وش رايكم يا شباب في الايسوزو ديمكس الجديد؟؟

[جو الصمان]

السلام عليكم ورحمة الله وبركاته
يا شباب انا ابغى شوركم في الايسوزؤ الجديد من كل النواحي
ولا تبخلون علينا باي معلومه
:d

[صالح المطيري]

اعرف شركة مختصة بصيانة أجهزة إرسال المايكروويف الموجود في أبراج بالبر والصحاري وعلى الخطوط ، كل سياراتهم أسيزو صالون ديزل موديلات متنوعة وطبيعة شغلهم كلها كرف ومطانيج والسواقين فلبينيين ومع ذلك احس ان مواترهم نظيفة وصوتها صافي مع شوية دخان طبيعي من الديزل ...
الأسيزو الحوض أثبت وجوده وأظن ان الصالون طيب مثل الحوض ولا تنسى ميزة محرك الديزل الإقتصادي .

[Bader-M]

توكل على الله

و خذها

[جو الصمان]

مشكورين على مروركم


لاتبخلون علينا بإي معلومة

[صالح المطيري]

فيه العضو وصديقنا الغالي في منتديات مكشات أسيزو4x4 ، معاه سيارة أسيزو دي ماكس ويمدحها كثير ويمكن تسأله يفيدك أكثر وهذه قائمة بمشاركاته وتستطيع مراسلته عبر الخاص .
وأنا حسب ما سمعت أن الأسيزو الجديد تطوير أمريكي ياباني وعلشان كذا تلقى فيه راحة الأمريكي وقوة تحمل الياباني .
صورة الأسيزو دي ماكس من موقع شركة أسيزو اليابانية

[رياض الجزيرة]

السلام عليكم ورحمة الله وبركاته

نداء نداء نداء
الأخوة في مكشات مطلوب فوراً مندوب شركة ايسوزو ( المجاني ) بمكشات الحبيب ( أسيزو4x4 ) ولا يهون الجميع .

صراحة من ناحيتي سيارة رزه وعملية وخاصة الديزل منها لأنها شركة متخصصة بمحركات الديزل وذات خبرة طويلة لا تقارن بمحركات الديزل التويوتا أو النيسان .

واسلموا لمحبكم/رياض الجزيرة

[اسيزو 4x4]

السلام عليكم ورحمة الله وبركاته

المندوب وصـل >>>>>>> تحت أمركم ( )

أنا مجرب الونيت الديمكس 2004 لواحد من الربع ومجرب الونيت 2003 الشكل الأول حقي كلها أزين من بعض

1- في النفود لا يعلى عليها حطه بالثاني وتمش على هالرمال

2- الطين شي >>>>>> وأهم شي السواق يكون راعي خبرة مثلي >>>أحم أحم >>>

3- الوديان والشعبان طبح وبإذن الله ما يطفى لأنة ديزل >>>> معي 2003 والله طبيت بشعيب وغطى الماء

الكبوت ومشاء الله ما طفى وجا بعدي جيب تيوتا بنزين وعلى طول طفي >>>البنزين ما يداني الماء

4- الراحة لايعلى عليها مع إرتفاع ممتاز ومناسب ( للعوايل )

5- مكدة نظر الشركات وخاصة بالجنوب والله أني تهولت يوم شفتهم معهم ونيتات وجيوب إسيزو يدخلون أماكن

توحش وهاتك من هالكرف ولا تأثر على السيزو أبد ( وهذي أحد الأسباب التي خلتني أخد أسيزو )

6- ديزل لا تخاف >>>>>> لا كلبليتر ولا بخاخات ولا بواجي ولا ديلكو ولا أسلاك بوجي . يعني أرتاح من

هالخرابيت وديزل إقتصادي جدا جدا

7- تيربو >>>>>>>> والله 2003 قوة 2800 سي سي و100 حصان تيربو مثل عزم GXR بنزن

و2004 قوة 3000 سي سي 134 حصان وتيربو >>>> ديمكس يعني شي خيال .

