استفسار عن ماكينة 97 و98 للسوبر سفاري ( القوة والأداء )

[mjmo55]

السلام عليكم ورحمة الله وبركاته

أخواني الكرام
لقد جربت استخدام سوبر سفاري موديل 97 ووجدته سلس وجداً جميل ومتجاوب معي

أيضاً جربت استخدام سوبر سفاري موديل 98 ( 4500 ) ووجدته جيد ولكنه أثقل في التجاوب من موديل 97

طبعاً مقارنة الاستخدام في الطرقات القصيرة والطويلة وفي البر والموديلين سوبر سفاري فل أوبشن بخاخ

استفساري :

بالنسبة لموديل 98 هل العيب في الماكينة نفسها أم في بدي السيارة لأنه ثقيل ؟

ولو تم تركيب ماكينة موديل 98 ( 4500 ) على موديل 97 هل سيتحسن أداء الـ 97 أفضل من ماكينته الأصلية
من ناحية السرعة والقوة والأداء

وشكراً

[عمر المختار]

هلا والله باخوي انا مركب مكينه 4500 انجكتر موديل 2009 على سوبر سفاري موديل 95 والصراحه قوه بشكل غير وانا انصحك بتركيبها بس يكون التركيب شغل مظبوط والله الموفق

[هويدي]

مافيه شك ان مكينة 98 اقوى 4500 بخاخ

وثقل الـ 98 من بديه الكبير وديكوراته وحسب ماسمعت من ميكانيكيين ( سعوديين حقين ترهيم ) تحويله قيره لها دور كبير في ثقله وضعفه نوعاً ما مقارنه بالشكل الاول حبيب الكل

[mjmo55]

أخوي عمر المختار

ما شاء الله تبارك الله والله يعطيك خيره ويكفيك شره
كلام جميل ومطمئن فهل غيرت المكينه فقط ولا غيرت شي في القير أوالدفرنشات ؟
والمكينه اركبت على نفس القواعد والكراسي ولا سويت ترهيم
وهل مكينه 4500 انجكتر موديل 2009 تفرق عن مكينه 4500 انجكتر موديل 98 في القوة والاداء؟ ولا مثل بعض بس الفرق بالموديل ؟

أخوي هويدي
الله يجزاك خير وما قصرت كلامك أيضاً جميل ومطمئن وفعلا 98 به ثقل و97 حبيب الكل
بس اسمح لي أخوي مافهمت وش المقصود بتحويلة قيره ومنك نستفيد ولتعم الفائدة

السموحة على كثرة الاستفسارات وجعل والدينا ووالديكم الجنة

[هويدي]

آمين يارب العالمين

بالعكس ياخلفهم ماحطوا المنتدى الا لتبادل الخبرات والفائده للجميع

وترا اخوك مامن خبره بالميكانيكا ـ طقطقه على قدي ـ بس اسمع من ربعي حقين الترهيم

التحويله والله العالم يقصدبه : الوصله اللي تربط مابين القير والمكينه

وزي ما اسلفت معلوماتي متواضعه اصحاب الخبره بيعرفونها بشكل اصح وادق

[عمر المختار]

هلا اخوي صحيح المكينه تركب بشكل سليم على القواعد الاساسيه ولايحتاج ترهيم لانها نفس مكينه 4200 بالحجم ولا يحتاج تغير في القيير او الدفريشنات..
اما مكينه موديل 2005 الى 2009 نظامهن غير سستم مكينه تكون غير من 98 الى 2004 حتى تلاحظ بين الاداء فرق لان السستم تركيز الكهرباء والوقود اكثر.. تسمع فرق بين تفت المكينه من 2004 الى 2009 والله الموفق ..

