15 نوفمبر 2015 - 16:514 نوفمبر 2015 - 21:27 منتديات مكشات


::::::: تابعونا على تويتر مكشات :::::::


مرحبا بكم في منتديات مكشات

::::::: تطبيق مكشات للأجهزة الذكية :::::::


تفعيل العضوية

إرسال كود التفعيل

مركز تحميل الصور

باحث قوقل لمكشات

الرصد الجوي

رادارات المناطق

إستعادة كلمة المرور

تنبيه : منتديات مكشات تمنع عرض أو طلب الأسلحة أو الذخائر بكافة أنواعها ، كما تمنع طرح مواضيع عن أي أسلحة عسكرية
النتائج 1 إلى 15 من 15

الموضوع: ديوان الشاعر / غيث داورد

  1. Post ديوان الشاعر / غيث داورد

    بسم الله الرحمن الرحيم

    السلام عليكم ورحمة الله وبركاته
    نقره لتكبير أو تصغير الصورة ونقرتين لعرض الصورة في صفحة مستقلة بحجمها الطبيعي
    (((المقدمه)))
    الشاعر / غيث داورد- من الشعراء المميزين والذين أثروا قسم الموروث الشعبي في منتديات مكشات بالقصائد الجميله والمعبره وقد قامت الإداره مشكوره بجمع هذه القصائد في
    دواوين خاصه لكل شاعر وهي إذ تقدم ذلك إنما تسعى لحفظ جهود شعرائها وجعلها
    في متناول القارئ وهي تقدر للشاعر مايبذله من جهد وتفان ٍ في هذا المجال


    ((السيرة الذاتية))

    ننتظرها من الشاعر

    """""""""""""""""
    """""""""

  2. مشاركة: ديوان الشاعر / غيث داورد

    جيبي نشدني قلت له سم ياسيد =قال القصيده قلت مالك من الخير
    اصبر علي ساعه ولاغيرها ازيد =ثم استمع احلى لحون وتعابير
    من الوكاله كاش مافيك تقصيد =سلمت شيكي واستلمت الفواتير
    وقصيت لوحاتك على كيف ماريد =ومن المرور اطلعت لك رخصه السير
    وذلحين انا باوصفك وصف بتفنيد =هيكل بدي صدام قدم ومواخير
    وجهك شبيه اللي تعلى يبي الصيد =يهوي على برق الطيور المخامير
    وشمعاتك عيون الوحش ناتق الجيد= الله يفكك كل حاسد وشرير
    ان ولعت باالليل تكشف لي البيد =في خايع كله زهور ونواوير
    والبدي مزيونه تهل الزغاريد =تفرق علي كل البني الغنادير
    وان جيت وسط السوق ماعنك تصديد =لله در مطور الجيب تطوير
    ياوارد اليابان ماحلى المواريد =من كربوريشن شاحنينك طوابير
    واربع توايرللوعر واسمر الحيد =ضد النفودالزاميات المزابير
    دفعك رباعي خالي من المناقيد =وخمسة عشر زر تعاشيق للقير
    واذامشيت بخط سكه وتمهيد =وفر العمود الويل جالك معاصير
    مثل السحاب اللي تزبر من بعيد =يهل هماله ثعوله شخاتير
    ثماني سلندر تغرد تغاريد =لادق سلفه تقل يصرف دنانير
    مستحكم بديك زوايا عواميد =مظمن بمساعدات ومسامير
    من عند ابن مرضاح شددك تشديد =على الضمان ومطلع عنك تقرير
    ومراتبك شد الوكاله يابو زيد =على الهواء تطلع وتنزل بازارير
    حملت عزبتنا وشلت البواريد =ونصيت لي روض نباته مزاهير
    فيه الارانب والحباري ملابيد =يفرح بها راع الولع ناقل الطير
    ومعه نشاما كل ابوهم اواليد =من شانهم ترخص جميع المخاسير
    يا حلو لمتهم على النار ياعبيد =مابينهم ياكود حشمه وتقدير
    بالقارمن حددت انا السير تحديد =شمال من لينه جنوب من صوير
    وناديت بالكنود عليهم تراديد =وعاشر نداء سمعت صوت المناعير
    لقيتهم حسب الوعد بالمواعيد =صبر على الشطه وطول المشاوير
    بداية المشوار حزم الجلاميد =ونهاية المشوار ريدة وخرخير

