15 نوفمبر 2015 - 16:514 نوفمبر 2015 - 21:27 منتديات مكشات


::::::: تابعونا على تويتر مكشات :::::::


مرحبا بكم في منتديات مكشات

::::::: تطبيق مكشات للأجهزة الذكية :::::::


تفعيل العضوية

إرسال كود التفعيل

مركز تحميل الصور

باحث قوقل لمكشات

الرصد الجوي

رادارات المناطق

إستعادة كلمة المرور

تنبيه : منتديات مكشات تمنع عرض أو طلب الأسلحة أو الذخائر بكافة أنواعها ، كما تمنع طرح مواضيع عن أي أسلحة عسكرية
صفحة 2 من 2 الأولىالأولى 12
النتائج 16 إلى 22 من 22

الموضوع: ديوان الشاعر / يوسف الخليفة ( أبو عبد الله )

  1. #16
    تاريخ التسجيل
    Dec 2007
    الدولة
    الرس
    المشاركات
    11,605

    رد: ديوان الشاعر / يوسف الخليفة ( أبو عبد الله )

    ( الجيب التويوتا الربع )


    جيبن ربع يمشي على الطعس مرتاح=ما عرقله عوق النفود وغرازه
    يمضي كما الزورق بالامواج طفّاح=عزمه شديدن والصعايب اجتازه
    ماشي على دربن تغشلته الاسماح=يسري على قفرن عريضن عزازه
    موتر خلا ما عضدوا له بالاصلاح=متناسق التفصيل عالي طرازه
    بالقيض يشبه للخرينق بمصباح=يرسم عليه الظل طال التزازه
    والا الوسم قرناس يكفخ لملواح=طيرن شطير كفوف عجلن فزازه
    في كل فجن بين الاقفار سواح=ياخذ معه مشوار وقت الاجازه
    ما يزلق بعسرات الاطعاس وينزاح=يرسم حوايفها سواة الخرازه
    مدهاله عروقن تولتها الارياح=فيها الغصون اللي تخالف هزازه
    هادي سليله للعساير بمرواح =كما الكسور اللي بعرض القزازه
    عزمه قوي لاعلا المطاليع نطاح=عدّا كما ذيبن سريعن قمازه
    والا كما فزة بدن حس باسلاح=سمع الحساس وجاه صياد هازه
    ذيب الرمال اللي على الطعس وضّاح=يشادي من فوق اللواليح بازه
    يا ما حلا مزنن على ديارنا لاح=وغطا مغيب الشمس قام ارتكازه
    على الفضا كله به الرعد رزّاح=كل الصخور السود يبدا اهتزازه
    يزيد وبله بالعدانه وينساح=يملا محاجرها وقاع ارتوازه
    يالله ياللي موجدن كل الارواح=يا باعث الاموات عقب الجنازه
    ترسل لنا ودقن على كل الابطاح=وتغيثنا يا رب من كل عازه
    من جده ومكه اليا شرق الاسياح=على شمال الجوف لين المحازه


    يوسف الخليفة ( أبو عبد الله )

  2. #17
    تاريخ التسجيل
    Dec 2007
    الدولة
    الرس
    المشاركات
    11,605

    رد: ديوان الشاعر / يوسف الخليفة ( أبو عبد الله )


    يالله انك تقلب ديار الجزيره=مثل جو جنيف مع نسمة باريس
    تجعله بالصيف مرباعن مطيره=تشبع البل وغنم قفره وتيس
    تمسي حزومه حدايق مستديره=نقدع المنقا عقب شقرا ويبيس
    نقطف المشمش والاثمار الكثيره=نشرب من الجوز من عقب المريس
    يجري نهرن من حقل اليا عسيره=واخرن من طيبه اليا ديار قيس
    يمسي فيها الشاوي مرتاحن ضميره=لا يحيل وما يبي فيها عسيس
    ما عليه ان يسكن الخالي بديره=او ذرا اللولاح ما فيه الانيس
    والجمل بافياضها تسمع هديره=خلفه الراعي يغني بيت قيس
    هذي نجدن يا عرب حايس مريره=الغضا والطلح فيها دردبيس
    رمثها مغبر لونه كالشعيره=اصفرن ما داجه طروش وحسيس
    له ثلاث سنين من كير لسميره=ما غشاها السيل غير اللي بخيس
    يالله الوالي عسى اللي جانا خيره=الخزاين في مدا ملكك تريس
    يالله انك تجلب خيال بمسيره=يمة اديار الكرام النباريس
    المداغيش اللي وافين السريره=من قعد معهم وجد خير الجليس
    واطلبك يالله يا ميسر عسيره=تسقي القفرا غدا المبرض حميس


