ياشباب من فضلكم عطونا رأيكم

[رعد البرديه]

السلام عليكم ورحمة الله وبركاته

كيف حالكم ياشباب أنا ودي أروح بهالإجازة لمدة اسبوع لجنوب المملكة وآخذ عمره أبي اقتراحكم لتنظيم الرحله ووش رايكم هل أروح لأبها أو اقعد بالطائف أو الباحه ( قبل أو بعد العمره .. وش رايكم ) أنا دايم اروح كل سنه بس يحصل تعب من ناحية ترتيب الرحله .. ووش رايكم ايهم احسن اروح من عند نفي والبجاديه أو مع طريق ضريه ،، حيث سكني بالقصيم

[ابوحسن ...]

روح مع البجاديه لما توصل الطائف بالسلامه على مكه بعدين ارجع الطائف افضل تروح ابها بس المشكله اجازتك اسبوع يعني كلها تروح بالطريق روح الباحه وتروح وترجع بالسلامه

[ابو خا11لد]

هلا اخوي بنسبة لتنظيم الرحلة اكيد ابدها بمكة وخذ عمرة ومر على ابها اجلسلك كم يوم ابرد وشوف المطر
ووسع صدرك شوية وارجع الى مكانك سالم غانم ....
تقبل مروررري

[رعد البرديه]

روح مع البجاديه لما توصل الطائف بالسلامه على مكه بعدين ارجع الطائف افضل تروح ابها بس المشكله اجازتك اسبوع يعني كلها تروح بالطريق روح الباحه وتروح وترجع بالسلامه

مشكور يابو حسن على اقتراحك ورأيك جزاك الله كل خير البجاديه اغلب روحاتي معها لكن من تالي قالوا ضريه اقرب ويطيح من الطريق حوالي 80 كلم بس يمكن البجاديه أحسن من ناحية الأمان .. اخوي ابو حسن وش الأماكن الزينه للسياحه بالباحه .. ماعليش ابلشناك معنا

[رعد البرديه]

هلا اخوي بنسبة لتنظيم الرحلة اكيد ابدها بمكة وخذ عمرة ومر على ابها اجلسلك كم يوم ابرد وشوف المطر
ووسع صدرك شوية وارجع الى مكانك سالم غانم ....
تقبل مروررري

وانت سالم يابو خالد أشكرك على رأيك .. لكن ثمة سؤال ؟ اذا وصلت الطايف وش رايك احرم واروح لمكه والا اقعد يوم لين يجي الليل واروح لمكه لأن العمره بالنهار الوقت هذا صعبه الجو حار . شاكر لك يابو خالد

[ابوحسن ...]

بالعكس ما ابلشتني اذا ماعطيتك المعلومات الي عندي حتى لو بسيطه مافيني خير>> صح كلامك بس البجاديه أأمن من الطريق الثاني 80كيلو مهب شي على الاساس امانك طال عمرك الاماكن زينه بالباحه كثير بس لو اوصفلك راح تضيع لاكن روح غابة رغدان او قرية خيره فيها غابة جدر بس اذا حبيت اوصفلك رغدان وجدر اعطيك رقمي وانشاء الله ما اقصر معك اذا نويت تطلع الباحه قولي وارسلك رقمي اسف طولت عليك بالكلام

[البشير11]

اخوي

طريق ضريه امان الحمد لله واقرب واشرح بالمررررررررررره

توكل على الله بس لا تمشيه ليل حاول تمشيه مع الفجر والا مسيان

واذا وصلت الطايف روح عندك في الحوية استراحات حلوووه وبرااااااد حيل خذ لك استراحة وريح
وشف الوقت اللي تبي تدخله الحرم وضبطة ولا تكنسل الاستراحة روح اعتمر واغراضك بالاستراحة
وارجع لهن بالحوية وريح بعد العمرة بالبراااااااااااد بعدين وين بتروح سلامتك
لاتنسى تدعيلي الله يجزاك خير

استراحات مو شقق
لا استراحات مثل اللي بالقصيم اسأل عنهن ويدلونك هناك

[رعد البرديه]

بالعكس ما ابلشتني اذا ماعطيتك المعلومات الي عندي حتى لو بسيطه مافيني خير>> صح كلامك بس البجاديه أأمن من الطريق الثاني 80كيلو مهب شي على الاساس امانك طال عمرك الاماكن زينه بالباحه كثير بس لو اوصفلك راح تضيع لاكن روح غابة رغدان او قرية خيره فيها غابة جدر بس اذا حبيت اوصفلك رغدان وجدر اعطيك رقمي وانشاء الله ما اقصر معك اذا نويت تطلع الباحه قولي وارسلك رقمي اسف طولت عليك بالكلام

الله يرضى عليك اخوي ابو حسن رغدان جيته مره وحده وهي الروحه الأولى للباحه بس لا قبلها ولا بعدها بس غير رغدان ما أعرف بس جدر ذا إن شاء الله اذا رحت ابا أنشد عنه هناك وإذا ما لقيته نلقاك بإذن الله وماتقصر يابو حسن جعل عمرك طويل على الطاعه .. الله لا يهينك يابو حسن

[رعد البرديه]

