قائمة اعطال سيارات اعضاء مكشات لاهنتم فقط ===>((( اذكر العطل + الاصلاح + التكلفة)))

[الشوشلي]

السلام عليكم بصراحه موضوع ممتاز جداً

سبق لي وان عرضت المشكله اللي حاصله مع موتركي ولكن ما يظر بعد اقولها هنا

انا معي باترول سفاري موديل92 وعيبه البنزين يشرب بشكل غير طيبعي
لأني قارنت بينه وبين موتر واحد من الشباب طلع الفرق كبير

ما الحل


مع الشكر للجميع

[راعي النفود]

السلام عليكم ورحمة الله
اخواني الاعزا قبل شهر وعدة ايام تحرك الهوا بسرعه عاليه واثار الاتربه والغبار وانا كنت بوسط الصمان قررت الرجوع الئ الرياض مما سبب ترميل وجه السياره ارجوا المساعده . ولكم شكري وتقديري
السياره شاص موديل 2006م جديده وانا منقهر

[ظلال الشمس]

السلام عليكم ورحمة الله وبركاته
اخي المعلن عن حل رجة السفاري وش اللي خرطته بالضبط وين صلحته وكم كلف وهل هي مجديه وكم لك من فترة بعد اصلاحها، لأني رحت لميزان وغيرت ذراع الدركسون وشهر ورجعت الرجة ورجعت وقالوا كبس اذرعة ونفس الحركة فهل هذي مجديه صحيح لأني تعبت وانا اصلح الرجه لي الآن سنتين على هالموال بيني وبينك مليك فإذا كان هذا هو حل مجدي ارجو منك الرد وجزاك الله خيرا اخوك ظلال الشمس

[الشقردي]

عندي VXR 98 بدون هيدروليك, في هالسنة بديت أسمع صوت صرصره مع المطب وكذلك اذا لفيت الدركسون وما تطلع هالاصوات الا اذا كنت توني راجع من البر تجلس يوم يومين بالكثير وتروح بعد فتره (مع العلم انها ما تطلع الاصوات وانا في البر) سألت ميكانيكي قال لو تغسل السيارة من تحت يروح الصوت رحت وغسلتها من تحت بستم بالماء بدون ديزل (مع العلم اني ما قد غسلتها من تحت الانادرا),المهم استمريت على هالحاله مرتين ثلاث وانا كل ما رجعت من البر اغسلها.

اليوم رحت للصناعيه بأشوف وش المشكله (لأن الصوت زاد ولا بعد راح الى الان) وقفت عند أكثر من ميزان قال أصلا يبيلك تغير الركبه اليسرى (يعني لازم تغير المقص اللي تحت كامل لأن الركبه ماتجي لحالها) (نفس جهت الصوت) وكذلك الدوده غير ثابته تبي لها كراسي (وهذي تولف وتخرط في المخرطة لأنها ماتجي الا مع الدودة كامله).

الزبدة أنهم قالوا أول شئ لازم تصلح هذي قبل تشوف الصوت, مع العلم اني اذكر اني قبل حوالي 5 سنين قد اكلت مطب قوي على هالجهة (اذكره الى الان في قلبي) وقد دخلتها صيانة الوكاله أكثر من مره ولا قالوا لى شي وآخرها كان الاسبوع الماضي.

في رايكم وش السوات ووش تنصحون لا عدمناكم؟

[أبومطر]

ارجوا منك يااخي العزيز التأكد من العطل عند اكثلر مهندس فهذه طريقتي اخوك ابو مطر

[غضنفر]

سهيل تكفى
وش رايك في الرنجلر من موديل 90-96
هل صحيح ما يذكرون عنه ان دفرنسه ضعيف ويخرب بسرعة
وان عمود الكردان عادة ما يكون فيه مشاكل
وايضا هل صحيح ان الرنجلر خراباته الكهربائية واجدة
وابرزها انه يجيه خمات ويطفي عليك بالبر بدون سبب واضح
وآسف على كثرة الأسئلة

[عطيب الضرايب]

قبل عدة سنوات و بتحديد على نزلة الددسن 1998 ( وارد عراوي ) طالع للبر وفي يوم من الايام قمت الصبح و أشغل الموتر و لا أشتغل الموتر يدق بس ما يشتغل مثل قطعت البنزين بعد محاولات عديدة أتضح أن العطل في طرمبة البنزين الي في التانكي
كيفية أكتشاف العطل قام أحد الأخوان بسحب الي من الصفاية وندق على السيارة صارة الطرمبة الي في التانكي ما تدفع بنزين لصفاية
العمل قمنا بشفط البنزين من التانكي ووضعناه في جركل وعلقنا الجركل بصندوق ووصلنا الصفاية بلي من الجركل .
ومشانا لين جينا محطة .

