صوووت لقلقه .. ما ادري هل هو في المكينة او القير

[عزيز النفسس]

بسم الله الرحمن الرحيم

السلام عليكم ورحمة الله وبركاته

يالله حيهم جميع

عندي جي اكس ار 2004 فيه صوت لقلقه زي صوت ديلكو الجموس اذا خربت وزنيته ..

الصوت يطلع اذا زدت شوي على الابنص .. ويطلع في الغالب اذا صار الموتر حار ..

اللي عنده خلفية عن المشكلة يسوي خير ويفيدني لاهنتوا ..

وجزاكم الله خير ..

[هويدي]

حول للـ 95 وبيختفي الصوت إن شاء الله

عندي باترول ظهرتلي نفس مشكتلك يوم عبيته اخضر

[قنياوي]

هذا من البنزين الأخضر 91 عب بنزين 95 أحمر وتنتهي مشكلتك بإذن الله صارت معي نفس المشكلة جيب جي إكس آر 2003

[عزيز النفسس]

هويدي

قنياوي

بيض الله وجيهكم على التفاعل

الموتر له شهر معي ومنيب اعبيه الا 95 .. تتوقعون مثلا انه ما بعد تعود عليه ؟

[ساري 111]

غير فلتر البنزين .. وتختفي نهائياً إن شاءالله ..

صارت عندي قبل فتره يوم فكيت فلتر البنزين طلع منه بنزين اسووووود عيا يروح من يدي إلا بصابون تايد

[هويدي]

الموتر له شهر معي ومنيب اعبيه الا 95 .. تتوقعون مثلا انه ما بعد تعود عليه ؟

ولو ان خبرتي لاتذكر بالميكانيكا والكهرباء ولكن اقول 80% يبيله وزن ديلكو
امس تعبثت بديلكو الموتر بعد الاطلاع على دروس اخونا ابو عبدالرحمن ( اصيل حجازي )

فريته مره وشديت وطلعت اجرب الموتر يلقلق وقفته وفريته عكس الفره الاولى وقريب من وزنيه الوكاله ولله الحمد اختفت اللقلقه مع ان الموتر لا يزال الاخضر فيه

اعذرني على الاطاله وإن شاء الله الخبراء بيفيدونك ويأكدونلك ولي صحه او خطاء ما قمت به

[قنياوي]

السلام عليكم ورحمة الله وبركاته
عزيز النفس ، مساك الله بالخير ...
السيارة كم ماشية وكيف البواجي معك كم ماشي عليها ومتى آخر مرة غيرت فلتر البنزين ؟

[عزيز النفسس]

غير فلتر البنزين .. وتختفي نهائياً إن شاءالله ..

صارت عندي قبل فتره يوم فكيت فلتر البنزين طلع منه بنزين اسووووود عيا يروح من يدي إلا بصابون تايد

حياك الله اخوي ساري

غيرت فلتر البنزين قبل اسبوعين تقريبا ولا تغير شي .. هل يحتاج اغيره مره ثانيه .؟

يمكن فيه بعض البقايا ما راحت او شي ؟
\
شاكر لك تفاعلك

لا عدمناك

[عزيز النفسس]

ولو ان خبرتي لاتذكر بالميكانيكا والكهرباء ولكن اقول 80% يبيله وزن ديلكو
امس تعبثت بديلكو الموتر بعد الاطلاع على دروس اخونا ابو عبدالرحمن ( اصيل حجازي )

فريته مره وشديت وطلعت اجرب الموتر يلقلق وقفته وفريته عكس الفره الاولى وقريب من وزنيه الوكاله ولله الحمد اختفت اللقلقه مع ان الموتر لا يزال الاخضر فيه

اعذرني على الاطاله وإن شاء الله الخبراء بيفيدونك ويأكدونلك ولي صحه او خطاء ما قمت به

كلامك في محله اخوي هويدي بس المشكلة ان موتري ماله ديلكو .. يعني اوتوماتيك .

شاكر لك تفاعلك والله لا يحرمك الاجر

كل الود

[عزيز النفسس]

السلام عليكم ورحمة الله وبركاته

عزيز النفس ، مساك الله بالخير ...

السيارة كم ماشية وكيف البواجي معك كم ماشي عليها ومتى آخر مرة غيرت فلتر البنزين ؟

وعليكم السلام ورحمة الله وبركاته

الله يمسيك بالرضى والنور

السياره وانا اخوك ماشيه 120 الف والبواجي واسلاكها وفلتر البنزين غيرتهن كلهن قبل اسبوعين تقريبا ..

