خوة النشمي , وجرة الوسمي , وفرخ شيهان لاهد يدمي

[الفيتو]

بسم الله الرحمن الرحيم
السلام عليكم ورحمة الله وبركاته
صباح الخير ياجماعة
الحلقة الأولى

لما تكون صقار ويمر الموسم
امامك امرين ياتكون راضي ومسرور أو تحس بالتقصير في حق نفسك وحق طيرك
إحساس يمر بي سنويا في نهاية كل موسم
العمال بالخواتيم
أنا راضي ودواعي الرضى والسرور كنت قانص في رجوع الكروان وفي مصر وفي ضيافة
سمو الشيخ محمد بن سلمان ال خليفه .بعيد عن عالم الصوايات ونسترفعك عندنا جره ههه
الدعوه كانت عامه لمن يهو الطيور وهددها . إركب الطياره القصر قدامك والجيب

شيخ ٍ شــبــاب مــولـع ٍ بالصقاره .. والمال مايــشــكــي من المال نقصان
من كل علم غـــانـــم ٍ فـيـه أشاره .. ولايــنــوخــذ عــلـم ٍ ولامــعـه برهان
دوك النشاما تـلــتـــقي وسط داره .. وإليـا مشى يمشي مع الشيخ شيخان
إمغامر على الـخـــطـر به جساره .. واهم مــافــيــه الــتـــواضع والإيمـان
ومن دون اطول بإختصار العباره .. محمد ولد سلمان مــاغـــيـــر سلـمان

قصر الشيخ يبعد عن المدينه تقريبا (30 )كم وعن اطرف حراوي الصيد نصف كم
هذا القصر
مضيت فيه أيام والــصــدر مشروح .. مستانــس بــين الــوجــيـه المفاليح
وأقفيت عنه إعصيروالقلب مجروح .. خطر ٍ عليه لا أنطل الثوب و أصيح

مايندرى هي حلم والاعلم تجمع من كذا دوله في وقت وعقب هالجمعه تفرقنا اللي راح
لمريكا واللي لبريطانيا واللي لقطر واللي للبحرين واللي قعد في مصر واللي للسعوديه

الصيد متوفر والجو طيب والطيور طارفها سداد . والمعزب ولامهونة ٍللشيوخ
محمد ِلين الجناب و ِزين القبال تخلي اي واحد يعرفه يحس إنه الوحيد المقرب منه
من دون غيره . يطري عليه بيت للشاعر المحبوب ياسر التويجري
إذا البلاط الأميري والكنب والغمام .. له واحد يدهـــل فــي صـبــــح والاعصير
فنا دهلت الثريا والــقــمـر والغمام .. واصبحت أدهل على مشلحك مالي خشير
..
كان المقناص فوق ماتصورنا ماخرجنا من جو المقناص الافي كم حاله اعرض عليكم منها
الحالة الأولى
رجوعنا الى مقاعد الدراسه .. طبعا حلم تخيلوا نكون قانصين ونحلم انا في مدرسه
كابوس لكن الحقيقه كان حلم جميل وخصوصا كلنا في فصل واحد

تصوروا طلع حسن السيره والسلوك ذياب النعيمي

ومن كان البرونجي (العريف )حمد راشد النعيمي ماشاء الله حتى في الحلم قيادي

الطالب المشاغب كان بدر الدوسري معقوله

لالالاوالمدرس شوفوا من الشريف حاتم ال غالب . ويستخدم محفار الجرابيع عصا

ما اقول لكم حلم جميل ماهو كابوس شوفوا موضوع الدرس

[الفيتو]

بالنسبه لراشد بن حمد ومحمد بن ذياب كان كابوس مزعك لأنهم طوفوا اسبوع من الدراسه
بموافقة أولياء أمورهم ولذة غياب اسبوع بلذة المقناص كله

