المشاركة الأصلية كتبت بواسطة بـو بـدر
السلام عليكم ورحمه الله
هاذا سلمكم الله قنصنا انا وخالي ( والله ماذكر المحل عدل ) ولكن علي البحر وكان وقتها عبور الطيور
وانا كنت بعمر 16 او 15 والله ماذكر -- المهم وصلنا هاك الارض المغرب وقال خالي محنا راجعين العزبه
بنمرح بالخلا وجهزنا عشانا وعينا من الله خير والحين صار وقت النوم قال خالي ياولد تجهز نصلي الفجر ونطلع ندور الرزق قلت توكل علي الله .
ويمكن بعد ساعه او ساعتين من النوم وقوم علي صوت طبول يامسلمين تقولون عرس دق طبل ماعمري سمعت مثله للحين وانا شايب
شوي وخالي يقحص وقول وش هالطبل ( اعوذ بالله من الشيطان الرجيم ) هو يوم تعوذ من الشيطان ماعاد اقدر امسك ركبي من الطقطقه وانقز الي انا بفراش خالي ههههههههههههههههههههه
ونشيل قشنا ونركب الموتر ونمشي للصوت والله يالربع يوم قربنا الي هم ناس مثلي ومثلكم ورا شجر وشابين ضوهم ويدقون طبول والي يرقص لا سيارات ولا بيوت ولالالالالالاشي
ونتعوذ من الشيطان ونمشي لربعنا والفجر عودنا لهم يمكن حولهم بيوت وكاشتين او حاجه
ويوم جينا لمكانهم والله لا الناس موجوده ولا جمرهم ولا اثر لهم ويقولي خالي تراهم الي امس ( جن )
وقلت له -- بالله ياشيخ جن رجعني للبيت كان يقول حنا بعيد ومكه بعيده مننا اصبر يمكن العصر اوديك
قلت معصي وديني البيت ( الكويييييييييييت ) ماني بقانص خلاص
هههههههههههههه
الله يرحمه برحمته
وسلامه تسلمكم
تحـــياتـــي
إنت يبو بدر والله سوالفك شئ طرب ياخوي
بس حللللللللللوة ( النقزة ... أموت وأعرف كيف النقزة بس ) 
الله يرحمه ويغفرله
المشاركة الأصلية كتبت بواسطة طيار قطر
بعلمكم بسالفه صارت لي والله يشهد علي وانا صايم
(ماكل مايقال يصدق ) واترك الحكم لكم
هذا الله يسلمكم في يوم من الايام كنت عازم ربع لي حضر ومالهم بالبر والكشتات وكانو زملاء لي بالجامعه والاغلبيه من جنسيات مختلفه فقلت ابي اقوم بالواجب واعزمهم فالعزبه ورحت قبلهم اجهز المكان والعشاء لكن بعد ساعه اتصلو علي واعتذرو لانهم مايقدرون يجون المهم قلت خلاص وتعشي انا والراعي وطلعت من العزبه وانا في نص الطريق بالبر قلت بكرا الجمعه واجازه وفرصه اقنص كلمت واحد من الربع وقلت له حياك انا فالمكان الفلاني قالي جايك وهذا الكلام الساعه 8 انتظرة وماجا واتصل الساعه 10 وتعذر مني فقلت ما منها شيء خلني امسي ولاجا النهار قنصة وانا مروح للدوحه قمت وفرشت في طرف الروضه ونمت الساعه تقريبآ 3 الفجر
احس ان النفس كتم علي واحس ان في احد يتنفس بوجهي فصحيت الا بشخص (بني ادم ) عينه بعيني ووجه بوجهي وخشمه بخشمي حولت اطوال السكين الي بجنبي بس ما وصلتها المهم جلست وجلس هو مقابلني وقالي انه يبي ياكل بصوت غريب اشرت على صندوق العزبه وكان عني بعد 30 متر وبيني وبين السياره في خطوه الا هو هناك خذ 5 دقايق وروح يمشي لين ماختفه عن النضر وكان وجه كله شعر ومشيته مثل السراب وللعلم ماكان في عزب حولي ولا شيء والخط كان بيني وبينه حول 15 كيلو وانا في وقتها ماقدرت اتكلم ولا قدرت امشي من مكاني
والحمدلله على كل شيء
واترك الحكم لكم انا اتوقع انه جن من شكله وصوته ومشيته وانتوا
أما انت يالطيار .. والله سالفتك هي خوفتني صدق وحسيت إني معك بنفس السالفه
يشهد الله إن شعر راسي تقول مكهرب شئ يخوووف صدق 
(( ياخي كيف نايم وفجأه تصحى وواحد اعوذ بالله يتنسم بوجهك كله شعر وصوته غريب ))
