كل ما تريد معرفته عن كمبيوترات الغوص بالصور والاسعار و التفاصيل و العيوب والمميزات
السلام عليكم و رحمه الله وبركاته
اللهم صلي على سيدنا محمد و على آله و صحبه وسلم
سبحان الله و بحمده
ان شاء الله يكون الجميع بالف صحه وعافيه
هذا الموضوع اهداء للأخ سنوركل .. واللي كان يحب اني ارد على موضوعه بخصوص الكمبيوترات فحبيت اهديه موضوع كاملو طبعا ما يهونون باقي الاخوان
اولأ انواع الكمبيوترات تنقسم الى 4 انواع ريئيسه وهي :
1- التي تكون على شكل ساعه .. وتكون مفضله اكثر شي عند السنوركلجيه و اصحاب الفري دايفينق و حلاوتها انك تقدر تلبسها كساعه عاديه علطول
و تتميز بالتالي ( عداد العمق - درجه حراره المياه - نسبه النيتروجين بالجسم - تحديد مده و عمق وقفه السلامه - مده السباحه فوق سطح البحر و مده الغوص- تسجيل عدد 99 غوصه- عرض سجل افتراضي للعمق و مده الغوص) و سعرها تقريبا بين 600 الى 1500 ريال بالمحلات عندنا و بالخارج نفس الاسعار لكن باختلاف مكان التصنيع
وفي منها انواع متطوره تقبل باضافه ريموت كونترول يركب على المنظم المرحله الاولى و مميزاتها نفس الساعه العاديه و لكن يمكن معرفه ضغط الهواء بالاسطوانه و مده الغوصه المتبقيه بها و بعضها يحتوي على بوصله الكترونيه
و هي اصليه في معظم المحلات و سعرها بين 2000 الى 5000 ريال بحسب المميزات و الماركه
و الموديلات تختلف باختلاف الماركات والمميزات بحسب سعر كل ساعه ... ولكن بعض انواع الساعات مثل الاوشانيك جيو غير مرغوبه لسببين .. اولا انها كانت تصنع بالسابق في امريكا وكانت ذات نوعيه ممتازه ولكن بسعر غالي في حدود 1500 ريال .. اما الآن فالمتوفر منها بسعر يناهز ال 650 الى 1000 ريال فهي صناعه تايوانيه رديئه تتعرض للعطل بسرعه و احيانا تزبط مع بعض الاخوان لمده طويله و لكن ان شاء الله المارس و السانتو ممتازه و مجربه لمده طويله و تتحمل عمق 200 او 300 قدم
2- التي تركب في لوحه العدادات
و مميزاتها نفس مميزات الساعه ولكن طبعا بشاشه اكبر و اوضح و مفضله عن معظم الغواصين و هاذي الفئه هي اللي دايما انصح فيها نظرا لسعرها المعتدل و جودتها العاليه و ان خرابها شبه مستحيل و سهله الاستخدام جدا واحيانا يمكن تركيبها على اطار مخصص لليد وتعمل كساعه يد ولكن حجمها كبير ... ولا يمكن اضافه ريموت كونترول لمعرفه عداد ضغط الهواء و افضل الانواع فيها هي الاوشانيك والشيروود و اليو اس دايفر و الجنيسس و ما اظن شفت منها نوعيات مقلده و كل اللي مرت علي كانت مصنعه في امريكا ونوعيه ممتازه جدا و ما شاء الله ما قد شفت ولا وحده منهم خربانه و بطاريتها مثل بطاريات الساعات و رخيصه بحدود 30 ريال للبطاريات اليابانيه الاصليه...
مع العلم بانها تتحمل لعمق 200 و بعضها الى 300 قدم ...سعرها بين 600 الى 1000 ريال للجديد فقط للكمبيوتر بدون لوحه العدادات و المستعمل بين 400 الى 500 ريال بالخارج ... و هنا تقريبا نفس الاسعار لكن باختلاف مكان التصنيع ما عدا غواص الاحلام و الخريف اللي يبيعو الاصليه منها بحدود 1400 تقريبا
3- اللي تكون بلوحه العدادات و مدمجه بعداد الكتروني لقياس ضغط الهواء بالاسطوانه مع خاصيه الانذار الصوتي للاعماق و عند قرب انتهاء كميه الهواء
و مميزاتها نفس الساعه اللي بالريموت كنترول ولكن تكون مرتبطه بالمنظم الرئيسي عن طريق لي عداد الضغط العادي وهي تعتبر الاغلى بينهم و دقيقه جدا وبعضها تتحمل الى عمق 1500 قدم .. و غالبا ما يستخدموها أهل الغوص التجاري و التقني .. و لها اكثر من 6 سنوات تستخدم في امريكا من قبل المدربين .. و الآن قبل شهر تقريبا وصلت عندنا السوق وبأسعار مبالغ فيها جدا ...مع انها في امريكا يوصل سعرها حدود 1500 ريال فقط
4- اللي تكون مدمجه بنظارات الغوص و هي حديثه جدا و متطوره و تجي بريموت كونترول في معظم الموديلات
و مميزاتها نفس مميزات الساعه اللي بريموت كونترول و لكن تعرض البيانات في زاويه نظاره الغوص.. و الله اعلم بالنسبه لأسعارها و عن تجربتها ويمكن الاستفسار اكثر عنها لدى محلات الغوص .. ولكن بالطبع سعرها مرتفع
ثانيا معلومات عامه عن الكمبيوترات :
* كمبيوترات سكوبا برو ذات الاصدار قبل 95 تم اعلان عن وجود اخطاء في حساب نسبه النيتروجين و هو عيب مصنعي و تم سحبها من السوق و قامو باستبدال جميع الكمبيوترات المباعه بموديلات حديثه.. و طبعا هذا حدث في امريكا و اوروبا .. لكن هنا يا عالم لك الله و للاسف النوعيات الجديده بعضها يعاني من خلل مصنعي
* كمبيوترات سكوبا برو تكلف 300 ريال عند تغيير البطاريه و يجب ارسالها للمصنع و انتظار مده اسبوعين تقريبا حتى ترجع مره اخرى
* بعض من كمبيوترات سانتو واريس لا يمكن استبدال بطارياتها لأنها غير متوفره نهائيا بالسوق و ممنوع استيرادها لأنها مصنعه باسرائيل
* البطاريات اللي يستبدلوها في محلات الغوص ليست يابنيه اصليه واللي من المفترض انها تخدم 5 سنوات تقريبا ... و يحطو بطاريات صينيه مكتوب عليها مصنوعه في اليابان و لا تستمر اكثر من سنه الى سنتين فقط و اغلب الظن ان اصحاب محلات الغوص ماهم عارفين المعلومه دي
* كانت اسعار الكمبيوترات بالسابق اغلى من الاسعار الحاليه و ذلك بسبب اختلاف التصنيع و الجوده حيث انها كانت سابقا تتصنع في امريكا و الان مصنعه في تايوان و الصين
* الاسعار السابقه غير ثابته لأن كل فتره والثانيه تتغير الاسعار بالمحلات و بالخارج و انا مني مطلع بجميع الاسعار
* اكيد في معلومات كثير و انواع اكثر من التفاصيل ما دخلت فيها لأنها غايبه عن بالي ..
* يفضل قبل تشغيل الكمبيوترات تغطيتها بالماء و البدء في تشغيلها لتجنب عدم تعطل حساسات العمق لأنها حساسه جدا و حتى تحافظ على دقتها .. يعني قبل ما تنزل الغوص انتا على السطح شغلها ... و للعلم لو نزلت لمعق يتعدى 10 قدم و ما شغلتها فما راح تشتغل الا بعد ما تطلع عند سطح البحر وهذي الخاصيه للحفاظ على دقه عمل الحساسات
هاذي صوره لأحد الاختبارات اللي تقوم بها جمعيات الغوص الامريكيه لمعرفه جوده و دقه عمل الكمبيوترات
هاذي هي الكمبيوترات وانواعها باختصار .. و لكن في بعضها تجي بشاشه TFT
وتعمل ككمبيوتر و كاميرا و شاشه عرض بيانات و تجي باسعار مرتفه و اظن انها للكشخه
وانا عارف ان موضوعي ذا حيكون بدايه زعل اصحاب محلات الغوص مني لاني ذكرت بعض الانواع بالذم و بعضها بجد تستحق المدح.. لكن الاخ سنوركل و كل الاخوان ما يغلى عليهم الموضوع و انا حبيت الفائده تعم حتى ما يورط احد
وأي استفسار انا موجود وما احد يرده الا كيبورده
اخوكم ابو هاشم
15 نوفمبر 2015 - 16:514 نوفمبر 2015 - 21:27
 |
رد مع اقتباس
المشاركة الأصلية كتبت بواسطة abuufahad
... و اسباب ان المحلات احيانا تعمل تخفيض على سلعه معينه و هي بالاساس سعرها غالي حتى لو من الخارج .. وبالاخير تطلع مقلدة و مصنعه في تايوان بدون علم اصحاب الماركه .. و الجمارك تحارب هذا النوع من الغش التجاري .. ولكن الواسطه فوق كل شي
