معقوله سياره تخلص و لا تلقاها في الوكالات و المعارض

[الشهابة]

السلام عليكم ..

شفروليه تاهو 2010 دبل ال تي ..

معقوله يا شباب مافيه سياره بالمواصفات هذي في الرياض او الشرقيه ..

و القصد جديده اصفار وكاله ..

دورت في المعارض قبل العيد و من يوم الاثنين و انا ادور في معارض الرياض و لا لقيت ..

لقيت يوكون بس مالي رغبه فيه .. و لقيت لون ابيض بس مالي رغبه فيه

الجميح مافيه .. العيسى مافيه .. التوكيلات العالميه في الشرقيه مافيه .. احد الاخوان سأل في معارض الشرقيه مافيه .. معارض الرياض النسيم و الشفا مافيه ..

معقوله سياره تخلص .. هل الطلب اكبر من العرض ..

بصراحه الموضوع يهمني و سبب لي احراج مع شخص بيشتري سيارتي تأخرت عليه في البيعه بسبب التاهو مالقيت ..

ياليت من يخبر لنا بالمواصفات هذي يدلنا و يكون مشكور ..

شفروليه تاهو - موديل 2010 - جديد (اصفار) - دبل - كاميرا خلفيه - ال تي - لون غامق ( رمادي - بني - اسود - ازرق غامق )

[زاحف بحر]

عليكم السلام ورحمة الله وبركاته

غريبة بصراحة تاهو ماهو موجود ..

معارض الشرقية أكيد فيها بس تحتاج تلف تلف اللين تحصل ..

انا أن شاء الله راح اروح للمعارض واذا شفت ابشر بعزك يالغلاا ..

وان شاء الله اذا لقيت راح اعطيك رسالة خاصة ..

والله يعطيك من خيرها ويكفيك من شرها ..













بالتوفيق للجميع ..











..

[ابوصالح77]

الله ييسر أمرك
بقى شركة بالبيد إتصل فيهم

[الشهابة]

زاحف بحر .. هذا العشم في الطيبين مثلك و امثالك و الله يجزاك خير مقدماً و بارك الله فيه ..

[الشهابة]

ابو صالح .. آمين و ياك و جميع المسلمين .. و شركة بالبيد بنتصل فيهم هاليومين بس مشوارهم بعيد و قلنا يمكن نحصل قريب

[ابوعقل]

ارسل رقم جوالك على الخاص

وان شاء الله اتصل عليك واعطيك خبر

[الشهابة]

ابو عقل .. لاهنت اخوي الغالي

حاولت ارسل لك على الخاص رقم الجوال .. رفض بريدك الاستقبال لاختيارك خاصية عدم قبول الرسائل الخاصه و بصراحه مافهمت شي .. شكراً

[بريداوي اصليm]

ودي أخدمك بس ما بيدي شي
إلا الله ييسرلك أمرك وتشري تاهو 2010 الي براسك

[لاتكب البيالة]

صراحة التاهو انتشر انتشار عجيب وطبيعي ما تقاه عليه اقبال ما شاء الله
وراه ما تصبر ل 2011

[الشهابة]

يسلّم عمرك اخوي بريداوي اصليm .. و يكفي احساسك يالغالي .. مشكور و جزاك الله خير

[الشهابة]

اخوي لاتكب البيالة ..

يوم مالقينا تاهو موديل 2010 قلنا بنصبر لموديل 2011

سألت و كالة الجميح هل فيه فرق في الشكل بين الموديلين قال يمكن الجنوط تختلف و لكن فرق السعر بين الموديلين بيكون تقريباً 14000 ريال على كلام الموظف في الوكاله

و بصراحه حرام الفرق الرهيب هذا على موديل و جنوط

[ابومازن2]

والله ما ودي اكسر خاطرك اذا انت من رمضان انا من شعبان وانا ادور لولد عمي اتصل على من الرياض ويبغاني ادورله على تاهو ال تي دبل وانا في جدة فريت الجميح - بالبيد - التوكيلات .
والمعارض والصالات وما لقيت بعد السؤال والتمحيص افاد احد المندوبين ان هناك شركة شرت جميع سيارات التاهو الدبل من السوق وباقي عليها نقص حدود 400 سيارة غير متوفرة .
وبالنسبة للموديلات 2011 صحيح زي ما قالت

[الشهابة]

افا و الله يا ابومازن2 .. حطمتني و انا اخوك بقووووه .. كان عندي امل اخير في بالبيد في جده او في معارض جده .. بس اذا كانوا اهل جده مالقوا وش نقول في الرياض ..

الله يسهل امركم و تلقون .. و ابشر اذا لقيت ابلغك بالموجود ..

[ابوعقل]

ارسل رقم جوالك على الخاص

وان شاء الله اتصل عليك واعطيك خبر

جــرب الــحــيــن

[العبقري 1]

أنا شريت تاهو 2010 ltz في 5/8/1431 من وكالة بالبيد في جدة وكان الإل تي موجود أنا شايفه .