الله يكفينا وانتوا شرهم
المشاركة الأصلية كتبت بواسطة غرشوووووب111
هذي السالفه صارت لي الخميس امس بوسط شعيب يا جماعه صارلي شي اول مره بحياتي يصيرلي شي زي كذا وقفنا نلعط دخل وشفتلي طلحه كبيره شوي قلت ان شاء الله ما تخلاء الساعه تقريبا 1:00 الضهر وكان الصيد قليل جدااا واوصل الطلحه طبعا السياره بعيده عني المهم واناضر طلحه فيها حركه خفيفه المهم وواصيد لي حول اربع ولا وحده طاحت كلهن تعلقن ثلاثه منهن عسرات بين اغصان مهب بسيطه ووحده طارفه واضحه وضوح الشمس وقريبه واخذلي حصا وارجم عليها واخطيها
والحصا الثاني ننفس الحكايه والثالثه والرابعه وال ....... الخ يا جماعه والله قعدت نص ساعه وزود وانا ارجم اقدر اروح واخليها بس ذبحتها لازم اخذها ولا ما يجوز قلت لازم اطيحها والباقيات اسحب عليهن عسرات وكان قحط ما فيه ولا ريشه بالشعيب المهم واقعد ارجم على الدخله الطارفه والمشكله شكيت بعمري انا قلت انا احول ولا وشو قريبه الدخله مره وجيت وقلت هذي اخر رميه ان ما جت الشكوى لله وتراي ارمي ويطيح الحصا بوسط الشعيب وارميها بالحصا وانا على رميتي ماد يدي على فكره ترا يدي جاها شد عضلي من كثر ما ارمي وريحت شوي بعد خمس دقايق كملت هههه المهم وانا ماد يدي برمي وكان شعري من ورا طويل شوي ولابس عمامه اول ما رميت الحصا انشد شعري من ورا شده اقسم بالله يا جماعه الخير ان مخي بغا يطلع راسي وجبهتي انشدت والتفت ككذا بقوه قلت يا حيوان واناضر ما فيهه احد حولي ..؟؟ انا يوم اللتفت واقول يا حيوان اقصد اخوي يوم اللتفت ما فيه احد حولي .! واخوي اشوفه من بعيد يلعط دخل كأن فيه احد مسك شعري من ورا وسحبه بأقوى ما عطاه الله , المهم واخلي الدخله واخذ البندق واروح لم اخوي قلت له مشينا بلا دخل بلا هم << انا اكلمه يعني اني طبيعي ولا كنه صار شي
قال مشينا ويوم اننا بالطريق قلت له قال سم بالرحمان واذكر الله , قلت له يا ابوي قريت أيه الكرسي عند الطلحه يوم صاري الموقف قبل اخذ البندق ثلاث مرات بخمس ثواني من الخوف والله يا جماعه هذا الي صار لي
والي صارله مثل ما صار لي او يعرف شي عن هالاشياء يعلمنا , يمكن اني قاعد ارمي الحصا بمكانهم اعوذ بالله من الشيطان الرجيم ولا شي زي كذا الله يستر ومعليش علىى الايطاله حبيت اوصل الي صار لي بالضبط . وراسي والله للحين يوجعني من ورا على خفيف
والحذرر يا اخوان لحد يرمي سوأ كان بندق ولا حصا الا وهو مسمي <|<وانا والله ما سميت نسيت وتعرفون عشرين ألف حصا رميتها
أخوي قالي تدري عاد قلت وشو قال ما دامك قلت لي بقولك الي صار لي قبل ما يصير لك بثواني قلت وشو قال اني رميت دخله وتعلقت ورميت عليها حصا يقول اول ما رميت رجعت علي الحصا اسرع من البرق على راسي وقعدت تحت الطلحه يمكن ربع ساعه اقرا المعوذات وافرك راسي
ضحكت انا قلت تستهبل علي قال المس وألمس راسه صعرور كبر كف يدي :d وهذا الي صار لي واسف على الاطاله
أححححححححححححححلى شئ كلمة صعرور هههههههههههههههههههه
الله يضحك سنك يالغالي .. والله هذا الموقف مر علي بالفعل وانا أصيد عمري 9 سنين
ومعي ( نبيله ) زي حرف ( Y ) المهم وهااات يانتف بالعصافير وماكلها
ولاخذها ... أذيه بس
وشوي مدري من وين جاتني صفقة حجر طايرة ملوين بين عيوني
يشهد الله .. إلا وكل حمراء تقول ... ههههههههههههه اطالع يمين يسار محد جمبي ماغير انا لحالي براس الشعيب ..