8- وسيع وأوسع من الهايلوكس والددسن >>>>>>> ومراتب السيزو مفصولة .

9- قطع غيارة مثل سعر غيار الددسن.

10- قطع الغيار متوفر .

11- شكلة رزة .


وأي سؤال أنا تحت أمركم >>>> شكر خاص للغالي صالح المطيري والغالي والعزيز رياض الجزيرة

[جو الصمان]

مشكوووووووووووورين
يا صالح المطيري
رياض الجزيره
ايسوزو
مشاء الله عليك ما خليت شي قلت كلش وماقصرت
ما ادري عن ممشاه في الخط
كم يجيب محمل او فاضي
ومشكورين مره ثانيه

[الوشاح]

جربت التمتيك 2005 الصراحه حلوه فخمه وخفيفه ماعيبه إلا الصوت (طرررررر)

[مراكي الذيب]

السلام عليكم ورحمة الله وبركاته

الله يعطيكم العافيه


والله انا محتار ودي بالاسوزو بس خايف من الصوت .

كم يسوى 2004 او 2005 مستعمل


ياليت اللي استخدمها يفيدنا بالنسبه للدبل الازارير هل هو عملي وهل يشبك لو انك ضغطه وانت مسرع


وشكرا

[جو الصمان]

وينك يا ايسوزو
نبيك تجاوبنا قبل ما نشتري
عجل علينا تكفى

[الطعس الذهبي]

انت جربت الموتسبيشي نفس الايسوزو بس أقوى لان فيه بور والبور قوة إضافية يعني ضاعف القوة الأصلية

[المذهـــــــب]

أخي العزيز أنا معاي أيسوزو 2011 فل كامل قير عادي دبل والله روعه روعه روعه لا تفوتك والله ما فيه منافس لها في محركات الديزل ولا لها صوت وما شاء الله تبارك الله قويه
أنا من وجهة نظري وهذا ريي الخاص أن أيسوزو هي قمة السيارات والدليل شف الشركات ما التي لها عمال يعملون في الصحراء والطرقات والجبال مثل ( شركة الراشد ) أو شركة ( أبن لادن ) أو شركة ( سعودي أوجيه ) وتعرف معنى أيسوزو جميع الشركات هذه تأخذ أيسوزو ما تأخذ غيرها لأن عندهم خبراء يقولون لهم أفضل السيارات التي تصلح للعمل الشاق في الجبال والطرق والمكده ويغيرون السيارات كل ثمان سنوات مع هذا العمل الشاق لهم من تحميل وتنزيل وسواقة العمال شف عاد وشلون لك عليه
والله يوفق الجميع

[ابوفيصل1]

رحت شفت الموتر في مدينة جدة 2014 صراحة الغماره تحفة والمقاعد الخلفيه مريح جدا ووسيع صراحة تفاجئة لاني مريت قبل على الددسن والهايلكس وكانت هي الافضل من ناحيه الديكور ورحابه الغمارة ووسع المقاعد الخلفية

الشكل الخارجي من وجهة نظري ورايي اجمل من الددسن والهايلكس انسيابية ومن الخلف يوجد قص للرفرف الخلفي حتي يرتفع عن الارض والمقدمة مرتفعة ارتفاع مناسب

بس

يوم شغلت السيارة صوتها واضح لانها ديزل صرحة ترددت كثير بسبب الصوت وفكرت لو داخل المدينة او مشاوير الحلال راح نغض النظر لكن خط او تسافر فيها والله الصوت ماراح ارتاح له ولا شريت ....... يمكن العيب فيني لان جميع سيارتى التى استخدمتها جي ام سي او تايوتا .. بعدين الواحد لو مشي خط وحس بصوت الهواء او تنسيم بسيط كره السياره كيف هذا طرطرطر

[hamido]

عليكم ترفيع مواضيع وتطفات نور يادفع البلا
الرجال يسأل عن 2004 والموضوع من 2005
لكن مايمنع الفايده