مقنـــاص أثيوبيا من سنـــام أرجو المتابعة الممتعة ((مسلسل ))

[سنـــــــــام]

يعطيك العااافيه على التقرير الرائع واظن انه اول تقرير صيد بالثيوبيا بالمنتدى

ونعم فيكم يا بني عبس

وانتظاااار جديدك يا عسسسل

هلا وغلا جذآآآب القلوب منور بقوة ياهلا والله فيك ياغالي

أخبارك عساك طيب !!

ولاهنت على الكلام الطيب مايطلع إلا من الطيبيين ولامهونه للأخوان

وسعيد بتواجدك معنا

لاهنت مره ثانية .

[سنـــــــــام]

يعطيك الف عافية على التقرير

الله يعافيك ياغالي ولاهنت على المتابعة .

[غرامي النحم]

رحلة جميله وموفقه يعطيك العافية

[سنـــــــــام]

مسلسل تركي صاير ؟؟؟؟؟؟؟؟؟؟؟؟تقرير روعة بس التقطيع اعدمة؟؟؟

هلا وغلا كيووود منور ياغالي إلا ماهو تركي مكسيكي هههههه

هيك بدوو التقرير ولا أيش بدك يكون ؟؟ !! << صاير لبناني تدري قربت أجازة الصيف هههه

على العموم سعيد بمرورك ولاهنت ياغالي

أتمني لك متابعة طيبة .

[سنـــــــــام]

تسلم على هلا الاخراج لكن ياسنام تقطعنا مير الحقنا بالصيد

وتقبل تحياتي وهيداني الجبيل

هلا وغلا بحيران منور ياغالي

ولاشكر على واجب وتستاهلون آآآآكثــر يشهد الله

وآآآبشر بالخير الصيد مابقي عليه شي

ولاهنت على المتابعة ياغالي .

[مقناصي12]

يسسسسسسسسسسسسلمو

[مقناصي12]

يسسسسسسسسسسسلمو

[صقار مبتدئ]

حرقتني ياسنام حسبي الله على ابليسك هات الموضوع كامل و انا فداك

[العبقري 1]

رحلة ممتعة وأحلى شي فيها المصاعب وأسلوبك في وصفها .. أكثر حاجة ضحكت عليها الرجال اللي يسولف مع اللي قاعدين تنتظرون فيه هههههههههه.

[سنـــــــــام]

نكمل على بركة الله

وبعد جهد وتعب على الفاضي شملز عجزنا نأخذ السيارة منه
وماصدنا إلا بيض النعام والحمدالله على كل حال شي أفضل من لاشي ههههههه
قلنا اليوم راح علينا وكان الوقت بحدود الساعة وحدة الظهر قلنا دام الدعوة كذا نبغا نشتري (( تيس ))
ونتغدا ونعين خير فهمنا شملز أنا نبغا تيس قال عند عبدو على يدبر أموركم
قلنا يالله ياعبدو نبغا تيس قال أطلع لديرة مشينا ودشينا ديرة أهلها الله يعينهم على أنفسهم
مدري كيف عايشين!! الحمد الله على كل حال .. المهم أخذنا صور للشباب الحلوين
وأبونايف وشملز وعبدو على نزلم يدورون تيس بوسط أرجاء هذه المنطقة
وبعد أنتظار دام 20 دقيقة جونا وهم شايلين التيس
وكنا بأشد الجوع وقهر وتعب وكلهن مجتمعات ههههههه
الشباب الحلوين وصورة تذكارية وحركات حلوه وغلطتي أني أصور وأخليهم يشوفون صورهم
أجتمعت علينا أمة محمد << قلق لأبعد الحدود

وأنا قاعد أصور أبناء الحارة إلي حنا فيها كثر من الحاره هههههه
تجمعو علينا لدرجة أن الهوا أنقطع عنا ذبحنا الحر وحنا وسط السيارة
وأبومبارك الله يذكرة بالخير سوالنا مصيبه مع الورعان
وليتها على الورعان حتي الكبار ماسلمنا منهم << ههههههههه
كان باقي تمره معنا مفتوحة تذكرون تمرتنا إلي أول الصور !! ؟؟
باقي منها شي قليل وأبومبارك يدور الأجر مد شلقة التمره برا
يوم خطفت من يده وراحم يتذابحون عليها كلن يدحم خويه وراحم يتهاوشون عليها
الحمدالله على النعمة أكثرو الحمد ..