بقدرة قادر قطعت مسافة 10 دقايق نزول من اول الشعيب إلى آخره في 10 ثواني
والله العظيم حتى نعالي أكرمكم الله مدري فين خليتها .. وعلى البيييييييييييييييييييييييت
وامي تصيح وشفيك .. قلت مدري .. أخاف إنها حصاة رميتها وبننننطت بين عيوني
المشاركة الأصلية كتبت بواسطة hawi net
السلام عليكم جميعا
تراي ماعرف اسولف لكن من باب المشاركة
هذا واحد فلاح يروس -يسقي- الزرع قبل طلعت الرشاش المحوري يقول اقبل علي الليل وانا اروس وفاتت علي صلاة المغرب بشوي توضيت ورحت للسيارة اجيب السجادة والا هالمخلوق الغريب قدام وجهي بسم الله جمدت اعظامي ولاقويت اتحرك حتى اني عجزت اميزه من مخلوق وامسكتني ام الركب رجعت اسحب رجليني اببعد عنه ومسكت مسحاتي لأجل ادافع بها عن نفسي وشوي شوي لين قضبتها ركضت منحاش لإقصرانا وصلت لهم مابي قطرة الدم من الخوف استفزعت بهم ولا قصروا وطلعنا ثلاث سيارات وحوطنا المكان ونورنا على المكان والا هذا المخلوق بمكانه ولا تحرك قربنا لمه والا وش تشوف الفشيلة بعينها
طلع شماغي حاطه على انصاب المسحات وصاير كنه راس ضخم وجسم نحيف
اتمنى تكون اعجبتكم
طيب اللي جوا معاه ماظربوا راسه بالمسحاه هذي هههههههههههههههههههههه
المشاركة الأصلية كتبت بواسطة بـو بـدر
تزين السوالف قبل الفطور
هاذي الثانيه وماخفي اعظم
--------------------------
هاذا سلمكم الله تواعدت انا وخوي لي سنه 93م للمقناص بمنطقه بالكويت اسمها العبدلي والبتحديد ( الاقمار الصناعيه ) تخبرون بعد الغزو المحطه مكسره ومنهوبه نهب ومضروبه من الطيران ومكسره يعني مهجوره وورا المنطقه فيها دشاش حلوه للطرد والصيد
الحاصل اتصلت تلفون عليه وتواعدنا علي الساعه 3 بالليل نصلي الفجر هناك ولي شق النور نقنص
انا سيارتي نيسان لوريل يعني ماهي للمقناص ابدا اما هو موتره جيب
قلت في بالي ياولد اطلع من البيت بدري شوي وجهز العزبه والقهوه والشاي والجلسه لين يجيك رفيقك الي كل شي جاهز
توكلت علي الله الساعه 1 بالليل <<<< مسوي فيها مايخاف ( امحق )
دخلت المحطه من الشارع ولف يمين ولف يسار متعرج لين وصلت لحدا الجبرات الكبار المخصصه محولات الكهربا مكان ماتواعدت مع رفيقي
ونزل من السياره ( الدنيا قمره وبرد ) ودخل بعاين مكاننا اذا وصخ او شي بنظفه قبل لا افرش الفرش
