في الطريق قصص و مواقف مرت بك ( و دعوة صادقة لمساعدة الآخرين )

[مطنوخ قطر]

فعلاً موضوع مميز وهام جداُ وجميعنا معرضين للمواقف على الطريق, جزا الله
صاحب الموضوع خيراً وجعلنا واياه بارين بوالدينا وخادمين لأمتنا اااامين.. المواقف كثيره ولكن هنا راح احكي لكم سالفة حصلت مع واحد من ربعنا كان جاي من الكويت, ويوم تعدى الخفجي عند اخر محطه من جنوب وهو اللي يشوف الشايب اللي يشر على الخط ومعه عجوزه,وقف الرجال عندهم جزاه الله خير وركبهم معه,وكان وقته بعد صلاة العشا تقريباً وعليهم هوا وبرد, الحاصل ان رفيقنا وسيع صدر وسوالفة طيبه,قام ياخذ ويعطي مع الشايب والشايب ماهو يمه,مهموم ويبدو ان احواله مصلَحه, يوم تعدوا السفانيه تقريباً بعشركيلو قال الشايب لرفيقنا ترى لفتنا اللي نبي ننزل عندها قربت, يوم وصل اللفه قال له الشايب جزاك الله خير يبوك حنا بننزل هنا, رفيقنا تعجب شوي,المكان مقطعه وبرد,قال للشايب وش منزلكم هنا؟ وين مكانكم وبوصلكم,قال الشايب اهلنا مع هاللفه وماهم بعيد, قام صاحبنا وقال لابد اوصلكم مكانكم ماني مخليكم في ذالليل,قال الشايب موترك يمكن يغرز وتعطل,المهم الرجال لف ومسك الطريق البري ,وسيارته مرسدس صالون,الله ستر ووصلهم مكانهم وقاموا يدعون له بأن الله يوصله سالم لهله ويكافيه شر الطريق,,, مشى رفيقنا لين وصل الطريق (طريق الخفجي-الدمام السريع), مسك الطريق متجه للدمام, يوم اقبل على كبري الجبيل ويامر الله وينقلب الرجال على سرعه تجاوز200كم, ويتقطع المويتر 200 قطعه من شافه قال الله يرحم اللي فيه (انا شفت الموتر بعد الحادث لاني كنت في الدمام وجيت على اتصال رفيقنا)........ياجماعه صدقوا او لاتصدقوا الناس اللي وقفوا على الحادث يقولون الله يرحم اللي فيه وهو واقف مافيه شي ,يقولهم انا اللي في الموتر ياناس وذالناس ماهم مصدقين....سبحان الله عمل المعروف ودعاء هاللي وصلهم بعد الله,,,, الزبده منذاالسالفه ان حنا ياجماعة امة خير امه حيه وفيها بركه وعسى الله يديم المعروف (طبعاً مع الاخذبالحيطه والحذر من بعض الاشخاص اللي تفزع لهم) ودمتم.

[عتيبي الدمام]

اشهد بالله ان هذا طبعا يااا هل الخليج

[ابوضيف الله]

انا يااخوان تعطلت بطريق حرض الساعه 2 الظهر بعز الحر امر الله ويضرب كفر والسيارة تلعب بي واطا لي صيخ مدري حديدة المهم انشق الكفر الثاني والله البلشة ومعي عيالي شوي الايوقفون شباب معهم جيب سلامات الله يسلمك قلت له السالفة كذا كذا الله لايهينكم ياشباب انتم تيسروا اذا شفتوا سطحة ارسلوها لي قال راعي السيارة ابد ويحرم الرجال الا تاخذ موتري وامش الحدود باقي عليها حدود 90 كيلو وفيها محطة خذلك غرفة وارسل لنا سطحة ووكل الله حنا نجيك يارجال حول بدل ويقوم الرجال ويطلق طلاق الا اخذ موترة وامشي قلت له ياابن الحلال قال خذ الموتر ورح المهم امري لله واخذ موترة وامشي وانا مالي وجه ماكلني الحيا ومتفشل المهم خذيت واحد من الكفرات معي واروح للمحطة واخذ لي غرفة وانزل عيالي واغير الكفر عند البنشري مالقيت لي الاكفر مستعمل وارجع للرجال والقاهم واقفين ميتين من الحر وانا ماخذ لهم موية وعصيرات باردة ونركب الكفر ونمشي واخذ رقمة واسمه والله يااخوان انا كل ماقمت وجلست اني ادعي لهم بس اللي انا مستغربة واحد متعطل بخط وتجي وتقول له خذ موتري وامش ماتعرفة ولايعرفك ولاتاخذ رقمة ولااسمه ولاتدري هو صادق والا كاذب
لكن الحمد لله الدنيا فيها خير وعيال الحلال كثار قعدت اسولف معه قلت له ياخي انت غريب قال لي ليه قلت انت عطيتني موترك وقلت لي امش ولاترجع لي انا بحمل السيارة بسطة واجيك وش دراك اني صادق ماني كاذب وش دراك اني ماني سارق السيارة قال حنا شباب وماعلينا خوف مثلك انت معك عايلة وعقالي وشاربي مهي على رجال لوشفتك بالوضع هاذا ولافزعت لك عيب على اني اشوفك وامشي واتركك ولوانك لحالك ماوقفت بس معك عايلة المهم اني انا وياه على تواصل الى هالحين والله اني ماانسي جميلة فيني وفي عيالي لين اموت

[بر الوالدين]

عز الله يبو ضيف الله إنك سنع و كفو و تذكر للرجال اللي موقفه معك لحد اللحين وما نسيته ولا حتى أعتبرته موقف حصل و إنتهى زمانه بل إنه لازمك لحد الآن

و الرجال اللي ساعدك عز الله إنه يستاهل الشحم و الدسم

[كحيلان تميم]

قريت كل الردود وكل سالفه احلى واجمل من الثانية فيها من العبر ..

بصراحه لو معي حريم ماراح افكر اوقف لاي احد .. ثانيا موب اي واحد تشوفه تساعده بعضهم بصراحه تخاف ..

[لامبالي]

صار لي قصه
ايام العزوبية كنا مسافرين من تبوك الى الجنوب مع واحد من الشباب راعي لومينا .
اللومينا رايحه فيها الانوار والبطارية ومامعنا اشتراك وعلى كذا ماشين . السواق الله يهديه يسرع في الطريق يوم خرجنا من ينبع ترتفع حراره السيارة ونوقف . الساعه 2 في الفجر دقينا على امن الطرق جانا العسكري وشفيكم قلنا السيارة ارتفعت حرارتها زي منت شايف نبغى مويه نعبي الرديتر واحنا نعبي المويه تخرج من الرديتر وماندري عنها ان فيه قطع في الللي الكوصل من الرديتر للمحرك اسفل السيارة
ونمشي وترتفع مرة ثانيه , ونوقف على مدخل قرية الرايس الساعه 3الفجر ولا احد وقف اشترت لواحد كداد لقيناه خخارج من البلدة وش فيكم نبغى مساعدة نبغى زيت ونبغى موية من القرية قال لنا مقفلين ولا يفتحون الا الساعه 8 الصبح يوم خميس
(السيارة ماتحتاج زيت فل زيت بس المشكله في المويه واحنا ماندري وش السالفه )
المهم نوقف راعي تريله بنزين ويدخلنا القرية ونروح اقرب بنشري وندق عليه بابه ههههههه الساعه 5 الفجر الناس قد صلت , مافتح لنا ويقابلنا راعي وايت صغير وش فيكم يا شباب الشارع فاضي ولا فيه احد قلنا والله نبغي نروح اقرب مكيانكي يشوف وشفيها السيارة ترتفع حرارتها ىثواني وارجع لكم ويوقف الوايت ويرجع لنا على كابرس وياخذنا ونجلس نلف في القرية ندور زيت وندور موية ,
اوخوينا اللي في السيارة وصلتهم امن الطرق وشغل لهم السيارة وعبى لهم الرديتر موية ووصفناهم بمكاننا وجونا عند مسجد وميكانيكي عند اول القرية عبينا السيارة اربع علب زيت على اللي جوتها ههههههه ونعبي السيارة موية ثاني مرة ونغير السواق ونتوكل على الله يوم خرجنا من الرايس والا نفس الحكاية ونوقف قلنا خلاص يبغالها سطحه ونجلس نتفاصل مع السواقين كل واحد يحط سعر من عنده وطفشانين وقرفانين مانمنا
ويجي راعي دينا محمل براميل وزيت يوم شفناه ويدق لنا بوري وش فيكم ياشباب قلنا الحرارة مرتفعه السيارة يبغالها سطحه راح وقف قدمنا واحد من الشباب يقول وش يبغي الملقوف هذا خلوه يفارقنا
نزل راعي الدينا وجلس يفحص السيارة والبطاريه والاسلاك والخراطيش قال بس خلاص هذي هي المشكله اللخروطوش الاسفل منقطع من حراره المكينة ويروح يقصه ويضبطه ويولف لنا اسلاك للمروحه عشان نشغلها اذا احترت السيارة (المروحه ماتتشتغل تمتك ) يولف الاسلاك ويدخلها جوه السيارة اذا احترت المكينة نشبكها وتشتغل المروحه واذا بردت نفصل الاسلاك
طبعا الزيت خرج من الصوف حقت المكينه حتى انعدمت المكينة من الزيت . والرجال يشتغل واحنا نتفرج ماندري وش نسوي ويرجع الدينا ويشرك السيارة ولم عدته حاولنا نعطيه فلوس حلفنا عليه قال والله ما اخذ شي بس ادعو لي واعطانا الاشتراك
الله يجزاه خير
خوينا بعد ماقال وش يبغي الملقوف هذا غير نظرته وصار يدعي له طول الطريق
هذي قصتنا
مايستفاد منها
1 التشييك على السيارة قبل السفر
2 اختيار الرفقه الطيبه
3 تعلم ابجديات التشييك على السيارة ومعرفه العطل قبل التصرف من راسك
4 لاتستحقر اي شخص ممكن هو افهم منك في السيارات

[ربوشي]

اولا اشكر اخونا الهويدي الي ساعد خوينا في الحريق واقوله بيض الله وجهك وجعله في موازين حسناتك سالفتي على الدائري بعد السفارات في الرياض فيه واحد متعطل ومعه عائلته ووقفت له وقال ابي بنزين واطلع للمحطه واجيب له بنزين والا عطاني 500 وقلت والله ما اخذها والله مااخذتها والثانية طفى موتر الوالد عند المرور الي على الدايري ومعي اهلي والوالده والا هذاك الي ياجر الدبابات جزاه الله خير قالي خذ موتري ود اهلك للبيت وتعال وقلت له يمكن العب عليك قال انا عطيتك الموتر ومعك عايله لو لحالك ماعطيتك والثالثه طالع من القصيم وعند المحطه قالي واحد وصلني للمجمعه قلت حياك قلت له تبي شي من البقاله قال ايه ابي سنكرس وعصير ليمون ومارس قلت بصلي واجيك قال صل قدام قلت له لا المهم وديتهوماش خايف منه ضخم الرجال ونزلته وسالت واحد من المجمعه معي في الدوام قالي علمته باسمه قالي انت خبل هذا فيه قل صح الحمدلله بعدها خلاص

[صياد العاصمه]

شكراً لصاحب الموضوع

وشكراً للهويدي وغيره من الشباب الي فيهم خير


مره صاحبي راجع من الدمام وكان لحاله .. تعب بالطريق ونزل على الخط بسرعه ووقف .. كان وراه سياره فيها ٢ الله يجزاهم خير .. نزلو له وفتحو الباب وشافو انه مايقدر يسوق .. كان باقي على الرياض تقريباً ٢٠٠ كيلو .. واحد منهم ساق سيارت صاحبي ووقفو عند بيته بالرياض الله يرحم والدينهم ويسخر لهم

[خشكاري]

سنة من السنين كنت مسافر في عز الشتاء من الشرقية للباحة ومعي حرمتي وولدي عمره شهر .. وحول حلبان بمسافة فتحت قزاز السايق لثواني ويوم جيت بقفلها عيت تتقفل .. أضغط الزر فوق تحت ياولد مافيه فايدة .. ومع المحاولات إلا وصوت ذيك الطقة وهي تنزل القزازة داخل الباب يعني القزاز صار مفتوح كامل .. وبرد جامد يالربع ينتف الوجه والموتر ماشي والبزر عمره شهر مايتحمل وآخر الليل لا والله النكبه .. قلت ياولد ماني موقف الا بمحطة .. المهم مشيت حول 90 كيلو ووقفت بالمحطة وكانت فاضية حتى الهندي زابن عن البرد وقفت تحت النور ونزلت العدة .. وبسم الله بديت أفك داخلية الباب الديكور .. وشوي إلا وراعي ددسن فيه اثنين شباب .. وقف جنبي وقال سلامات يالأخو قلت الله يسلمك مافيه شي بسيطه روح الله معك .. شوي الا والراكب نازل وجاي يمي .. وانا على طول أدخل يدي تحت المرتبه وأحطها على الفرد بدون ما أسحبه .. وهو شاف الحركه ووقف مكانه .. والله يالربع ما شكلهم راعين فزعه وخاصة أنه يشوف إن معي عايله الموتر مهوب مظلل .. وأنا أصيح عليه أنت ما تسمع قلت لك بسيطة توكل على الله .. وهو يرجع من مكانه ويركب الددسن .. وعشق ومشى على هونه وأشوفه يكلم خويه السايق .. يمشي على اقل من مهله وأنا عيني عليهم وبنفس الوقت شغال أفك الباب .. وهو يلف من ورى المحطه وينصاني من الجهة الثانية ومطفي نوره المره ذي ..!! ياولد الله يستر !! وقتها قلت مايبغالها كلام هالمره .. وأنا أسحب الفرد وأعلق على البوري قلت يغدي الهندي يصحى وأقلها يشهد لو صار شي .. وانا اوقف على رجلي مواجههم بالفرد مشرع بيدي .. وبس شاف الحركة ذي وهو يردها باثنين ويدوس حرام ماشفت الا غبرته .. ولا تطمنت لين شفته أبعد .. شوي الا الهندي جاي يفكرني بعبي بنزين .. والحمد لله الله فكني شرهم .. وفكيت ديكور الباب والهندي جزاه الله خير ساعدني وراح جاب لي خشب ورهمته بحيث أرفع القزازة وألزها بالخشب علشان تثبت مكانها .. وزبطت وكملت طريقي وانا والله ماعاد أحس بيديني ووجهي من قوة البرد ..

هذي سالفتي يالربع والحمد لله والفضل له وحده ثم للسلاح رد كيد الاثنين راعين الددسن اللي من أشكالهم والله يالربع أنهم مهوب مضبوطين وفيهم بلى .. وسلامتكم ..

[خشكاري]

وهذا موقف ثاني قديم حصل لي في عز أيام المراهقة عمري حول 18 كنت رايح الجبيل لمخيم عمي .. ولقيت واحد متعطل و يأشر بشماغه .. وقفت إلا وهو رجال كبير عمره حول 40 .. سلامات قال الكفر منصلخ وكفر الاستبنه بعد منصلخ .. قلت أبشر بالفزعه وشلنا الاستبنه وانا أدق فلشر وأعكس الطريق للمحطة تبعد حول 5 كيلو .. يوم وصلنا قال مامعي فلوس !! قلت ولا أنا مامعي الا 20 ريال وانا صادق ايام الفلس .. ونحاول بالهندي ويالله عطانا كفر مستعمل بالعشرين .. المهم مشينا شوي إلا الرجال يقول أنت والله ماقصرت و شكلك ماتقصر وودي أنك تجي معي وأنا عزوبي ومدري أيش !!! المهم الوصخ قام يقط كلام انا فهمته ..!! حرام بالله يالربع ارتفع ضغطي وماصرت أشوف .. حذفت الموتر جلد يمين الخط لاشعوريا والله وجلنط خليته يلصق بالباب وسحبت مفتاح موتري ونزلت له بالعجرى .. فتحت بابه قلت انزل ياخسيس انزل لعنة الله على هالوجه .. وهو يتمسكن وانا آسف لاتفهمني غلط وانا مدري أيش .. أقول أنزل ياللي فيك ياللي .. انواع السب .. وانا والله حاط فبالي وقتها انه اكبر مني لاكن كبدي ولعت نار عليه .. المهم نزل وأفتح الشنطه وأنطل الاستبنه حقته .. والملعون باقي له وجه يقول كمل جميلك وصلني موتري .. وأتحمى بكل قوتي وأرنه بوحده بالعجرى على راسه حطيت بها حرة الاوله والتاليه وطاح من قوة الضربه ولا طرى له يقاوم أبد .. وانا اسب وألعن فيه منغبن على حركته الخسيس ومنغبن على العشرين إللي دفعتها للكفر 20 ايام الفلس كنها الفين عندي ..
وإلى يومكم هذا يارجاجيل كل ما اتذكر الموقف والله إني أنغبن في داخل نفسي وتاكلني كبدي على الموقف .. وسلامتكم

[بر الوالدين]

قريت كل القصص اللي بعد ردي

سالفه لامبالي وخويكم اللي يقول لصاحب الدينا وش يبي هالنلقوف
والله نفروض انه اعتذر منه قدامكم مع دوعته له بالطريق

وسالفه ربوشي الله فكك من الخبل اجل سنكرس

خنشكاري الحمدلله على السلامه وحلبان منطقه كثير نسمع عنها سوالف مهي طيبه

وابوال 40 يالله حسن الخاتمه

اخونا صياد زين اللي سخر الله لخويك اجواد مهم حراميه كان نهبوه

[الاشهب 507]

مواقفي كثيره مره وحده يساعدوني الناس
وعشر اساعده وتستمر الحياه يوم لك ويوم عليك
المهم أنا عندي خبره في الكهرب والمكنيكى واعرف للسمكره
الي تمشي حال وتضبط المنضر العام للبودي
المهم كل ماشفت واحد متعطله مروحته ولا شيء احاول
اولف له اي شيء يمشيه لين يضبط وضعه ومره ضبطت لواحد
مروحه تماتيك على الكهرب طبعن ماهي اول مره اضبط مثل هذي الشغلات
وباسلاك كويسه جودته وتتحمل الحراره لكن مره والانسان ماهو معصوم
من الخطى ضبطت للرجال مروحته واشتغلة والطريق مهجوره
السيارات فيه قليل ونادره المهم ضبطت له الشغله لكن
اثار السلك الموجب إلى أنا موصله فيه قرصه خفيف ماانتبهت لها
المهم والكل يعرف ان بودي السيارات سالاب ابعدهى مشى الرجال وراي
وبعد كم كيلو إلى وهو يدق الفلشر وياشر لي بشماغه معى القزاز
وقفت ووقف وراي المهم إلى وهو نازل على بعجره اطول مني
ونغير تفاهم أنا فكرت بيحطه للكبوت لين حطه المره الاوله يوم وقفني
المهم الاسلاك إلى مديته له خليت تشبيكه يدوي بليد منغير فاصل بس.
سلكين تضرب في بعض والمهم تعرفون تتولد حراره إذا التمس السالب
والموجب حراره عاليه كلكم تعرفونه المهم اهو شبك السلك ويوم جاء بيفصله
احترق ابهامه من الحراره وزعل الرجال وصرني وانا غافل قلت ليه يابن الحلال
وهو ينافخ الانسان ماه معصوم من الخطاء ومن ذلكلام المهم على خفله
صفكني بلعجره صفقه ماهي بلسهله على يدي اليسار وانا عندي مشكله صحيه
إذا عصبت ادوخ وارتجف ومقدر اتصرف المهم كسر العجره على يدي وجلست
في عز الشمس لمدت تقربن نصف ساعه مقدر اشوف قدامي وارتجف
كني في واحد حاط عليه ثلج المهم ويوقف واحد من اخوياي يعرفن
ويوقف سيارت ويشيلني ويركبن في موتري لين هو يعرف أني اخاف على موتري
ويجلس بالي مشغول طول الوقت إذا أنا بعيد عنه المهم وعلى الطواري
ويطلع كسر مضاعف وانا مالي ذنب ومن طبعي لسبب صحي من يوم اناصغير
أين مستحيل امد يدي على احد واصبر واتحمل مايجيني لين إذا عصبت
مقدر اتصرف وادوخ ومقدر اشوف قدامي واحس ببروده شديده
في جسمي وهذا جزا فاعل الخير لكن قدر الله وماشاء فعل
ومن بعده موقف لحد واذا وقفت اعطيه العده إلى يحتاج وماتدخل
في شيء بكيفه هو حر في موتره
الاشهب 507

[turkiq]

مواقفي كثيره مره وحده يساعدوني الناس
وعشر اساعده وتستمر الحياه يوم لك ويوم عليك
المهم أنا عندي خبره في الكهرب والمكنيكى واعرف للسمكره
الي تمشي حال وتضبط المنضر العام للبودي
المهم كل ماشفت واحد متعطله مروحته ولا شيء احاول
اولف له اي شيء يمشيه لين يضبط وضعه ومره ضبطت لواحد
مروحه تماتيك على الكهرب طبعن ماهي اول مره اضبط مثل هذي الشغلات
وباسلاك كويسه جودته وتتحمل الحراره لكن مره والانسان ماهو معصوم
من الخطى ضبطت للرجال مروحته واشتغلة والطريق مهجوره
السيارات فيه قليل ونادره المهم ضبطت له الشغله لكن
اثار السلك الموجب إلى أنا موصله فيه قرصه خفيف ماانتبهت لها
المهم والكل يعرف ان بودي السيارات سالاب ابعدهى مشى الرجال وراي
وبعد كم كيلو إلى وهو يدق الفلشر وياشر لي بشماغه معى القزاز
وقفت ووقف وراي المهم إلى وهو نازل على بعجره اطول مني
ونغير تفاهم أنا فكرت بيحطه للكبوت لين حطه المره الاوله يوم وقفني
المهم الاسلاك إلى مديته له خليت تشبيكه يدوي بليد منغير فاصل بس.
سلكين تضرب في بعض والمهم تعرفون تتولد حراره إذا التمس السالب
والموجب حراره عاليه كلكم تعرفونه المهم اهو شبك السلك ويوم جاء بيفصله
احترق ابهامه من الحراره وزعل الرجال وصرني وانا غافل قلت ليه يابن الحلال
وهو ينافخ الانسان ماه معصوم من الخطاء ومن ذلكلام المهم على خفله
صفكني بلعجره صفقه ماهي بلسهله على يدي اليسار وانا عندي مشكله صحيه
إذا عصبت ادوخ وارتجف ومقدر اتصرف المهم كسر العجره على يدي وجلست
في عز الشمس لمدت تقربن نصف ساعه مقدر اشوف قدامي وارتجف
كني في واحد حاط عليه ثلج المهم ويوقف واحد من اخوياي يعرفن
ويوقف سيارت ويشيلني ويركبن في موتري لين هو يعرف أني اخاف على موتري
ويجلس بالي مشغول طول الوقت إذا أنا بعيد عنه المهم وعلى الطواري
ويطلع كسر مضاعف وانا مالي ذنب ومن طبعي لسبب صحي من يوم اناصغير
أين مستحيل امد يدي على احد واصبر واتحمل مايجيني لين إذا عصبت
مقدر اتصرف وادوخ ومقدر اشوف قدامي واحس ببروده شديده
في جسمي وهذا جزا فاعل الخير لكن قدر الله وماشاء فعل
ومن بعده موقف لحد واذا وقفت اعطيه العده إلى يحتاج وماتدخل
في شيء بكيفه هو حر في موتره
الاشهب 507

لاحول ولاقوة الا بالله
والله رحمتك ياخوي .. وش ذا الحالة!!
مثل هذا كان المفروض تبلغ عنه وتاخذ حقك منه

[الاشهب 507]

المشكله معرف عنه اي شيء
حتى شكله ماكنت ملقي له بال
اسلم عليه وقلبي ماهو حوله
والله يرحمك ويرحم ولديك
الاشهب 507

[الاشهب 507]

الحاله إلى عندي بذكره بشكل عام لتكون مفهومه الصوره
ا. وهو مرض نادر وقليل الانتشار نادر جدا بكل ماتعنيه الكله
ولله الحمد
هي عباره عن تقص في هرمون معين لاذكر اسمه بلضبط لكن
على ماعتقد هو الكفيين الطبيع في جسم الانسان
وهو المسول عن التحكم في الاعصاب
وقد ينقص عند الانسان منذولادته وعند نقص
لايستطيع الانسان التحكم بلشكل المطلوب في حركات جسمه
وايض هناك سبب اخر هو اضطراب خلاياء الدم احمرى والبيضاء
فيتسبب ذالك في انخفاض حرار الجسم بشكل ملحوظ
ممايأدي إلى الرعش وسببه هو عدم القدرت الكفيه
للتحكم في الاعصاب فيستنفر الجسم لضخ الدم في جميع
الاطراف بشكل عشواءي وهو خلل هرموني خطير في بعض
الحالات المتقدمه وهذا المرض نادر جدنا ونسبه قليله ولله الحمد
لدرجت ان. اكثر من 97% من الناس لا يعرفه اساسن واكثر الاطباء
ايضن لندرته وقلت ولم يعرف له سبب معي ولكن هناك بعض الحبوب
التي تساعد الجسم على التحكم في خلاي الدم ويخفف قليل من المعانات
ولكن هو في كل الاحوال هو عباره عن مرض من الامراض العصبيه
النادره ولله الحمد والله يكفيكم شره وشكر كل مرض خبيث
وهناك الكثير من الامراض والحالت غير المفهومه ولم يكتشف لها علاج
معين وأذا اراد الله فيه علاج جديد قد يكون هو الحل بعد الله سبحان وتعالى
لكن لم يتم طرح في السوق حتى الان ليعرفوا مدى فعاليته وماهي اعراضه
الجانبيه أنا هذى الكلام إلى فهمته من الدكتور لينه تكلم بكلام كثير وفيه
مصطلاحات انقلبزيه ولاتينيه لم افهما ولكن هذى ماتضح لي
من كلامه والله واعلم
الاشهب 507