موقف اريد التعليق عليه ................

[#ّّ الفارس #]

اليوم ركبت الطريق الدولي
طبعا كنت امشي بسيارتي الددسن موديل 2003 غمارة بسرعة 180
وبعد ما قطعت نصف المسافة للديرة الللي رايح لها
لاحظت انه فيه ددسن 2002 مرت من عندي ولا كاني امشي وحاولت الحقه لاكن مافيه فائدة
ليش هذا وش مسوي بسيارته علشان تمشي كذا .
ملاحظه / راعي 2002 ابتعد عني تقريبا 200متر فقط

[السالمي]

قرب احتمااال تلقاه مركب مراوح كهرب

او شايل الماكينه ومغيرها الى ماكينة ثانيه

بس دامك تقول انه ابتعد 200 متر فقط اغلب الاحتمالات

هو انه مركب مراوح كهرب

لان عزم الموتر يزود وحنته تخف بعد شيل المروحه العاديه

وبعدين انت ماحددت وش مكينتك كربريتر او بخاخ

لان حسب ماعرفه ان الددسن تجي كاربريتر وتجي بخاخ

وهذا يفرق بالعزم

[#ّّ الفارس #]

مشكور اخوي
اولا: وشي مراوح الكهرب وين تحط
ثانيا: كبريتر طال عمرك
وشكرا

[SilverSniper]

السلام عليكم ورحمة الله وبركاته...
حياك الله أخوي الفارس...
أولاً... وش بلاك تمشي 180... أنت بايع عمرك؟؟.. والا أهلك ما يبونك؟؟.. ياخي ما من ورا السرعة خير.. أرفق على عمرك وترى العمر غالي..
ثانياً... فيه أشياء كثيرة ممكن تركبها وتزيد السرعة... منها فلتر الهوا.. منها أسلاك البواجي والبواجي.. منها مراوح الكهرب.. منها الفصال.. منها تغيير الكربريتر.. منها اللعب في المكينة ( بساتم نفخ... عمود تيمن .. خرط سلندر... وزن بلوف.. هيدرز ) .. أشياء كثيرة جداً.. بس أغلبها يلعب بعمر السيارة ويحوسها..

[اعقاب]

الحمد لله انك رجعت سالم
ياخوي وش حادك على 180
اكرر الحمد لله على سلامتك

[#ّّ الفارس #]

مشكورين جميعا والله يسلمكم
اخوي SilverSniper الديرة بعيده وانا موظف في ارامكو يعني في الدمام ومطلوب هناك يعني لازم استعجل
اخوي اعقاب الله يسلمك ويجزاك خير
أخوكم
الفــــــــــــــــــــــارس

[كشاته]

يمكنه منزل وجه الموتر شوي

[السالمي]

مراوح الكهرب

من المعروف ان الددسن مروحتها مشبكوه مع الماكينه في عمود

والرابط بينهم هو الكلتش


واغلب الناس يفك المروحه مع كلتشها

ويركب بدالها مراوح كهرباء

تعمل على الكهرباء مع وجود كتاوت

بالحاله هذي يقل الحمل على الماكينه

وتزيد سرعة السياره

وفيه اشياء ثانيه زي فلاتر الهواء اللي ذكرها اخوي SilverSniper

حتى الاطارات اختلاف حجمها يزيد من سرعة السياره

يعني الكفارات العريضه تبطء من سرعة السياره اذا كان حجم الكفارات اللي يجي شد بلد نحيف

وغير كذا زي ماذكرو الاخوان اذا كان راعيها منزل وجهيتها بالحاله ذي تقل مساحة اصتدام الهواء فيها

[#ّّ الفارس #]

مشكورين جميعا
بس للمعلومية ترا السيار الـ2002 حكومية
أخوكم
الفــــــــــــــــــــــارس

[السومر]

السلام عليكم
اذا الددسن الي طافك 2002 حكومي تلقاه مسنن يعني مخروطه ما كينته 60 بوصه
ددسنك شكل وجهيته مرتفعه وهو نازله ويمكن يكون موترك مو متعود على الخط
بعدين اخوي الفارس لا تسرع وتوقع على الخط عاد خط الدولي معروف كله باصات
وتريلات وسواقتهم الله بالخير .وقف على جنب يا راعي الددسن نوديك للحجز
تحياتي ســــــــــــــــــــــومر الشمال

[#ّّ الفارس #]

هلا والله بسومر الشمال
اولا موتري وزن الوكاله
ثانيا ما صارلى من شريته شهرين الا ماشي حوالى 30 الف كلها خطوط
ثالثا الطريق مزدوج
وشكرا
أخوكم
الفــــــــــــــــــــــــــــــــــــارس

[هاوي الهلي]

اول شي ليش تسرع ما سمعت الي يقول (لا تسرع فالموت اسرع) ثاني شي يمكن الددسن 2002 اقوى من2003 مثل الهايلكس2002 اقوى من 2003و2004 و2005 ولا يمكنه مسوي شي بالمكينه هذا الي اعرف وجزاكم الله خير

[#ّّ الفارس #]

هاوي الهلي مشكور وما قصرت
لاكن على حسب معرفتي المتواضعة في الدداسن
ا لــ2003 اقوى ،، واحسن ،، واريح ،، وارغب
وشكرا
اخوكم
الفـــــــــــــــــــــــــــــــــــــارس