    يوسف الخليفة ( أبو عبد الله )

  3. #18
    تاريخ التسجيل
    Dec 2007
    الدولة
    الرس
    المشاركات
    11,605

    رد: ديوان الشاعر / يوسف الخليفة ( أبو عبد الله )

    محاورة بين حمامتين مهاجرتين وهما ( سعود بن حدور ) و ( عزوز القميري )



    ((عزوز))


    يا سعود انا محتار بين الصحاري=عديمة المحيا قليلة مذاري
    وحيشتن تجتال فيها الضواري=وش جابني ويّاك بارضن خليه



    ((سعود))


    عزوز لا تكثر علي التهاويل=انا حنوكي غادياتن مراقيل
    لاترهب حسوسي بزود الاقاويل=همّي مكفيني عسى لي بقيه


    ((عزوز))


    انا سألتك عن حسن قصد يا سعود=من شعّة البيضا من البرد مصرود
    ديره غريبه كلها قشاش واجلود=ما فيه ونسه من شروس البريه



    ((سعود))


    حالي كما حالك حداني جفالي=وانا مثل وضعك سهرت الليالي
    كانك دهاك الخوف مالك ومالي=فيني مكفيني غشتني دهيه


    ((عزوز))


    انا سالتك نشدتن ما بها عيب=درقني حظي درقت الغادر الذيب
    وسؤالي اللي ما عليه العذاريب=قلي صحيح العلم يابو حدريه


    ((سعود))


    عندي جواب وما بخلت بجوابي=مير انه الخوف اقتفان بشبابي
    وطيت ورطه لعثمت بي خطابي=ازريت اميز بين نفد وشغيه

    ((عزوز))


    قلي وش اللي جابنا بالمداهير=غصونها باقصا وطاها مكاسير
    حتى حصاها كنهن المسامير=واسهولها تذرا عليك السفيه


    ((سعود))


    هذي ديارن نعرفه من سنيني=من ينزل حماها يصير الغبيني
    نمرها ما بين حينن وحيني=واللي جرا فيها اساس القضيه


    ((عزوز))


    حيرتني بالقول يا ولد حدور=هزتني الريبه عسى بليس مدحور
    خليت حالي بين حاير ومجبور=اربكت قلبي يا وسيع الدعيه


    ((سعود))


    معذور لنك جاهلن به يتيمي=ما لك على الدنيا قريب ورحيمي
    ما تدري وش جاهم بديرة قصيمي=واحد ورا واحد غشته المنيه



    ((عزوز))


    حقيقتن قولك او احلام جاثوم=صدقن حكاياتك او القول فيوم
    زادت علي بقولك احزان واهموم=عطني حكاياتن تقافا مضيه


    ((سعود))


    نشدتني قول الحقايق يا عزوز=والصدق يذكر لو بالاسرار ملفوز
    الحق واضح بالمطاويل مركوز=ابروي احداثن تجعجع رحيه



    ((عزوز))


    قلي وابسمع ياصدوق الحكاوي=خالك وابوك مزبنين الجلاوي
    قلي ترا كبدي توذاها لاوي=قل سيرة الماضي حلاه ورديه



    ((سعود))


    حكاية اجدادك حكايه طويله=كانوا على الهجره بشد ونزيله
    تفانوا بصحرا قليلن ظليله=باديارنا هذي تناهوا سويه


    ((عزوز))


    هم نزلوا بين الصحاري والاقفار=عجيبتن والله عجيبه هالاخبار
    قولك يخلي راكد الفكر يحتار=وش صابهم بالهجرة السالفيه



    ((سعود))


    طاروا من ديارن قليلن سماره=غاباتن وساعن كثيره اشجاره
    ديار اوروبا مستمدن خضاره=حنا نويناها بحز المسيه



    ((عزوز))


