مساعدات خلفية ترفع الهايلوكس!!

[تلميذ شقران]

أحبابي في المنتدى ..
موضوع طرحته في أكثر من منتدى لكن لم أجد الإجابة الشافية ..
عندي هايلوكس 99 من الجدد غمارتين، وركبت توانك في الخلف جعل الموتر مطيح من الخلف ..
وذكر لي أن هناك مساعدات - الظاهر - تركب بأحجام تنفع للهايلوكس ..
ياليت تعلموني عنها وعن أنواعها، وهل لها مضار ؟

الرجاء إخباري في أسرع وقت وإفادتي لا هنتم ..

[تلميذ شقران]

يا جماعة الربع، والله محتاج لها بسرعة جدا ..
وينك يا مشرف الورشة ..

[تلميذ شقران]

نرفع لنرفع الهايلكس

[تلميذ شقران]

بانتظار الفرج ..

[الشاص]

حياك الله اخوي
واعتقد ان فيه مساعدات اسمه جبريال بس مدري عاد عن الهيلوكسات تركب والى لا بس اعتقد انه يجي منها نوع صغير وهي الصراحه مساعدات قويه وتستحمل وترفع الموتر
وسلامتك

[تلميذ شقران]

تسلم يالشاص ما قصرت، ولا هنت ..
وياليت من يعرف أكثر عن الأمر وكان مجرب يفيدنا، ونحن له من الشاكرين.

[جواب]

نعم ياخي
هذي المساعدات مثل ماقل الشاص يجي معة سستة ملفوفة حول المساعد وهي جيدة وقوية تركب مدبولة مع مساعدات شد البلد على الجموس بكل سهولة ماادري اذا هي تركب على الهايلكس او لا......

[تلميذ شقران]

مشكور عزيز جواب، لكن وعلى حد علمي ان المساعدات ليس لها أي تأثير في ارتفاع الموتر ونزوله، بل في قوة المطبات على الموتر أو خفتها أفتوني مأجورين

[الشاص]

بالعكس ياالطيب
المساعدات اذا صارت قوبه مثل مساعدات جبريال فهي تتحمل ثقل التوانك ولا تخلي الموتر ينزل
واذا كانت جبيريال تركب على الهيلكس انصحك تجربها لانه مساعدات الصراحه مافيها كلام
او انك تمر لك اقرب ورشه وتخليهم يشد لك الستت او مدري وش يسون بها بس عاد الله يكون في عونك بيصير المطب مب صاحي
وبالتوفيق انشاء الله

[فتى صعافيق]

السلام عليكم حياكم الله جميعاً
بالنسبه للمساعدات فيه أنواع وأشكال للإمامي والخلفي هن:
الأمام:
1- مساعدات مرسدس أنصحك بهن مررررره.
2- مساعدات جبريال .
الخلفي:
1- مساعدات جبريال لونه أبيض حلوه للي يبي يحمل وللتطعيس.
2- مساعدات جمس حلوه للي يبي يطامر ويطعس ( يركبونه للي يبي يطامر) علشانهن قاسيات.
3- مساعدات رانش حلوه للي يبي يطامر ويطعس ( يركبونه للي يبي يطامر) علشانهن قاسيات.
4- مساعدات راليات لونه أصفر حلوه للي يبي يطامر ويطعس ( يركبونه للي يبي يطامر) علشانهن قاسيات.
5- مساعدات أم ياي هذي ( ماأدري عن أستعمالهن)!!
6- مساعدات جكس ( ماأدري عن أستعمالهن)!!

وهذا اللي عندي وتستاهلون
ـ
ــــــــــــــــــــــــ تحياتي فتى صعافيق ــــــــــــــــــــــــــــــــــ

[مخاوي الهايلكس]

هلا اخوي كيف الحال وش اخبارك انا سمعت انا تظر السياره ولا ادري هل هذا الكلام صح والله ماادري.

[تلميذ شقران]

ما قصرتو يا اخوان، ومشكور يا فتى صعافيق أفدت وأجدت ..
لكن يا جماعة الخير .. المساعدات ما ترفع الموتر ولا سنتيمتر .. هذا كلام كل أهل الميكانيكا .. هي تؤثر على مطاب الموتر فقط ..
أنا غيرت مساعداتي الأمامية والخلفية إلى جبريال البيضاء، وهي ممتازة بالحيل، لكن ما رفعت المواتر ولا قيد أنملة ..
فما الحل في نظركم حتى أستطيع رفع موتري من الخلف ؟..

ولكم جزيل شكري وامتناني ..

[أبوسليمان]

أخوي تلميذ شقران
ورا ماتزيد سسته
وتريح نفسك

وأخوي فتى صعافيق
أنا مركب مساعدات جبريال
بالأمام والخلف
وأنت كاتب أن مساعدات المرسدس أفضل بالأمام
سؤالي
مساعدات المرسدس وش يميزه عن جبريال
وكم سعره التقريبي
مع ألف شكر

تحياتي
أبوسليمان

[تلميذ شقران]

طيب عزيزي أبو سليمان وين وكيف يتم تركيب السسته أو الريشة، ..
وسمعت أحد الشباب يقول إن فيه ناس يثنون الريش (السست) ..
وين وكيييييييييف؟

ولكم خالص حبي واحترامي ..

[أبوسليمان]

هلا أخوي تلميذ شقران
شف أول ماتقرا كلامي رح وزينه حرف حرف
أول شي:
جب عفريته( تمساح) وأرفع السياره من وراء بس أهم شي لاترفعه من الدفرنس ولا السست
بعدين بتشوف فراغ بين السست جب حديده ولا خشبه ودخله
وبعدين شل العفريته وبتلاحظ أن السياره أرتفعت
وأذا بغيت ترجعه زي ماكانت زين زي قبل شوي
أور رح لأي ورشه تعرفهم وخلهم يزينونه لك

تحياتي
أبوسليمان