كيف تتجنب التغريز من الأســـاس ....

[خط الشمالي]

السلام عليكم ورحمة الله وبركاته

فيه عدة مواضيع تحتدث عن التغريز وكيفية إخراج السيارة منه ، والمواضيع تلك فعلاً رائعة وممتازة ومفيدة .و...

واستفدنا منها جميعاً ..
لكن السؤال /
كيف ما تغرز من الأساس ، يعني وش الطرق اللي بإذن الله تجعلك ما تغرز في الرمال خاصة .

وياليت تكون الإجابه للي معهم مواتر دفرنس ويلعبون بالموتر على كيفهم تقول كأنه مشغل دبل وما يمدي أهل الجيوب يجيبونه ...

وش تسوون ياناس ....
وكيف نصير مثلكم ...

أنا طولت عليكم لكن تحملوا ...


لا تبخلون علينا يالشباب النشامى ....

[الدبل الثقيل]

1 تركيب كفرات اعرض لكن مهو عريضة مره تطيح عزم السيارة.. ولو تكون هنكوك بالنسبة للهايلكس افضل..
2 تنسيم الكفرات الى عيار 15 من قبل الدخول الى الرمال.. وزيادة التنسيم عند الحاجة الى عيار 10 لكن ماينقص عن ذلك..
3 رفع السيارة من الأمام اذا كانت مدنقه هذا بالنسبة للهايلكس يعني تكون ارفع من وقفة بلدها بشويه..
4 عدم لف الكفر على الأخر يعني توسع لفتك... وعدم ضرب الفرامل في الرمل ..
5 المشي التدريجي يعني ماتشد فجأه
6 قبل هذا كله التسمية ودعاء الركوب عند ركوب السيارة...
هذا ماعندي وجزاك الله خير...

[سفير الجزيرة]

السلام عليكم ورحمة الله وبركاته

شكراً أخوي خط الشمالي
موضوع مهم

من فنيات القيادة في الرمل أن تنظر لبعيد .
ما فهمت !!!

يعني تكون نظرتك وأنت تسوق واسعة بحث ترى المناطق الصالحة لسير السيارة معها ، وكذلك يمديك تأخذ عزم إذا كان اللي قـدامك رمل رفيع ...

وإذا بغيت توقف الأفضل يكون وجه الموتر متجه للأسفل ، حتى ما تتعب إذا بغيت تمشي لأنه يمكن يغرز الموتر ..

هذا ما عندي ..........

[الاجودي]

وعليكم السلام ورحمة الله وبركاته

سؤالك حلو شلون تتجنب التغريز

بالنسبة لراعين الجيوب اشوف كثير منهم يشوف قدامه غراز ولا يشغل الدبل يقول لا الجيب يقطع بدون دبل

همن يغرز ويبلش بعمره ويفشل روحه

اما الي مامعه سيارة دبل

المفروض مايوهق عمره ويعرف قدرات سيارته

ومن الاشياء البديهية عشان الواحد مايغرز تنسيم الكفرات

الواحد يسايس الموتر مسايس مايرخيه ولا يشد عليه

وهذا الي عندي

[القياده]

السلام عليكم ورحمة الله وبركاته
أبشر بالطلب لكن
لكن.
.
.
.
.
.
بعد ما أعطل إنشاء الله كله اسبوع وانا جايكم بقوه

با لمناسبه أنا معي هايلكس غماره ولله الحمد من اللي يعرف كيف يتعامل مع شبح الغراز
تصدق إني قبل 3 شهور كنت بالدهناء وتعرف عاد سيوف الدهناء إني قطعت 20 كم بين السيوف ووالله ما أزيد عليكم وهذا من فضل ربي
لكن أوع تدخل الدهناء لحالك خاصه بسياره دفرنس

وأخيرا أعدكم بالمفيد والجديد بإذن الله خاصه لأصحاب الهاي

[اسيزو 4x4]

ياليت تفيدونا بالرمل بوقت الصيف هل يحتاج لمهارة أعلى وقواعد أخرى ؟؟؟؟


.

[شاص 2003]

السلام عليكم

كيف حالكم يالربع

من وجهة نظري اشوف ان فيه كم شغله لازم ينتبه لها الواحد قبل ما يطيح الفاس بالراس

خصوصا اذا كان ماهنا زود سواقه

بالنسبة لراعين الدفرنس

1 تنسيم الكفرات زي ماقال اخوي الدبل الثقيل
2 ماتخلي عزم الموتر يرتخي بحيث انك اذا عطيته بنزين يجاوب معك
3 تسايس الموتر وتنتقي الجواد السهله مهوب تطقها وبس
4 تنتبه لوقفة الموتر زي ماقال اخوي هاوي 20000
5 ماتشد للموتر فجأه يعني تسايسه اذا بغيت تحرك واذا دقر ماتدوس له (مرجح لين يطلع)

ويفضل ان الواحد ما يبعد بالنفود اذا ماكان واثق بسواقته وعارف الموتر اللي معه

اما بالنسبة لراعين الدبل

يلزمهم تنسيم ان ماكان عشان يمشي الموتر فهو عشان ترييح المطب والبطناج

واهم شي ان الواحد يعرف يتعامل مع الدبل
الله من واحد وواحد لقيناه محرق الكلتش ( الاول وداعس له بالثقيل)

مسايس الموتر لازم موب عشان معك دبل تريح راسك وزي ماتجي تجي

هذا اللي جا على بالي واتمنى اني افدتكم بشي يسوى

تقبلو تحياتي

[شاص 2003]

معليش بالنسبه لسؤال اخوي اسيزو

اتوقع ان تنسيم الكفرات على 10 مناسب
وقواعد السواقه ماتتغير

اذا الواحد نسم الكفرات وتنقى الجواد اللي يمشي عليها ماعليه خلاف والحافظ رب العالمين

[هاوي الشمال]

السلام عليكم ورحمة الله وبركاته
بنسبه كيف تتجنب التغريز أعتقد بأن الأخوان وضحوا أكثر السبل .وعندي إيضافه وهي عليك بتدريب أولاً ولا توهق نفسك بطعوس الكبيرة وعليك بتدريب على طعوس صغيره فتتدرج وكثرة الممارسه تجعلك ماهر في الغرازلأنها تفيدك في مسالك الطريق وتجنب الأماكن التي يكون الرمل فيها خفيف مثل التي بين الطعوس وهي الأماكن المنخفظه .

[الحسكولي]

السلام عليكم
الموضوع اكثر من رائع ومفيد للجميع ............. واعتقد ان الاخوان ماشالله ماقصرو وفو وكفوا ، للللللللللكن عندي اضافات بسيطه وهي :
- لاتطلع الطعوس بنمرصغيره يعني اول مايشد الموتر معك عطه الثالث واذا ما قدرت عليه اذا انت طالع شطف ميل وانزل واذا انت طالع طول ارجع ريوس ولاتوقف الاعلى منحدر الطعس اللي خلفك لكي تاخذ عزم مره ثانيه او تغير اتجاهك .
- انتبه لاماكن السيوف ولاتقطعها عرض ولا تنزل على حد السيف فجأه عشان مايتعلق الموتر .
- لاتدخل الرمل الا والموتر فيه بنزين اكثر ومن النصف اذا طرف اطلع من الرمل على طول .
اخيرا المعذرة على الاطالة وركاكة الاسلوب .
مع تحيات بسباس

[الحسكولي]

السلام عليكم
الموضوع اكثر من رائع ومفيد للجميع ............. واعتقد ان الاخوان ماشالله ماقصرو وفو وكفوا ، للللللللللكن عندي اضافات بسيطه وهي :
- لاتطلع الطعوس بنمرصغيره يعني اول مايشد الموتر معك عطه الثالث واذا ما قدرت عليه اذا انت طالع شطف ميل وانزل واذا انت طالع طول ارجع ريوس ولاتوقف الاعلى منحدر الطعس اللي خلفك لكي تاخذ عزم مره ثانيه او تغير اتجاهك .
- انتبه لاماكن السيوف ولاتقطعها عرض ولا تنزل على حد السيف فجأه عشان مايتعلق الموتر .
- لاتدخل الرمل الا والموتر فيه بنزين اكثر ومن النصف اذا طرف اطلع من الرمل على طول .
اخيرا المعذرة على الاطالة وركاكة الاسلوب .
مع تحيات بسباس

[خط الشمالي]

إخواني
الدبل الثقيل
هاوي 20000
الأجودي
القيادة
شاص 2003
هاوي الشمال
بسباس

شكراً لمعلوماتكم القيمة وما قصرتوا ونبغى المزيد .

أخوي اسيزوا
شكراً لمرورك وسؤالك فعلاً زجيه ويحتاج من يجيب عليه ...
تكفون يالشباب

[شيخ الصقور]

الحل عندي
خذ لك لاندكروزر وريح بالك وانس التطعيس
اما اذا كان موترك غيره انا الي اعرفه عشق بالاول والثاني ولفلف
وقبل هاذا كله ادع ركوب السياره وباذن الله ماتغرز حتى لو معك [[ صغيره]]

[v..x..r]

ياجماعة الخير .........

انا معي في اكس ار 2002 اذا نويت اطعس او ادخل في تغاريز
1ـ اكون منسم الكفرات على 20 او 15
2ـ واذا كنت تشوف امامك تغاريز قويه احطه في الدبل الخفيف والتعشيقه الثانيه او الثالثه
3ـ وكن حذر اذا شفت نفسك بين التغاريز لا تحاول انك تدعس بنزين او تضرب فرامل خلك على سرعتك
4ـ واذا كنت في الطعوس حطه في الثقيل وامش بالثاني او الثالث
وهذا ماحبت اقوله اسف على الإطاله

اخوكم v..x..r

[شـهـاب]

1 تركيب كفرات اعرض لكن مهو عريضة مره تطيح عزم السيارة.. ولو تكون هنكوك بالنسبة للهايلكس افضل..
2 تنسيم الكفرات الى عيار 15 من قبل الدخول الى الرمال.. وزيادة التنسيم عند الحاجة الى عيار 10 لكن ماينقص عن ذلك..
3 رفع السيارة من الأمام اذا كانت مدنقه هذا بالنسبة للهايلكس يعني تكون ارفع من وقفة بلدها بشويه..
4 عدم لف الكفر على الأخر يعني توسع لفتك... وعدم ضرب الفرامل في الرمل ..
5 المشي التدريجي يعني ماتشد فجأه
6 قبل هذا كله التسمية ودعاء الركوب عند ركوب السيارة...
هذا ماعندي وجزاك الله خير...

مع الاخ بس مادري للهايلووكس كم يصلح المقااس
225/70
او 75
ايهن احسسسن