    وش صار عقب نهوضهم بالعلالي=هم قطعوا شوطن بسود الليالي
    هي احزمت فيهم عقود الحبالي=صارت عليهم ليتن فوق ليه


    ((سعود))


    لوالله الا حدروا للجزيره=لقوا قوانيصه ذيابن سعيره
    من صبحهم والحرب مقبل مريره=صاروا حطبها يوم يبس الشفيه



    ((عزوز))


    هي النهايه من نصيب القوانيص=او هجوا العزوه ترا ماني بخيص
    ما ودي اسبق بالسوالف تخريص=كمل ترا الهوشات ماارغب طريه


    ((سعود))


    ضالوا عليهم واحتما الكف بالخد=قامت شوازرهم بالاشجار ترعد
    كلن على ما قيل يحبل ويهبد=حتى البزارين يتعطش جميه



    ((عزوز))


    وش عقبها صارت خطوب النهايه=لا تكمل اقوالك كفايه كفايه
    ازداد حزني حين قلت الروايه=عدوا على اهلي مثل عدي السريه


    ((سعود))


    من بعدها ماتوا ربوعك بصيدي=وامسيت بالدنيا يتيمن وحيدي
    يالله عسا ترفل بعمرن مديدي=واتعيش بالدنيا حياتن هنيه


    ((عزوز))


    عسا الولي يسمع دعاك ويجيبي=من يدعي الله يا خوي ما يخيبي
    يالله نهج اقبل دداسن وجيبي=الهجه الهجه لعالي عليه


    يوسف الخليفة ( أبو عبد الله )

  4. #19
    تاريخ التسجيل
    Dec 2007
    الدولة
    الرس
    المشاركات
    11,605

    رد: ديوان الشاعر / يوسف الخليفة ( أبو عبد الله )

    أحداث الذئب ( سحمان ) ورحلتنا البرية البعيدة إلى جبال ( حمر الشهوق )


    ( المشهد الأول )



    مع سواد الليل واهجوع الحمام=قاعدن بين الصفيه والشعيب
    ليلها حالك ولا فيها الجهام=ارقب النيزك اليا طش اللهيب
    اشتعل بالكون مرسول العدام=انحنا يم الوطا مثل العسيب
    جالسن وارقب فضاها بانسجام=ما معي من بين خلق الله صحيب
    بالخلا وحدي ولا عندي انام=اتفكر واسبر الكون العجيب
    شدني صوتن مع سفوع الظلام=صوتن اشغلني مع الدو الرهيب
    من بعيدن لا هو رغين او كلام=خافتن موحيه من فوق الجذيب
    حين قرب واتضح صوته تمام=بان لي نوعه مع الضوح القريب
    واقفن جنب الرجم باكمل نظام=يشبه لحارس على المدخل رقيب
    رافعن راسه وخشمه للامام=ويوم قرب لي بدا لي زول ذيب
    قلت له يا ذيب ما قلت السلام=هو تكبر او عدون مستريب
    استهل عواه مشدود القوام=والتفت يمي كما وضع الخطيب
    قال لي انت الذي عالي مقام=يا فتى ادم مكرمك المجيب
    قلت له قرب وابهديك الوسام=مشتهر بين الملا سبعن عطيب
    من قديمن لك معزه واحترام=واذكروك الناس بالشعر الرتيب
    قال لي يا هيه ما عندك دوام=سامرن بالليل قصادن اديب
    تستهل القاف مثل المستهام=والقوافي ما يعاسرك الصعيب
    قلت له يا ذيب بافكارك عسام=الدوام الصبح وقته يالحبيب
    يا عديم المعرفه فيك انجام=تحسب الاعمال بالليل العصيب
    قال لا تقسا ترا ما لي مقام=حتا لو قالوا من سباع القنيب
    مثلي المقهور هالوقت ويضام=طاردوني بالبنادق فوق جيب
    لاشعرت اني هديفه للحطام=انفذ بجلدي عن العالم واغيب
    وازبن لعنقورن صخوره ركام=عسرن المطلاع والمرقا تعيب
    قلت له شايف على شوفك جحام=من غرابيل الليالي مستريب
    صاحبن واصحبك من دون الزحام=بالنجود الخاليه وقتن قريب
    بالنجود اللي تولاها الغمام=سبعة ايامن تهامل بالصبيب
    ارضها صارت عشيبه كالوشام=لين يصبح زهرها شين عجيب
    واعدن يا ذيب وعدن بك لزام=لا يقولون الوفا عندك يخيب


