مفخرة الارض ...

[اليكي]

بسم الله الرحمن الرحيم
.
.
.
.
.
.
.
.
.

شدكم العنوان؟

اخواني انا مقبل على شراء سيارة .. وانا كنت محتار بين تويوتا جي اكس ار و نيسان الجديد ..

لكن ابشركم جزمت على التويوتا لاسباب كثيره راح اذكرها لكم .

لكن قبل ماذكرها لكم حبيت اقولكم ان النيسان سيارة قويه وممتازه وسعرها مناسب .<< على شان مايزعلون اهل النيسان

الي خلان اقبل على التويوتا وانا مرتاح :
1- اغلب مواقع السيارات تلقى اصحاب (النيسان) شانين هجمه قوية على المفخره !! والاغرب من هاذا ان كل واحد معه مفخرة الارض يقرا مواضيع مهينه للتويوتا ولا يعلق ولا يرد !! وهاذا خلاني اتذكر مقولة ( اذا ركلك احد من الخلف فاعلم انك بالمقدمه ) !!

2- التويوتا رحت للوكاله وقلت ابي جي اكس ار قالي ادفع كاااااااش !! واصبر شهريين ؟؟!!*## !!
واروح ادوره برا الوكاله في المعااارض والقى قيمته اغلى من الوكااااله ؟؟؟!!!
( تويوتا الوكاله الوحيد الي سياراتها تنباع اغلى من قيمة الوكاله ) وهاذا بصراحه لخبط مخي !!؟؟ ليشششششش ؟؟ الجواب معروووف التويوتا شيك << وادري ان هالكلمه تنرفز اهل النيسان . بينما بعض الوكالات <<!!؟؟ تجيهم وعلى طوول مندوب المبيعات يمسكك ويهذ عليك كل العروض الي عندهم ..مايبيك تطلع يبي يمشي بضاعته ..

3- واحد من الربع ( واحد من العيال ) الان موجود في قطر . ويقول ان كل اصحاب المعارض والشريطيه الي في قطر يقووول انتم يالسعودين تشترون مننا تويوتا بكميات كثيره وين تودون هالسيارات ووش تسون بهن ؟؟ معقوووله .؟؟
يعني الوكاله الي عندنا ماكفتنا ؟؟؟ رحنا نشتري من برا ؟؟؟

اخواني اهل النيسان بالذات اذا انت متاكد ان موترك مافيه مثله وهو احسن موتر .. خلاص احمد ربك على النعمه الي انت فيها ولا تتشمت باقي خلق الله انا ادري ان النيسان موتر ماله مثيل بس فيه ناس ماله عقل تروح تدفع فلوس اكثر بموتر مايجي ربع النيساان ..!!

وللمعلوميه انا مافتحت باب المقارنه بالمواصفات والقوه والمتانه .... الخ
انا بس اعرض عليكم الي موجود الان بالسووق.
ومن واقع تجربتي التويوتا يبل التسبد .... وانا ان شاء الله مقبل على شرائه وراح اوافيكم بالتقارير واتمنى منكم الدعاء لي وابيكم تتحملوني واسف على الاطاله

[رفيع المقآم]

ايه نعم تويوتا بايخ هههههههههههه اللي ما يطول العنب قصير ههههههه حامض عنه يقوووووووووووووووووووووووووووووووووووووووووووول

[قمة افرست]

بسم الله الرحمن الرحيم

.
.
.
.
.
.
.
.
.

الي خلان اقبل على التويوتا وانا مرتاح :

2- التويوتا رحت للوكاله وقلت ابي جي اكس ار قالي ادفع كاااااااش !! واصبر شهريين ؟؟!!*## !!
واروح ادوره برا الوكاله في المعااارض والقى قيمته اغلى من الوكااااله ؟؟؟!!!
( تويوتا الوكاله الوحيد الي سياراتها تنباع اغلى من قيمة الوكاله ) وهاذا بصراحه لخبط مخي !!؟؟ ليشششششش ؟؟ الجواب معروووف التويوتا شيك << وادري ان