اخوي

طريق ضريه امان الحمد لله واقرب واشرح بالمررررررررررره

توكل على الله بس لا تمشيه ليل حاول تمشيه مع الفجر والا مسيان

واذا وصلت الطايف روح عندك في الحوية استراحات حلوووه وبرااااااد حيل خذ لك استراحة وريح
وشف الوقت اللي تبي تدخله الحرم وضبطة ولا تكنسل الاستراحة روح اعتمر واغراضك بالاستراحة
وارجع لهن بالحوية وريح بعد العمرة بالبراااااااااااد بعدين وين بتروح سلامتك
لاتنسى تدعيلي الله يجزاك خير

استراحات مو شقق
لا استراحات مثل اللي بالقصيم اسأل عنهن ويدلونك هناك

البشير الله ينور دربك صراحه الإستراحات ماعمري أخذتها لكن هالمره إن شاء الله ابا اسوي اللي انت قلتي لي الصراحه انه راي الله يجزاك خير وادعيلك من الآن .. الله يجزاك خير ونلقى الإستراحات رخيصه بإذن الله

[نجد البراري]

هلا فيك يا سلام على السفر شي ممتع :

اول شي خلك بطريق البجادية افضل للخدمات وغيرها يعني طريقنا القديم لكن خل الممشى بالنهار افضل لان الطرق خطرة والانتباه لازم

اذا وصلت الطايف رح للسيل وخذ غرفة ونم
والفجر صل واحرم من الميقات
ثم روح وخذ العمرة وارجع للطايف ونم لك يوم
ومن الفجر على طول الباحة افضل

هذا اللي اقدر اقوله
وتجي بالسلامة

[رعد البرديه]

هلا فيك يا سلام على السفر شي ممتع :

اول شي خلك بطريق البجادية افضل للخدمات وغيرها يعني طريقنا القديم لكن خل الممشى بالنهار افضل لان الطرق خطرة والانتباه لازم

اذا وصلت الطايف رح للسيل وخذ غرفة ونم
والفجر صل واحرم من الميقات
ثم روح وخذ العمرة وارجع للطايف ونم لك يوم
ومن الفجر على طول الباحة افضل

هذا اللي اقدر اقوله
وتجي بالسلامة

وتسلم يا نجد البراري وعسى الله يقدرك على كل مافيه مصلحة دينك ودنياك والله طريقنا طريق البجاديه موالفينه ونرتاح له بس مشي النهار بهالوقت صعب لانه حر علينا وعلى موترنا وانا بصراحه دايم امشي بعد العصر واتقبل الليل أريح من النهار صحيح انه خطر شوي خصوصاً بين عفيف وظلم لأنه مقطعه ، لكن من يوم عرفنا الحج والعمره هذاك دربنا ،، ألف شكر لك نجد البراري على رأيك ومرورك .. لكن الراي اللي رسخ بالراس بإذن الله هو راي البشير الله يجزاه خير ،،

[البشير11]

اخوي الدرب القديم حق البجادية كلنا نعرف خطورة السيارات اللي تطلع عليك والطريق المكسر ولفلفة

وحق ضريه اخوي مليان خدمات من يقول ما فيه ؟؟!!!!

وغير كذا قريب مو محتاج شي لو تعبي من الرس تاصل عفيف منتصف يمكن .

بالنسبة للاستراحات تعرف لا جاك مفرق السيل يمين افرق معه بعد شوي يجيك المفرق الثاني اللي يمين بعد لاتروح معه لا روح يسار الاستراحات هناك فيه مخطط كامل كله استراحات وروووعه بالمره ومؤثثه وسخان عشان الجو شوي بارد وسعرها اذكرها قبل سنه اليوم 350 وحولها بس صدقني جوها خيال والقهوه الظهر بالحوش تسوى

عسى افدناك اخوي
وموفق

[رعد البرديه]

اخوي الدرب القديم حق البجادية كلنا نعرف خطورة السيارات اللي تطلع عليك والطريق المكسر ولفلفة

وحق ضريه اخوي مليان خدمات من يقول ما فيه ؟؟!!!!

وغير كذا قريب مو محتاج شي لو تعبي من الرس تاصل عفيف منتصف يمكن .

بالنسبة للاستراحات تعرف لا جاك مفرق السيل يمين افرق معه بعد شوي يجيك المفرق الثاني اللي يمين بعد لاتروح معه لا روح يسار الاستراحات هناك فيه مخطط كامل كله استراحات وروووعه بالمره ومؤثثه وسخان عشان الجو شوي بارد وسعرها اذكرها قبل سنه اليوم 350 وحولها بس صدقني جوها خيال والقهوه الظهر بالحوش تسوى

عسى افدناك اخوي
وموفق

الله يجعلك موفق يالبشير ويسهل أمرك .. ماقصرت بيض الله وجهك ،، تحياتي وتقديري لك ياهاب الريح

[سعود 101]

الله يوفقك ويستر عليك
أنا اقول لوتروح تعتمر أول احسن وانت شوف الي يعجبك

[رعد البرديه]

الله يوفقك ويستر عليك
أنا اقول لوتروح تعتمر أول احسن وانت شوف الي يعجبك

كلامك صحيح يا سميي وهذا اللي ناوينه بإذن الله لكن أول ما تاصل تصير تعبان لازم ترتاح وتنام بعدين تحرم وتمشي لمكه تعتمر وترجع ،، مثل ماقال المبشر الله يوفقه كلامه سليم ,, شرفت اخوي سعود