    يوسف الخليفة ( أبو عبد الله )

  5. #20
    تاريخ التسجيل
    Dec 2007
    الدولة
    الرس
    المشاركات
    11,605

    رد: ديوان الشاعر / يوسف الخليفة ( أبو عبد الله )

    أحبابي الفضلاء رأيتم ما حصل بيني وبين الذئب في الجزء الأول حيث جلست في البرية فوافقته هناك وحدث بيني


    وبينه نقاش وقد أخذت منه موعدا بأن يصاحبني في رحلة برية إلى جبال بعيدة شاهقة وقد حدث هذا الشيء


    وصحبني إلى جبال اسمها سلسلة جبال حمر الشهوق ويبدو أنه صحبني خوفا على نفسه من الناس لأنه أراد تلك


    الجبال فهو الذي اقترح أن نذهب إليها وللمعلومية فاسمه ( سحمان ) ومما يميزه أنه لا يتكلم في أحد


    فلما وصلنا احدى الشعاب في وسط الجبال وبجانب جبل أحمر شاهق وذلك بعد صلاة العشاء مباشرة


    فجمعت الحطب وأشعلت النار فلما رأى النار تتراقص في سفح الجبل ضحك بتكشيرة حادة من أعماق قلبه


    فحصلت بيني وبينه بعض الأبيات التي سأذكرها لكم






    ((الرجال))


    اضحك يا شين النفس يا مكشر الناب=اضحك ترا الدنيا تقافت ركابه
    لك غدرتن قشرا كما قرصت الداب=واللي مجرب سطوتك وا عذابه
    وشلون ومنخارك على الدوم مسراب=والسانك اللي مستمرن لعابه
    عينك كما صفر البراجون تنهاب=وجهن كليحن مستبينن خرابه


    ((سحمان))


    حاسب سليل ادم ولا تبدي عتاب=ماريد انا لومن ولا اقبل دعابه
    وشلون ابضحك لنطوا العلم لكلاب=والجوع وفا في ضميري حسابه
    الدنيا حلت بين ظالم ونهاب=حتى الثعل دلا يروج خطابه
    من موق عيني ينزل الدمع سكاب=ومن ضيقتي حالي تكدر شرابه



    ((الرجال))


    لا زلت انا من مثلك اخشاه وارتاب=غدار اعرفك يا عقيد الذيابه
    حقود اعرفك مستميتن يابو شهاب=يابن الضواري يا زعيم العصابه
    لا تظهر التزييف ما نصلح اصحاب=حبل الرفاقه ما تجود قضابه
    ما لي علاقه فيك ما قالوا انساب=بيني وبينك تستحيل القرابه




    ((سحمان))


    لا يندمل جرحي ترا الجرح قد طاب=تفدق الملحوم عقب اللزابه
    منولن مثلي على باين هضاب=واليوم مندس بظليم الشطابه
    الناس هالحاضر غدوا عني اغراب=صارت مبانيهم بليا كلابه
    امنن وامان وما ظهر فيهم ارهاب=الا لمن دينه عليه الريابه الريابه



    ((الرجال))


    ذق ما يذوقه كل شاوي يا عطاب=يا جايرن شابت عليه الخيابه
    كم شاة قومن تستلمها بمخلاب=بالليل اهلها يلحقونك طلابه
    انت السروق اللي بك طبوع سلاب=اليا نصيت مراح صار الخرابه
    تفرس حلال الناس والذيل لساب=لك سطوتن قشرا سواة الحرابه



    ((سحمان))


    صحيح انا فيما مضى كنت نهاب=اخذت انا الدنيا بفعلي نهابه
    اخذتها فراسه على غير ترحاب=واهديت غيري من حميس اللهابه
    ذكيت عشر شيوخ من عكف الاشناب=وانهيت منعورن ولا من درابه
    واليوم محسورن تراكا بمصلاب=مثل الذليل اللي تراخت اطنابه



    ((الرجال))