  3. مشاركة: ديوان الشاعر / غيث داورد


    هات القلم يابدر والبوك دنه =امري عليك ولالي امرعلى الغير
    امر الولي اللي على الناس سنه =اللي فرض خمس الصلوات تذكير
    تذكير للي زايغ العقل منه =عقب المرابح عودن له مخاسير
    لي ونة باقصى الحشا مستكنه =لوظهرت جاوب لها كاف والنير
    يابدر انا باوصيك علمي وكنه =كنه وحذرا يعرفه زيد وعمير
    اركب على جمس ورد من مغنه =جمس جديد مسكلبن بالمسامير
    جمس غطا كل المواتر بفنه =حط السوتش وشغله والمس القير
    وحذراك من طول المسافه تحنه =ترى عمار الجمس طول المشاوير
    واذا وصلت اول تلفون رنه =وعطني علومك جعلها لك مسافير
    وذا لفيته قبل الراس منه =وقله مجار من الرزا والمعاثير
    وسلم كتابي كف عود رمنه =سود الليالي لاجزاهن بالخير
    سود الليالي كم مغر فجنه =جنه على غره بليا مناذير
    شب الحطب ودق هيله وبنه =ومده لربع جو لجدك مسايير
    كيف النشاما موردين الاسنه =اهل الكرم والجود ماهم خماكير
    واذبح لهم ماجود جدك وثنه =مادمت عنده خدمه العود لك خير
    بعض العرب يابدر جا فيه منه =ناكر جميل ولانوى نيت الخير
    مريض قلب ويقرع اقراع شنه =لانافع نفسه ولانافع الغير

  4. مشاركة: ديوان الشاعر / غيث داورد



    ""((يامل قلب))""

    يامل قلب عليه من الغثا طوله = لاعسعس الليل جر الصوت بالحانه
    لاتشكي الهم لولد اللاش وشهوله = لاتشكي الا على الخلاق سبحانه
    حتيش لو قال لك كلمات معسوله = الحقد فالقلب لو ماطراه بلسانه
    بعض المخاليق دبلة كبد وعذوله = ماينعرف زود ميزانه ونقصانه
    وبعض المخاليق مثل النار مشعوله = امالحقك اللهب يعميك دخانه
    وبعض المخاليق مثل الزمل مرحوله = تاكل وتشرب جمال هذيل فسقانه
    وبعض المخاليق ياعرضه ويا طوله = تنغر به تحسب انه فرخ شيهانه
    ولياه مجهول ضمن اجناس مجهوله = لوكان ساسه عزيز وصلب بنيانه
    ناس يديها الى الاعناق مغلوله = مانته بلاقي ذرى فالبيت واركانه
    والا هل الجود والمعروف مشموله = بعناية اللي علينا مرتفع شانه
    راع الكرم والوفا تشهد له فعوله = وقت المواجيب سوق الطيب ميدانه
    والاقليل المعرفه ماحدن حوله = المرجله باعتقاده لبس حذيانه
    الطيب عسر المراقي ماحد يطوله = يصعب على اللي حياته دان يادانه
    من لاتحيزم لفعل الطيب قولوا له = ماينفعه طيب عمانه وجدانه
    خلوه يحسب حسابه كيف وصلوا له =والا ببيته عليه يصك بيبانه
    هذا زمان يكفي عنه مرسوله = يكفيك عن صفحته مضمون عنوانه
    الرجل صدوا عنه والنذل فزوا له = والبوم قلط محل الشيخ واخوانه
    العين مما تشوف اليوم مذهوله = ذربين الايمان صاروا مالهم خانه
    هذا زمان ردي ياقل محصوله = يقصر عن اهل الوفا وبله وهتانه
    فيه النفاق انتشر ياقو مفعوله = وصار المنافق يهز اطراف جنحانه
    يصول ويجول بين الناس بطبوله = ويرقص له ابليس بالمزمار واعوانه
    سلموا من ارجافه اللي ماتوحوله = وخاواه ناس عن التوفيق عميانه
    اما غشاهم مساْْ فالصبح ضحوا له = تجارة ابليس ياهل العرف خسرانه
    والشيخ شيخ القبيله رمز للدوله = كلن يعرفه ويعرف وين مسكانه
    شيخ اذا مسهم ناب الدهر جوا له = يم الحرازات والا يم جعرانه

  5. مشاركة: ديوان الشاعر / غيث داورد


    ""((اربع ميه))""