..
الحالة الثانيه اللي خرنا من جو المقناص
تسمعون عن المشاكل اللي يتعرض لها القنوص الخليجيين في الخارج .في أحد الأيام
كنا تونا دارعين في الكراوين سمعنا صوت واحد من ربعنايراسلنا يقول يالربع
تقاربوا واللي يشوف موتري يتجه يمي . فيه رجل ذبح اثنين قدامي
توجهنا يمه وشفنا هالشوفه

. من قريب حبينا نوثق الحدث بالصوره ومبين تونا صايدين كروانين

في الحلقة القادمه أكمل لكم السالفه
*
والسلام
الفيتو
الحجاز
15/4/1431هـ

عشقت شلفا عقب ما روح الدامي ** واشغلتني يافهد واشغلت شيبانك

[الفيتو]

بسم الله الرحمن الرحيم
السلام عليكم ورحمة الله وبركاته
مساءالخير ياجماعه

الحلقة الثانية

.رجل من اهل المنطقه مار في الطريق نشده واحد من الربع عن كراوين دله عليها ونزل من السياره
ورمى راس الذبيحتين اللي تشوفون . وقال هذي ضيفتكم .
هذا هو ينفض يده بعد الذبح الحاج مبروك من قبيلة الجميعات


.تونا صايدين كروانين والجول باقي والساعه تقريبا تسع . مالنا خيار
أحمد النعيمي شرع رجل الذبيحه . ونعم يابو عبدالله
رفيق الرفيق اليا عطى العثعث الخالي


.الخبره اللي في ذياب وفريقه انهت الفطور في فتره وجيزه ورجعنا للكراوين


.تفننا في الشوي الذبيحتين لم يبقى منها الاماترون

.مانخلص من العزايم اهل المنطقه كرماء ووقتنا ضيق
رحومه سعد ابو الربعيه وإخوانه عاشور وناجي وقاسم .لم نستطيع التخلص
منهم اعتذر ردائة الصوره . خمس من الغنم غير التوابع
ماهو غريب الطيب من منبع الطيب


.حتى صغار السن يتحلون بصفات الكرم والرجوله . من منطقة اولاد مرعي
لقيناهم مجتمعين على الشاهي وغنمهم ترعى حولهم نشدنا عن الكراوين قالوا
((حولوا .. اشربوا الشاهي ..ندلكم على جول ))


.أول ايام المقناص كانت مع سمو الشيخ خليفه بن سلمان بن محمد ال خليفه
سبوع وظروفه احرمتنا التمتع بالمقناص معاه


.علي بن حمد بن ظافر العجمي . يغدي الطير على اول صيده له.وسبعين نعم
يابو حسن ولاتكفي بس يكفي ثناء ابن الذيب عليكم في قصيدته المشهوره
اشرب الفنجال واكب البــيـــاله .. قاضب ســلــــمي سلوم الاوليني
ماش وين اللي عوايده الشكاله .. مثل ابن ظافر حمد ليته يــجــيني
الثنا والجود دايم فــي خــيــاله .. علمه ظافر دروب سلوم الطيبيني
جود العليا وســلـــمـــها عياله .. وادركوا من علــمــته دنيا وديني
نعم صدق ابن الذيب جود العليا وسلمها عياله

[الفيتو]

يتبع .....

.كان لنا حظ في التمتع بهدات السلق . لكن بعض المواقع مال السلوقي فيها سعد
هدد واحد في اليوم يحفيها . يتضح في الصوره
الشريف محمود الغالب . كذلك ظروفه احرمتنا متعت المقناص معاه


.الأيام اللي قضيناها مع الشيخ خليفه والشريف محمود كانت ممتعه
مضحى كنا نستلذ بحرارة الشمس بعد البرد


