(صير بني ياس .. مأوى الطبيعة)

[مقنـــــاصة]

بسم الله الرحمن الرحيم

صير بني ياس ثالث اكبر يزيرة في بوظبي..

و صير معناتها الرقعه اللي يملكها الانسان بالورث .. او المكان العالي اللي كله حصا او المكان اللي فيه ماي

و هاليزيره معروفه من زمان بين

البحاره و صيادين اللولو انها

تابعه لجبايل بني ياس ..

و من الموجودات و الاثار اللي لقوها في اليزيرة .. تبين انها كانت مأهولة بالسكان من اكثر من 5000 سنة

بدت اعمال التطوير في اليزيره بامر من بو خليفه الله يطول بعمره سنة 1970 .. و عشان يزيدون الرقعه الخضرا ..و بامر من بو خليفه بنوا يزيره صناعية هي اليزيرة الخضرا .. اللي تمتد على مساحة 10 كيلو عشان تكون قاعدة للتجارب الزراعية في اليزيرة ..

و هاليزيرة الصناعية فيها اكثر عن 32 مزرعة

و بفضل الله و من ثم توجيهات بو خليفة تحولت اليزيرة من ارض حصويه يردا .. لين منطقة من اكبر المحميات الطبيعية في شبه الجزيرة

الموقع و المساحه ..



تبعد صير بني ياس عن بوظبي مسافة 250 كيلو .. من الغرب .. و تبعد عن اقرب مينا .. مينا مفرق _ معدية دلما _ .. مسافة 8 كيلو ..

يعني بالتحديد على خط عرض 34- 24 شمال .. و خط الطول 40 – 52 شرق ..

و تتميز اليزيرة انه فيها سلسلة يبال على ارتفاع 150 كيلو و اللي تحتل 15 % من مساحه اليزيرة ..

و نقدر نقسم صير بني ياس لثلاث مناطق :

# مناطق ساحليه فيها خلجان صغيرة .. و كلها تغطيها غابات القرم

السياحه ..

بامر من بو خليفه الله يحفظه .. توفرت وسايل الراحه لزوار اليزيرة ..

و منها ..

# استراحه للزوار .. 80 سرير .. و وياها مطعم ..

# استراحه لكبار الزوار .. مكونه من اربع غرف

# سيارات سياحيه .. حق الكشته و الحواطه في اليزيره .. ويا مرشدين سياحيين ..

# مراكب سياحية و طرادات سريعه .. حق الجولات حول اليزيرة ..

و شي معدية .. عشان تنقل المواتر و الزوار من و لين اليزيرة ..



و حاليا .. ينبنى فندق في اليزيرة.. و هالمشاريع السياحيه و التطورات الحالية شي اكيد بتكون طفره سياحيه عوده ..



و للي يبى يوصل اليزيرة .. شي ثلاث وسايل ..

# عن طريج البحر .. تاخذ الرحله 3 ساعات من بوظبي

# عن طريج البر .. لين مينا مفرق و مناك لين اليزيرة بمركب سياحي .. تاخذ الرحله 40 دقيقة

# عن طريج الجو .. اليزيرة فيها مطار بطول 3 كيلو .. و ثلاث مهابط طيارات عموديه ..( هليكوبتر ) ..

الثروة الحيوانية ..



في غابات الصير يتوزع اكثر من 60 ألف حيوان من 23 نوع من الحيوانات البرية ، و شي منها انواع مهددة بالانقراض ..

و تعيش هالحيوانات طلقة تحوط في اليزيرة او في غابات واسعة و مشبجة ..



و من هالحيوانات .. الغزال العربي .. المها العربي .. المها الافريقي ..

أبو عدس .. آيلند افريقي .. الغزال الهندي .. غزال طومسون ..

الآيل الأرقط .. أمبالا .. اللاما .. الزراف .. اغنام الجبل .. البقر الوحشي ..



وهذه بعض الصور لبعض الحيوانات الموجودة في الجزيرة:










الطيور ..



بحيرات الماي العذب تجذب مجموعة من الطيور البرية اللي تمر في المنطقة ..

واليزيرة فيها حوالي 86 نوع من الطيور .. منها .. الحبارى .. السمان .. فلامنجو ..



الانواع الموجوده في اليزيرة 22 بس .. و الباجي كلها طيور مهاجره استقرت فيها .. و بعد شي انواع من البط و الدواجن و الفرّي و الاوز ..