[ساري 111]

غيرت فلتر البنزين قبل اسبوعين تقريبا ولا تغير شي .. هل يحتاج اغيره مره ثانيه .؟

يمكن فيه بعض البقايا ما راحت او شي ؟

طيب يوم تغير الفلتر كيف كانت نظافته ؟؟

ياليت تقيس ضغط طرمبه البنزين يمكنه ضعيفه
او بطريقه اخرى شف حالته اذا حولته على التانكي الصغير نفس المشكله او يتحسن الوضع؟؟

اذا ختلف الوضع فعندك الطرمبه به خلل <<مع انه مهب من عوايد الجيب تخرب طرمبته



فيه نقطه اخرى يمكن الموتر مايجيه مس بالخطوط ومكربن جرب تمسه بخط مع حبتين سرعه

[سوبر VTC]

شف يا طويل العمر

اذا كانت البواجي مهب اصلية من الوكيل ؟
و ايضا رقمهن يختلف ؟

و قد تكون الاسلاك مهب اصلية

اذا كانت الاسلاك القديمة موجودة عندك فاحتفظ بهن
لان قطع الغيار مهب مثل اول
الان اختلط الحابل بالنابل
ماتدري وش الاصلي من التجاري

البواجي يسببن لقلقة لان الشرارة ضعيفة
و يسببن صرقعة للمكينة

و قد تكون المشكلة رخاوة بجنزير التيمن اذا كان له فحمة

مثال
الباثفندر يجي له 3جنازير لانه راسين
من بكرة المكينة الى بكرة التيمن الكبير جنزير
من بكرة التيمن الى عمود التيمن الاول جنزير
من بكرة التيمن الى عمود التيمن الثاني جنزير
عمدان التيمن لهن مثل الفحمات حقات الدينمو
اذا خصلن و تاكلن يسبب لقلقة للباثفندر


موقعك يدلونك الربع على ورشة


اعانك الله

[عزيز النفسس]

طيب يوم تغير الفلتر كيف كانت نظافته ؟؟

ياليت تقيس ضغط طرمبه البنزين يمكنه ضعيفه
او بطريقه اخرى شف حالته اذا حولته على التانكي الصغير نفس المشكله او يتحسن الوضع؟؟

اذا ختلف الوضع فعندك الطرمبه به خلل <<مع انه مهب من عوايد الجيب تخرب طرمبته



فيه نقطه اخرى يمكن الموتر مايجيه مس بالخطوط ومكربن جرب تمسه بخط مع حبتين سرعه

فكرتك حلوة اخوي ساري جزاك الله خير .. راح احول لتانكي الثاني واشوف ..

وبالنسبة للكربنه فهي والله حراويه لان راعيه الاول مهوب يتعدى به ..

بشوف شغلة الطرمبه وبعدين ابجرب الخط .. والله يستر

شاكر ومقدر لك تفاعلك


لاهنت

[عزيز النفسس]

شف يا طويل العمر

اذا كانت البواجي مهب اصلية من الوكيل ؟
و ايضا رقمهن يختلف ؟

و قد تكون الاسلاك مهب اصلية

اذا كانت الاسلاك القديمة موجودة عندك فاحتفظ بهن
لان قطع الغيار مهب مثل اول
الان اختلط الحابل بالنابل
ماتدري وش الاصلي من التجاري

البواجي يسببن لقلقة لان الشرارة ضعيفة
و يسببن صرقعة للمكينة

و قد تكون المشكلة رخاوة بجنزير التيمن اذا كان له فحمة

مثال
الباثفندر يجي له 3جنازير لانه راسين
من بكرة المكينة الى بكرة التيمن الكبير جنزير
من بكرة التيمن الى عمود التيمن الاول جنزير
من بكرة التيمن الى عمود التيمن الثاني جنزير
عمدان التيمن لهن مثل الفحمات حقات الدينمو
اذا خصلن و تاكلن يسبب لقلقة للباثفندر


موقعك يدلونك الربع على ورشة


اعانك الله

حياك الله اخوي سوبر

بالنسبة للبواجي فهي من الوكالة بنفس رقمهن الاول ..

وانا غيرت اسلاك البواجي من الوكالة بعد قلت يمكن الصوت منهن .. ولا زالت المشكلة ..

بالنسبة لجنزير التيمن انا اعرف شي عنه وياليت لو تكرمت تصحح لي المعلومة ان كنت غلطان .

اللي اعرفه وانا اخوك ان جنزير التيمن يطلع له لقلقه في اول التشغيل وبعدين يروح .. هذي ما اعاني منها

والحمدلله .. ثانيا جنزير الاند الجي اكس ار حديد مهوب تيب زي الفي اكس ار .. يعني لو بيرتخي

ما راح يرتخي نفس الجنزير .. بس ترتخي الشدادات حقته ..

الشي الثالث الموتر الحين ماشي 120 الف .. ما تتوقع انه بدري على الجنزير تصير فيه رخاوه .؟!!


اتمنى تصحح لي معلوماتي ان كانت غلط ..


وشاااكر ومقدر لك تفاعلك


لاهنت

[العنابي 616]

السلام عليكم أخوي

أنا عندي لند 95 كان فيه نفس مشكلتك إذا احتمى يطلع صوت لقلقه مع الدعسه
بس قبل فترة كنت فاتح كبوت السيارة أتعبث و لقيت ان سلك السالب حق البطارية منجرح
على طول جبت تيب كهرباء و تيبته و الحمدلله من يومه و المشكلة راحت بنسبة 95%