جنوط GXR,VXR من وكالة عبداللطيف جميل صينية (غش علني)

[ابوعروب]

نعم جميع جنوط VXRوGXR من وكيله عبداللطيف جميل مغشوشة وهي جنوط صينية رديئة الصنع وتسبب ارتجاج قوي للسيارة 0 هل يعقل ان تشتري سيرة بهذة القيمة وتكون الجنوط صينية ورديئة الصنع 0اين ؟ هيئة المواصفات والمقاييس عن هذاء النصب والغش الكبير 0فقط ختم واستكر واسم وليسى لهم اي قيمة والعملية مصالح للوكلاء و من يتوارى خلفهم من اصحاب النفوذ 0 واكثر شي عندنا الهيئات الفاشلة واخرها هيئة سوق المال ‍‍‍‍‍‍0 ‍‍‍‍‍‍‍ يجب ان يرفع على عبداللطيف جميل شكوى جماعية وتشوية سمعة الشركة شركة النصب 0

[* الخطيب *]

أخي / أبو عروب

معي vxr 2003 رقم 2 سعودي
وجنوطه أصلية عليها ختم بلد الصنع حفر ولم أعاني من رجات .والحمد لله ، والجنط مقاس 17 ،والمسجل أصلي والاكسسوارات كذلك باستثناء الدعامة النيكل فوق الصدام الأمامي فهي صينية .
أما الــ gxr فمعي أحد الزملاء بالعمل فعلا وجد ماذكرته جزاك الله خيرا من أن الجنوط تسبب رجات بالموتر . وكذلك المسجل صيني وبعض الاكسسوارات كذلك ، وشكاوي هو والوكالة حتى استطاع ترجيعه واسترداد القيمة مع خسارة سبعة آلاف بعد جهد جهيد .

فعلا المسألة تريد حماية مستهلك صح !

[aziz2727]

انا معي GX-R مديل 2004 والغريب ان جنوط الخليجي يجي مقاس 17 وعبداللطيف مقاس 16 !!!!! وحسيت انها مهيب اصلي من اكواع الجنوط شكله مسويه اي كلام .. بس اليحين وش الحل ؟؟؟؟ نشتكي والا كيف ؟؟؟

[SilverSniper]

الأخ العزيز أبوعروب....
أشكر لك اثارة الموضوع... جميع الجنوط التي تدخل للمملكة مفحوصة ومختبرة ومطابقة للمواصفات السعودية والأمريكية .. ولكن تتفاوت في هذا التطابق.. فبعضها مطابق بجدارة والبعض الآخر كما يقولون على الحفة.. ولكن كلها مطابقة للمواصفات السعودية..
بالنسبة لسيارات تويوتا.. الجنوط المستخدمة يابانية الصنع وذات جودة عالية وهذا ما رأيته في مختبر المعادن.. ولكن ما أراه في المعرض شيء.. وما أراه في الارسالية شيء آخر.. وهذا يدل على تحايل عبداللطيف جميل حتى على الأنظمة الحكومية كذلك.. وللأسف.. لا سلطة لنا عليه.. لأنه يستخدم جنوط صينية مطابقة للمواصفات السعودية مع أن مطابقتها على الحفة ولكنها تعتبر نظامية.. وللتاجر الحق في التصرف في بضاعته نظاميا كيفما يشاء..صحيح أنه غش وخداع ولكن لا سلطة لنا عليه.. ...على العموم... لي عودة بعد التثبت من بعض الأمور المتعلقة بالموضوع وأخذ بعض المعلومات من مختبر المعادن ومختبر السيارات..

[ابوصالح91]

الصراحه موضوع غش عبد اللطيف جميل ما ينسكت عليه
شف الهايلكس السعودي القير مهب اصلي والدليل1كل يومين اوثلا ث تلقا واحدطايح قيره
2لقمةالريوس للخليجيه بدون قررررره سواءا واقف او مدحدر بخلاف السعودي

[ابوعروب]

اخواني الاعزاء ما ذكرتة شاهدتة بعيني واعتراف من وكالة تايوتا نفس العاملين فيها يقولون ان الجنوط صينية !!! ومكتوب عليهاء !!! والدليل حينما يحدث اي رجة في السيارة و تذهب الى تايوتا وهي تحت الضمان يدخلون السيارة ويفيدونك انها تحتاج الى ترصيص فقط !!! حتى لا ينفضحو ويشتكيهم صاحب السيارة0 !!! البضاعة مضروبة اصبحنا في سوريا ههههه

[أخو شما]