ونا ماشي بين صناديق المحولات بروح الجهه الثانيه جلستها احلا --- ويصير عيني بعين هالرجال الجالس علي حفره الكيابل -- يالربع هاذا وصفه -- ابيض لحيته بيضه ثوبه ابيض وجالس علي جنب ( متكي ) ويناظر فيني -- الوصف هاذا بجزء من الثانيه -- لا كلمني ولا كلمته -- مثل الاغنيه ( اربع سنين انتطالع بالعيون ) -- تعرفون المقوله ( شردوااااااااا رحمكم الله ) -- لاحد يسألني كيف وصلت السياره هو انا فتحت الباب او نقزت من الشباك -- الله وعليم -- كيف وصلت للشارع العام -- الله وعلم -- الي اعرفه اني ماسك الخط والطبلون راجع البيت -- وسكر فتحه السياره والشبابيك وفك النور الداخلي كله -- مابي الظلمه -- يارياجيل حاله نفسيه من الظلمه مسكت فيني -- المهم وحط رجلي طاااااير طيار وشوفه علي ايسر الطريق
والله العظيم والله العظيم حلف لكم ونا صايم ولكم تصدقون او تكذبون -- يارياجيل امر عليه وهو علي طرف الشارع ونا مقلع قلاع وسمعه يقولي ( ياولد فلانه ) وتعداه وشوي ( ياولد فلانه ) وتعداه وشوي ( ياولد فلانه ) والله يالربع اسمعه كنه جنبي وانا مسرع ومسكر جميييييييع فتحه بالسياره يناديني باسم امي -- وصلت البيت وفتح الانوار كلها بالبيت وتجيني حاله صياااااح ومسكني ابوي الله يرحمه ويقرا علي وهدي شوي ورقد
وعلم الشايب من ثاني يوم الي صار --- ويمسكها علي عياره لين توفا الله يرحمه برحمته ---
وهاذي السالفه يالربع ويشهد علي الله مازليت بكلمه عليكم
تحـــياتـــي
أقسملك بالله يبو بدر إني أقرأها وأنا أفححححط برجولي من الضحك
هههههههههههههههههههههههههههههههههههههه
واتخيل وجهك وانت تطالع يمينك وتشوفه وهو بوجهك ( ياولد فلأنه ياولد فلأنه )
اضحك الله سنك ياشيخ
أقول إنت وينك والله لو بجدة لأطلع معك يوم شرط خلآ خالي والرب عالي
المشاركة الأصلية كتبت بواسطة فهد الهلالي
يوم أمس, 10:33 PM
الدبل الرابع 
مكشاتي متواصل
تاريخ التسجيل: Dec 2009
المشاركات: 114
المواضيع: 8
رد: قصص مع الجن
تراي احذركم ولينتبه اكبركم قبل اصغركم ان التمادي في مثل هذه القصص سيؤدي بالبعض منكم الى الشك والهلوسه.
وليبلغ اكبركم اصغركم انه مافيه دخان بلا نار ومن في قلبه ذرة من خوف او شك فليجرب ان يستمريء
مثل هذه القصص والله ثم والله ان يقف شعر راسه ويتنمل جلده ويصبح اسيرا لموقف وضع نفسه فيه دون ان يدري وعلى من يقص مثل تلك القصص ان يخشى على نفسه وان يحافظ على اوراده وان يستعيذ بالله من الشيطان الرجيم وان يتقي الله في اخوان له قلوبهم ارهف واخف من الريشه.
بارك الله فيكم الكاتب والناقل وماتقدمونه هو حرص منكم وجزاكم الله خير الجزاء
ولكن لآ يدخل الموضوع إلا شخص يعي مايفعل وما يقرأ
أستميحكم العذر في عدم الموافقه على إقفاله
مكشاتي متواصل
ضوابط المشاركة
