السلام عليكم ورحمة الله
هذا تواصل جديد .. نظرا لطلب بعض الأخوة الأفاضل لقصائدي
مع العلم اني ترددت اين اضعها ولكن يمكن
تكون هنا أفضل حال
اببدا واتخيـّـر فالقوافي = قوافي ما تجيب الا العوافي
وابا اغني على هاجوس جاشي = لأني شاعر ولي قلب صافي
اغني للرجال المسفهله = هل الطالات وأصحاب المظافي
ليا من جاء على بالي قصيدة = اعلــّـم لجـل اذمـّـك يالتجافي
احب اهل الشكاله والكرامه = وسقم العين اشوف الرجل هافي
واحب اللي على شرواي دايم = قلوب ٍ بيض وكبار ونظافي
انا رجال شاعر وابن شاعر = وابويـّـه من قبل رجـّـال وافي
جعل ربي يسلم راس ابويه = لانه من وجوده ، زان قافي
بعدها ياهل المعروف هاكم = ثمار ٍ يانعـه وقت القطافي
ابنصحكم وابنصح نفسي اول = معا الاجواد عيب آقول ، مافي
ليا شفتوا على الطرقه مسيـّـر = امانه لا يجي والضو طافي
ترى الطرقي يجيب الخير كله = لو ان البيت غطـّـتـه السوافي
يغيـّــر حالته جعلي فدا له = ليا منـّـه لفى جا الخير لافي
وابنصح كل رجال ٍ شقردي = مشى قدام لا ينظر خلافي
وابنصح كل قنـّـاص ٍ مفكـــر = يجـنـّـب بندقه قلب الضعافي
قبل لا أختتـم موجز مقالي = وقبل لا ازيد ثم يقال كافي
ترى الأحرار تفهم يوم أأشـر = وتفهم بالجهار وبالخوافي
وصلاة الله على محمد رسوله = عدد من حج بيت الله وطافي
وسلمتوا ..
مع العذر منكم اذا قصرت