    هذي هي الدنيا بها الشر ما ذاب=تمشي كما قاعن تباعد سرابه
    ان زانت الاحوال تغلق بها ابواب=فيها غموض الحال ما له اجابه
    تدور من بين الملا كلها اتعاب=بعض الليالي في حشاها زلابه
    واللي تمادا بالظلاله ولا تاب=يمسي ردي العز ينقل صوابه


    يوسف الخليفة ( أبو عبد الله )

  6. #21
    تاريخ التسجيل
    Dec 2007
    الدولة
    الرس
    المشاركات
    11,605

    رد: ديوان الشاعر / يوسف الخليفة ( أبو عبد الله )

    عرفتم في الجزء السابق ما حدث مع الذئب حيث ذهبنا إلى تلك الجبال الشاهقة الوحيشة وقد نزلنا في ذلك الشعيب


    بين تلك السلسلة الجبلية الطويلة وحدث ما لم يكن في الحسبان حدث أمر لا طب له في ذلك المكان الخالي


    حيث حصل عطل في السيارة اعتقد أنه فساد ( الكلتش ) فلا تستطيع السيارة أن تسير في بطحاء الشعيب ولو


    شبرا واحدا فاجتمعت أنا والذئب سحمان بعد أن أرخى الليل سدوله في ليلة مقمرة حيث بان لي أمام


    نور القمر فلم يكن لي بد من المشي على الأقدام في تلك الجبال الخالية بحثا عن أحد ينجدنا فدارت


    بيني وبين الذئب الأبيات التالية





    ( أبو عبد الله )


    يا ذيب عضدني وعضدك يا ذيب=سيارتي هاليوم ما ينمشابه
    مدري كلتش او هي تبي خرط توضيب=والا سهم عينن قوين صوابه
    حقيقه الاسفار شطه وتعذيب=نوبات كالحنضل كريهن شرابه



    ( الذئب )


    فل الحجاج وخل عنك النواشيب=وخله على ربك يفك انقضابه
    ترا النخل تنهض عليها الرواكيب=والعرق يسري في صلايد ترابه
    واحمس هراري لا يهمك غثا الجيب=واطرب حسوسك في عوالي هضابه



    ( أبو عبد الله )


    ما لي سوا طرق الفجوج المشاهيب=مشين على الاقدام ما هي معابه
    والا انت خلك بالدروب المصاعيب=يمكن تحس اصوات بعض الكلابه
    لعلي القى فازعن دون تحسيب=والموعد الضلع الطويل المجابه


    ( الذئب )


    وش حيلتي لفترقت اقصى الدواريب=وابعدت عنك وطوقتك الذيابه
    وش هي علامة صوت وقت الكواريب=بيني وبينك شارتن واستجابه
    علامتن ما للثعل فيها تخريب=واحذر تمثلها فلا هي دعابه


    ( أبو عبد الله )


    بيني وبينك لحتمن الشلاهيب=وتوالت الشطات عجلن قضابه
    ثلاث عوياتن صلافن غواليب=يلجن الضلعان فيهن طلابه
    وليا سمعت اصعد لروس المراقيب=واياك يا سحمان طبع المهابه



    ( الذئب )


    ابشر تراني فدوتن لك على الطيب=دمي جعلته في عدوك خضابه
    فديتك بروحي جميل التراحيب=انا خويك في خطوب الحرابه
    لا تحسب اني تابعن للعراقيب=انا على الزامي ولا بي خيابه


    ( أبو عبد الله )


    نمضي عسانا مع بطى الوقت ما نخيب=وان طالت المده نراجع حسابه
    هذي هي الدنيا ليون وتصاليب=والفايز اللي سالمن من زهابه
    لكن تدرهم مع جروف الدواعيب=واترك على ما قيل طبع القنابه


    يوسف الخليفة ( أبو عبد الله )

  7. #22
    تاريخ التسجيل
    Dec 2007
    الدولة
    الرس
    المشاركات
    11,605

    رد: ديوان الشاعر / يوسف الخليفة ( أبو عبد الله )

    كما علمتم ما حدث في الجزء الثالث من عطل في السيارة حيث قررنا المشي على الأقدام في تلك الجبال الشاهقة
    الواسعة بحثا عن مساعدة من أحد وكان الاتفاق على أن أجتمع بسحمان بعد صلاة المغرب من كل يوم لكنه تغيب
    من الغد ولم أره يوما وليلة فجلست على صخرة بعد المغرب وقلت ابياتا بحضرة أحد الثعالب الذي حصلت معه
    محاورة ببعض الابيات وقلت