[mjmo55]

أخواني هويدي وعمر المختار

بيض الله وجيهكم يالنشامى وفيتوا وكفيتوا وجزاكم الله خير في الدنيا والآخرة
آمين يارب العامين

وصلت المعلومة وجاري التنفيذ بإذن الله تعالى

[راعي الطلعات]

من ناحية الـ98 إلى 2001م عيبهم في القير والمكينة وكذلك البدي ثقيل شوي معي معي 99 بخاخات المكينة توصل 5 والسيكل يطوف علي ولا عرفة وش العله معه

[mjmo55]

يا مرحبا بك اخوي راعي طلعات

خذ الهرجة والسموحة على الاطالة
صار لي نفس موقفك مع 98 امشي به بالاول والثاني ويادوب ممشي حاله وبالثالث يموت الموتر رحت فيه الامارات ( سياحة ) وحده بالممشى 140 ما يزود عنها
طبعاً مريت على بعض الورش بالشارقة وما عندهم سالفة واحد قالي يبغالك تغير دسك كلتش قلت له ما كملت شهر من غيرته قال لا في نوع رياضي أحسن من حق الوكالة خليته ورحت لغيره قال بنفك نص الماكينه ونشوف وش السبب قلت له انت أهبل وخر ايدنك وسكرت الكبوت ورحت للثالث قال يمكن ولاحظ يمكن الكهرب يبغاله ترتيب ناظرته على جنب ومشيت من الصناعية وليتني ماجيتهم ضيعت وقتي

ويومي قضيت وجيت برد للديره قلت الوضع سيء تدري ياولد فر الديلكو لأني قاري هالمعلومة بالمنتدى هنا لعل وعسى وبعد ما فريته لقريب النهاية وتغير الموتر 180 درجة معي ما شاء الله تبارك الله وفي الدرب وصلت بالسرعة لين 180 تقريبا ويبي الزود بس بصراحة خفت من السرعة

فيمكن علتك من الديلكو جرب ولعل وعسى والله يوفك ويضبط معك

صارت قصة ماهي هرجة السموحة :d :d

[هويدي]

على كثر حبرشتي والفكفكه ماعمري قربت الديلكو

فياليتك تبطحلنا موضوع عن طريقه فر الديلكو .. قريت مواضيع واجد ناس تقول توزنه بمسدس وناس تقول حط الموتر نمره وهز الخ من الطرق الاخرى

[التعـ King ـديل]

بالنسبه للباترول 97 ميزته بديه خفيف جدآ وديكوراته لاتذكر ..

اما ال 98 وزنه عالي بس برضو مكينته حلوة كان عندي 99 يسدح ال 200 وبالمثبت حق السرعه يجيب 190

[S4500]

اخوي انا معي باترول 99 وكان بطة وسئلت النشامة في منتدانا مكشات
وقالولي صف المكينة وصفيتها ووزنت دلكو والله تغير 180 درجة
يجيب 200 والله براحة
مع العلم بأن ما ركبت هدرز ولا فرارات

[شمالات نجد]

صحيح 97 خفيف في الوزن وخفيف نفس

الله يوفقك بالمكينه النظيفه والشغل المضبوط

سلام

[mjmo55]

على كثر حبرشتي والفكفكه ماعمري قربت الديلكو

فياليتك تبطحلنا موضوع عن طريقه فر الديلكو .. قريت مواضيع واجد ناس تقول توزنه بمسدس وناس تقول حط الموتر نمره وهز الخ من الطرق الاخرى

والله ياخوي اللي سويته
رخيت على البرغي اللي يثبت الديلكو بدون ما أفره
وبعدين شغلت السيارة وفريت الديلكو مدري يمين أويسار وعتقد عكس عقارب الساعة
بمعنى لو فريته بالاتجاه الغلط راح تضعف الماكينه كأنها بتطفي وبعدين اربط البرغي اللي رخيته

والله لا استخدمت مسدس ولا حطيته بنمره ولا شي زي ما قلت لك وللمعلومية هذي أول مره أفر ديلكو
ولو ما وصلت الفكره ابشر أبصور لك الديلكو وفرته

[mjmo55]

بالنسبه للباترول 97 ميزته بديه خفيف جدآ وديكوراته لاتذكر ..

اما ال 98 وزنه عالي بس برضو مكينته حلوة كان عندي 99 يسدح ال 200 وبالمثبت حق السرعه يجيب 190

ما شاء الله تبارك الله
الله يعطيك خيره ويكفيك شره