تلحيم القزوز ....... افضل لحام

[سوبر مكشات]

السلام عليكم


سيارة احد الزملاء 2004 فيها شق في القزوز


ويبي الحل ؟

وسمع عن شي يسمونه الكوره الفضيه او الصمغ الفضي ويقولون انه افضل من لحام قايد

اللي كد جرب الصمغ هذا يفيدنا عنه وتحمله
خاصة انه جديد عالسوق
وكيف طريقة استعماله

الله لايهينكم

[مفتاح التقنية]

السلام عليكم

اول مره اسمع فيه

ننتظر المجربين لعلنا نستفيد منه بإذن الله

[][][زلفاوي][][]

نوع السيارة لو سمحت ..
اللحام ما ينفع لان الاغلب ان راس القزوز فيه زهر
الافضل يدور على راس من التشاليح والله يوفقه

[aooa]

ان شاء الله يفيدونك الشباب عن هذا النوع الجديد

[سوبر مكشات]

السيارة فتك 2004


تلحيم قايد يقوم بالغرض
لكن الصمغ الفضي او الكورة الفضيه يقولون افضل

والمشكله انه جديده فودي اللي جربها يعطينا تجربته

[ابومناحي]

وين يباع الصمغ الفضي وانا بجربه وبعلمك لان عندي موتر منشق قزوزه

[wafian]

ياليت يفيدوننا الشباب

[جيبي جايزلي]

نفس المشكله انا عندي القزوز منشق وينسم قالو لي فيه صمغ يباع في ساكو رحت وشريته
وعلى كلام موظف الاستقبال يقول انه قوي مره قلت القزوز اقوى منه قال ما عليك جربه وبتدعيلي جربته ولا نفع لفيت الصناعيه ابي احد يلحمه قالو لي ما ينفع التلحيم لازم يغير القزوز اسف على الاطاله واللي عنده حل غير التغيير يقولي الله يجزاه خير

[asdali]

نفس المشكله انا عندي القزوز منشق وينسم قالو لي فيه صمغ يباع في ساكو رحت وشريته
وعلى كلام موظف الاستقبال يقول انه قوي مره قلت القزوز اقوى منه قال ما عليك جربه وبتدعيلي جربته ولا نفع لفيت الصناعيه ابي احد يلحمه قالو لي ما ينفع التلحيم لازم يغير القزوز اسف على الاطاله واللي عنده حل غير التغيير يقولي الله يجزاه خير

الحل تلحيم الكهرب ثم تدبل الجازجيت يمشيك ستة شهور الى سنة ثم يرجع الصوت .

[أبوعبدالملك الجهني]

قبل خمسة أشهر لحمت اقزوز ( 2400 هايلكس ) ... بلحام خاص بالزهر

و إلى الآن ما فيه أي مشكة ... و الحمد لله .

و قال لي عامل المخرطة :

هذا سيخ لحام خاص بالزهر ... و هذا سيخ للألمونيوم ... و هذا سيخ للحديد ...


و أظن إنكم تعرفون ذلك ...

[مزون الشمال]

.معليش انا فني معادن فيه لحام خاص للزهر بس مو موجود في الصناعيات
لنه المكينه غاليه مره والسلك حقت اللحام غاليه يعني الزهر صعب تلحيمه بالكهرب فيه السلاك خاصه له تعمل بمكينه الحام العادي تقعد سنه الى سنه ونصف بس ما يجيبونها الورش انت تشتريه وتجيبه لهم من محلات اللحام
وهذا حل مؤقت

[جيبي جايزلي]

الحل تلحيم الكهرب ثم تدبل الجازجيت يمشيك ستة شهور الى سنة ثم يرجع الصوت .

الله يعطيك العافيه
لحام الكهرب وعرفته
بس الجازجيت اسمحلي ما عرفته

[ابو وافي 444]

الله يعطيك العافيه
لحام الكهرب وعرفته
بس الجازجيت اسمحلي ما عرفته

القازقيت هي الوجيه

[وعيد]

ياليت احد يفيدنا انا برضه عندي صوت بالقزوز

[قايد النيسان]

السلام عليكم
عندي نفس المشكلة ولحمت عند قايد لحام الماني وبعد ستة شهور رجع مثل اول ونبي الحل
مشكلة الفتك في شكمانه