    عون وعوا وعون لجل سحمان الغداري=اسمعن يا ذيب واظهر فالشفق بادي حماره
    لي نهار وليلتن واضرب على الكايد مواري=سجت سبوتي على دربن تلقاني خضاره
    ما معي نورن وادورج بين وطيات الضواري=البشر ما تبصر بليل الدجى غير بنهاره
    يالثعل ما شفت ذيب الضلع من بين المذاري=سحمتن في غاربه واتشوف في وجهه قشاره
    هامته هامت عقور العسكر بنقطة طواري=لابلج عينه تحس يطير منها كالشراره
    قل لي يالدرباس كانك مبصره باقصى الصحاري=كان دليتن على دربه ترا جت لك بشاره
    وانشد الهجرس رفيقك يسأل اجواز الخضاري=واحذر المكر الخبيث اللي على راسك مداره
    بغيتي هو ذيبن امعط له كفوفن كالعجاري=ما يغطي نابه المسنون والسطوه شعاره
    حازمن ما به تصانيفن ولا عنده طواري=ذاك سحمان الخلا ذيب الجنادل والسماره
    عاقدن صلحي معاه بقاعة النيف العساري=والغزال اللي نصيده بيني وبينه جزاره


    ( الثعلب )


    يا عجيب القول واعجب منه دوجك بالبراري=وشهو جابك بالضلوع النايفه عقب العماره
    ما رعت فيها البوادي ما بها سوق وحواري=وش تبي فيها ومثلك عارف البر وعساره
    ما معك موتر ولا عده بها صحن وصفاري=مامعك مركوب لو سيكل ولا حتى حماره
    وش تبي بالذيب الاسحم يمكن لمرباه ساري=كانك تريده طلابه فانت وفيت الجساره
    حنا الاوباش انتحاشا هالشراسه وانت داري=وانت لك فكرن وكلن يتخذ مبدا قراره
    والسلام وداعتي لك ما لنا بالبيع شاري=والدلاله خله لغيري وذي لب العباره


    ( أبو عبد الله )


    اقفى وانفض الثعيلب قال انا هذا قراري=هز ذيله وانسلت من بين دحمول وزباره
    ما لي غير ارقد يعل الصبح به خير انتظاري=او يجيني من فرج ربي بدعوه واستخاره
    الجبال مشربكه والصبح تلفحني ذواري=علني القاه بين السفح الاقصى وانحداره


    والسفح الأقصى هذا أقرب ما يكون إلى الجهة الجنوبية الشرقية من حمر الشهوق ودائما بأمر الله تهب عليه
    الرياح المبكرة في وقت الوسم فيغزر مطره فتجد اشجاره دائمة الخضرة وبالفعل عندما وسلت إليه وجدته مخضرا
    وربيع منقطع النظير وماء وزهور فتمنيت القهوة على جال غديره فليس معي إلا كبريت وبندقيتي فقلت بذلك


    مريت انا بالسفح الاقصى على عصير=وابهرني منثور القحويان نوار
    في حاجرن كله نبوت ودعاثير=قام يتخالف بالذعيذع به ازهار
    عده قراح وباردن كنه الزير=ليته يزوره من هل البر والكار
    يقضون فيها كشتتن بالمشاوير=احلا من الثيل على مدخل الدار
    غمضني الما مدهلن للعصافير=يا ليت من ولع على جاله النار
    ودق النجر جنب الدلال المباهير=هيلن والاخرى حط بالبن مسمار
    يا ليت من ضيف عليه المناعير=يرسم معاهم مقبل الوقت تذكار
    يا ليت من ينصب على جاله الطير=ويطورق بحضرة هل الطيب الاشعار
    هذاك مرباعن يذع المعاطير=في عزلتن قفرا تولتها الامطار
    نسيم نسناسن يخدرك تخدير=يا سعد من سوا له اليوم مشوار
    يرقد على عشبن بليا مقاصير=في شعبتن ما حاطها سايج اجدار