    الله على اللي قيره ارقام وحروف = وامبير قيره بينها يلعب العاب
    اربع ميه واربع وخمسين معروف = ونيت جمس ولنج ماهوب سكراب
    عبارتينه عكس في سيد وصفوف = اذا دعسله ثورن عج وتراب
    وقو المكينه في هواْء النار وبلوف = وبستم وشمبر مع سرندل وصباب
    يعجبك في بديه وهيكله ووقوف = يشدي لحر نايف فوق مرقاب
    واذا ركبته ماطرق قلبك الخوف = لو كان في دربك غراميل وهضاب
    يدني بلحظه ماقصر دونه الشوف = عطه الابنص وخذ منه عد بحساب
    يعد طبلونه وعداده يطوف = وما حط له في ساعته غيرها جاب
    خص اذا جاء خلف طارته مشغوف = ومعه خويه راكب بايمن الباب
    حط الطبيق يسار ومعقب الجوف = اللي سكن به باول الوقت حطاب
    نصا الجفر وجفور مع طعس وجروف = واتلى العهد به عقب عمرات بسحاب

  6. #6
    تاريخ التسجيل
    Jun 2005
    المشاركات
    4,759

    رد: ديوان الشاعر / غيث داورد

    مابي منه فزعه

    بيت ماهو لاهل الوفاء دوم مدهال

    يابو دحيم قلنا وش نبيبه
    ماكل من يلبس له شماغ وعقال

    = يابو دحيم فالزوم نغزيبه
    تشوف زوله زين وتقول رجال

    واذا فتشته بان لك كل عيبه
    شين نباء المقرود في كل الاحوال

    حتى على ربعه ردي نصيبه
    مايحمل من الطيب لو ربع مثقال

    عديم حس وله طبايع غريبه
    حاولت ادورله على الطيب مدخال

    لاكن شينه غاطي كل طيبه
    قبلي يقولون النشاما بلامثال

    قولة هلا من لايودك معيبه
    وعيب على الرجال تبعه للانذال

    النذل خله تايه في شعيبه
    ماله مع اهل الكار ياشيخ مدهال

    ولاناشته صكات بقعاء الرهيبه
    الله لايجعل لنا معه منزال

    يصبح على خيبه وممساه خيبه
    مابي منه فزعه ولابي منه مال

    ولابي منه مدت يمينه لجيبه
    صلة رحم صارت وبال وغربال

    ياالله تعاف الرجل مما بليبه
    شعر : غيث داورد

    .
    .................................................. .............

    ياالله ياللي للمخاليق علام

    ياعالم بالكون دقه وجله
    تفرج لعبد يصبح الصبح مانام

    يرعى النجوم الساهرات المطله
    يحسب حساب الوقت خلفه وقدام

    ويحسب مواطي الرجل عن كل زله
    ياخالد الشكوى على غير صمصام

    تصبح على الشاكي دبور ومذله
    بعض الرجال افعالها هرج ووهام

    لافيه لامذهب ولافيه مله
    تضحك معك ودق لك بعض الانغام

    والا الصدور ابها ثمانين عله
    تشرب هماج ورزقها مال الايتام

    وتصوم قبل تشوف مبداء الاهله
    انهض جناحك وانت ياحر جزام

    انص الحرار وطاير البوم خله
    مالك بطير البوم ماهوب عزام

    يكفيك عن ماضيه حاضر سجله
    شعر:غيث داورد

    .................................................. .......

    تخنقني العبره اذا قرب العيد

    تطري علي من الهواجس طواري
    ماهم قريب يجون واصلهم بعيد

    تحت الثرى تذري عليهم ذواري
    امر واسلم سلام الملاهيد

    ملهود في صدره بعشرة شباري
    لولاي اوسع خاطري بالتناهيد

    .والعين تسبقني بهل العباري
    كان الهموم الها بقلبي مواعيد

    لو كان اشوف الها بقلبي مواري
    هذا عزاء من دون شرط ولا قيد

    للي مثل حالي جراله جواري

    شعر: غيث داورد


  7. #7
    تاريخ التسجيل
    Jun 2005
    المشاركات
    4,759

    رد: ديوان الشاعر / غيث داورد



    عز الضحى والشمس ماترسل اشعاع


    كفن شعاع الشمس غيم وسحابه

    هل السحاب ورافق الوبل ذعذاع

    عم السهل والمرتفع من هضابه

    والطير غرد وانتشى ميت القاع

    واخضر ماناش الحيا من ترابه

    تلونت بالعشب من كل الانواع

    وراع الولع بالبر جهز زهابه

    روض وغدير وليل الاحباب جماع

    ياما حلى باليل صوت الربابه

    وسولف تطرب لها كل الاسماع

    في مجلس كيف النشاما مشى به

    والا المحل مافيه للبدو مرباع

    مافيه غير البين ينعق غرابه






    شعر: غيث داورد

  8. #8
    تاريخ التسجيل
    Jun 2005
    المشاركات
    4,759

    رد: ديوان الشاعر / غيث داورد

    (( نفـود الـسر ))

    باسم الله ابدا والمعانـي براكيـن
    والزلزله فيها حـروف القصايـد

    والرابحين الساجديـن المصليـن
    والخاسرين اهل القلـوب البلايـد

    وبيت الكرم فيه الرجال الكريميـن
    وبيت الخناء فيه البلاء والنكايـد

    والرجل له في خط سيره طريقيـن
    روم الـعـلا والادروب النقـايـد

    ومن لايثمن هرجتـه بالموازيـن
    ترجـع عليـه بعاقبتهـا وكايـد

    السا لفه ماهي تهجس وتخميـن
    والاقنـاة اعــلام والاجـرايـد

    السالفه فعـل الرجـال المياميـن
    حماية الماقـف وسـاع البنايـد

    اللي لهم في كل محفـل عناويـن
    قول وفعل ماهوب ناقـص وزايـد

    زحول الرجال الغانمين المسميـن
    اللي لهم فعـل المراجـل عوايـد

    كسابة الطولات بالعسـر والليـن
    تشوفهم وقت القسـى والشدايـد

    تشوفهم في ماقف يبهـج العيـن
    غربي نفود السـر نعـم الولايـد

    صيوانهم غربي مقـام الرباعيـن
    شمال لابن حميد شرق ابن زايـد

    وجنوبه الهيضل اميـر الدعاجيـن
    اللي نخاهـم دون بـاق البدايـد

    لقيتهم علـى الوعـد مستعديـن
    ثالث شهر شـوال بعـد المعايـد

    من عامنا الهجري ثمنيه وعشرين
    في ملتقى الهيـلا رقينـا سنايـد

    كلن يقول ابشر بعـزك وذلحيـن
    خسران من لافـاد يـوم الفوايـد

    وفزوا كما فزت حرار الشياهيـن
    اللـي مخالبـهـا شطارحـدايـد

    صالوا وجالواواكتسوا بالنياشيـن
    وركبوا على قب المهـار الفرايـد

    وسووا لهم معراض بندق وصفين
    والنـار مشبوبـه توقـد وقايـد

    يوم ان بعض الناس صاير بوجهين
    فالضيق ماتلقـاه وفالحفـل قايـد

    والحمدلله فـي عددهـم قليليـن
    فـي طارفتنـا نعتبرهـم زوايـد

    والرمز والمعنى هدف للفهيميـن
    وصوت الرعد انذار والطيب كايـد



    شعر : غيث داورد



  9. #9
    تاريخ التسجيل
    Dec 2007
    الدولة
    الرس
    المشاركات
    11,605

    رد: ديوان الشاعر / غيث داورد


    بعدماقطعت الياس من شوفة الفرتات=على اخرموديل الهاف سته وستيني
    ماشوفله ضيحه فالرفيعه ولاالتنهات=ولافي فيافي نجدقدشافته عيني
    ثلاثين عام(ن)ماضيه في زمان فات=وحنا على الفرتات مثل السلاطيني
    لفاني بشيرالخيرقال اله توكيلات=وكيل الجزيره جاب من ورده زيني
    نويت اشتريه ومثل ماقيل راحت جات=ابااجدد اللي راح من ماضي سنيني
    دخلت الوكاله في يدي دفترالشيكات=وسجلت شيكي واستلمه الفلسطيني
    غماره ونص مواصفاته كذا بالذات=علامته الأف ورقمه اميه وخمسيني
    مقاسه وحجمه في جنوبه شهوداثبات=على كل رفرف كنهن النياشيني
    اله هيبة في وقفته داخل الصالات=وله فزة فروخ الحرارالشياهيني
    بعدماركبته طاب شفي من الجمسات=ومن وارداليابان ماعاد يغريني
    ليادق سلفه تقل يصرف لك جنيهات=وكيل الامير ومحترينه مساكيني
    ثمان السرندل تقل يهرج معي بسكات=لغات البكم باشارة منه تكفيني
    تماتيك قير ارضي على خمس تعشيقات=دبل يطربك لاغاص في واحل الطيني
    إذا دار ترس القير وافترت الويلات=تحس الزلازل قايمه والبراكيني
    تصاميم طبلونه دواير على لمبات =جواهر معوض في رقاب المزاييني
    اذا صرت في رمله وهويه مع طلعات=ينومسك صوته لاشخر بالشكاميني
    يفدالنفود الناعمه كنها ازفلتات=ويرقى بخفة نفس روس الضلاعيني
    ليامن سرى فالليل تكشف له الشمعات=جميع الخطوط اللي لدربي توديني
    معي لون عودي والرفارف بتكحيلات=تقل فص ياقوت شري بالملاييني
    ليا ضاق صدري وانتوى غرب من حسلات=ركبته مابي فالخط غيره يسليني