[sahil]

الاخ الكريم مشكلة الرنجر هي الصلبان وذلك لقصر العامود الخلفي والصليب الخلفي والامامي واحد اماقيمته فهو بحدود 25 ريال في حالة انك طلبته من البايع علي انه (صليب بليزر موديل 90-91 تيل خارجيه ولاتجيب سيرة الشروكيللبايع عشان مايرفع السعر) اما الكرونه فهي واحد الرنجر والاريدو وتوجد بالكرونه كلشتات لزيادة احكام غلق التروس اثناء المناوره اوالتغريز واما بالنسبه للكهرباء كان بخاخ فامره هين حيث ان كمبيوتر الشروكي يعطيك رموز الاعطال وتغير القطعه العطلانه فقط واي عطل يحصل معاك انا موجود وفي الخدمه مع العلم انهناك قطع لسيارات امركيه تركب علي الشروكي والامر باذن الله هين

[تميراوي]

عندي VXR 98 بدون هيدروليك, في هالسنة بديت أسمع صوت صرصره مع المطب وكذلك اذا لفيت الدركسون وما تطلع هالاصوات الا اذا كنت توني راجع من البر تجلس يوم يومين بالكثير وتروح بعد فتره (مع العلم انها ما تطلع الاصوات وانا في البر) سألت ميكانيكي قال لو تغسل السيارة من تحت يروح الصوت رحت وغسلتها من تحت بستم بالماء بدون ديزل (مع العلم اني ما قد غسلتها من تحت الانادرا),المهم استمريت على هالحاله مرتين ثلاث وانا كل ما رجعت من البر اغسلها.

اليوم رحت للصناعيه بأشوف وش المشكله (لأن الصوت زاد ولا بعد راح الى الان) وقفت عند أكثر من ميزان قال أصلا يبيلك تغير الركبه اليسرى (يعني لازم تغير المقص اللي تحت كامل لأن الركبه ماتجي لحالها) (نفس جهت الصوت) وكذلك الدوده غير ثابته تبي لها كراسي (وهذي تولف وتخرط في المخرطة لأنها ماتجي الا مع الدودة كامله).

الزبدة أنهم قالوا أول شئ لازم تصلح هذي قبل تشوف الصوت, مع العلم اني اذكر اني قبل حوالي 5 سنين قد اكلت مطب قوي على هالجهة (اذكره الى الان في قلبي) وقد دخلتها صيانة الوكاله أكثر من مره ولا قالوا لى شي وآخرها كان الاسبوع الماضي.

في رايكم وش السوات ووش تنصحون لا عدمناكم؟

انا كانت الركبه اليمين كانت تطلع صوت اذا لفيت بالدركسون او اذا جا مطب ووديتها لميكانيكي الخميس الي راح
وفكها ووخر الربله الي على الركب وشحمها وضبطت معي

[الشقردي]

تميراوي ... مشكور وماقصرت لكن وشو موديل موترك؟

أنا سمعت ان اللاندكروزر من 98 وفوق مالها مكان تشحم معه (مشاحم) لأني جربت هالطريقة ولا نفعت مع العلم ان المشكله لها حول 5 سنين تروح وتجي ولكن كل مالها تزود

الحل غيرت المقصات (السفليه) كامله وكل الجهتين وراح الصوت
المقص سعره حول 470
وبالمرة غيرت المساعدات الاماميه الواحد بـ70 تقريبا

[htc]

اخوي الحضري ولا يهون silversniper نفس المشكلة هذي صارت علينها بسيارة الوالد فولفو وكانت المشكلة ان موية الرديتر تختلط مع الزيت وبعد الكشف في الوكاله طلعت المشكلة ان مواصير تبريد زيت الجيربوكس اللي تدخل على الرديتر وترجع للجيربوكس للتبريد على الجيربوكس فيها تهريب وبسببها اختلط زيت الجيربوكس مع ماء الرديتر وكان حل المشكلة في تغيير الرديتر والحمد لله كل شي تمام .

[ســـرحـــان]

السلام عليكم ورحمة الله وبركاته ...ماقصرتوا على الموضوع الممتاز ... معي سفاري 2005 جير عادي ... ماشي 35000 .... مركب عليه سيستم اكزوز وهدرز وفلتر هواء تم تركيبهم بالامارات اول مافكيت الموتر شهر 1/2005 .... قبل اسبوعين قام الموتر يقطع واوديه الوكاله قالوا انه اكيد من المترجم (منظم الهواء) لانه حطوا الكمبيوتر عليه ماقام يعطيهم اي قراءه .. وقالوا هذا اكيد من الشغلات اللي مركبها .. والله ماصدقت اخذت الموتر وشلت كل الاغراض اللي عليه ورديته كما كان من المصنع ( علشان ماتطيح الكفالة) ... وديته للوكاله وسووا له سيرفس 35 الف وطلعته بس التقطيعه لازالت موجودة ... والله وارده مره ثانيه على نفس المشكلة واليوم انشالله مواعديني يخلص وانوف واعطيكم خبر ان الله جعلنا من الحيين ... في امان الله

[غضنفر]

سرحان
ممكن المشكلة من حساس الهواء

[ســـرحـــان]

بالضبط يا ... Black ... اعتقد انه من الحساس .. واللي يسمونه بالوكالة مترجم الهواء ... يقولون انه مر عليهم سفاري ثاني نفس الموديل ومركب فلتر هواء وعنده نفس المشكلة ...

[برنس777]

المشكله الاولى التي تواجه البعض وهي حين تصدم السياره با النفود ينكسر الرديتر وبعد الله يستر يطلع الماء الحل هذا طبعا إذا كنت بعيد عن الديره الحل هو فك الرديتر ورقع الرديتر بما يوجد في الجنوط من ترصيص الطريقه لأنه كله ألمنيوم وهو ماعليك إلا تسخين الرديتر والترصيص وبعد ذلك يرقع _بإذن الله_
من المهمات وقت الملمات هو 1- صمغ أبو جني لرقع الكفرات من الشقوق التي بعد ظرب الرظم الكبير وأنا جربته في كفرات شبح وكذلك كفرات gxr نوع يوكوهاما وأنا كذلك بحثت عن الشق بعد
الرقع فلم أجده بعد مضي مايقارب شهر من الاستعمال
2- الصمعغالخلط والمهمه هي رقع تانكي البانزين
3-صابون لوكس لرقع كذلك تانكي البانزين المنخرم لأنه سبحان الله يبرد بفعل البانزين ثم يجمد على التانكي
4-لي يسحب من كفر لكفر لتفخ الكفر التيبلس لأنه يحتاج إلى ضغط لكي يرتفع من الصفر
5- مسامير مع الصواميل للجنوط
الحاله الثانيه من الاعطال هي حين
إذا فضت الباطاريه عليك وأنت في نفود عليك بالعمل التالي هذا في السيارة القير عايدي
1_قم بتعشيق القير بالخامس
2- أرفع السياره من الخلف
3_ أدر الكفر بأيي طريقه كانت وللملاحضه إذا ستعملت الدوران عن طريق المفتاح العجل فكن حذر لأنه ممكن يكسر اليد أو يطير فوق
والاحسن هو الدوران عن طريق الحبل .
والامر المطلوب منكم أعزائي للأنتباه إلى أن السيارات التاليه صارت فصلت الدبل وشبكته عن طريق الكهرب كما هو الحاصل في الشاص والتايوتا عموما
وعندي أقتراح قد عملته هو مفيد وقت الصيد بالحر والدوران على _الشعبان يالله من فضلك _ وهو عمل لي أمام الرديتر ممدود من التانكي الماء الخلفي يمر برشاش المساحات أو رشاش أخر لتبريد الرديتر وهو فعَال للغايه بشكل ملحوض وأنا أستعملته الان لي سنتان ولم أجد له أي ضرر ولله الحمد
والاقتراح الاخر لتوفير تكلفت تمديد الكهرب داخل السياره هو شراء ضفيره المسماة بضفير الجيب العشه لكي يمدد الواحد على كيفه في أي مكان وأمرها سهل ومأمون _بإذن الله_ لكي لايلعبون علينا العماله .
والاقتراح الاخر لأصحاب السيارات المدعومه بالونش وهو الاحتاياط ببكرات قويه لتخفيف الحمل على الونش لأن الونش _ونش التايوتا الشد بلد مثلا_ إذا كان ذاهب فقط فهو يسحب واحد طن وأما إذا كان ذاهب وراجع يسحب طنين ونصف وأما إذاكان ذاهب وراجع ومن ثم ذاهب وكل هذا عن طريق البكرات يسحب ثلاثه طن يعني أمر البكرات أمر لازم للونش وبالاختصار البكرات تضاعف عمل الونش وسأل أصحاب المصاعد (للإفاد)