    وقد لفت نظري ذلك الصقر الفارسي على العشب الأخضر فقلت لعلي أحادثه وأرى ما عنده طمعا بأن أحمله
    رسالة ليذهب بها إلى أحد لكن يبدو أنه غريب ولا يعرف شيئا عن ديارنا فدار بيني وبينه حوار شعري
    وما حصل بيني وبينه من ابيات


    (( أبو عبد الله ))


    سلام يا طيرن بذيك النحاوي=يا واقعن فوق الربيع الرطيبي
    وشبك عبوسن تقل فيك العناوي=انت العجم ولا نتاجك عريبي


    (( الطير ))


    يا مرحبا باللي عساه المداوي=يعالج الجرح العميق العطيبي
    ما تدري انه يلوي القلب لاوي=ادور اللي يمكن انه طبيبي


    (( أبو عبد الله ))


    جاوب سؤالي لا تلوذ بلهاوي=خلك فهيمن منتبه لي لبيبي
    تراي مزبان الشريد الجلاوي=خلك على ما قيل صقرن رضي بي


    (( الطير ))



    ما ني عبوسن مير ذيك البلاوي=دنيا عسى ميلانها للخريبي
    انا من بلادن بعيدة مداوي=يبيلها زين المواتر وجيبي

    (( أبو عبد الله ))


    غريبن امرك يالعطيب النداوي=تشكي من الضيقات وانت النجيبي
    رسمك اصيل وما عليك الرداوي=تبارك الرحمن ما بك ذريبي


    (( الطير ))


    انا بلاي بصف ريشي زهاوي=اللي دمرني اني حرن حريبي
    لو اني شبوطن غديت النجاوي=ان كان ما صرت بسببها جليبي


    (( أبو عبد الله ))


    علمك عجيبن يا غريب الخطاوي=مع ان بينات المواري حبيبي
    لكن فهمت انك قصدت الشكاوي=يعل ما لك بالخلايق طليبي


    (( الطير ))



    لا والله الا مطلب لكل ضاوي=كلن يقول اني لشخصه نصيبي
    ناسن تبي زرق الدراهم ملاوي=تريد كثر المال تزعب زعيبي


    (( أبو عبد الله ))


    وش ميزتك يوم العرب لك شهاوي=خلوا لك الشيكات مالن خصيبي
    خصوك من بين الغنم والقطاوي=مثلك مثل طلع النخل والعسيبي


    (( الطير ))


    ناسن خراجه باكثر المال حاوي=تشري مثل جنسي ولو هو صعيبي
    ما همه المليون كنه شلاوي=ما جاله بكد الجبين التعيبي


    (( أبو عبد الله ))


    دنيا غريبه ما بها اللي مخاوي=فيها من اسرار الخلايق عجيبي
    لكن لي استفسار عن هالقصاوي=عن الديار اللي تريد الزهيبي


    (( الطير ))


    اسأل وابفصح يالصحيب الرهاوي=انشد وانا لك يا رفيقي مجيبي
    لا تحسب اني مثل ذيخن ضراوي=بوله على بعض القوايم سريبي


    (( أبو عبد الله ))



    يا طير ما شفت النجيع الخلاوي=رجلن مطاليعه مطاليع ذيبي
    لاقبل شديدن مثل نجمن مهاوي=وليا تولى مثل سيل الشعيبي


    (( الطير ))



    عجيب موصوفك هذاك العطاوي=يا ليت لو شفته عطيب الضريبي
    مدري من اقصى نجد ولا حساوي=ولا من ارض الشام وان صار ليبي

    (( أبو عبد الله ))


    ما هوب من ديرة جاكرتا وجاوي=ولا هو بالسوفيت ولا هو صليبي
    من عالية نجدن بقلبه رباوي=ولا ولد عمي ولا هو نسيبي


    (( الطير ))


    وداعتي لك لاجل احلق علاوي=حان الرحيل وحان وقت الذهيبي
    ابترك ديارن به الغصن ذاوي=قبل اربع سنينن سقاه الصبيبي


    (( أبو عبد الله ))


    فرقاك خلا بخاطري كل عاوي=شب بحشا بالي قشاشن لهيبي
    عساك تلقى للي مع البيد ناوي=عساي اشوفك في زمانن قريبي


