خضرا
    على وطاها القش من عش الاطيار=واشجار جثجاثن على القاع ثبرا
    وانا على المقسوم راضي وصبار=ومن لا صبر يحمل على الكف وزرا
    هذا قدر ربي وهو رب الاقدار=مشيئته كانت وتتكون جبرا
    يالله يا رب المداين والامصار=يرجيك عبدن سورة الكهف يقرا
    ترسل علينا وابل المزن مدرار=من غرب ينبع ترزم لشرق شقرا
    سحايبن تفرش مفاسيح الاقفار=يمشي رجيس السيل مع كل مجرا
    فيها الرعد يرزح وتهتز الاحجار=وابروقها بيضا ومرات حمرا
    تفرش على سيحاتها كل الازهار=يصير عشبن في سهل كل صحرا
    فيها الزبيدي يشدي لروس الابقار=ويصير عرجونن كما راس عجرا
    واستانس وربعي على واهج النار=ناخذ لنا مع فسحة الوقت مسرا
    فيها الحباري دورجت صابها ذيار=ملوبداتن في دواعيب سمرا
    مواسمن ينجع بها كل صقار=ينقل على كفه وليفن مضرا
    طيرن مخاليبه كما راس مسمار=حرن به الريشه على الصدر شقرا

    يوسف الخليفة ( أبو عبد الله )

  4. #4
    تاريخ التسجيل
    Dec 2007
    الدولة
    الرس
    المشاركات
    11,607

    رد: ديوان الشاعر / يوسف الخليفة ( أبو عبد الله )

    مسابقة في الرد على قصيدة


    بسم الله الرحمن الرحيم


    حياكم الله يا قرائنا الكرام ونطرح لكم قصيدة ونريد من يرد عليها و يأتي بمثلها وفقا للشروط


    1- التوافق في نفس عدد الأبيات مع قصيدة المسابقة


    2- أن تكون مقفاة وموزونة وعلى نفس الوزن والقافية وتنتهي القافية بالنون والزاي


    3- أن لا تحتوي قصيدة المتسابق على أي كلمة من القافية وهي عجز البيت من قصيدة المسابقة الأصل فمثلا عندما نذكر كلمة ( صالح ) مثلا في نهاية البيت الأول أو الخامس أو 00 لا يذكر المتسابق كلمة ( صالح ) في نهاية عجز أي بيت من أبيات قصيدته


    4- لا يسمح بذكر أكثر من كلمة واحدة أجنبية في نهاية الأبيات جميعها فمثلا عندما يذكر كلمة أجنبية في نهاية عجز البيت الأول فلا يذكر أي كلمة أجنبية في نهاية جميع باقي الأبيات


    5- القصيدة من الشعر النبطي العامي



    وإليكم القصيدة


    جعلت سري بالمغاليق محــــجوز=خليته بمكنون بالي كما الكنــــــــــز
    حطيته بغبات قلبي له حـــــــــروز=وامنع نواقيطه اليا بان له نـــــــــز
    ابديه للي في ضميري له ركـــــوز=اللي على مثلي بالامجاد عنـــــــــز
    اخير منهو بالعلاقات مــــهزوز=اللي تباطا بي عن الود حنـــــــــز
    اللي عطاه من الطويلات مجـزوز=دايم عطياته من الطيب باقنـــــــــز
    لو يعطي القفضه يتابعها باحـزوز=عطا مثل هذا كما الجيف مخنـــــز
    حتيش لو يعطي كدالك او بنـــــوز=كله سوا لو هي من المجربه عنز
    لصار شكله بالردايا له رمــــــوز=العنز من مثله تساوت مع البنـــز
    لو هو يكوبر بالمشالح على روز=او يلبس الجاكيت مع غالي الجنز
    العلم دينه للي مثله به يفـــــــــوز=والمال ما ينفع اذا فيه فلونــــــــز
    لو انك تخاوي حلاياه مخبــــــــوز=تصير مثل اللي بنعشه مجنــــــــــز
    اليا بغيت العلم تلقاه مهــــــــــزوز=وليا عطيته صامل العلم خانـــــــز
    يكفيك طيّب لو سبوته به خـــــروز=ولباسه مرقع به الناس تطنــــــــز