أخذنا تيسنا وطلعنا من الديرة بصعوبة من الناس ألتفت علينا يشحذون من بعد التمره
لا إله إلا الله .. والحمدالله طلعنا سالمين منهم وهذا الأهم
وحنا ماشين بطريق كنا بجانب نهر والطيور عليه أشكال وأنواع وبعد مشوار طلع
لنا تكرمون عنه الخنزي البــري ويتواجد بكثرة غير طبيعية ويدخل مزارع الناس
ومحد يقدر يقول شي << وحشي ومحد يقدر يقرب منه << هذا مافهمت منهم

وبعد ماوقفنا نأخذ الصور وهو مايستاهل << هههههههههه
صحنا عليه كلنا وفر من قوة صوتنا << هههههههههههه
وقف يراقبنا من بعيد ولسان حاله يقول أنزل وأنا أعلمك كيف تصيح ههههههههههه

وبعد المشاوير إلي حصلت لنا والمفاجأة الكثيــــرة لقينا المزيون هذا للقبلة

بسم الله والله وكبـــر

ويازين العيشة عقب تعب وجهد أنشد مجرب ولاتنشد طبيب
والله من الصلف والتعب ههههههههه أبومبارك أقام الحد عليه وأبونايف قام بصلخ
وأبوفهد يصلح فنجال القهوا والشاهي وسنــــام يضبط الغدا << كلن يكف عن ذراعه

شووفوو كيف ألحم الطازج ومافيه شي أسمه كيماوي ولا شعير تكرمون
والسمن مايحتاج وصف

[سنـــــــــام]

وشوي المعاليق بالأجماع موافقين مايحتاج نشده ههههههههههه
وياسلاااام على ذاك الشوي والغدا رد روووحنا عقب التعب

وأبونايف أصر يأخذ صوره معهم



وبعد الغدا وأخذنا أنفاسنا وخططنا زين أنتقلنا للفندق وكلن راح لغرفة
وبعد المغرب تواجدنا على صبه الفندق مع دلة القهوا وبرادي الشاهي
جمعنا العالم على ذيك الصبه الله يذكرها باخير عرفتنا على ناس كثيـــر
وعرفنا على أنفسنا بالكثير وجايكم بصور إن شاء الله

[سنـــــــــام]

أخواني الأعزاء نكمل بقية قصتنا ورحلتنا إلي أثيوبيا (( ديار الحبش )) على خير

وبركة نتذكر من الجزء الأخير أن الصيد ماحالفنا أخذنا تيسنا وتغدينا وعينا من الله كل خير ورجعنا فندقنا
معنا تالي لحم التيس جلسنا بالفندق على الصبه (( بوابة الفندق إلي تودي للغرف ))
مبسوطين يشوفون الرايح والجاي هههه
إلي مايعرفنا يقول حراس الفندق ,, وبنظرنا مازين الفندق إلا الصبه الجلسه عليها
شي خيااال يهفك الهوا والبراد إلي يرد الرووووح .. ضبطنا دلة القهوا وبرادي الشاهي
وبدأة سيارات الأجانب توافد على الفندق جايين من رحلات داخليه سياحة
ينامون والصباح يطلعون مايرجعون إلا المغرب .. وحنا جالسين مع دلتنا وشاهينا
وكل مانزل من السيارات من أجانب جلسم يناظرون فينا مستغربين
ولسان حالهم يقولون وش يشربون منين جايين ,, قلت ياخوياي نبغا نعزم على القهوا
كلهم أيدووني وجلست أنادي ولكم أفري بدي يعني حيالله كلن بأسمه ههههه
كم هيــر أقلط يمال الشحم هههههه ... ويبادلونا الأبتسامات ودهم يجون وماودهم
قلت مافيه إلا أنادي على القهوااا هههههه كوفي أربك تقهو جعلك تحيا من قهوة العرب ..
وعلي طوووول أكثرهم أخذم الأرض ههههههههه
يدورون إلي يقعد روووسهم يفكرون زي قهوتهم ههههههههه
والحمدالله فكرتي نجحت لوفوو علينا أجانب ماتنفع عرب هههههه
وتقهو وعينم من الله كل خير عندنا وعرفناهم بأنفسنا وعرفونا بأنفسهم والحمدالله