    وحلق عاليا ومضيت اشاهد تلك الحشائش الخضراء فوجدت صقر شيهان فقلت هذا بغيتي لعله يوصل رسالتي لكن
    سأرسم له طريقا بعيدا عن المكان حتى يذعن لي ولن أبين ما عندي سأخاطبه كما يخاطبه بعض الناس وأوهمه
    أني أريده أن يوصل رسالة للحبيب كما يقول بعضهم يا طير بلغ سلامي 000 وكذلك قولهم يا طير بلغ سلامي
    وقله وهكذا فحدثت معه هذه المحاورة الشعرية


    (أبو عبد الله)


    يا طير ياللي في سما نجد طيار=بلغ سلامي للغضي التهامي
    قله ترا خلك سكن ذيك الاقفار=من حد شقرا لين قفرا العجامي
    وبكل مرقابن نظم فيك الاشعار=ودلا يجر النوح مثل الحمامي


    (الطير)


    ما نيب طيرن لك ولاني لك حمار=كل ما طرا لك قلت بلغ سلامي
    هما انت فاضي لاتهيضت بالدار=ناديتني يا طير طاير يا زامي
    بلغ سلامي للغضي زين الانظار=وش دخلي بالمخضره والغرامي


    (أبو عبد الله)


    لا تصير نذلن من قصيرين الاشبار=انا نخيتك يا سليل القطامي
    لو ان لابن ادم مثل جنحانكم طار=لكن يسير المبعده بالاقدامي
    مثلك خدومن يفرح بكل مشوار=يشلع مع الارياح ويا الرهامي


    (الطير)


    لا تبدا بالتلكيع يا راعي الكار=واتحثني وافهم جواب الكلامي
    انا وحيدن لابغيتن لمسيار=وش حالتي لامسا علي الظلامي
    فلاة ما فيها سوا بعض الاشجار=والارض شينه والضواري هيامي


    (أبو عبد الله)


    توي اعرف انك تنكتن وعيار=تقدم الاعذار مثل الرخامي
    تمتر وتذرع من قصيرات الاعذار=الظاهر انك مثل بوم الهدامي
    شكلك تبيعن من رديات الاوكار=جلابتن ماحدن عنا لي وسامي


    (الطير)


    وراك تجرحني على غير معيار=واتحدني للظيم والقلب دامي
    حكيك على قلبي كما دق مسمار=واحسوسي من الذل صارن ضوامي
    هذا جزاي اني خدومن وصبار=لا تصير قاسي يا عريب الشهامي


    (أبو عبد الله)


    لا تظهر حسوسك كما لمس دهدار=واتحطلي بين النواظر زمامي
    تودع نواياك الرديه بالاسرار=واتخفي الداني سواة النعامي
    كنك على ما قيل شراط طرار=كان الجدا عذرك فلا يفيد ضامي


    (الطير)


    لا تترك قليبي على سنون منشار=واتحطني بين القواطع حطامي
    ارحم احوالي ما يفيد التنهزار=تراني مسكينن ولا لي محامي
    دربك بعيدن مرتفع كله اخطار=عوالي جبالن بروس الغمامي


    (أبو عبد الله)


    والله ياننك ما تعدل وتختار=اللي طلبته منك لاترك دوامي
    واحطك بخيشه بها عث واغبار=وارفعك شاره من على راس زامي
    وازهب اللي واضعن فيها منظار=وامزع متونك واخليك دامي


    (الطير)



    الشكوا لله ما نفع كل معذار=مالي سوا التنفيذ امرن لزامي
    شين جرالي ما يداويه بيطار=وانا الضعيف اللي خدومن يلامي
    هذي هي الدنيا حكاوي وتذكار=والحي فيها ما سلم من عدامي

    ومضى في حال سبيله ودقائق قليلة وإذا بذلك الصوت الحاد من بعيد إنه سحمان نعم سحمان 000
    نكمل إن شاء الله في الحلقة القادمة وعذرا على إطالة الجزء هذه المرة والشكر الجزيل لكم ودمت بخير


    يوسف الخليفة ( أبو عبد الله )

صفحة 2 من 2 الأولىالأولى 12

معلومات الموضوع

الأعضاء الذين يشاهدون هذا الموضوع

الذين يشاهدون الموضوع الآن: 1 (0 من الأعضاء و 1 زائر)

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •