ياراعين المكاشيت عطونا علم ماطور الكهرب اللي في هايبر بنده

[التاج الذهبي]

السلام عليكم يا مكشاتيين تراني متابع قديم لكم ولكني توني اصير عضو الله يعينكم على غثاي

لقيت ماطور كهرب
نوعه Tiger تايقر صيني
1200 واط
يقول اللي يبيع انه يشغل ست لمبات نجف وتلفزيون وريسيفر

تهقون انه سنع ويتكل عليه ؟

ولا نكبة عفش ننحاش منه ؟

صراحه سعره يغري يقولون بـ 299 ريال بس

وش قولكم يا مكشاتين ؟؟؟؟؟؟؟؟؟؟؟؟؟؟؟؟؟



هلا

[odyssey]

هذا الله يسلمك اشتريتة قبل عيد الأضحى واخذانة في رحلة لمدة ستة ايام صراحة ما قصر مشغلين علية ثلاث لمبات صفر زائد ثلاث نجفات وشغال زي الحلاوة مع انة كان مطر غزير طول اليل وما كان مغطى وهو لازم تخلط زيت مع البنزين واذا عبيتة فل يقعد خمس ساعات

[aziz99]

أخوي/ التاج الذهبي

حياك الله ....وخذ العلم مني....... إشتريت ماطور هوندا .....ياباني... 1000 واط.... بـ 1300 من رحلتي

ولكن فيه ملاحظات:-

1- أزعاج
2- زينة البر لمبة صغيرة ولا تريك .....وهذي حلاوة البر
3- فيه شاحن كهرباء قيمة 450 ريال ...... يمكن أستخدامة عمل اشتراك للسيارة ( يقوم بطارية السيارة ) وتشفل علية المبات الي تبي......جربتة .... على لمبه بيضاء نيون لمدة 6 ايام وما فضى..
4- عموماً الماطور الهوندا ....بعتة ونا ماستخدمتة الا 7 ساعات.....أزعاج... ويلغي حلاوة البر

وشكراً

[التاج الذهبي]

أخوي odyssey

كلامك قالووووه لي في هايبر بنده والحين أنت تأكده يعني صادقين
والله انه رخيص ان جيت للحق والظاهر اني ابتوكل وأطق لي وحيد
مشكور على ردك


أخوي aziz99

كلامك ياقربه من الصح لكن تدري وش المشكله عندي ؟
العام كنت في روضة الخفس وماخذ عيالي معي وفي اخر الليل قبل نسري بدت تضعف اللمبه اللي انا مركبها على السياره قمت اركض بزعمي ابلحق على البطاريه ويوم شغلت اشتغل الموتر شوي ثم بدت اللمبات تضعف الين طفت السياره واكتشفت ان اللمبه جابت العيد بالدينمو


تخيل انت في البر ومكان بعيد ومعك عايله والدينمو يقولك قابلني اشتغل وش تسوي ؟
بعدها صراحه قررت اني ما اطلع طلعه في الليل الا ومعي ماطور ولا ماطلعت



هلا

[مهراس]

التاج الذهبي: هذا الكلام السنع

[ابو وطبان]

الله يسلمك اشتريت واحد من كار فور بمبلغ 280 ريال وطلعت به لصمان ثلاث مرات ويشتغل من احسن شى ومركب عليه (9)لمبات 60 شمعه وشاحن الثرياء ترا صناعه صيني لكن فيه عيب وهو انه مايشتغل بعد ماتطفيه الابعد ماتنظف البوجي المهم ان سعره ببلاش

[الورر]

اقول... محول كهرب " سونيكا "
مكتبول عليه: صناعه اظن " تشاينيه" بتكنولوجيا " يابانيه"
نشغل عليه 7 نجفات ولا ادري هو يتحمل زود او لا... ما جربت
الجهاز صغييييييييييييير في حجمه10x10سم
سعره تقريبا 130 الى 150
تجدونه في الغرابي ... عند حقين الروادو وزينة السيارات اللي حو ل اهل الكفرات، وممكن ايضا في البطحاء عند اهل الكهرباء اللي على الشارع العام
وما يأثر على البطارية
يعني يشتغل له 7 او 6 ساعات
وبامكانك تشغل الموتر كل ساعتين علشان تطمئن على البطارية

[mox600]

اخوي فيه نوع اسمه ميتسوبيشي نفس شكل ولون التايقر بالضبط
هذا عند واحد من الشباب وصار له سنه عنده زي الحلاوه
بس ما عندي خلفيه عن سعره!

اما الماطور الهوندا اللي ذكره الاخ عزيز99
اعرف ابو واحد من الشباب عنده واحد من تقريبا12 سنه
وماشي ميه ميه معه لين اللحين يستخدمه ولا اشتكى منه
بس هو انسان محافظ على المعدات يعني يعتني
وعلى كثر كشتاته ماشاء الله الماطور شاد نفسه .

اتمنى اني افدتكم

[الدردغان]

بصراحة الماطور المذكور ،،،،،،،،،، هههههههههههههههههههههههههههههههههسنع جدى

[الجنوبي]

الا خ العزيز
التاج الذهبي
الما طور المذكور ممتاز بس مشكلته في قطع الغيار
شريت واحد من دبي وشدني له سعره
فحصلته في محل الجمله 170درهم
بس اقل كميه 12 ماطور
وشريته من الخارج 240مع قاعده حديد تحمي من الصدمات وتساعد على حمل الماطور
وطلعت فيه كشتات وشغلنا عليه لمبا ت وتلفزيون ورسيفر وماشاء الله عليه .....
يس مشكلة المواطير الصوت ......
بس اعتقد فيه هوندا كاتم للصوت ...................................

[aahhhh2]

السلام عليكم
يشباب انا شريت وحد من كار فور 1200 واط وخلطت معه زيت دركسون (با لبيد )
وجيم ( خرب )
سوئلي وش الزيت الي يخلط معه زيت سيرات او دركسون او زيت حق الدبابات البانشي
عجلو بلجواب ترا عندي واحد اخاف يروح ضمانه

[الجنوبي]

الا خ العزيز
aahhhh2
الزيت الذي يخلط مع البنزين زيت مكينه السياره
ويوجد في غطاء تانكي الماطور علبه بلا ستك عليها شرطات
تعبيها فل وتعبي الماطور فل وتخلطها مع بعض .... وسلا متك

[mox600]

aahhhh2
اللي اعرفه تحط زيت باور في التايقر

[الجنوبي]

يا شباب للا هميه
ماهو الزيت الذي يخلط مع البنزين
1)زيت مكينه
2)زيت باور
او مافيه فرق بين الا ثنين

[سهيل واحد]

الأخ............. التاج الذهبي


صراحة أنا ما استخدم مواطير كهرب بالبران لمبة على البطارية و السلام .. لكن .. ولكن هنا مهمة وخاصة لك يا التاج الذهبي الماطور اللي ذكرت تايقر (النمر) يوم شفت فعله في آخر طلعة لي قلت عز الله لوهو بألف ريال انه رخيص والسالفة يا طويل العمر والقارئين كم يلي:

كنا في منطقة ربيع بعيدة وما حولنا إلا الوالي وكان معنا سيارتين وحدة خبطت وبطاريتها راحت في خرايطها .... والسيارة الثانية نام فيها واحد من الشباب (خواف) وكان تارك الأنوار الداخلية مولعة والسيارة طافية ويوم أصبحنا الجمعة إلا السيارة اللي نام فيها الرجال قصدي الخواف فاضيه بطاريتها ... وكان مع واحد من الشباب المذكور قصدي الماطور Tiger.. راعي الماطور كان توه شارية و ما قد جربه قام وجاب الماطور وعطاني إياه و قال شف فيه سلكين زى أسلاك الاشتراك يمكن ينفعن بشي .. قمت شغلت الماطور و شبكت السلكين بأصابع البطارية كان قصدي أجس النبض حق الماطور وتركته حوالي ربع ساعة شغال و الأسلاك مشبوكات و اسمي بالرحمن و انقر السلف وتشتغل السيارة .. والتفت على راعي الماطور و أذكر الله .. قال لي والله إني معطيك اياه وأنا ما ادري هو يقوم دباب او لا .. قلت له والله بوضعنا هذا لو قيل لي تشتريه بألف ريال .. أقول يسوى أكثر .. رجعنا للرياض ومن ثاني يوم وأروح لكارفور و اشتري واحد.

والسلام ختام.