    يوسف الخليفة ( أبو عبد الله )

  5. #5
    تاريخ التسجيل
    Dec 2007
    الدولة
    الرس
    المشاركات
    11,607

    رد: ديوان الشاعر / يوسف الخليفة ( أبو عبد الله )

    قصيدة عن البرد الشديد


    البرد عزر بي وانا منه ضــــــــــــــــايق=عجزت ارد حنوكي لا يرقلنــــــــــــــــــــا
    كنه نفيث السم بين التــــــــــــــــــــرايق=ينفض عظام الصدر لين احتمنــــــــــــــا
    منهو لبردن حل قابل وطــــــــــــــــايق=الا يا كود اللي مشبه مسنـــــــــــــــــــــا
    حتى السما صحون ولا من بــــــــرايق=بالليل بيض نجومها يلعجنـــــــــــــــــــــا
    خبري بوقت القيض واسهيل وايــــــــق=يوم العرب سراح منا ومنــــــــــــــــــــا
    صرصر به الجخدب بذيك الـــــــــــزلايق=حزمن زما والقاع دونه تدنــــــــــــــــا
    وقتن به الشاوي سعيدن وفـــــايق=ما يشكي البيدا ولو هو تعنــــــــــــــــــــا
    ما يلتعي يوم الروابع صفـــــــــــــــــايق=حزات نسمات الخلا يطرقنـــــــــــــــــــــا
    وجدي على روضن زهوره رحــايـق=بين الشجر زملوق عشبه تثنـــــــــــــــا
    جاه الروي واشفا الشجر للعنايـــــــــق=من الطفل خضر الورق ينقطنــــــــــــــا
    فيها عزيف الريح بالسمع لايــــــــــــق=واطيورن بغصن السلم يسجعنـــــــــا
    والورق فوق الراك جوزن عشــايق=وطير البلابل بين الاغصان غنـــــــــــا
    والقهوجي جنب المحاديب ســــــــــايق=يحمس جديد البن نجره يدنــــــــــــــــا
    يطرب لكيفه بالخلا كل ذايـــــــــــــــــق=في جلسة المرباع كلن تهنــــــــــــا
    جايب قدوعن من لذيذ البســــــــايق=غيدن عوالي بالمقيض ارتونــــــــا
    جلسة خلا ما تشتال كل الزهــــــــــايق=ضيقات الانفس بالفلا يبعدنــــــــــــــــا
    يطرب لها من مستكني خفــــــــــــايق=بالدنيا جنه ما عليها مطنـــــــــــــــــــا


    يوسف الخليفة ( أبو عبد الله )

  6. #6
    تاريخ التسجيل
    Dec 2007
    الدولة
    الرس
    المشاركات
    11,607

    رد: ديوان الشاعر / يوسف الخليفة ( أبو عبد الله )

    بسم الله الرحمن الرحيم


    صقر ( البيلز )


