مانستغني عن نصايحكم يأهل الجيوب وبالأخص باتروول

[حرباش]

السلام عليكم
اخواني الإعزاء
انا مقدم على شراء سياره باترول 2005 ان شاء لله واريد آخذ بعض نصايحكم بالنسبه للآتي
1- كفرات البالون ( ماهو علاج الرجه )
2- اجهزه تحديد المواقع
3- اجهزه الإتصال الاسلكيه
4- اهم الأدوات التي يجب توفرها في سياره الدفع الرباعي
5- بعض النصائح التي يجهلها المستخدم الجديد والتي تتعلق بسيارات باترول والتي اكتسبها اصحابها من خبره الإستخدام من ناحيه الأشياء التي تحتاج مراعاه وصيانه مستمره

وزي ماقلتلكم ياشباب لاحد يبخل علينا بأي معلومه يعرفها وكل على حسب خبرته في النقاط الي سبق طرحها
ونأسف على الإطاله
تقبلو تحياتي اخوكم حرباش

[عاشق الحماد]

اخي حرباش\

بالنسبة للكفرات البالون لاادري

اما جهاز تحديد المواقع عليك بقارمن بلس ثري

اما جهاز الندا عليك ب الايكوم الفين ومية

بالنسبة للوازم السيارة والبر خصوصا اهم شي عدة البنشر ومنفاخ الهوا والاضاءة-لمبة كبس


وسلامتك\يمكن فية اشياء وانواع اخرى يفيدونك الشباب

[حرباش]

بيض الله وجهك اخوي عاشق الحماد وماقصرت

[الشوق]

أخي الكريم الله يوفقك وأحسنت الاختيار

صدق صقر الصحراء موتر ماعليه كلام أبد


أما بالنسبه لكفرات البالون فنصيحه من أخو لك لا تقربها أبد
الا اذا بغيت تطلع للبر أما عشان التشخيص فوالله انها بتعدم موترك وحرام وهو جديد تخلي الكفرات تلعب فيه

لأنها اولا تسبب رجه
ثانيا ثقيله جدا على الموتر وتتعب الدفرنس
ثالثا تعدم الفرامل وتطول مسافة التوقف وتزحلق بالموتر

ثم ان السفاري اصلا بالكفرات العاديه اذا نسمت له يطلع مجنون بالبر حتى بدون دبل


وأهم شيء أول ماتطلعه على طول للغرابي لبس الارضيه بلاستيك كامل

ويبي لك ماطور هواء وواير سحب قوي
والعفريته الي تنشبك في الشكمان تراها مفيده بالبر


وأهم شيء الصيانه الدوريه للموتر

والله يعطيك خيره ويكفيك شره مقدما

واسف على الاطاله

[حرباش]

اخوي الشوق الله يجزاك خير وماقصرت ونصيحه طيبه من انسان طيب
شاكر لك اخوي الشوق

[طحنون]

هلابك اخوي حرباش
على البركه انشاء الله
بس ونا اخوك عندي وجه نظر
لاتأخذ قير تماتيك اذا انك تروح للبر بصفه يوميه اواسبوعيه خذ القير العادي افضل
مع ان القيرالتماتيك ممتاز تربونيك يعني تماتيك وعادي بنفس الوقت
ولاتبعد عن رقم 2 سفاري 2
والله الله بالصيانه والتربيط المستمروتشييك ضغط الكفرات بشكل اسبوعي
والبالون لاتقربه مثل ماقالوالشباب
أسف على الاطاله

[اسيزو 4x4]

الله يبارلك ياخوي حرباش

احسنت الاختيار الباترول موتر برويعتمد عليه

وزي ماقالو الاخوان الكفرات البالون تلعب بالسياره لعب

واهم شي الصيانه الدوريه للموتر

ومن ثم التنجيد الداخلي الكامل(تنجيد الارضيه - وتلبيس الطبلون والدركسون)

ونش -توانك ماء-اجهزه ملاحه -شبك لتحميل اغراضك فوق التنده -اكباس هيلا الالمانيه - ماطور هواء -والله الله بالقير العادي

اخوي الغالي الله يبارلك مقدما ويعطيك خير هالموتر ويكفاك شره

تحياتي لك

اخوك ابوحمود

[حرباش]

اخوي طحنون ماقصرت يالغالي وهي النيه ان شالله سفاري 2 اما التوماتيك الله ماعطاني حبه
والاخ اسيزو ماقصرت وبالنسبه لكبوس هيلا هذي اول مره اسمعبها ودي تعطيني فكره عنها هل هي من الانواع اللي تتثبت امام السياره او الكبوس اليدويه

ماقصرتو وبيض الله وجيهكم

[صقر]

مبروك مقدما واحسنت الإختبار ... فهذه السيارة هي ( في نظري ) سيارة البر

وممكن أفيدك من خلال تجاربي مع هذه السيارة

كفرات البالون : أنا اختلف مع الاخوان ... فهي كفرات مخصصة للبر ومميزاتها هي :
- تخفف المطبات بنسبة 30% وتمتص الصدمات بشكل ملموس.
- هذه الكفرات مصنوعة للحماية من الحصى والتشقق فالحصى ينزلق من تحتها ويجنبها التشقق.
- عريضة بشكل يساعد في القيادة في المناطق الرملية .

عيوبها : قصر عمرها ... فعمرها الافتراضي يصل الى 6 شهور فقط مع الاستعمال الكثير وتتراوح نسبة العمر لهذه الكفرات من 6 الى 12 شهرا كحد أقصى.

ثقيلة عندما يكون الهواء خفيف وتبطيء من سير السيارة ... لذا يجب ملؤها بالهواء في المدن والطرق السريعة.

============

أنا مركب تانكي ماء بشكل عرضي خلف المرتبة الخلفية يتسع لـ 130 لتر ويعبأ من الداخل ويكفي لرحلة عمرها ثلاثة أيام لشخصين

التجهيزات الاخرى المهمة

قارمن 276 وهو احسن الموجود في أسواق العالم
آيكوم جهاز اتصال رائع ويعمر طويلا ومعقول من حيث المسافة
ماطور هواء ( camel) وهو من أفضل المواطير وسعره معقول جدا.

هناك تلبيسة للقير فيها حوالي ثمانية مخابيء ومهمة لهذه السيارة.

[ساكن البراري]

السلام عليكم أخوي
أولا حبيت أقول لك الله يعطيك خيره ويكفيك شره

أخوي مسألة التربيط إحذر أنك تربط السيارة في كل رحلة أو كل ما طلعت للبر لأن التربيط المستمر يسبب إنحلال المسامير وبالحالة هذي تضطر أنك تربط السيارة كل شهر سواء طلعت للبر أو لا

أخوي بالنسبه لتوانك المويه أنا ما تعجبني فكرة التوانك الثابته لأنها عرضه للصدأ أما إذا كنت تميل إليها فأفضل شيء أنك تركب توانك ستيل لأنها أقل عرضه للتلوث مع مرور الوقت

بالنسبه للكفرات البلون ما أرجحها لأنها قد أنفقع علي أثنين في طرق جبليه وبعدين الوكالة حقيقة كفراتها ممتازة وتتحمل والدليل إني رجعت لها ويقول المثل: قديمك نديمك ولو جديدك أغناك

وأعذرنا على الإطالة

وأتمنى لك رحلات موفقة

[حرباش]

اخوي صقر سوبر مشرف
<<<<<<< خاف يوم شاف اسمك خخخخخخخخخخخخخخخخخخخخخخخخ
يعطيك العافيه اخوي صقر على هذه المعلومات القيمه صراحه وفكره التانكي فكره حلوه وزي ماقال الاخ ساكن البراري يفضل انه يكون استيل
والأخ ساكن البراري عطيتنا فكره حلوه بشأن التربيط ونورتنا الله يزيدك نور ان شالله ويعطيك العافيه

بالنسبه لكفرات البالون
انا اكثر رحلاتي تكون في مناطق رمليه واعجبتني فكره حلوه يقوم بها بعض الشباب وهي كالتالي :-
يقوم بشراء طقم جنوط اضافي ويركب عليه كفرات البالون ، وغالبا مايكون هذا الجنط من نوع استرالي ومتعارف عليه بسم الجنط الإسترالي ، وهذا الجنط خفيف جدا وله طاقه تحمل حلوه.
فلمن يصير طالع البر يركب الجنط الأسترالي عليه ويخليه في المشاوير البسيطه واذا كان عنده مشوار بعيد او مسافات طويله ركب جنط الوكاله وعليه الكفر الي يجي شد بلاد .
البعض يقول هذي شغله مالها اول ولا آخر لكن اللي اشوف ان البر له اوقات وفكره الشباب 100 على ميه 100 من وهجه نظري ولا ادري عن وجهه نظر الآخرين يعطيكم العافيه ونأسف على الإطاله

[ابو هشام]

الباترول مايحتجله كفرات بلون عشان التغريز او المطبات. حط الهواء على 20 وانطلق بسرعة 100 الى 120 في اي مطبات واي تغريز.

له معاي 6 سنوات ما قد خيبني في اي شيء سوى ان حديده خفيف.

[حرباش]

مشكووور اخوي ابو هشام على النصيحه وبيض الله وجهك

[اسيزو 4x4]

الغالي حرباش

كشافات هيلا تركب على الصدام وهي من نوع ألماني ممتازة جدا للنفود وقت الليل

ميزتها تجي سخيفة من الجنب

وقوية وتستحمل

ولا تحترق شمعاتها بسرعة

ويمكن تركيب شمعات زينون عليها

وتوجد عند بعض محلات الزينة

وأي أستفسار أنا تحت أمرك يالنشمي

وأسف على تأخري بالرد

[محب الشمال]

اخوي حرباش الله يعطيك خيره ويكفيك شره
الباترول سياره ما شاء الله قويه وتستحمل كان عندي واحد موديل 97 ورحت في الصمان والبران والثمامه وطمرت عشرين رصيف وكرفته كرف ماهو طبيعي ولا عمري رصصته ابداً ابداً
بالنسبه للتجهيزات في اعتقادي والله اعلم ...
تانكي ماء ( المويه اهم شي في الرحلات وغير الرحلات )
تانكي بنزي احتياط
منفاخ هواء نوعيه ممتازه وكفر سبير ثاني احتياط اذا امكن او انه يكون معك عده رقع
قارمن وكنود
بالنسبه للكنود انا كنت مركب واحد في الباترول عندي بس بطريقه حلوه كان مخفي يعني كان عندي فتحة بسقف الجيب من الخلف خليت العامل يركب قاعده الاريل عن طريقها ويمد الاسلاك من تحتت الفرشه والبلاستيك الي على ارضيه الباب لين عند الطبلون وخليته يشبك الكهرباء من البطاريه ويدخلها من الكبوت على الطلبون مباشره عشان تصير مخفيه الاسلاك ويصير المنظر احلى طبعاً عطيت العامل خمسين ريال عشان يسوي لي هالحركه هذي وانا سويتها عند شمالات في المرسلات
واذا طلعت للبر ونويت تروح مكانات بعيده لازم والافضل بعد توفيق الله انه يكون معك كمية من التمر والماء الوافر من باب الاحتياظ عشان لا سمح الله تتعطل معك السياره او يخرب معك جهاز
اسأل الله أن يحفظك ويعافيك ويسهل لك طريقك دوماً وابداً ويستر عليك ويوفقك
وسامحني على الاطاله