في الطريق قصص و مواقف مرت بك ( و دعوة صادقة لمساعدة الآخرين )

[هوى الشرق]

موضوع جميل جدا يتعرف الواحد على الاخطاء والاخطار التي ممكن تواجهه
هل من مزيد من القصص والروايات ؟

[سد الحريق...]

ياشباب وين القصص
وانا دقيت على راعي القصة امس وعلمته اني كتبت القصة في مكشات وقال مايحتاج
بس يقول بسجل في منتدى مكشات وبقراها وقلت اقراها وشف كان عندي خطاء عدله وسلامتكم...

[اسير الغضا]

مرتن من المرات كانت موتري بالورشه ومعي موتر اخوي كنت امشي بأمان الله والمنطقه به نفود وارض فاضيه كبيره
ودايم ادخل به واختصر الدرب بدال مااحيوط للمعلوميه كانت الساعه 2الظهر برمضان ودرجة الحراره بالحيل مرتفعه
والرمل حار(وكان موسم التمور(يعني الوقت اللي يسمونه طباخ التمر من شدة الحراره)وكفرات الموتر بلد(سواطير) ويابسات بالحيل
وادخل واغرز تغريزة توحش انا شايفن نفيستي ومتعود كثير على المواقف والتغاريز فلذالك ماخفت واكثر من مره ادخل المكان ذا وبحكم ان بيتنا مب بعيد بالحيل
نزلت ولا الرمل حار وش اسوي ونسم الكفرات اللي ورا15 ونا صايم والعرق يتسبب ورجلي راحت ملح وانا ارقص الموتر مادريت الا وحدا الكفرات ينسم بقوه وشوي ولا مابه هوا ابد
انا صايم وعطشان وتونا بعز الظهريه وموسم طباخ التمر بعد وين اللي متعود على الغرازات راحت كل ذي مالي الا انتظر الفرج ويمر راعي شاصي ويبحلز بي قلت بس جانا الفرج مادريت الا وهو سافطن وماشي (ايه وانا اخوك ماتلام حر وصايم وتونا على الفطور ) وتمر سياره ورا سياره مااحد عنده نيه ياقف وانا عطشاااااااااان الا ويجي راعي فرد محمل بشنطته تمر ومعه عاملين
وقف وسلم وقال خن نطلع موتر قلت يابن الحلال وشوله الكلافه الموتر مبنشر والجو حار وصايمين
قال ماعليك العاملين كفار خلن اكرفهم ويمين يساروحاول ماقدرنا والسبب ان الكفر مبنشرو ماش الرجال وده يفزع طيب يابن الحلال موترك ماتساعد وش نسوي قال انا ادبر لك موتر قلت والله ماتعب روحك بس وودن للبيت قريب قال اركب
واول ماوصلت البيت واشرب لترين مياه من العطش ماهنا صوم ابموت لي حول ساعتين راص بالشمس المهم وجيت عقب التراويح نفخت الكفر وطلعت الموتر


وعقبه كل ماشفت موتر مغرزه اقف عنده عرفت المعاناه ومريت به
وموضوع شيق اخوي

[ابو سلطان1234]

الله يحيي كلا باسمه :
اذكر قبل شهر تقريبا طلعت لنفود الزويليات اللي صوب الحاير على طريق الخرج على اذان المغرب انا وعديلي ومعه بزارينه المهم صلينا المغرب جنب الخط ونزلنا معي اكسبديشن وندخل داخل النفود نتمشى طلعت فوق طعس وانزل إلا جيب فكس ار مغرز وجنبه عايله جالسه وابوهم يحفر الجيب مايل على جنبه اليمين يوم شاف نور السيارة وهو يوقف والله انهم خافوا شوي لكن ماوقفت عندهم تعديتهم شوي ووقف ورى الجيب وانزل السلام عليكم قال وعليكم قلت سلامات قال معكم واير ولا ونش والرجال شوي خايف السيارة مظلمة وليل بعد وانا اشغل اللمبة الداخلية إلا السيارة مليانه بزارين يوم تطمن وقرب يمنا وانزل اخذ الواير واشبكه بموتره واجي قدامه واسحبه شوي شوي حتى نزل واستوى ووقف اي خدمه اي شي قام يدعيلنا ونخليه ونطلع برا شوي وننتظره يطلع يوم طلع للشارع ونطلع حنا بعده صارت سبحان الله روحتنا علشان نسحب الرجال ونرجع . وسلامتكم

[محمد-الرس]

هذا الكلام له أكثر من 13 سنة يوم كنت صغير يمكن 5أو 6سنوات ما أذكر....السالفه.
كنا ماسكين خط مسافرين من الرياض لمكة المكرمة وانتم تتعرفون ان المسافة حول ال950 كلم
الزبدة وحنا ماسكين خط نمشي ونمشي كان معنا الموتر الجبار جمس مديل 88 اللي مكينته 450
المهم أخوي الكبير قال لأبوي وقف وقف كلنا انهبلنا ويقول فيه شرارة تطلع من تحت السيارة
وأنا اتذكرها شرار كثير المهم سفط الوالد على يمين ونزلنا باسرع ما يمكن والا الوالد الله يحفظه
مثبت أسيام الظاهر على الشكمان لا يطيح أو شي ما أدرى وشوله-وبعدها فكوها الاخوان وكملنا الطريق
----------------

السالفة الثانية....

كنا راجعين من مكه للرياض بموتر 88صالون- وشوي نحس فيه سخونة بأرضية السيارة وكل مالها تزيد
المهم سفطنا على جمب الطريق ونشيك على الكبوت ما فيه شي -
تدرون منين الحرارة ---من خزان البانزين - الله ستر كان رحنا فيها المهم أخوي الكبير فتح غطاء البنزين وإلا مليان هوا كثييير ونسمع صوت تششششششش وبانزين يتبخر بعدها نسمناه لين ما فضى الهوا وكملنا الطريق للحين ما ادري وش سخن الخزان .
=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-

[بر الوالدين]

بيض الله وجيهكم يالربع و ما قصرتوا

و الحقيقه من خلال طرح و سرد القصص ( مساعدة الآخرين في الطريق )

هناك و الله فوائد تم إستنتاجها و يجب أخذها بعين الإعتبار

مثلاً في قصة الأخ الغالي / سد الحريق يجب عليها إن نستنتج منها عدة تحذيرات

يجب عليك أن لا تترك المفتاح على السيارة ( سواء تشتغل أو طافية ) عند وقوفك لجلب بغض الأغراض

تسانك محتد و نزلت و الموتر شغال ( خلك عجل )

لا تقف إلا في محطة مليانه مسافرين ( العوائل )و تسان المحطة خاليه ،: بانزين و أمش



هناك الكثير و راح نعرفه في سرد قصص الأخوان ( لمساعدة الآخرين )

[ابوحمد 2009]

مشكور اخوي على الموضوع الراائع؟؟..!!

والله انك صادق ياليت كل شبابنا كذا؟؟..!!

تقبل مرورري

[الربذي]

مشكور أخي الحبيب وانتهت السالفه وهذا الشاب (عبدالله بن راشد بن ابرهيم الهويدي)الله يحفظه ويخليه لعين ترجيه..

والله ياعليه جراءه هالبنقالي الخسيس المفروض طلعتوا عيونه هالكلب راكب يبي يسرق السياره بالحريم ولا مقفل الباب عليه بعد جت سلامات اغاثكم الله بالشاب الطيب
زين فزع لكم بالوقت المناسب ولا يمدي لاسمح الله حاصل شي قهره يبقى مدى الحياه ولوتشوي ابو بنقلا بالنار وهو حي ماطفا اللي بقلبك عليه واسهل الامور انه يهرب بالعائله ويسوي حادث ويمكن يروحون فيه .هو قلعته لكن الابرياء

[الحريقي..]

السلام عليكم ورحمة الله وبركاته
القصه ياخوي سد الحريق صحيحه ولا فيها اخطأ بس والله كلفت على عمرك رحت وكتبت القصه والتفاصيل وماباقي منتدى الا وحطيت القصه فيه بس ماقصرت وماقصرت بعد ع الترحيب ومشكوووووووووووور الف مره

[دربيل تبوك]

مآدري آنآ فهمت آنه آلشآب آللي بآلقصه هو (آلحريقي)

هو آللي آنقذ آلعآئله صح وآلاخطآ؟

عمومآ لو كآن هو آلشخص ويقرآ كلامي

كل آلكلام مآرآح يوفيك حقك.. ذيب ولد ذيب

آحييك ولك مني آن آقبل رآسك

ودعوة بظهر آلغيب

وفقك آلله ...

مهمآ كتبت آعتقد آنه لم تكتشف بعد تلك آلحروف في آللغة آلعربيه آلتي نستطيع رصفهآ بجوآر بعض لتكون كلمة شكر.. لتسعفنآ بآن نقدم آلشكرآلذي يليق للآبطآل آمثآلك آنت يآ(آلحريقي)

[هويدي]

كفو والله يالحريقي بيض الله وجهك دنيا وآخره

وشباب المسلمين كلهم فيهم الخير والبركه

ما انسى فزعتهم واستنفارهم يوم تغرق الرياض الغرقه الاخيره
المرور متكين بسياراتهم عند الميكف والشباب بوسط مناقع الماء الملوث بكل مايخطر ببالك ينظمون السير بثيابهم لدرجه بعضهم مسكر الخط بسيارته ونازل يحول الناس لطريق سالك .

والمفترض اللي معه جيب ما ينزل الواير من موتره .. يدق عليك اخ ولا عزيز او تصادف عائله متعطلين بوسط الشارع

والمواقف واجد بفضل الله لان خيالي واسع ان شفت عزوبي حطيت نفسي مكانه وان شفت عائله تخيلت اهلي ورده فعلهم بمثل هالموقف ـ الله يدفع البلا عن المسلمين جميعا
مافيه الا موقفين فيهم اكشن

الموقف الاول سحبت مراهق مغرز بالثمامه وعقبه حرمت الا للضروره او وجود عائله
ابو الشباب صدمني ـ متحمس وداق ريوس ـ وقالي اطلع للشارع نحتري المرور !! شوي اخوياه شبو عليه ومشا وهو ما اقتنع ..

الموقف الثاني كنت وواحد من الربع بالنفود في ساعه متأخره من اللي يوم نزلنا مع احد العروق لقيت ناس متثرين كل واحد بجهه اللي يولع بكشاف واللي بولاعه واللي يصفر .. يوم وصلتهم قالوا حنا مغرزين من العصر دقينا على الدفاع المدني وامن الطرق والشرطه والاسعاف ومحد جانا واثناء حديثهم وشرحهم ( كلهم يحتسون ) نقز واحد منهم بأعلى صوته قال عطشااااااانييييييييين ابيهم يسكتون ابنزل الترمس قلت تبون مويه .؟ رد خوينا اللي يقول عطشانين وشاركه من معه بصوت واحد (لا نبي دخااااااااان ) يعلم الله هذا اللي صار :: اذا عرف السبب بطل العجب
مالكم بالطويله واثر الربع معطبينها الله يصلحهم لقينا بطلين فاضيه مدفونه جمب الشبه وريحتهم تعايط
خفت اسحبه يصدمن زي الاول او يتسبب بحادث لاسمح الله وبعد مشاورات مع خويي قال خلنا نعس السواق كانه صاحي طلعناهم .. سولفنا معه الرجال مضبوط وعن الشكه خليناه يبرح ويدف علشان كان باقيبوه حثال يروح . طلعته وتعمدت اني اهج لدرب غير الدرب المؤدي للخط كأختبار أخير لمستوى الكحول

وسامحونا على الاطاله وركاكة الاسلوب

[راعي طفات]

قبل يومين كنت طالع من الدوام بدري وقبل الديرة بشوي لمحت ددسن مغرزة بعبارة بجوار الطريق لكنه تحت شوي

كان فيه حرمتين واقفت قدام السيارة وحدة بعيدة شوي = البنت وماسكة الجوال ... والثانية - الأم - بين السيارة والخط ولاهي الي أشرت ولا الي جلست

بعد ماتعديت العبارة ديورت لهم ووقفت خشم الموتر بخشم موترهم ونزلت وطلعت الواير وشبكته بسيارتي وسيارتهم

الأم الله يحفظه ويستر عليهم تقول سواقنا غشيم تعني البنت قلت مايخالف بسيطة وهم واقفين عند السيارة قلت للأم خليه تسوق وتعشق بالأول

كان فيه مسحاة محاولين يبرحون للسيارة لكن الكفرات مليانة ومغرزين بنهاية البطحاء وعلى طلعة ومحملين أغراض بالصندوق وشكله خايفة عليهن لايطيحن

عشقت الريوس وبدون دبل سحبتهم وطلعت سيارتهم والصراحة البنت ماهي غشيمه أول ماطلعت ووقفت وقفت .

فكيت الواير والأم الله يجزاه خير ماغير تدعي وهذا أكبر مكسب لي وغاية مرادي .

مشيت وانا أناظرهم بالمراية لين مشو وهم يبارون الخط لأنهم بمنطقة قريبة من الديرة وصعب انهم يمشون مع الخط المزفلت

شكلهم من قرية ولا بدو حول الوادي

والله يكتب الأجر والمثوبة

ومثل هالموقف ماذكرته رياء لاوالله لكن لأن الواجب يحتم على الشخص الوقوف بمثل هالمواقف وتقديم المساعدة بأي طريقة كانت .

وفقكم الله وأبعد عنكم المواقف الصعبة وسخركم لمساعدة الغير

شكراً على الموضوع الجميل والمواقف المشرفة

[أنا الذي...]

مشكور صاحب الموضوع على هذا الموضوع
أنا مريت بتجارب كثيره ماره أنا أساعد وماره يساعدوني
أذكر ماره طالع العصر أتمشا وأصور وديرتي بها رمل كثير وما دريت عن حالي إلا وانا مغرز حاولت أطلع مشي فايده نسمت الهواءبعد مشي فايده إلى راعي أبو شنب(شاص)يوقف خلفي وينزل القلص(الواير)ويقلصني.
وماره كنا رايحين أنا والرابع وفي الطريق انفجر التاير(الكفر)ووقفنا ما عندى العده لتبطيل التايروالوقت ليل إلا واذاك راعي الأفلون يوقف ويعطينى العده وبطلنا التاير وركبنا اسبير.
وغيرها الكثير من القصص

[DEVICE]

مشكور اخوي

[الحريقي..]

مآدري آنآ فهمت آنه آلشآب آللي بآلقصه هو (آلحريقي)

هو آللي آنقذ آلعآئله صح وآلاخطآ؟

عمومآ لو كآن هو آلشخص ويقرآ كلامي

كل آلكلام مآرآح يوفيك حقك.. ذيب ولد ذيب

آحييك ولك مني آن آقبل رآسك

ودعوة بظهر آلغيب

وفقك آلله ...

مهمآ كتبت آعتقد آنه لم تكتشف بعد تلك آلحروف في آللغة آلعربيه آلتي نستطيع رصفهآ بجوآر بعض لتكون كلمة شكر.. لتسعفنآ بآن نقدم آلشكرآلذي يليق للآبطآل آمثآلك آنت يآ(آلحريقي)

صح عليك انا الحريقي
وماقصرت كفيت ووفيت