    منشأه الأصلي شمال الولايات المتحدة وبالتحديد في جبال الروك وهو شرس جدا

    لدرجة أنه يستميت في مطاردة فريسته


    وقد ثبت بالتجربة أنه يتغلب على الغزال والصيادون لا يرغبونه نوعا

    ما لصلافته وشدة طبعه


    فرخ الشياهين اللي للصيد هـــــــــــــداد=غريب من ضمن الطيور الفريــــــــــده
    عايش بضلع الروك من عهد الاجـــــداد=من نوع بيلز وما سمعنا شديــــــــــــــده
    صعبن يطبع يرهبه كل صيـــــــــاد=شرس الطبوع وما يهاب الطريــــــــــده
    ياقع على روس الزرانيق وقــــــــــــــاد=يجسر على تيس الضبى في يصيـــــــده
    وحشن جفول ولو يعلف من الــــزاد=نفسه على راعيه دايم شديـــــــــــــــــده
    له رزتن تجذب نظر كل قصــــــــاد=يستاهل وصوفن بشطر القصـــــيده
    حجمه كبيرن كنه الصخر جلمــــــاد=والا العقاب اللي على زبر بيــــده
    واكتوفه عراضن على النيف رصاد=يفاهق الجنحان حزة هديـــــــــــــــــــده
    اللون فضي يشبه لكير حــــــــــــــــداد=اسحم رمادي عقب شعلة وقيــــــــــــده
    وانقوط بيضن كنها نجومن بعـاد=والعين مثل الليل سفعا سويـــــــــــــده
    منقاره يهول طريرن ولا بـــــــــاد=شبرية تهامي شجاعن وليــــــــــده
    والمخلب الصياد سيفن لجـــــلاد=طرير مقداده قوين حديـــــــــــده
    حقيقه انه طير فيه التوجـــــــــــــــاد=انا اشهد انه عزوة اللي يريــــــــــده


    يوسف الخليفة ( أبو عبد الله )

  7. #7
    تاريخ التسجيل
    Dec 2007
    الدولة
    الرس
    المشاركات
    11,607

    رد: ديوان الشاعر / يوسف الخليفة ( أبو عبد الله )

    الطالب والاختبار والمكاشيت


    الجو صافي والهبايب خفيفـــــــــه=والبر شجعني على شبة النــــــــــــــــار
    مشكلتي اني ما وصلت الوظيفــــه=لا زلت طالب باقي للدرس مشــــــــوار
    لاسنبل العشب وتثنا رهيفـــــــــــــه=يبدا اختباري وابقى بالبيت محتـــــــــار
    والنفس في حب الفيافي ضعيفـــــه=وقتن تهاطل فيه مغزور الامطـــــــــار
    لكني اطالع دروسن كليفــــــــــــــه=عشرة مناهج عن يمين وعلى يســـار
    كل واحدن باوراقه اللي كثيفــــــــه=ما ياسعه خرجن على كرشة حمـــــار
    علم البلوجيا فاق علم الدويفــــــــه=هذا على قول اشهب الخد بيطـــــــــار
    منتكتن نفسي وحالي كسيفــــــــــــه=عفت الغدا قبله ترا عفت الافطـــــار
    قمت ادرس التاريخ وابدا بعسيفــــه=عجزت اعسفه كله ارقامن كثـــــــار
    قلت انجلش غربي واترجم وصيفه=ولا عرفت الا ذاموس انه الفـــــــــار
    قلت الرياضيات يمكن عطيفــــــــــــه=واثره لعاويسن من الساس لــــجدار
    يقول سينن معها صادن وليفــــــــــه=يساوي الناتج كذا عين مسمـــــــــار
    الشكوا لله حالتن لي كسيفـــــــــــــه=عجزت اميز غبة الدرس واختـــــــار
    قلت الدروس علوم صلفن وحيفـــــــــه=معادلاتن كلها يود واغبـــــــــــــــــار
    كلور وبوتاسيوم وعظمين جيفـــــــه=والناتج الكربوهيدراتن يا شطـــــــــار
    والمختبر فيه المرايا نظيفـــــــــــــــه=انبوب ومحقان وحصاتن ومخبـــــار
    قلت ادرس الاملا ولا هي حسيفــــــه=لغوة عربنا حاويه كل الاســـــــــرار
    وبلشت بالهمزات آرى وازيفـــــــــه=هي نفسه الهمزه علـــــــى أد وآذار
    دخلت انا بدوامتينن لفيفـــــــــــــــــــه=يلفن التركيز من دون تذكـــــــــــــار
    رحت لعلوم النفس يمكن ظريفــــــــه=واثره علومن تقلب سلوم الافكــار
    الله لا يبلا حياتن سخيفــــــــــــــــــه=فرويد وقردن يتبعه ناسن اشــرار
    سمعت انا رعدن قوين رجيفـــــــــــه=وتهاوت بسطح المظلات الامطـــار
    جدعت انا كتابي بعيدن حذيفــــــــــــه=وفتحت انا الشباك وابديت الاشعـار
    طرت علي شعبان حصبا النشيفــــــه=اليا ارتفع فيها الزبد عدة اشبــــــار
    اليا اصطفق سيل المحاجر جريفــــــه=تخاور الوادي تقل رغية حـــوار
    يدرج على الاغصان حلون عزيفـــــه=يفرش على كل الفيافي والاقفــــــار
    هي جنة الدنيا ولا من حسيفـــــــــــــــه=حسايف اللي ما نهج درب الاخيـار
    في جنة الفردوس زان تعفيفـــــــــــــه=فيها ملذات النسايم والاشجـــــــــار
    ما فيها يومن مستحلن خريفـــــــــــــه=الحاله استمرار بانهار وازهار
    النفس للجنه تزايد لهيفــــــــــــــــــه=يالله عسانا من اهاليها الابــــــرار


    يوسف الخليفة ( أبو عبد الله )

  8. #8
    تاريخ التسجيل
    Dec 2007
    الدولة
    الرس
    المشاركات
    11,607

    رد: ديوان الشاعر / يوسف الخليفة ( أبو عبد الله )

    قم سو يا خلي من البن دله=واعدل مزاج اللي سرا ما يبالي
    تصبغ بها الفنجال ساعة تصله=لونن كما مجّة جراد المفالي
    لا بدها تركد قبل ما تزله=واحرص على ماها نظيفن وحالي
    حنا نوينا قور بيدا ندله=كشته بغيناها لرفحا الشمالي
    سهيل هل وبادر الصيد هله=صفير والدخل على اول وتالي
    كلن على ما قيل يشها محله=كلن هواه لمسقط الراس مالي
    احلا من الادغال لو فيه قله=هذاك طلحن بين سمر التلالي
    والا هضابن كنها لعوج مله=حمرن تزامت فوق نجدن عوالي
    صحيح وابل نادرن ما يهله=لكن هي الاقدار يرضاه بالي
    متى تهب من النسانيس طله=هيفية يسري معاها الخيالي
    ترشق على طعسن من المزن بله=يصير نفدن مثل لون الظلالي
    او يرسم الوسمي على القاع كله=لين يتساوا جرفها والعدالي
    في معزلن ذيب العوالي نزله=ياطا على سفحن ذرير السهالي
    يا حلوها لعقربت من سما له=اليا طفح فيها الرباب متتالي
    ترجف رعودن والفضا فاسحن له=من ضيق وبلن ساحت بكل جالي
    تزين معها نجعة قروم شله=سناعن حشامن زحول الرجالي
    سواقهم في كل قفرن يتله=ينزل على المذرا بعرق الرمالي
    وقودهم غصن الغضا مشعلن له=تسامروا في سرمدي الليالي
    وناسة اللي هالبراري هوا له=يا زينها ذيك النجود الخوالي
    كلن شهاته بالهوا مستقله=احيان شين ما يريده هوا لي
    طبعن على ابن ادم وهذي جبله=مير الهوا لازم يكون بحلالي
    ترا الحرام اجرد ولا يزين ظله=تركه رضا وطاعه لرب الجلالي
    حذرا من الدنيا تراها مذله=لا تنحني لفتونها والريالي
    احذر تصير خطات رجلك عصا له=ترا يتبدل بدركم بالهلالي
    ومن طاوع الدنيا وبدل محله=تجيه حزات الليالي محالي


    يوسف الخليفة ( أبو عبد الله )