ابدا من هذه النقطة

وهي سياسة شركة تويوتا وصارت معروفة للكل حتى انك اذا بتشتري يقولك باقي حبة الحق قبل تروح عليك
وطبعا سبب هذه السياسة انه ماهو بحاجة للبيع للافراد اتبعت شركة تويوتا سياسة وكلاء او مسوقين بالنيابة
فتذهب لمعارض السيارات تجد تويوتا اعداد هائلة جديدة والتي تم شراءها من قبل وكيل تويوتا الحصري بالسعودية
وتم التفاق بين الوكيل والموزع بالمحافظه على السعر
وهذا كلة سياسة اقناع او دعاية للشركة لشد اقبال المشنري ( الحق او يمكن ماتلقى سيارة )
وانت مضمون يالمستهلك ماراح تلقى سيارة تويوتا ولامورد من اليابان الا عبد اللطيف جميل
وطبعا هو مطبق المقولة ( اين ماتمطري فخراجكي عندي ) وضامن
عكس باقي الوكالات الي تجد اكثر من وكيل معتمد للشركة الام

اما تعليقي على قوة السيارة او تحملها فاغلب السيارة الان من ياباني كوري امريكي تصنع بمصانع مشابهه ويدير تطبيق الاجزاء كمبيوتر وطبعا الماركة تختلف ويختلف السعر
في مثل بطرحة للفائدة اشتريت شمعة بي ام دبليو 2008 عند الوكيل 6000 الاف قيمتها
علما بان قيمتها بالمانيا لاتتجاوز 2000 ريال ولاكن ضريبة الماركة

نجي للنقطة الحفاظ على السعر

رغم ظلم اليوكون بالمقارنه لانه اوسع واريح وافخم

كمثال موديلات يوكون 2006 تم بيعها من قبل الوكيل والكل يذكر العرض كانت ب100 الف وتم عمل عرض
الى 90 الف والان تباع بالسوق من 75 الف الى 80 الف وطبعا نتكلم عن سياحي
جيب 2006 تم شراءه ب 145الف يقارب مواصفات اليوكون
يباع الان بمبلغ من 115 الى 125 الف كاقصى حد
الفرق
اليوكون خسر 5الاف ريال خلها عشر الاف
التويوتا خسر 20 الف ريال
وين الي ماسك سعره

هذا تعليقي ووجة نظري ارجوا تقبلها

[ابوطاقية]

ياصاحب الموضوع
موضوعك سوف يحذف من جذوره جزاء لك وردعا لامثالك
اي موضوع ضد النيسان الى سلة المهملات
وبالنسبه للوكاله ان السياره غير موجوده هذا كذب وانا قبل يومين عندهم قال عد دراهمك وخذ الموتر بكرى واي لون تبي
وللمعلوميه ترى سعره طاح من 192600 الى 186500

[فهد العتيبي1]

هههههههههههههههههههههههههههههههههههههههههههههههههه هه

[ياوجودي]

الله يبارك لك في اللي نويت تشتريه.

أخوي إنت تقول التويوتا شيك إشتر الحين السياره وتعال هنا وقول لنا بكم

يعني لو نقول شريتها بـ 200.000ريال بنحسب انا وانت سنه وبيكون ممشاها الطبيعي 40.000كيلو تقريبا

إعرضها بهالوقت هنا وبتشوف بكم تسام

صدقني أخوي انا كنت يوم الجمعه بالمعارض أكثر عرض بالمعارض الجيوب التويوتا بكافة موديلاتها.

أنا معاك الطلب عليها ولكن من كثر العرض ماعاد فيه شي اسمه تمسك سعرها.

أخوي
انت لو معك شي شريته بـ200.000ريال وبعته بـ 160.000ريال
وأنا معي شي شريته بـ 140.000ريال وبعته بـ 105.000ريال
.

هل معناها ان الشي اللي معك شيك؟

باللهِ ركزوا ياإخوان في سياسة الشركات إدخل على قوقل ايرث وحط احداثية مستودع عبداللطيف جميل اللي في

جده وشوف صورة جديده والله بتشوف الاندكروزر اللي يقول لك إدفع كاش وانتظر شهرين أكوام أكوام

ياحبيبي الإف جي صارت سيارات دوريات عليها خطوط الدوريه هههههههههههههههههههههه.

المرور السّري معه كورولات فل كامل فتحه وقير اوتوماتيك ومراتب جلد خخخخخخخخخخخخخ.<< وهنا مربط الفرس

إدفع كاش وانتظر شهور ؟؟ أطلع الامارات أو قطر وأطق لي أحلى مواصفات وأستلمه في يومه.