واسفة على الاطالة بس حبيت اوريكم جزء من اهتمام الدولة بالمحميات الطبيعية في دولتنا الغاالية
والسموحة

[رحال الخبر]

الغالي او الغالية ( مقناصة)

مشكور جدا على السرد السياحي الجميل
امتعنا ماذكر في موضوعك حول جزيرة بني ياس
واهتمام زايد الخير الله يرحمة معروف
وهذا من اعمالة التي تكتب له بعد مماته عسى الله ان يخلفكم خير منه وبولده الخير ماشي انشالله
وسؤال حول الجزيرة الله يحفظك

هل هناك مواسم معينة للزيارة

والمفرق اللي ذكرته هو قبل ابوظبي من جهة الغرب ولا لا

ولك كل الهلا والسلام

[الهلالي]

مشكوره أخت مقناصة على المعلومات الجيدة. بس لي ملاحظتين :
1- الموضوع ورد فيه( أبو خليفة الله يحفضه ) رحمة الله عليه .
2- ذكرتي ( و تتميز اليزيرة انه فيها سلسلة يبال على ارتفاع 150 كيلو و اللي تحتل 15 % من مساحه اليزيرة )
ممكن يكون الإرتفاع بالمتر أو القدم ولكن بالكيلو مستحيل .
أرجو تقبل ملاحظاتي بصدر رحب ولكي تحياتي .

[مقنـــــاصة]

اخوي رحال الخبر اشكرك على تعقيبك على الموضوع
بالنسبة لسؤالك حول المواسم انا لمن كنت في المدرسة قبل حوالي 4 سنين خذونا المدرسة رحلة لمدة ثلاث ايام لهذة المحمية قمة في الروعة
بالنسبة للمواسم ما ادري بس اذكر انه لازم تصريح عشان تدخل هذي المحمية كان الوالد ربي يحفظه يبي ياخذنا لمها بس <<<<<< الوالد تعذر بالبرد ذيك الايام تعرفون الابهات يتعذرون عشان هالسوالف

بالنسبة للسؤال الثاني بالنسبة للمفرق هو انته تروح لها بواسطة هولكبتر او عبارة بس مادري انت وش تقصد بالضبط


اخي العزيز الهلالي اشكرك على تواصلك وملاحظتك والسموحة انا مانتبهت لهالنقطة لان الشيخ زايد باقي بقلوبنا واعتبره ويانا مامات
وبالنسبة للجبال راح اتأكد مرتن ثانية وراح اررد لك خبر شكرا على ملاحظاتك اخي العزيز



اذا حنا ماشجعنا سياحة بلدنا منو بيشجعها ؟؟؟ <<<<<< سؤال يدور بذهني

[alferis]

موضوع جميل جداً
واسلوب في الطرح ممتاز
وعندي سؤال هل آي شخص يمكنه الذهاب الى الجزيرة في اى وقت ام لابد من اذن مسبق
تحياتي

[مقنـــــاصة]

هلا اخوي alferis

تسلم على مرورك الكريم
بالنسبة لسؤالك انت تعرف انه المحميات الطبيعية لابد انه لأي زيارة من تصريح دخول لهذه المحمية واخذ الاذن المسبق من جهة معينة في ابوظبي والمواسم اتوقع في مواسم معينة ماعندي خلفية بس لازم يكون هناك اذن مسبق للدخول

اتمنى لك يوم جميل

[الجيب الربع]

الغالي او الغالية ( مقناصة)

مشكور جدا على السرد السياحي الجميل
امتعنا ماذكر في موضوعك حول جزيرة بني ياس
واهتمام زايد الخير الله يرحمة معروف
وهذا من اعمالة التي تكتب له بعد مماته عسى الله ان يخلفكم خير منه وبولده الخير ماشي انشالله
وسؤال حول الجزيرة الله يحفظك

هل هناك مواسم معينة للزيارة

والمفرق اللي ذكرته هو قبل ابوظبي من جهة الغرب ولا لا

ولك كل الهلا والسلام

الصور صغيرة مافية صور أكبر

وهل هناك موقع على الشبكة للجزيرة؟

ياليت تزودينا بأي مواقع على الانترنت عن الطبيعة والآثار والحياة الفطرية بالامارات مع الشكر الجزيل مقدماً

[مقنـــــاصة]

من العين الجيب الربع اجيب لك اللي تبي
وتسلم على تواصلك

[alferis]

حبيت اضيف هذي الإضافة البسيطة

[مقنـــــاصة]

مشكور يالغلا على الاضافة المميزة