  9. #9
    تاريخ التسجيل
    Dec 2007
    الدولة
    الرس
    المشاركات
    11,607

    رد: ديوان الشاعر / يوسف الخليفة ( أبو عبد الله )

    يجوز لي قفرن بعيد المراميس=بساطي الرمل النظيف اهتنيبه
    طعسن رطيبن ما تحفر ولا ديس=ما غير جرذي بالثمامه لعيبه
    والليل توحي به حسوس الدرابيس=فوق النثايل جافله مستهيبه
    واحكر لي بريقن لذيذن عنيبيس=والجو مشمس والطبيعه عجيبه
    شاهي حمر مستكمله بالمقاييس=الما قراحن قبل يوم بقليبه
    شغلن نظيفن ما حدته المطاريس=القز رمثن والهوادي ركيبه
    الحمرجيج اللي بليا برابيس=يقعد عماس الراس كنه طبيبه
    لابوخ الفنجال بين التضاريس=يرغي خريره فيه ساعة صبيبه
    احس في نفسي طروق الهواجيس=تفرض على قلبي رسوم الضريبه
    ملزوم اسددها على غير تفليس=اوّفي حقوق الخواطر واجيبه
    انسج عليها القاف مسحوبها قيس=يشرح سرايرها ويسقي عشيبه
    يروي زهور البال بين الدواعيس=في غبتن خضرا ولا احدن دريبه
    وثيقتن بالبال ويّا القراطيس=واحطها ذكرا ولا هي معيبه
    يالله عسى نجدن بروقن مقابيس=باخشوم مزنن مقبلاتن رهيبه
    تلوح بالمغرب سواة العبابيس=واتفوح نسمات الشروق الرطيبه
    من الوبل تمسي دعوبن مراجيس=يمشي بها الوادي ويدلب شعيبه
    تزبر سدودن بالمزارع محابيس=واحزوم نجدن بالمسايل خصيبه
    يالله يا رب الشياه المهاليس=يا رازقن فوق الزرانيق ذيبه
    يا مطعم الجفره ويامشبع التيس=يا واهبن للنمل قوتن تجيبه
    يا جامع شتات العظام المداريس=تلم كل الناس ما هي صعيبه
    يا ممكن سليمان من عرش بلقيس=خليته بحوزة نبيك كسيبه
    انك تغيث المشرفه والمداعيس=تسقي طلاحن من دهورن شهيبه
    يالله ودقن بالفجوج الميابيس=ترا حياة الخلق صارت صعيبه
    يالله فوق انفاد ما جاها تطعيس=يبرض غضاها وينحني ما دريبه
    يالله باخشوم المزون المتاريس=من ثقلها تروي حزومن صليبه


    يوسف الخليفة ( أبو عبد الله )

  10. #10
    تاريخ التسجيل
    Dec 2007
    الدولة
    الرس
    المشاركات
    11,607

    رد: ديوان الشاعر / يوسف الخليفة ( أبو عبد الله )

    غيثن هطل واقرش كما الساقي=مع قورة الدحمول مرشاقه
    دورج عجل يسيح بزلاقي=زبايده كنه لبن ناقه
    النفس لهطل الماطر تشتاقي=ويا حلوها مزنتن براقه
    شف هالشعيب اقبل له صفاقي=يرغي كما الجمل في رقراقه
    عم السهل واجروف الاشناقي=يسقي عرادن يابسن ساقه
    تسمع خرير بكل مضياقي=والا الحصا حدر به زراقه
    يا زين اليا تعدا مدفاقي=وامسى بالبيدا باين سحاقه
    يسقي بسيحه كل زملاقي=وزهور الوادي صفرا براقه
    تشبه بلونه برحي عراقي=تجني منها ثمان مية باقه
    ارضن تكوبعت حيا راقي=نفسك مع المرباع فتاقه
    ينزاح هم الضايق الشاقي=وابشوفة الريضان مفهاقه
    شوف اليهق يجعل بك شهاقي=القلب فز وزود خفاقه
    واطيور الروضه تزعق زعاقي=والعشب عم وكثرت اوراقه


    يوسف الخليفة ( أبو عبد الله )

  11. #11
    تاريخ التسجيل
    Dec 2007
    الدولة
    الرس
    المشاركات
    11,607

    رد: ديوان الشاعر / يوسف الخليفة ( أبو عبد الله )


    مريت طلحه بين ابو جلال واسواج=في شعة الصفرا صباح الربوعي
    مريت سجه وابتدا الصبح فلاج=والطير يسجع والخلايق هجوعي
    داخل شعيبن ما وطا فيه دواج=بطحا قعيره ما حوتها الزروعي
    ارضن خليه يمها القلب مخلاج=عسى الوسم يبذر بها كل نوعي
    يسقي وطاها طامن المزن لعاج=من وابلن نوه قعد له اسبوعي
    انا خطرني من ضميري تولاج=خلاني اعدي بروس الضلوعي
    لفيت لي في داخل البال دراج=يبرم على دم الفؤاد ويزوعي
    يميح مكنون الخواطر بمزلاج=لما يكبه بالمحاجر مزوعي
    يا زينها الطلحه بها الظل مبهاج=ريانتن تنهض ورقها الفروعي
    اتكي تحتها لاحتما القيض وهاج=هذي هواياتي وهذي طبوعي
    وادودل القربه على غصن منعاج=لا نيب عطشانن ولا اعيان جوعي
    ولاعسعس الخرمس اعلقبها سراج=واسمع معاوا الذيب هايم يسوعي
    تراني يا سحمان ما عنك هجاج=احذر تراني مصغين لك سموعي
    انا تراي بكيفه وفلت حجاج=ارجع ورا تلقى سراتن نجوعي
    الخايع الخالي شهاتن ومنهاج=ضلعن حمر مطمن مسيله يروعي
    فيه الذرا والورق بالراك صجاج=ينشد عزيف الصوت حسه يلوعي
    اخذتلي فيها تكاتن ومدراج=واثري تهنيت بمسيرة طلوعي


    يوسف الخليفة ( أبو عبد الله )

  12. #12
    تاريخ التسجيل
    Dec 2007
    الدولة
    الرس
    المشاركات
    11,607

    رد: ديوان الشاعر / يوسف الخليفة ( أبو عبد الله )

    ( الإصبعـــــــــــــــــــــــــــــــــــــة )


    انتويت الاصبعه في عازلن ما فيه داير=راغبن في خوة ربوعن تغدوا في قفاره
    امتطيت الجيب نيسان اللي كنه طير طاير=يطوي البيدا ولا همه معاسير السماره
    ان توايق مع مشاريف التلايع جاك ساير=يشدي الصايل من سباعن ضواري في مغاره
    وان مشى مع حالك الليل استوا دربه حداير=بالنواظر تحسب انه في مقاديمه شراره
    مع طريق اهل المصك انسل من بين العماير=مهدفن قدام ومشمل للربع باول نهاره
    انتويت رجال عزن مستطيبين الضماير=طيبهم دايم على ميسور حاله والعساره
    ناسن فهودن وفاهم ما تجي فيه البواير=الوفا منهم تشوفه ما بدت منهم نكاره
    شوشليه شوفهم يوحي لك زهورن نواير=في خصيب بروضتن يبهج هوا الناظر خضاره
    في شعيبن خابرينه كن طلحه كالمناير=طلحته من كبرها باقصى الخلا مثل العماره
    مشعلين النار وادلالن على المله بهاير=هيلن ومسمار وابريقن به اكليلن يساره
    واخرينن في رماد الجمر من حوله خداير=تحسب انه دم ريمن منتثر به من حماره
    طابخين تويس ما يشكون بالضيم الطفاير=اغتنوا بانفوسهم فيها التواضع والوقاره
    ناسن حشامن سنايع بين خلق الله نداير=التسامح والحبابه ما نشت فيها النكاره
    جلستن بالبر تسوا لو عثت فيه الدهاير=انقضى وقت الوسم والسيل ما بان انتثاره
    ما بالاجوا غير منظور العسام وعج ثاير=يفرش بكل الفيافي سافين ينثر غباره
    يالله بنودن تجينا تاتي بخيرن بداير=تسقي حزومن قواحل والنفود وكل قاره
    يمسي المرباع فيها معشبه فيه البذاير=الحماده ما تشوف بحزمها جحر الخفاره


    يوسف الخليفة ( أبو عبد الله )

  13. #13
    تاريخ التسجيل
    Dec 2007
    الدولة
    الرس
    المشاركات
    11,607

    رد: ديوان الشاعر / يوسف الخليفة ( أبو عبد الله )

    يا ما حلا قفرن بذيك المساحات=في عزلتن صمدا غطاها النباتي
    من بين زرنوقن وسهله ورضمات=فيها الغويلب تحت ظل الصفاتي
    مبيت الارنب بين ذيك الرتوجات=لاصفت لمصباحها بالفلاتي
    مرباعها خشم الضلوع الطويلات=والا المقيض بسهبن واسعاتي
    ملعابها في عثعثن ما به الشات=ما به سوا الضبعه تلوفح وتاتي
    اليا انفجت من دون دعبن وصمدات=يسطه القرناس بالصايداتي
    هوا لها بالقاع لفعن وخطمات=يشتالها باكفوفه المحكماتي
    تبي السلامه مير ما من سلامات=الطير يهفي كالرياح العواتي
    حرن تربى بالضلوع العسيرات=في راس لولاحن يحوم ويباتي
    في هظبتن باقصى النجود البعيدات=من فوقها نسور الخلا حايماتي
    تلفي عليها لاضوا الفي ميلات=وقت الغروب بهضلة السارحاتي
    في خايعن تغشاك فيه المسرات=كل الشغايا حولها معشباتي
    عزايزن بين الشجاير مريحات=والنار من جرم الحطب يابساتي
    وادنيت ثنتين المحاديب سفعات=مهيله واخرى القرنفل شهاتي
    واخذت لي في عسعس الليل تكيات=مع رفقتن ما يتركون الصلاتي
    خوة سنايع ما عليها خمالات=ارشادن وقافن ونيس وحجاتي
    ايدامنا صيدن طبيخ وشويات=ومنامنا من بين جرف وحصاتي
    ما فيها ضوضا من تناكيد الاصوات=ما غير نسمات الشجر عازفاتي
    نرقد مريحينن ولا فيها ضيقات=من فوقنا نور السما ساطعاتي
    صرنا هتاتيشن على كل وجهات=نهار والا مع خطاة السراتي
    ضوا هوانا الصيد يحلا بنجعات=هذا الولع ما له طبيب ودواتي


    يوسف الخليفة ( أبو عبد الله )

  14. #14
    تاريخ التسجيل
    Dec 2007
    الدولة
    الرس
    المشاركات
    11,607

    رد: ديوان الشاعر / يوسف الخليفة ( أبو عبد الله )