.الشيخ خليفه إعجاب بطيرالصقار ناجي سعد (باروده) حظه دايم في الهدد يصير في ظروف غير عادية والنتيجه فتاكه
كان الهدد في شمال منطقة عبانه . مرب الحباري . يذكرها شاعر قديم وصقار من اهل المنطقه
في قصيده
جليت له في تقاطيع .. قبــلــي نــــزوة عبانه
خذى راسها ماتحير.. والجوجي قعد في مكانه
انشد ناجي سعد كلعاده هل هذ الكروان اللي صادته اللي كان متعلي فوق فوق
يرد الجواب المعتاد (( ماندري انا جليت للطير وقلب وطلب وفكيت سبوقه
وتمت نجري وراه بالسياره وهو يرقى وماشوف قدامه شي لحد ماقلت
في الجهازعبد يمسح الكبد هو الوقت اللي شفت الكروان وهي دخله عليه))


.


.صوره من الارشيف يظهر فيها ناجي سعد والفيتو جالسين
وفارس الصحراء ثابت العشيبي ايام الشباب. والشريف حاتم قبل يلتحق بالتدريس هههههه .
ورحيل بضاوه ابو تركي.الله يذكره بالخير ويذكر ال بضاوه بالخير
بت صقاره قديم ولازالوا من قبيلة اولاد علي واشهرهم في الصقاره الان .جابالله بضاوه . حسين بضاوه
وحمد بضاوه . افتقدناهم من فتره وفقدانهم علينا صعيب
طول غيابك علينا يارحـيـل .. ياعل ما حاصل ٍِ منا خطا
غيبتك عنا مثل غيبة سهيل.. الله يجيبك لنا عقب البطا
قول للزمان ارجع يازمان
( الديرة اللي صدنا فيها الظباء لو الواحد يدور الظبي للعلاج مايحصله الله المستعان )


سمو الشيخ خالد بن علي بن عيسى ال خليفه . من اللي بجنبه ؟
اقول لكم في الحلقة القادمه لالالا بقول لكم هالحين
اخاف يختفي وماتشوفونه . هذا مسعود مرزوق حزام الظهر
يختفي ووقت الله الله يظهر وتبان منفعته .. قلب صاطي وخوي طرقه


يالله ياقنيص غبر هذا الجير تابع الحلقة القادمه وتاخذ العلوم

انتظروا الحلقة القادمه
*
السلام
الفيتو
الحجاز
16-4-1431هـ

[الفيتو]

بسم الله الرحمن الرحيم
السلام عليكم ورحمة الله وبركاته
صباح الخير ياجماعه

الحلقة الثالثة

التنافس على تعليق الوشاح لمن يتصدرالقائمه بكثر الصيد اليومي .
يشحذ الهمم , ويزيد الحماس
سمو الشيخ خليفه بن علي ال خليفه . ويتضح التفوق من وجود الوشاح
على صدره ويطمع في (الهاترك)
.

قبل المضحى وهذا الصيد !!!!اليوم مالك منافس يابو دعيج .
الهاترك حاصل حاصل
.

طير الشيخ خليفه جميل واسمه جميل (إستاند باي منتظر للانطلاق )
الصقار ناصر بن ماجد النعيمي نجاح الطير من تمكن الصقار
.

صوره تذكاريه مع الشيخ خليفه وطيره بعد ارفع تعليقه في ذاك اليوم
.

إمحق كروان والله ماانت بحضيض من يوم صبحك هالموتر
قبل خروج إشهاب من التنده طلعنا السكين
نادرا ماتشوف الكروان مخمر في هالديره . كراوين ضاريه بالرمي
تطير على البعد , تعلق بالنجوم , من الصعب تاخذ من الجول اكثر
من كروانين , لوكان طيورك مستواها ممتاز
.

كل يوم يمتعنا سمو الشيخ خالد بن علي بن عيسى ال خليفه
بهدات اشهاب والهدد هذا غير عادي
(النــعـــم بالــمــهــدي ونعم الهديه) .. ونعم بمن جته الشــياهين مهداه
هــدو الــعــديــم اللـي ينومس خويه .. وشوفة بني عمه معه غاية إمناه
يالــشــيــخ خــالـد يــازبــون الونيه .. ياخو خليفه اللي طروقه مـــخلاه
إطلق إسبوق إشهاب صبح إوعشيه .. خــلــــــوا جماهيره تهلل وتبراه
.