يعني الإنتظار مو لأنك شريت تويوتا الإنتظار لأنك عاملت أبو جميل.... وإفهم يافهيم

[ريثان القصيم]

الي جميع عشاق التويوتا والنيسان

الباترول الاخ غير الشقيق للاندكروزر ولكل واحد صفاته فكما يوجد هدد في التويوتا

ايضا يوجد هدد في النيسان (سياحي مكيفين وثلاجه ودفلك )

التويوتا v8 مايجي قير عايدي ابد حول 300 حصان
بينما النيسان يجي قير عايدي 6 سرعات الR السابع حول 400 حصان

تحياتي

ريثان القصيم

[عميد سامودة]

تويوتا صارت ( مسخرة الارض ) وانت الصادق
شوف الوكاله سحبت السكويا والافالون والكورلا وانتظر الجيب والهلي مابقي الا هي
بس النيسااااااان قيمته حلوه بيع ولا مشترى
والسعر يوم انك تقول الجي اكس غالي لانكم مضحكه
السياره تجي من اليابان للمورد الجيب اقصد يمكن بعشرين الف
ويبيعونه عليك بميتين الف وانت مبسوط واتلاتها ...... الخ

[راعي الفتك 9]

الحين مادامك مقتنع اشتر ولا تقارن بين النيسان والتايوتا
نصيحه لاتاخذ كلام الوكاله كلن يمدح بقله

[_دربيل_999]

أخوي..
اشكرك على الموضوع..
بكلمك بكل صراحة..
السيارات تؤدي الدور المطلوب منها وفي جميع فأتها..
انا سيارتي نيسان باترول..واقول لك انت صادق التويوتا اغلا ثمن وشيك بالجيب..ولكنها غالية نار سعرها..
اذا صار تفكيري اثناء الشراء كم بتجيب لي السيارة بعد كذا وقت بشتري تويوتا,,
اما اذا كان تقكيري استخدام وقوة كذا بنصرف للنيسان ليش مو لانه افضل من تويوتا لا تويوتا سيارتها ممتازة..بنصرف لان تويوتا غالية..والنيسان موتر قوي وكل مكان توصله سيارات تويوتا توصله النيسان..
ولمعلوميتك التويوتا سعرها مو بسبب قوة وأداء كل السيارات فيها عيوب وتويوتا تحتل هرم الأعطال وعندك النت وشفها سعر التويوتا صرعة زي اسعار الإبل عندنا في أم رقيبة..

تقبل تحيتي

الروقي

[ملك الإحسآس]

يا عزيزي المفخره مفخره ولا تسمع كلام النيسان
من متى النيسان سعره 230 ألف ..

[عميد سامودة]

يا مضحكه ههههههههههه

[قنوع]

تويوتا صارت ( مسخرة الارض ) وانت الصادق
شوف الوكاله سحبت السكويا والافالون والكورلا وانتظر الجيب والهلي مابقي الا هي
بس النيسااااااان قيمته حلوه بيع ولا مشترى
والسعر يوم انك تقول الجي اكس غالي لانكم مضحكه
السياره تجي من اليابان للمورد الجيب اقصد يمكن بعشرين الف
ويبيعونه عليك بميتين الف وانت مبسوط واتلاتها ...... الخ

السياره تجي من اليابان للمورد الجيب اقصد يمكن بعشرين الف
ويبيعونه عليك بميتين الف وانت مبسوط

هههههههههههههههههههههههه ماشاء الله عليك ................. تسمع بالأشاعات

[قنوع]

كل الموترين ماعليهم كلام

وكلن ورغبته............................ انا جربت النيسان ماجاز لي

وسلك معي التويوتا.............................. وفيه من الربع ماجاز له التويوتا يقول كنه ثور............. ومغرم بالنيسان

وانا أشوف ان الواحد ياخذ اللي يرغب ويرتاح له وفي الأخير كلها مواتر................... تودي وتجيب

وراح أجرب النيسان الجديد بأذن الله واذا شفت انه افضل من التويوتا لامانع من التغيير

والله يحيينا واياكم حياتن طيبه ويرزقنا من فضله.................... ويجعل مارزقنا عونن على طاعته

[مدمن فتك]

كلن ينام على جنبه اللي يريحه