ولكم الصور

أبونايف وشيبانا إلي جلسم يتقهون معنا ههههههه وأكثرهم من كندا وأوكرانيا
مناحشين من ديارهم درجة حرارة بلادهم 30 تحت الصفر
ناظر العجوز معها فنجال عانيت من مشكلة كل مامد علي الفنجال
أرجع أصب أبن الحلال تفخت بطنه من القهوا والهيل
وعجز عني ههههه أخر شي قالي بليز تكفا يرحم والديك خلااااااااااااص
مابغا شي هههههههههههه وأصريت عليه قلت هز فنجالك قل بس وقالها والله ههههههههه

وهذا الخرمااااااااااااااااان بشدة مع قهوتنا هههههههههه أعجب بطعمها بشكل ماتصور هههههههه

وبعد اليله الحلوة على الصبه والعشا الطيب والي عزمناهم على القهوة وأحاديث وتسامرنا ما أمرحنا إلا الساعة 11 من أليل

أصبحـــنا وجهزنا أغراضنا ومشينا على بركة الله وأول مانزلنا من الزفلت

هذا ماشفنا
تكرمون دمن الصيــــد وكان كثير مرررره وبشارة خير

وهذا الصيد وحنا نتحسر عليه هج من السدر والأشجار وكانت فروق الصيد كثـــيرة
من نعام غزال وضيحي عفري وحبرو بس مابليد حييييييله

[سنـــــــــام]

وعجزنا نفهم شملز تكفا يالحيا الغانمة نبغا السيارة نذبح الغزال ونرجع تكفا
ياشملز ياخوووووووك ياشملز عطنا السيارة تكفا طلبناك << نعنبوه ذلنا هههههههه
الله يزيلك من الأرض << أخذتها من الشايب كثر ما قالها له ههههههه
وهنا نترجاه ويفهمونه خويانا ولا حياااااااااة لمن تنادي
لسان حله يقول تبغا تروح بعيد هناك هههههههههههههه

أبومبارك غسل يده من شملز وقال أجلس أتأمل بصيد وحنا مابيدنا شي

وأبونايف عجزنا عنه تقول مقروص كل دقيقة يقحص من محله يشوف الصيد
ويقول ياويلي حالي ياسنـــام تعال ناظر الصيد << ملح الرحله

قلت أفلسنا تبونا نتقهوا ونعدل رووووسنا ؟؟ !! << على طووول قالم عجل علينا
نبغا نتقهوة ونروووح ندور صرفه لشملز

وهذي قهوتنا تفوووح معنا يوووم شفنا الصيد والقهر سيطر علينا اليوم هذا
هههههههههههههههههههههه

وعلى خيــــــــــــــــر نلتقي بالجزء الأخر إن شاء الله

ولاهنتم على المتابعة .

[Golden Hawk]

هههههههههههههههههههههههههههههههههه

ياضحكت على الاحداث الطريفة
خصوصاً دعاء الشايب الله يطول بعمره

تابع نبغى كل السالفة

[سيف الذهب]

الله يعينكم على شملز
تقرير رائع