    طير الكرك بين القوانيص مرغوب=كلن عنا له بالنجود البعيده
    طيرن كبيرن دايم الدوم مرعوب=يصعب على القناص ختله وصيده
    كنه حوارن باول السوق مجلوب=يدير شوفه وامه امست شريده
    عنقه طويلن مستديرن ومنصوب=غلبا تمسس بالتحاسيس جيده
    مثل الحنش لاكوبر بجذع مشذوب=طوله ثلاث اشبار والا يزيده
    والراس عرجونن على جال مسروب=له هامتن مثل الحصاة الصميده
    ومنقاره سواة الوتد باطرف طنوب=والا كما الميبر طريرن قديده
    كن الخرز عينه بها الخيط مقضوب=يبلج بها حذرن على اللي يريده
    له غاربن فوق النحر يشلع الطوب=مكثوث ريشه مثل خوص الجريده
    وحنجرتن ما فيها بالوصف مكتوب=الا كما عذقن تباطا جديده
    لاطار جنحانه كما صفوق دالوب=تقول طربالن بريحن شديده
    ريشة جناحه كنها راس كالوب=منسوج سناره طريرن حديده
    لشفت ثنداته كما الجذع محطوب=يرفع بصدره لتوارا طريده
    ذيله قصيرن ناعم الريش مرتوب=كنه قصير الزرع ساعة حصيده
    ساقه طويله كنها الرمح منصوب=سوقن سماحيقن ثقيلن هبيده
    خطرن اليا ساح بفلاتن به عشوب=يودع زهرها مستبينن هميده
    ترا رقم سته كما القش مكبوب=لو خمس طلقاتن سرن ما يفيده
    عليك بالضغط القوي ذاك شلهوب=والا رقم واحد شديدن جليده
    تفيد بانلي لها الراس محدوب=والقولد ينفع مثلها يا وليده
    والا القديمه صارت توالا باعيوب=اليا انتخاها من حملها بليده
    ما تحتمل ضغطن قوي نوبن ونوب=خرابها واجد ولا من جهيده
    بنى عليها الوقت والوقت مسحوب=يمضي سريعن ما يهدي صريده


    يوسف الخليفة ( أبو عبد الله )

  15. #15
    تاريخ التسجيل
    Dec 2007
    الدولة
    الرس
    المشاركات
    11,607

    رد: ديوان الشاعر / يوسف الخليفة ( أبو عبد الله )


    مريت انا قفرن بعيد المراميس=بين الجبال المشرفات العلاوي
    في لايذن ما فيه ضوضا وتحاسيس=الا يا كود الصوت من ذيب عاوي
    يسري وحيف الريح جاله تهاميس=بين الغصون المبرضات الحناوي
    في عازلن قفره حسين التضاريس=الارض عثعث والمحاجر ملاوي
    شعبانها بطحا ونيسة مجاليس =يجري مسيلن بالبعيد المداوي
    قاعد تحت طلحه بذيك المداعيس=ظلالها زاين كما الليل داوي
    ترابها عقب المراهيش ما ديس=ولا وطا فيها من الناس شاوي
    موقفن جيبي كما جيش تتريس=اليا مشوا للحرب والقوم ضاوي
    ولا طرا بالقلب جور الهواجيس=مستانسن بالي بذيك النحاوي
    منثوره العده سواة القراطيس=لابعثر اوراقه نسيمن رخاوي
    معي قرومن حازمينن نواميس=ناسن لهم بالبال عشبن عذاوي
    اسقيتهم كيفن بليا مطاريس=بنن هراري بالدلال الحلاوي
    واعليت قدري بالعيون المقابيس=نوعه سويدي في مصيف وشتاوي
    دنيت يم النار مابي مواهيس=ما غير اونس خاطري باللضاوي
    النار تطرد طاريات التعابيس=عن بال منعورن مولع خلاوي
    وحطيت لحم الزاد بالجمر تحميس=ارنب فرنسيه ظهرها طراوي
    وارخيت من بالي جميع الحواسيس=انا اشهد اني بالطبيعه سلاوي
    بالليل نوحي به حسوس الهجاريس=والا الضحى طير المحاجر غناوي
    هذا وتم القاف من خاطري قيس=واعوذ بالله من زلال الخطاوي


    يوسف الخليفة ( أبو عبد الله )

صفحة 1 من 2 12 الأخيرةالأخيرة

معلومات الموضوع

الأعضاء الذين يشاهدون هذا الموضوع

الذين يشاهدون الموضوع الآن: 1 (0 من الأعضاء و 1 زائر)

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •