ماهي صلاحية القطع التاليه

[محب الشمال]

اخواني اعضاء مكشات المحترمين السلام عليكم ورحمة الله وركاته
اخواني كما تعلمون انه في قطع غيار لابد من تغيرها في السياره بين فتره واخرى
والسؤال يا اخواني مثلاً متى اغير بطارية السيارة
هل شرط انها تطفى عشان اغيرها او انه تتغيره بعد فتره حتى لو كانت تعمل
متى اغير البواجي والسيور وفلتر البنزين بعد كم غيار للزيت
وكذلك الكفرات هل كل سنه او سنتين
وكذلك زيت الدفرنس والقير والجربوكس وغيرها من الغيارات الدوريه
انا عارف انها حسب الاستخدام بس الزمن التقريبي لغيار القطع ؟؟؟

والله يعطيكم العافيه ويحفظكم

[ابو ســــاره]

على حسب السيارة اخوي اذا كانت تويوتا فالصيانه اقل من غيرها .
البطاريه اذا بدأت بالضعف غيرها . ولكن اذا انت تنظف املاحها بشكل دوري ما تخرب .
والبواجي اذا بدأ تقطيع عزم الموتر وغالباُ كل سنه في النيسان
السيور عند النظر الي جوانت السير تعرف انه متأكل ويحتاج تغير او بالنظر الي الخياطه الموجوده .
الفلتر ان اغيره كل ثمانية اشهر .
الكفرات كذلك مثل السيور في الجوانب يتضح التاكل في الربل على اطراف زوايا الكفر.

الدفرنس عادة ما يغير بل يزاد والجير برظه

والله اعلم ،،،

[Bader-M]

تختلف من سياره الى اخرى

و اذا اردت معلومات اكثر تفصيلا

ارجع الى الكتالوج السياره تجد فيه معلومات كثيره تفيدك


تقبل تحياتي

[ماجد الشمري]

اخوي محب الشمال ..
ممكن نعرف معلومات عن سيارتك عشان نعطيك افضل فكرة عنها ...
لان موديل السيارة يفرق فسيارات نيسان الجديدة مثلا تجي ببواجي بلاتينيوم وتتغير كل فترات طويلة لكن القديمة لأ وهكذا ....







اخوكم ماجد الشمري

[الشامخ الشمالي]

الأخ محب الشمال
السلام عليكم ورحمة الله وبركاته
بالنسبة للبطاريات منها العادي والالكتروني العادي حافظ على نظافة اصابع البطارية من المادة البيضاء اللي عليها، والالكترونية تجي فيها مثل العدسة الأخضر=جيد، والأسود=اشحن ، والأبيض=استبدل ، وبالنسبة للسير عندما يتآكل ويتشطب استبدله ، وزيت القير اذا كان عادي يزاد ولايغير لفترات طويلة والدفرنس كذلك ، اما القير التماتيك من الأفضل يتغير كل سته شهور مع الفلتر، وفلتر البنزين والبواجي اذا كانت تقطع السيارة تستبدل وكذلك اسلاك البواجي ، أما الكفرات تستبدل اذا كانت ممسوحه ومتآكله وغالباً ماتكون كل سنتين ومن المستحسن استبدال الكفرات الأمامية مكان الكفرات الخلفية بعد التركيب بسته أشهر تقريباً على حسب استعمال السيارة .

عسى أن تعم الفائدة للجميع ، وشكراً


أبوشوق

[محب الشمال]

اخواني ابو ساره وطاير بالعجه وماجد الشمري وابو شوق
الله يعطيكم العافية وتجاوبكم صراحه هو ما يميز مكشات عن باقي المنتديات

اخوي ماجد انا سيارتي الحين جمس 2001 وان شاء الله ناوي اطلع لي سياره وكل يوم في مكشات وغيره ادور وابحث عن الافضل في البران وصراحه كل واحد يعطيك راي من عنده ويمدح له سياره فيه ناس تمدح التايوتوتا ويجيك واحد ويقول لك انحش عن الجي اكس ار كل قطع غياره صيني في صيني الجناح الرفوف والمسجل وغيره
الفي اكس ار غالي وتحس انه ثقيل شوي اكثر من غيره
والباترول يقولون انحش تراه يهربد مع اني جربته حوالي سبع سنوات وكرفته على كيفك ولا مره عملت له تربيط
اليوكون يقولون انحش عنه بس ديكور وهو جمس صغير
طبعاً انا ابي سياره للبر والمدينه
صراحه من جد يحيرون الواحد ولا تعرف وش تشتري
مع انه صراحه الاهم عندي انه يكون سياره طعوس
مع العلم انه اليوكون داخل مزاجي واحس انه الافضل لانه يشيل العائلة والاهل
لكن الله يختار الي فيه خير

بس انا اقصد بشكل عام يعني كل واحد يكتب الي يعرفه عشان تعم الفايده لجيمع اعضاء مكشات والزوار
اكرر شكري وتجاوبكم
وأسال الله العظيم ان يعافيكم ويحفظكم ويسترعليكم

[ماجد الشمري]

اخوي محب الشمال ..
الله يعطيك خير السيارة ويكفيك شرها مقدما ...

القطع الاستهلاكية صراحة تختلف حتى حسب نوع تلك القطع ...
عندك على سبيل المثال البواجي بالسوبربان على ما اعتقد انها عادية وبالتالي غيرها كل 20 ولا 30 الف حسب كرفك للموتر ...
البطارية لا تركب اي سي ديلكو المتخلفة ذي ... انما في بطاريات يابانية ممتازة ناسي اسمها ممتازة مثل حقت الحمراني اللي تجي من نيسان وهذي تعمر حسب تجربة ...
فلتر الهواء وهذا لازم يتغير كل فترات قصيرة .. زيت الجير غيره كل 40 الف كيلو لكن حط لك زيت ممتاز ... والدفرنس ما يزيت الا كل 80 الف كيلو تقريبا ... وبالنسبة للجير العادي يتم اضافة زيت وعدم تغييره كل فترات طويلة تقريبا كل 70 الف كيلو .. وفي حالة تغيير الزيت سيصدر الجير اصوات مزعجة قليلا مع التغيير ..
والكفرات لها عمر افتراضي مكتوب عليها وهو Treadwear وخذ الكفرات الاكثر رقما لانها تعيش اكثر ويفضل تغيير اماكن الكفرات كل فترات قصيرة .. يعني ينصح مع تغيير زيت السيارة كل 5 الاف كيلو مثلا تخلي البنشر يغير لك مكان الكفرات حسب الكاتالوج حق السيارة او مقاس الكفرات ...
والكل ممكن يختار من هنا الشكل اللي يعجبه ...







لاحظوا ان التغيير المتكرر لاماكن الكفرات يطول من عمرها الافتراضي ويؤدي الى تمسيح الكفرات بالتساوي وبالتاي ضمن عدم وجود رجة بالكفرات .. ايضا تؤدي الى تماسك افضل في حالة الفرملة لانه في حالة وجود كفرات متمسحة في جهه واخرى جيدة في الجهه الاخرى تزحف السيارة بشكل غير متوازن وممكن تخرج عن السيطرة ...

وكذلك انصح الجميع عند غسيل سياراتهم عدم استعمال الصابون عند الغسيل في المحطات .. او انك تجيب معاك مواد غسيل خاصة بغسل السيارة ...
وان شاء الله لي رجعه ..







اخوكم ماجد عبدالله الشمري

[محب الشمال]

الله يعطيك العافية اخوي ماجد الشمري
ما قصرت وبيض الله وجهك وماشاء الله عليكم
اشكرك على مرورك واشكر الاخوان الذي مروا على هذا الموضوع واتمنى اكبر عدد من الاعضاء المرور
وابداء الرأي والملاحظات

والله يحفظكم ويرعاكم