اعذروني بس عبداللطيف جميل ما يلمس اللكزس بجميع أنواعه والvxr أما ال gxr وباقي السيارات فخذ غشا وتجميعا
الوالد معه vxr 2 موديل 2003 من عبداللطيف جميل مثل الاخ طويلب علم جاي كلش أصلي وكلش شد بلد
وأنا معي هايلكس فل glx جاي من اليابان بدون مكيف ولا مراتب ولا مسجل ولا جنوط
ومركب مكيفهم ومراتبهم وجنوطهم في جدة
والمسجل تدري انه تسذب شكله ما يركب على السيارة من داخل مثل الجي اكس ار 2003 وتحت
وعشان يسكتنا حاط حساسات ونور يتحرك و فيبر أسود بالصندوق





تشتكي والا ما تشتكي ما عندك أحد

[اسيزو 4x4]

والله انة نصاب كبير كلن يشتكي بس وش السواة
مامعك الا عبد اللطيف الله لا يوفقه......

[ابوعروب]

وازيدكم من الشعربيت ان مسجل بايونير الي في GXR ماليزي 0 والجناح الخلفي صيني ‍‍‍ 0 الله لا يوفقهم لو تشتري بقيمتة 5 جيوب كورية احسن من الصناعة الصينية

[السالمي]

لبيه يالشروكي والنيسان

مايعروفن السوالف ذي

كلش اصلي من وكالته

حتى دبله دفرنس ماغيرو فيه شي

ان غيرو تلقاهم يطورون فقط

[ابو شكاع]

ولو اثر الأمور مدبرة

فعلا شي يقهررر

الله لايوفق كل من يغش المسلمين

[ابوهاجوس]

حسبنا الله ونعم الوكيل

[مالك بن الريب]

عليكم بالنيسان طويل العمر مايعرف الغش بس عيبه شفاط لقاط للبنزين وقطع غياره نيراااااااااااااااااااااان

[قصيمي دب سريع]

وحشتون
رحت لقيت جنوطي مرصصه
وموتري فكس ار رفم 2 خليجي
شاريه ب150 الف ريال
بس مو انا الي فاكه
عموما كل جنط فيه مع الجنب يمكن 3 حروف بارزه بس مادري وشو ومالقيت كتبة مديان يابان
اغيرهن والا لا
تراي شكاك

[بن عدوان]

أنا شريت موتري اللي بالصورة تحت جديد من الوكالة .. وهو نوع GXR-J المطور موديل 2004

ولكن بدأت الاكسسوارات اللي ركبها عبدللطيف جميل على شكل السيارة تظهر مساوئها ..فمثلا :

الأنوار الأمامية .. : لما غسلت السيارة أول مرة بعد ما طلعتها من الوكاله .. دخل فيها الماء .. وأصبحت قطرات الماء داخل الأنوار ..ثم رجعت للوكالة وقالوا أنهم غيروها ..ولما رجعت مرة أخرى وغسلتها بالمغسلة .. دخل الماء في الأنوار مرة أخرى .. وأعدتها لهم عند فحص العشرة ألاف كيلوا .. وغيروها .. والحمد لله لم يدخلها ماء إلى الأن .

الصدام الأمام : يصدر صرير أثناء المطبات .. بل وعند ركلك له بالقدم بشكل خفيف .. وأعدتها للوكاله وتم تنزيل ربلة الصدام الأمامي وإعادة تركبه مرة أخرى .. وذهب الصوت ..ولله الحمد ..

الشكمان : وضع عبدللطيف جميل شكمانين لهذا الموديل ..وياليته مافعل .. فأنا راجعت الوكاله ثلاث مرات .. بسبب أصوات الصرصرة الصادرة من احتكاك الشكامين بالبدي !! كأنك راكب هايلكس موديل 70 .. وإبشركم .. إلى الآن ما انحلت المشكلة .. وأخرها قال لي مسئول الصيانة : هذه الاكسسوارات هشه .. وضعيفه ...

ربلة الصدام الخلفية : ضعيفة جدا .. جدا .. وأول ما يلامس الرمل أثناء التطعيس .. راح يقوس .. وينتفخ ويصبح كأنه به ورم سرطاني خبيث !!! دفع الله البلاء عنا وعنكم ..

هذا اللي طلع لي في هالموتر اللي تشوفونه .. وهو ما مشى إلا 14000 كم فقط .. والله يستر من الخافي ..

واللي عنده مثل هالموديل راح يعرف كلامي ..
وسلامتكم ..

أخوكم بن عدوان