قصص مع الجن

[الذيب ذيب .]

السلام عليكم ورحمة الله وبركاتة

كيف حالكم يا الربع

ان شاء الله تمام

موضوعي عبارة عن قصص مع الجن
( صارت معك * سامعها من خويك * سامعها من شيخ )
المهم تصير صارت مع الي جبتا القصه منه

بالنسبة لي هذا واحد من المدرسين يقصها لي وصارت معه شخصيا
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــــــــــ

يقول الله يسلمكم :

أول ما عينوني مدرس عينوني في مدرسة متهالكة يوم جت الإختبارات النهائية يقول مامداني اكمل التصحيح وكملت العصر على بعد المغرب المهم يقول المدرسة مالها حارس وصرت بلحالي يقول وانا اصحح اسمع المكيف يشتغل ويطفي واللنبه تشتغل وتطفي يقول طلعت واسمع صوت ركض مع الدرج صوت ناس تنزل وترقا والمشكلة ما فيه احد في المدرسة يقول المهم دريت انهم جن يقول وقعت أضف عفشي واوراقي يوم هذا جت الطامة الكبرى
والا الجن يقلبونها سامري طق وطقيق يقول واطلع ومشيت يقول يوم جا من بكرة علمتهم
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــ
عاد والله ما ادري أغلقوا المدرسة ام لا


أرجو منكم المشاركة

وشكرا....


أخوكم / الذيب ذيب .

[طفران بس بطران]

اعوذ بالله

[واوك]

شاكر لك الموضوع ...

الله يكفينا شر الجن

[الذيب ذيب .]

مشكورين على المرور

والله يكفينا شر الجن

[ساحووق]

اعووذ بالله

لاهنت

[هلي 1999]

دام السوالف مع الجنووووون ياكثر السوالف عنها العلم هذا ويشهد الله اني مازليت عليكم بشيء
شدينا الابل عام 1428هـ عند حدود العراق المهم اباعرنا ماتمسكها شبك تعرف راعيها وتعرف بعضها
المهم الشايب راح واخواني كلهم مابقى الا انا والسوداني المهم وقت الشتاء وانا اشب النار من المغرب وصلينا وعينا من الله خير
طبعا الواحد ان قعد لحاله جته نفسيه وانا اهوجس واغني وارقب النجوم وماادري وش اسوي
شوي يوم جت الساعه 1 ونص بالليل اسمع واحد يناااادي جاي من عند الابل وانا ارد عليه احسبه السوداني والله اني نسيت وش قلت له والا وش قال لي وسكت الصوت وسكت انا وقعدت شوي الا ابي اشرب مويه واروح للخيمه الثانيه القى السوداني راقد قلت له وراك تنادي اوله قال ماناديت وحسبته يلعب علي يبي يخوفني
عودت للخيمه واهوجس شوي شب ناااار بعيد عني بعيد لوونه احمرررررر تقول عيون الذيب وانا خابر الديره اللي انا فيها ماهي منزل كشاتيه ولا شيء وقمت اناظر النار لين سجيت مع الناااار الا كل وشي يقرب يوم صحيت من السجه الا مافي نار ثم يولع نار هناك وهناك وانا على طوووووول دريت انهم الجن الله يفكنا من شرررها واقحص يم الخيمه عند السوداني قلت الحق واثوره من النوومه والدفى يوم طلعنا من الخيمه الا الابل جفلت ولا عندنا سيارات غير شاص 97 والوايت بس والا مجاهيم وحنا باخر الشهر يعني ظلمه الا وانا اصيح للابل وانا اشهد ان صياااحي يجااوب عني كل مااصيح صياحي يرد لي وانا يوم شفت الدعوه كذا تعال دووووورني رحت للخيمه واتلحف بلحافي قلت الصباح رباح وماغير اتشهد بالله واذكر الله الخوووف يالعن ابوه صدق ولادريت الا الشمس جت من عقب خوف وسوسه والسوداني اثره حادر معي راقد وخاايف يوم جت الشمس كان جاني الفرررج وامشي واتبع جرة الابل الا اباعرنا باركه من محل قريب منا وجنبها اباعر مغاتير لدوسري ياولد وانا اجيه قلت جاك اللي امس قال وش قلت ماشفت نار حمرا وصياح قال ايه ايه ويضحك الشايب قلت علامك قال النار الحمرا انا امشي اتبع جرة دااب واكشف بالنور بس شفتكم عرب وانا اطفي النور وامشي واكبس عشان لانوذيكم قلت اها النار وكنسلناها طيب الصياح قال انت تصيح وانا اصيح عليك واثر العلم لاجنوووون ولاخرررررطي
ماغير الشايب هذا لعب في حسبتنا الله يطول بعمره وخلنا نعرف الخوووووف يادافع البلا صدق حسبي الله على الشيطان وهاذي السالفه وما فيها
مير الجنون سوالفها واااجد عني خذ خذ السالفه التااليه

[الذيب ذيب .]

والله القصة الغريبة

مشكورين على المرور


لا هنتوا

[هلي 1999]

هاذي سالفه ياطول الذراع اوردها عن خالي لكن السالفه اتوقع خرافيه لانه ماهو متاكد منها
قال هذا رررجال يحب يقنص قريب من ديرته ومرة من المرات راح يقنص الا يسمع صياح الجعار ( الضبع )
طبعا الجعار صوته كصوت الاطفال وان سمعتو صوت ورع بالبر لاتقربون له الا وانتم بسياره والا معكم سلاح المهم لاتقربون له الا بالسياره عشان فيها انوار وان كانه حصني والا جعار تبلص عيونه
المهم الرجال سمع صوته ومعه خمسة انفار وقالو هذا صياح ورع خلنا نلحق عليه ومشو يوم قربو من الصوت الا والصوت هجد الرجال هذا شاف له جحر والجحر جحر حصني والا جعار وسكت ماعلم احد من اللي معه عشان لايسولفون بالمجلس ويروحون الوراعين للمحل هذا ورجعو والرجال راح لحاله اليوم الثاني للجحر هذا ناويه بالشوزن يوم جلس عند جحره يحتريه يظهر لان الجعار معروف يظهر مع اذان المغرب والا قبيل شوي يوم جا وقت خرووجه جت هبووووب قويه على الرجال من تحته هفهف الريح عليه وهو فطن لها وسمى بالله ومشى تركها قال الوعد اليوم الثالث
وهو يجيها ويحتريها ولاجاه هبوب ريح يوم قعد عند فم الجحر وتطلع له عجوز تكد شعرها والمشط عالق في شعرها طبعا شعرها شوووشه وتضحك له وطالع من فمها ناب ضبع يوم شافها الرجال سمى بالله واذن وكبر ومشى والرجال هذا يقولون موجود الى الحين في الديره الديرة يقولون انها رغبه على كلام خالي والله اعلم
وان شاء الله اني ماقصرت السوالف واجد لكن ماني ماخذ منكم حلاوة المجلس

[القناص104]

الله يكفينا شر الجن

[راكان الظاهري]

سلمت يمناك
كفانا الله شرهم

[طفران بس بطران]

الليلة تسيف ابرقد

[wagooode]

أنــــــــــــــــــا شفت جني ( بفلـــــــــــــم أمريكــــــــــــي ) ياهو يخوف ها كالجني !!!!

[صامولي]

بانتظار المزيد من التفاعل
>>>داخل عرض<<<

[ابوناصر السهلي]

الله يكفينا شرهم وكل مسلم وبارك الله فيك

[الذيب ذيب .]

اشكر جميع من رد على الموضوع

لاهنتوا