رأيكم بالسكويا 2010 دبل

[مغلي]

السلام عليكم

السيكويا 2010 دبل

أستخدامي عائلي 90% عائلتي 7 بالغين وطفله 11 سنه وطفله اخرى 3 سنوات
السرعه لا تهمني -لأني ما اتجاوز ال 125 الا نادرا- فقط العزم والقوه والثقه والمتانه هي اهم شي عندي
عزم المحرك 55.5 كغم /متر ---- بينما الفكسار الان 41.8 كغم /متر والباترول الجديد 55 كغم /متر

الاحصنه 381 حصان --- وحسب معلوماتي الاحصنه تفيد بالسرعات العاليه
بينما العزم يفيد بقوة الفزه من الوقوف

مطلوب رأي المجربين لها

هل هي سيارتن يشد بها الظهر سواء بخط سفر او بطعوس او بجبال
هل دفرنساتها وقيرها نفس الفكسار واللكزس 2010
هل فيها اعطال مصنعيه عويصه
هل دفرنسها الخلفي عكوس او دفرنس كامل
هل قطع غيارها متوفر بكل مكان ورخيص او غالي
هل مقاعدها مريحه بالسفر مثل الفكسار او قلق مثل الجكسار
هل القير 6 نمر مثل اللكزس او 5 نمر مثل الجكسار
هل البنزين 91 او 95
هل المرايات الجانبيه يمين ويسار مأخوذه من اليوكن !!! ... الله يستر اكره شي عندي جي ام سي وشفروليه
هل ينفع للتطعيس المعقول (وليس الهبال مثل اهل الهايلوكسات وخبالهم بالتفتفه عشان يرقى ويمشي بالطعوس)
هل شكل السياره مقبول او غير مقبول خصوصا ان اغلب من يقودها الان هنود
هل فيه اي اشياء ميكانيكيه مشتركه بينه وبين الجكسار
هل ممكن تركيب ونش له
هل ممكن تركيب دعامه اماميه مثل الجكسار
هل ممكن تركيب جناح خلفي مثل الجكسار
هل الزجاجه الخلفيه بباب الشنطه = عمليه او عله لأنها تنزل وترتفع وليست رهيبه مثل الجكسار حيث تفتح لفوق مع جزء من الباب لتسهيل تحميل الاغراض
هل يأتي بتشغيل بصمه
هل يوجد ثلاجه من الوكاله بهذا الموديل 2010
هل عزل الصوت ممتاز او وسط او سيء = عند سرعة 140 واقل .... فوق ال 140 بسلامته مايهمني حدي 140 وبس
هل نظام تبريد المحرك ميكانيكي او كهربائي
ماهو افضل لون يركب عليه 100%

























http://www.alrroya.com/node/7499

اختبار تصادم ... كفانا الله واياكم شر الحوادث

[bu hadi]

عليكم السلام ورحمة الله وبركاتة

اسمع وانا اخوك

السيارة هذي فكرت فيها بصراحة قبل مااخذ الكروزر

لكن للأسف ماكانت دبل وهذا كان عيب في موديل 2009

لكن موديل 2010 ماشاء الله مافية كلام وانا اكلمك وانا مقتنع فيها كأفضل سيارة

وخاصة انها تويوتا ومكينة لكسز فهي سيارة قوية مافية كلام

دخلت الكثير من المنتديات ونشدت الين عجزت والكل يمدح فيها

ما حد عاب الا صرفية البزين يقولون تصرف شوي ولو فكرنا بجدية نلقى من يقتني سيارة بهذا الحجم ومكينة كبيرة لازم بتصرف شوي

اما عيوب لا توجد ولن توجد انشاء الله وكفاية انها تويوتا

بالنسبة للهنود الله يغثهم انا زيك كرهوني من كثر ماشوف ذالسووايق بازين فيها

لكن لو فكرنا نحصلها مناسبة للعوايل وسعرها معقول لكن ماتمنعك تقتنيها

تقبل مروري واستخر وذا نويت علمني نبيع الكروزر وناخذسكويا اكبر للعوايل ومكينة صح

[بن سليمان]

اذا كنت تقدر على الباترول الجديد فلا تتردد وش جاب الثراء للثريا
والسكويا يجي مقصات واهل التويوتا يقولون المقصات ما تنفع ابد ابد في البر يعني ما يشد فيها الظهر في طعوس وجبال

[مغلي]

حياك الله يابوهادي

رأيك على العين والراس

فعلا السكويا سياره قويه وخصوصا ان المحرك + القير = لكزس = والسعر 148 الف ريال .... اقل من اللاندكروزر ال G اخس نوع قيمته 156 الف

*********************

اخي ابن سليمان

الباترول الجديد في نظري انه ارمادا بشكل جديد فقط ... تقريبا كل المحركات نفس الشي 100% .... لكن داخليته خباااااااااااااااال وجناااااااااااااان

[ابن عكاش]

للفائده الباترول الجديد نفس قاعدة الأرمادا
السكويا سعره مغري لكن اشوف انه مايصلح للبر
هل فكرت في التاهو الجديد 2010م ltبـ 128ألف
اتوقع الحكسار موتر للي بيستخدم مده طويلة خصوصاَانه يجع اشياء واجد للبر للسفر وموتر يواجه وشكل اتوقع مافيها مقارنه بس غالي
تقبل مروري

[مغلي]

صدقت يا ابن عكاش

الجكسار ... رزّه ويواجه لكن عيوبه الحاليه = السعر 192 الف + المحرك 4.7 قديم وعزمه لك عليه شوي مقارنة بالباترول والسكويا طبعا

اما سالفة التاهو ... فهي آآآآآآآآخر شي افكر فيه

والمشكله ان الباترول مهوب باترول ... اسم فقط بينما هو ارمادا مجدد بالكامل لأن الارمادا سيتوقف انتاجها نهائيا لدلاخة شكله

[عميد سامودة]

الله يعينك خذ اللي ترتاحله ولا رضا الناس غاية لا تدرك كل واحد بيمدح موتره

[علوان]

متابع



افكر انا باخو السكويا الي هو التندرا الفرق انه يجي غرفه وحوش ولا غرفتين او حوش

[بحرالحياة]

السيارة رائعة بكل المقاييس

[monsixnet]

-

×مشكور ويعطيك العافيه

[hightech]

سبق وان استأجرت السيارة لمدة يوم بقصد التجربة والحقيقة ان السيارة ماعليها كلام

والعذروب الوحيد ماكانت دبل (2009) وهذا ماجعلني اصرف عنها واستخير الله

وبالاخير اخذت تاهو 2010lt .

اقترح عليك انك تستأجر وحدة يمكن تغطي نصف استفساراتك ولا تنسى

الثمامة رح هناك وجربها زين اذا الموتر جازلك توكل على والله يكتب لك الصالح.

[مكشاتي الجزيرة]

سيكويا مجربه....توكل على الله...

[بعيد الهقاوي6]

الخيارات اللي انت حاطها كلها ممتازه ماعدا السيكويا

الباترول واللاند والجمس هذي المواتر لك وللزمن قوه وتحمل وكرف ورزه


السيكويا انحش عنه نحشتك عن الذيب موتر كثيرتن مشاكله وماهوب مرغوب

[الجني العبد]

السيكويا انحش عنه نحشتك عن الذيب موتر كثيرتن مشاكله وماهوب مرغوب

من تكلم بغير فنّة أتى بالعجائب

[أبوعذااب707]

بعيد الهقاوي
اليوكن انا مجربه وخراباته واجد بالذات القير وطرمبة البنزين علما بأن موديله 2009
السيكويا الحمد لله ما شفت منه شيء
الباترول حجمه صغير للعايله الكبيره
الجي اكس ار لا يعلى عليه لراعي البر
اما مدينه وبر قليل سيكوياا بقووه