لقطات شــــــــــــهـــــــــــــاااابيه
.

لقطات نـــــــــــــزااااعــــــيــــــه

[الفيتو]

يتبع ......

..

أكيد الغلا له عقب ما صاد طيري زاد .. ومادام الغلا له زاد يالربع أبا أزيده
..

مقناص وصيد تالي نهار يتوسط الصوره اللي حاذف العمامه
عاشور سعد ( لقاف ظباء وشباك طيور ودليله خصوصا في جنوب مصر)
اليوم فر بنا على السريع في مكان توفقنا بالصيد وكان نصيب الاسد لشهاب
...

إسمح لي آخذ معك يابو علي صوره .. وحطها وسط جوالي وفي قـــلبي
أنته وأنا مع شهاب الطير الأسطوره .. النادر اللي فعوله تسلب اللبي
هدات تبقى بفكري دوم محــــفـــوره .. ياعل في المقبلات إيعيدها ربي
.
.

في أمان الله ياشيخ خالد مروح للقصر بعد ماطاحت الشمس وعشيت إشهاب الحقيقه المقناص معه مايمل وهو من الصيد ما يمل
راشد بن عجلان الصقار الاسطوره ايضا يلتفت لكم ويمسيكم بالخير
لو فيه أكاديميه للصقار وتسمى اكاديمية بن عجلان للصقاره ما اخطى من سمى
..

موت عدد من الطيور اثناء السفر وقبل المقناص . امر غير متوقع .
فروخ شواهين صايدات الحباري ,, وش معلم على الحباري ,, شي جارد في الصلال . الكل مجهزين طيورهم لهذا المقناص لكن أمر الله وحصل
.
.
.
الشيء اللي كان له أثر قوي علينا هو
سمو الشيخ عيسى بن سلمان بن حمد ال خليفه . يدرس في امريكا
وقرر يقضي إجازته الدراسيه في المقناص بين أخوانه الشيوخ وربعه
أرسل طيوره مع الصقاقيرقبل يجي وعدد منها مات .
لحظة وصوله كان سعيد جدا ونحن كنا سعداء بوصوله وسعداء بأن موضوع
الطيور تمت معالجته قبل وصوله . وذياب النعيمي اكثر سعاده ماتشوفونه ؟

كيف تمت معالجة موضوع الطيور ؟؟؟
انتظر في الحلقة القادمه
*
والسلام
الفيتو
الحجاز
19-4-1431هـ

[الفيتو]

بسم الله الرحمن الرحيم
السلام عليكم ورحمة الله وبركاته
صباح الخير ياجماعه

الحلقة الرابعة

معالجة مشكلة الطيور .
بتوفيق من الله

وصول ثلاث دفعات طيور عن طريق تجار الطيوربعد موت الطيور بيوم
دفعه فروخ شاهين صايدات الحباري
ودفعتين بين ,,قرانيس هواء,, وتبوع بحرايات,, وعراقيات.
كل دفعه مايرجع تاجرها الا بالفلوس
اما الطيور فرقت على الربع اللي فقد طير ياخذ طير واللي بيتزود طير
لايرده الا نفسه يدخل على الطيور ويشيل اللي يعجبه


وحوش بعضها جاء بقطابه


دخلنا في جو شهر عشره كل طير نديره ونفتش ريشه


الله يطول عمر الشيخ محمد فرق من اول المقناص .طيوره الصايده والوحوش ولم يترك لنفسه الا الرفاع


بدا العد التنازلي لو صول الشيخ عيسى بن سلمان ومرافقيه من امريكا
هابس المري ,, عبدالرحمن الدوسري
ايام معدوده والطيور لازم تصيد قبل يجي جهود مبذوله ومتابعه من الشيخ محمد
( الشيخ عيسى فضل قضاء إجازته بيننا يستاهل من يتعب له)


جزار
من طيور الشيخ عيسى سلم من الموت لكن البنج والمهاد والسفر اثرعليه كثير
فراج المري واجتهاد مع جزار لمحاولة عودتة لمستواه السابق


زلم
من طيور الشيخ عيسى لم يتأثر من السفر والحمد للهوهذا تركي مذكور
يطمنا عليه ويقول صاد اربعه ..ابداع ياتركي


صدق اللي قال جهز الحر ولاتوصيه ,, ذياب النعيمي متابعة الطيور
وبرنامجها ما يبا الا بياض الوجه مع الشيخ عيسى


مشعل البلوشي تولى قرناس الهوى وصل للتو بقطابه ..قلت الله يعينك يامشعل
قرناس الهوى والوقت يمشي بسرعه والشيخ قرب وصوله
قال(( لاتشيل هم قرانيس الهوى لعبتي))


مجلس راشد بن ناصر النعيمي داخل القصر
وصل الشيخ عيسى مواصل السفر من واشنطن الى هثرو الى مطروح
وواصل ليلة وصوله ينتظر الصباح على احر من الجمر


وتبدا ممارسة الهوايه

[الفيتو]

يتبع .....

طرد ,,, وهدد ,,, وتلقيف ,,, ومخالا


اول وقفه عند مصاد لطيور الشيخ عيسى ومع طلوع الشمس
وبسمك يارحمن يارحيم

معطاب
من طيور الشيخ عيسى سلم من الموت ايضا لكن البنج والمهاد والسفر اثرعليه كثير
ومحمد على النعيمي كان في سباق مع الوقت لتجهيز معطاب قبل وصول الشيخ
والحمد لله استطاع ان يرجعه لمستواه
الهدد هذ كان من امتع المهاد على قول هل الامارات طماشه


مع وصول الشيخ كثرة الكراوين لدرجة مايحتاج سياره .. لو مشينا على رجولنا هدينا ..اربعه كراوين كانت في الخلف يمكن مرمى شوزل


كراوين متقفلات من الشحم (فريش من كف الطير تدورالقدر والمرق)


قول وفعل يامشعل اليوم الثامن وبعد وصول الشيخ بيومين دخل الميدان بالخلوي
وشي شي لايصدق سوى شي ماتسويه الفروخ المعيده


جزار ,, فراج المري ومهد على قول الشيخ عيسى يستاهل العنوه من امريكا
الظابط .. خالد بن سيف النعيمي منورالصوره .. صيح معرفة الرجال تجاره
مـهـد يـسـتـاهــل عـنا الـطـأيــراتي .. عنت مـن إمــريـكــا ليا حــد مطروح
تمـشـي بأوامر راعي الــمـوجبات .. نسل الملوك الصـيـرمي مبعد الـشوح
عيسى ولد سلمان عدم الصــــفاتي .. يالله عسى صدره على الدوم مشروح
شيخ يشوف المشي بأرض النباتي .. مع الوحوش وهدها من غذى الروح
مــتــولـــع قـــلــبــه بـهــد الـفواتي .. بــالــلــي مــثـــل جزار للصيد ذابوح
إليا أهمل إسبوقه وهـــن مـبعـداتي .. كل الـصـقـاقــيــر إهتفوا وين بتروح


هذ الشي اللي عنا له الشيخ عيسى ويتمناه كل شغموم
ممشى بارض نبات ,, مع مشاكيل ,, وطيور جاردات
وتحقق بفضل الله




