السلام عليكم ورحمة الله وبركاته
بدون مقدمات
في عام 1407 هـ قررنا المقناص الى الربع الخالي
وعددنا (5) افراد وعدد السيارات (2) وادوت الصيد (3) سلق اعزكم الله وشوزل وهوائيه ومسدس
علما اننا اول مره نقنص للربع الخالي !!! ماعداء ابوخالد وعبدالله عندهم خدمت مقناص واحد فقط !!
تجمعنا في حرض عصر الثلاثاء وشيكنا بنزين وتوكلنا على الله مع خطوط بريه متجهين للجنوب الشرقي وامرحنا اول ليله في ندقان
وكنا مخططين على غضاء ابو الفرايس ويبعد عن حرض حوالي (400)كم منها (150)كم طريق زين والباقي بدون خطوط كلها
طعوس ورباضات وفي صباح الاربعاء توجهنا الى ابوفرايس بقيادت الدليله عبدالله لأنه يعرف هك المنطقه ووصلناها بعد العصر ودوجنا فيها
وكانت الارض ممطوره ولاتبين الجره ولاكن المحل ماأعجبنا !! وصلحنا عشانا قبل المغرب وبعد العشاء قنصنا على السيارتين وفرفرنا اكثر
من ثلاث ساعات ولم نوفق الا بأرنب وحده وبعدها وقفنا لنتقهوا ونريح شوى وبعد ساعه زمن من الراحه والمشاورات
((قررنا بما يلــــــــــــــي))
اولا) تنزيل الدليله عبدالله من منصبه وتعيين ابوخالد بدلا منه !
ثانيا)تغيير الموقع الحالي بموقع آخر يعرفه ابوخالد ويسمى الكراسيع !!
ثالثا)التنفيذ حالا وبدون تأخير !!!
وبعد التشكيل الجديد تحركنا متجهين للغرب الجنوبي وفي اثناء المسير صدنا ارنب وامرحنا آخر الليل وفي الصباح الباكر واصلنا طريقنا ووجدنا سلقه
ضايعه ووقفنا عندها واسقيناها وبعد الفطور راح ابو خالد يسير والسلق معه واذا بنفجة الارنب !!! ولاكن القوات الأرضيه بالمرصاد رد لهن ورد لبو خالد (الرجال يبغى يثبت نفسه بالمنصب الجديد)
حتى طرحوها وبداء يتجدد النشاط ومشينا حتي وصلنا خطوط سيارات جديده ووقفنا لصلاة العصر واذا بملاعب ارانب وقررنا المعشى بدري وتقدمت سيارة العزبه
قدامنا ونزلوا النشاما العزبه وحنا الثلاثه الباقين نحلحل على الارانب في الشجر وهو (الحاذ ) وبعضنا اول مره يشوفه يفكر انه رمث ؟؟؟؟
ووصلنا اخويانا ومعنا ارنبين !! وكان كل صيدنا 5 ارانب + سلقه هههههه وحصلنا القهوه الي تقعد الراس والشاهى الخادر وبرا د الحليب على الكيف والعشاء الى سابقه
كاس مرق ارانب مصلحينها الذيابه اخويانا وسوالف مقانيص لين صلينا المغرب والعشاء جمع ,,وبعده ضفينا قراشيعنا وكملنا المسير للموقع الذي يعرفه ابو خالد,,,,,, وبعد تحركنا
بنصف ساعه كل ما ارتفعنا شفنا نور سياره ورانا من بعيد قلنا اكيد قناص وخذنا شوي ولين النور يقرب وهنا بداء التخمين !!! يمكن قناص ؟؟اوراعي ابل ؟؟او قطاع طريق ؟؟؟؟؟
المهم ..... وقفنا وطلعنا الشوزل ولحقنا خويانا وبلغناهم ان لانجمع السيارات سوا وحنا نبي نروح للسياره ونعرف السالفه واثناء تفرقنا وإذا بالسفتي (الرماق) يشتغل وإلا هي
دورية سلاح الحدود ؟؟؟؟؟؟ ســلام ,,,, وعليكم السلام ,,,,,, اثباتاتكم وانزلوا من السياره ,,,, قلنا سم وطاعه ,,, وبعد التفتيش ازين ماشفنا شوزلنا بيد واحد منهم وجونا اخويانا وفتشوهم واخذوالهوائيه
وقالو الحقونا لأمر الفرقه بعد ماركّبوا في كل سياره جندي وبعد ماراحوا اخويانا والعسكري بقى عندنا جندي وسايق الجيب وطلبناهم ان يفكونا بعد ما أقنعناهم ان المقناص مسموح وحنا في طريقنا للمقناص
ولم نتنور والشوزل اخذناها للحمايه بعد الله من قطاع الطرق لآننا اول مره نقنص للربع الخالي واخطاره كثيره !! فأ قتنع السايق وهو دوسري بيض الله وجهه ومن يقرا,,,,,
وقال لنا خلونا نلحق العسكري الى في سيارة اخوياكم نقنعه ونطلبه قبل مانجي آمر الفرقه ؟؟ ولما لحقناه حاولنا نقنعه حنا والدوسري ولاكن رفظ ورد علينا بقوله (اطلبوا واحد من عيالي ولاتطلبوني السماح عنكم)
وفى هذه اللحضه توقعنا ان صاير بينه وبين اخويانا شي كبير ؟؟ وبعده مشينا حتى وصلنا آمر الفرقه وهو رقيب ومعه اربع جيوب وهم على وشك يتعشون وتقدم السايق الدوسري للرقيب وقال له,,,,
يا بو راشد القنوص هذولي كانوا يمشون في طريقهم للمقناص ولم نشاهدهم يتصيدون بالليل ولا حاولوا الهرب بل وقفوا وتجاوبو ا معنا ولم نجد معهم من الممنوعات الا كسرة هالشوزل وهي حمايه معهم ؟؟
والآن انا والاخوان نطلبك بأخلاء سبيلهم ؟؟ فرد ابو راشد تفضلوا علي العشا وبعده يصير خير ان شاء الله قلنا الله يجزاكم خير قد سبقناكم بالعشا ورد علينا اجل تقهووا لين نتعشا قلنا (سم )وكل منا يضحك حجاجه فرحانين!!!
وبعد ماتعشو ا جانا ابو راشد وسولف معنا وكان لين الجانب واعطانا نصايح ,,,, وإذا بالعسكري الذي رفض يفكنا؟؟ ينادي الرقيب وبرز به بعيد عنا وبعد شوي رجع ابو راشد ووجهه متغير ؟؟ وتفأجئنا لما قــــا لــــــ
لآفراده شيلوا اغراظكم نبي نمشي للمركز وحاولنا معه مره ثانيه ولاكن رفض وبشده ؟؟ ومن هنا ثبت الشك في اخويانا ولاكن مافيه فرصه نسئلهم وش صاير بينهم وبين العسكري؟؟
والآن اسمحولي يأخوان لطول القصه الباقي نكمله في الحلقه الجايه ان شاء الله
أمل ان تحوز على رضاكم وإستحسانكم
وتقلو تحيات اخوكــم ابـونـايــف