في الطريق قصص و مواقف مرت بك ( و دعوة صادقة لمساعدة الآخرين )

[الحريقي..]

كفو والله يالحريقي بيض الله وجهك دنيا وآخره

وشباب المسلمين كلهم فيهم الخير والبركه

ما انسى فزعتهم واستنفارهم يوم تغرق الرياض الغرقه الاخيره
المرور متكين بسياراتهم عند الميكف والشباب بوسط مناقع الماء الملوث بكل مايخطر ببالك ينظمون السير بثيابهم لدرجه بعضهم مسكر الخط بسيارته ونازل يحول الناس لطريق سالك .

والمفترض اللي معه جيب ما ينزل الواير من موتره .. يدق عليك اخ ولا عزيز او تصادف عائله متعطلين بوسط الشارع

والمواقف واجد بفضل الله لان خيالي واسع ان شفت عزوبي حطيت نفسي مكانه وان شفت عائله تخيلت اهلي ورده فعلهم بمثل هالموقف ـ الله يدفع البلا عن المسلمين جميعا
مافيه الا موقفين فيهم اكشن

الموقف الاول سحبت مراهق مغرز بالثمامه وعقبه حرمت الا للضروره او وجود عائله
ابو الشباب صدمني ـ متحمس وداق ريوس ـ وقالي اطلع للشارع نحتري المرور !! شوي اخوياه شبو عليه ومشا وهو ما اقتنع ..

الموقف الثاني كنت وواحد من الربع بالنفود في ساعه متأخره من اللي يوم نزلنا مع احد العروق لقيت ناس متثرين كل واحد بجهه اللي يولع بكشاف واللي بولاعه واللي يصفر .. يوم وصلتهم قالوا حنا مغرزين من العصر دقينا على الدفاع المدني وامن الطرق والشرطه والاسعاف ومحد جانا واثناء حديثهم وشرحهم ( كلهم يحتسون ) نقز واحد منهم بأعلى صوته قال عطشااااااانييييييييين ابيهم يسكتون ابنزل الترمس قلت تبون مويه .؟ رد خوينا اللي يقول عطشانين وشاركه من معه بصوت واحد (لا نبي دخااااااااان ) يعلم الله هذا اللي صار :: اذا عرف السبب بطل العجب
مالكم بالطويله واثر الربع معطبينها الله يصلحهم لقينا بطلين فاضيه مدفونه جمب الشبه وريحتهم تعايط
خفت اسحبه يصدمن زي الاول او يتسبب بحادث لاسمح الله وبعد مشاورات مع خويي قال خلنا نعس السواق كانه صاحي طلعناهم .. سولفنا معه الرجال مضبوط وعن الشكه خليناه يبرح ويدف علشان كان باقيبوه حثال يروح . طلعته وتعمدت اني اهج لدرب غير الدرب المؤدي للخط كأختبار أخير لمستوى الكحول

وسامحونا على الاطاله وركاكة الاسلوب

ووجهك وماقصرت هذا حق وواجب

[فطوم باك]

يعطيك الف عافية

[بر الوالدين]

بيض الله وجيهكم

كسبتو الأجر في معاونة كل محتاج

و فعلاً كل صاحب جيب يحرص على وجود الواير معه

[بر الوالدين]

عاد هاليومين حر و حراره

و لزوم تكون القرامه حاضرهـ

بالتوفيق يا أخوان

عصر الجمعه طلعت لمشوار ضروري ، المهم هذا راعي الفورد و الظاهر موتره مفور

جيت وراه على أساس بدفه بطلعه على الخدمه

المهم و ينفز راعي الهمر وهو اللي يدفه ما شاء الله عليه

و مشاء مسافه طويله دافه لين وصله للمحطه حتى إننا في زحمة إشارة و المحطة يمين بمسافه

يعني تخيل درب راعي الهمر يسار وعطل نفسه وراح يمين و الريتيرن مهب قريب و زحمة سيارات

و شمال الرياض يعني عند أعمال طريق الملك عبدالله

و الله يقويكم شباب

[بر الوالدين]

أهلاً و سهلاً بالجميع

و ياهلا و الله فيكم

( ( ( نعود من جديد و بعد مرور سنه و 4 أيام على الموضوع ) ) ) الله يالدنيا

نعود إليكم ، و خلال هذهـ الأيام يشتد الحر و الزحمات

إما إنك تصادف أحد متعطل سواء كان ( عزابي أو معاهـ عائلته )

و تصادف أيضاً العمال اللي يتشغلون تحت حرارة الشمس < < < وهي دعوهـ لتقديم لهم أي مشروب بارد ، تؤجر .

. . . . مرهـ أخرى و في إنتظار مداخلاتكم و تجاربكم و مواقفكم و نصائحكم فأهلاً لكم جميع

.

[.أبوعبدالرحمن]

والله وانا اخوك المواقف كثيرة

لكن مرة على طريق الشرقية وقفنا نصلي المغرب يوم صلينا جينا نبي نمشي قال الموتر هذا محلي غرزنا يمين يسار ولا فيه فايده

نسمنى الدبل الثقيل ولا فيه فايدة و وطلع ولد عمتي على الخط وتوقف لنا تريلة ثلاجة قال بساعدكم لكن 200 ريال

فتهاوش هو وإيا ولد عمتي ودقينا على امن الطرق والله يعطيهم العافية ما كملنا 15 دقيقة الا جانا العسكري وسحبنا وطلعنا


و لي عودة إن شاء الله

[بريداوي اصليm]

الحريقي
بيض الله وجهك
رجال من ظهر رجال
فزعتك تدل على شهاتمك وطيب اصلك
الله يجعل ماسويت بموازين حسناتك
وياليت كل الشباب مثلك كان الدنيا بخير
تقبل تحيتي

[قــــنـــاص عـــنــيـــزة]

اشكر اخوي بر الوالدين على طرح هذا الموضوع الشيق والمفيد...
اشكر كل من طرح قصته وساهم في إنجاح هذا الموضوع وتفاعله...
اشكر اخوي [الحريقي] جزيل الشكر على موقفه البطولي
وهذا يدل على شهامته وحسن تربيته
ومهما قلت لن اوفيه حقه...
تحيتي ومودتي للجميع...
قــــنــــاص عنـــيـــزة...

[محب الخيال]

لا هنت برك الله فيك

[بربنجي]

صراحة انا زمان كنت اوقف لاي شخص يأشر احاول اساعدة قدر الامكان وخاصة لما نروح للثمامة المخيم اوقف للعمال السودانيين اعتقد اكثرهم رعاة غنم او يشتغلون في المخيمات حراس
وبعدين صراحة حذرني اكثر من شخص لا توقف لاحد يمكن تطيح لك بشخص سكران ولا حرامي لا سمح الله
وتدخل في متاهات انت في غنى عنها
وانصح نفسي وانصحكم اذا شفت مكان فيه غراز لا تغامر وتدخل فيه عارف انكم بتقولون نصيب لكن الانسان ياخذ بالاسباب والحافظ الله
حتى لو تروح مسافه اكثر اريح من اني اغرز وقوم عاد احفر واردم واسحب وتقعد ساعة او اكثر وتقول ذيك اللحفظه يا ليتيني ما جيت من الغراز
والله يحفظكم ويرعاكم

[كهربان]

كنت ماسك خط القصيم في الليل انا وخويي رايح للزلفي ..
وفي نص الخط الا راعي ذاك الكابرس متعديني ومسرع ..
شوي ويوم تعداني بمسافه ليست بعيده الا وموتره يروغ يمين ويسار وبقوه ..
قلت ياساتر وش اللي صار وش جاه هل الكفر ضرب او العكوس او انه يفحط ..
المهم اني هديت ويوم قربت وناظرت زين الا هالثلاث النياق واقفات في نصف الخط ..
والوانها مجاهيم سود كنها فحم وكانو مكبتنين في نص الخط ولا فكروا يتحركون مغير ينتظرون فريسه ..
المهم واقرب منها والحقها بالسياره وبالبواري واطردها برا الخط ..
ويوم طلعتهم الا والقى باقي القطيع مبركين جنب الخط يمكن عددها خمسين..

المهم واقوم واتكي عندها لاترجع للخط وكنت قبلها بمسافه قد مريت على سياره امن الطرق وهي تسير بشويش مثل العاده واقعد انتظر لين وصلوا واوقفهم ..
وش عندك قلت شوفوا البعارين قالوا وينها قلت شف هناك جنب الخط .. يوم شافها قال الله لايربح راعيهم جزاك الله خير وماقصرت ..

الحمدلله اللي الله فكنا منهم وفك غيرنا .. والحقيقه انا ناسي وش اللي طلعهم على الخط مع وجود الشبك هل كانو بجنب الجسر ام ان الشبك مقطوع ..
لكن المهم انها جت سلامات ..

احسنت برالوالدين على الموضوع ..

[بر الوالدين]

الله يجزاك خير أخوي كهربان على تصرفك النبيل و إنتظارك عندها لا ترجع للخط ثانية

ولا أحد يشوفها خاصة إن لونها سود ماتنشاف

.

[ياما نسيت]

السالفة هذي صارت لأخوي

قبل سنتين اخوي جاي من الرياض الى المدينة معاه فورد كان معاه امي واخواتي بنشر عليه الكفر قبل القصيم وماكان معاه الا الاستبنه الصغيرة اللي تجي مع الفورد الامريكي ركبها ومشى عليها ومايقدر يسرع والليل حل

يقول اخوي تعداني راعي فورد معه عائلة وشوي وهو يهدي ويدق بوري لأخوي ويأشره يبغاه يوقف

اخوي خاف في البداية لكن يوم شاف ان معه عائلة وقف
طلع الرجال سنايدي ورجال ولد رجال

بدون كلام راح لشنطة سيارته وفتحها ونزل الاستبنه حقته الكبيرة واعطاها اخوي
اخوي يقول له انتظر اركبها وامشي معك الى اقرب محطة واشتري وحدة وارعطيك الاستبنه حقتك وهو رفض طيب يابن الحلال عطني رقمك يسير اردها لك رفض رفضا قاطعا يقول انا ديرتي قريبه وعدي وصلت لها وانت مشوارك بعيد ( المدينة )

ومن ذاك اليوم الى اليوم وامي تدعيله وتذكره بالخير

الله يجزاه خير ويفرج عنه كرب الدنيا والأخرة

[ABO ZAIN 29]

جزاءكم الله الف خير

[ابو عمررر]

يعطيكم العافية