ِحـــبـــه يـــأشــيـخ حــبـه .. يستاهل مية ِحبه .. هذا الرفاع النادر مرض حشاك وِطبه
.
تسمعون عن طير يشنق في المزن؟؟ ماهي غريبه
لكن يشنق ويصلب . . هذا الشي شفناه
بالطير الرفاع كم مره يشنق الكروان فالسحاب . ويبقى فوق لمدة خمس دقايق
واكثر .لاوي رقبته ويطوطح .به كأنه خارج نطاق الجاذبيه مره يشرب به الريح
ومره يطيح به مع الريح . واللي منا فاته وماشاف الشنق معاه مجال
يجي ويتفرج في الصلب
طير خبير شنق وصلب
في الحلقة الجايه نشوف الرفاع

انتظروا الحلقه القادمه

[الفيتو]

بسم الله الرحمن الرحيم
السلام عليكم ورحمة الله وبركاته
صباح الخير ياجماعة

الحلقة الخامسه والأخيره

كل فرخ شياهين ماهو غريب الفعل الطيب عليه.. لكن في ميزه غريبه تطلع في
طير ويبطي مايشوفها الصقار في طير اخر

الرفاع لا شنق الكروان فوق , وكان تحته غنم ومعها كلاب . يلوي رقبة الكروان
ويبدا يحوم و يرقى به الين يبعد . عقبها اخذه
طبع حتى المواتر لاشافها تحته . استمر يطوطح به
في السماء ولا ينزل على سيره


هذا الصلب اللي تميز به الرفاع .. يضيف على روعة التعليق في المزن تتمتع العين بشوفه . يطوطح به دقايق
(شنق في عز القايله)


ويبدا الرفاع في الشنق والصلب وكلما زاد الهدد زادت مراجله .. يذكرني
بـ سليمان عوده . اللي حاذف العمامه في يمين الصوره
كلما زادت الشطه زادت مراجله


محمد بن حمد النعيمي (عامج234) يناسره من الصباح الى غروب الشمس .
الله يذكرك بالخير يابو حمد مرآه تعكس
للي يخاويه جمال قطر واهل قطر

من أجمل ماشفنا هالهده السماء ختم بيينا وبين الرفاع والكروان
الشيخ محمد طلب صوره جماعيه لتوثيق الهدد وتمنى وجود
الشيخ ابراهيم بن عبدالعزيز ال خليفه وشاف الهدد


الشيخ ابراهيم بن عبدالعزيز ال خليفه . تمناه الشيخ محمد وتمنيناه يكون
في المقناص لكن الظروف القاهره حالت دون ذلك


صورتذكاريه




للذكرى ويتضح في اخر الصور .. ابو قليله الله يذكره بالخير


الصقار جاسم الرويعي ,, يرفع صيد الرفاع . . لاشفت تعامل الرجل هذا مع الطيور
عرفت ان الصقاره مهيب خذني جيتك . والطيور المثامين ودك ماينقلها
الاهو وشرواه من الطيبين اغلب الطيور اللي اثبتت وجودها من
شهر عشره الى هذا الوقت كانت تحت نظره

[الفيتو]

اللي يحتزم بطير مثل الرفاع إليا قنص بيرجع كل تالي نهار باللي تشوفون وزود
.............
..........
الصفطان صفة من صفات الشيخ محمد ولا يصفط الا الطيب
بعد مامتعنا الرفاع أرسله هدية
وهذي قصيده قد قالها
الشاعر حشر بن نايف بن عون . في سمو الشيخ محمد من سنوات
اوردتها لموافقتها سياق الحديث يذكر فيها هالخصله الطيبه
مشكور يانجل الـشـيــوخ المسمين .. اللي كــرمــهـم تنضرب فيه الأمثال
فعل ٍ عليه إشـهــود عـــدل ٍ مزكين .. توارثوه اجــيــال واجــيـــال واجيال
من جدكم سلـمان الأول لها لحــيـن .. وأفعالكم يـفـخــر بــهــا بـين الأفعـال
إسم الخليفه لاحــضــر فــالـمـيادين .. يحط له في قــمـــة الـمـجـد مـنــزال
لأهل الوفاء وافــيــن للـضـد قـاسي .. ديباج في حال ٍ وقاســيــن فــي حال
كرمان للــضــيـفــان والمستـحـقين .. وموت ٍ حمر لاصار به حرب وإقتال
إبيتوهم في العسر منصا المقــلـيـن .. مثل الربيع اللي يجي عقب الأمـحال
أضفوا على البحرين ورد ورياحين .. والجار منهم يامن الــحــــال والمال
سلم ٍ من الأسلاف يـمـشـيـه حـيـين .. عن طيب أوايلهم يـبـرهن وفا التال
سلمان وعياله هم أكــبـر بـراهـيـن .. عن ماضي الأجداد يحكون الأشبـال
وهدية مـحــمـد على الراس والعين .. تاج ٍ لبسته لــبـســــة الراس لعـقال
اهدى عليه فرخ نــادر شـيــاهـيـن .. افخر بها بين الـصـقــــاقير واختـال
تشرى ولا تـنباع لو بالــمـلايـيــن .. من حشـمة محمد لها قــــدر واجـلال
عزيزة ٍ مرســولــة ٍ مـن عـزيزين .. بين الطـيور الها غلا خـاص وإلحـال
وختامها ما غــطــرف ٍ الـمــزايين .. اسلم ودم يامــعــرب الـعـــم والخـال

الشاعر حشر بن نايف بن عون


ايام مرت كأنها احلام اليوم يبدأ بعد الرجوع من صلاة الفجر والاتجاه لمجلس رااشد بن ناصر النعيمي لشرب القهوه
ومجلس راشد خيمه تشب فيها النار ونتقاطع عليها الأشوار


وبعد القهوه نجتمع على وجبة الافطار


الطيور اللي مجود عشاها يفرع عنها عقب الفجر


التشييك الاخير على السياره وشيل مايلزم ماء ..حمام


بعض المواقع . هد السلق بدون طير هذي نتايجه اليوم غاره لازم
اجازه يعني بيزعل خالد السعدي


هذا خالد السعدي يحييكم ويقدم نصيحه


نصيحة السعدي . ارنب الارض الحفيه هذا علاجها سلقه وطير

[الفيتو]

يتبع ....

بعد التأكد من رمي الروباج كلن شال طيره


مابقى إلا ظهورهن يالنشاما
..
.


هذي بداية كل يوم والمساء رجعه الى القصر واجتماع على هبة الريح
...





ايام راحت كأنها أحلام ليل ومطاريش عَرَفتنا فيها الرجال وعرفنا فيها
الرجال وإذا سلمنا بالمقوله
( الرجال معادن )
فمن دون مهونة ٍ لباقي الدول وشعوبها

( البحرين منجم النقدين )
..
اشكر الجميع على المتابعه واستودعكم الله
*
والسلام
الفيتو
الحجاز
24-4-1431هـ

[بعيد الشوح]

ماشاء الله تبارك الله ابو صالح لا ماني مصدق عيوني ومعه الشيخ وحاتم ونايف لا اكيد انهم قنوص في مصر
يالله حيه يمرحبا يبو صالح موفقين دايم ومافيكم حيله وفالكم العراق السنه الجايه
تقبل مروري

[قنيص غبر]

الفيتو انته بتذاكر من ورانا ولا ايييييه !!!!!

انته مواضيعك كلها مشوقه ومتميزه ولا يهونون الربع ...

بس كثر من الجير الله لا يهينك ترا مالهن صور في هالمطراش ههههههه

[عبيدان]

ما شاء الله تبارك الرحمن

عزالله انها خوة نشامى تسوى شي(ن) كثير

والله لا يهينك على هالموضوع الرائع

لكن سالفة الدم وذبح ثنين

ودنا نعرف سالفتها

بإنتظارك

[القنـاص2008]

صايد وفايد وباالعافية صحبتة طيبة وانت اطيب