  10. #10
    تاريخ التسجيل
    Dec 2007
    الدولة
    الرس
    المشاركات
    11,605

    رد: ديوان الشاعر / غيث داورد

    ياساهرعاف المنام



    قلبه على السهر احتوى



    منهويردالنوم لعيونك ويعطيك الخبر



    ادواك في حلوالكلام



    الياعزفته واستوى



    يكفيك نزف الحرف من قلبك الى منه ظهر



    معناك غالي ما يسام



    ومن جاءيسومه قل لوى



    حومةفكرخل الفكريرقص على زخ المطر



    يلعب وفي يدك اللجام



    لعب الحمام بنينوى



    ياجامع ليلٍٍٍٍِ وذيب ونجوم مع جمرحمر



    هو دايم المبدع حسام



    صوته من السوده دوى



    رجع الصدى بين الجبال يداعب اغصان الشجر



    ابهايداعبهاالغمام



    واللي مسمي ماغوى



    ابها..البهيه بك تباهي..كل من لابهاحضر



    البستهااغلى وسام



    والورديسقى ماذوى



    غردعلى ماتشتهي حرفك يردده البشر



    ياخالد الفيصل علام؟



    الطيربالفرقى نوى



    الطيرلويدرك محله في فؤادك ماشهر



    خل الفؤادالمستهام



    من الطبيعةمارتوى



    وإذاارتوى يظهرلناالمحارمن جوف البحر




    شعر : غيث داورد

  11. #11
    تاريخ التسجيل
    Dec 2007
    الدولة
    الرس
    المشاركات
    11,605

    رد: ديوان الشاعر / غيث داورد


    ياحمد لوكنت انا وياك حلم او علم في شط الفرات=جالسين ومتكين وكلما نطلب من الدنيا يجاب
    ماهقيت انه يساوي شي عندك في كميت وفي مرات=وارجي ان الظن فيكم يانديم كميت عندي مايخاب
    الأمل موجود عندك والذي قد فات يابن الناس مات=والمطر هتان يذرف ساقه الرحمن من جوف السحاب
    العمر يمضي بنا قدام والمكتوب حاصل بالليال المقبلات=ليتها سود الليالي تنبىْ السائل بشىْ من الجواب
    ان بلاك الله ببعض الناس اخير من الحكي معه السكات=اسفهه لاتاخذ وتعطي معه يفقدك عقلك والصواب
    شدة الايام دايم (ياحمد) يبغى لها صبر وثبات=ليتنا نصبر على الشدة ويجزينا الولي حسن الثواب
    عزتي للي يذوق الحنظله ويقول ماذقته ترى سكر نبات=مايميز بين حلو وبين مر ولا تعلم من حذر ولد الغراب

    شعر : غيث داورد

  12. #12
    تاريخ التسجيل
    Dec 2007
    الدولة
    الرس
    المشاركات
    11,605

    رد: ديوان الشاعر / غيث داورد

    جعل السحاب اللي بروقه لواميع = يسقي رويشد والمراء كل ساعه
    دار بها للطير دايم مطاليع = يطلع هدد والخرب في ساع لاعه
    دار تشوف ابها الزبيدي مصاليع = والصيد وافر في مثاني تلاعه
    دار بها ربع قروم بواتيع = مشهور والمزعل وامين الوداعه


    شعر : غيث داوردِ

  13. #13
    تاريخ التسجيل
    Dec 2007
    الدولة
    الرس
    المشاركات
    11,605

    رد: ديوان الشاعر / غيث داورد

    تشهد الاصبع بوادي حنيفه = واشتدت الازمه بهداج تيماء
    استل سيفك يالزناتي خليفه = والمعركة من ساق لأجاء وسلماء
    لاتنشد الممحل متى ايام ريفه = ولا تطلب العطشان قطره من الماء
    القلب مبصر والحبايب كفيفه = وابو عيون تشوف دنياه ظلماء


    شعر : غيث داورد

  14. #14
    تاريخ التسجيل
    Dec 2007
    الدولة
    الرس
    المشاركات
    11,605

    رد: ديوان الشاعر / غيث داورد


    لاوالله الا غدى مفتاح كيلوني=ومن ضيعته صككت يابدر بيباني
    ان كان عند الشايقي حل ودوني=والحل واحد ولاني شايف ثاني
    الحل حلي وترحالي كما العوني=لين الله اللي خلقني يقضي بشاني
    ياسرع ماتنفرج لومايودوني=من راع الافراج في ظلماي يقداني
    يقداني اللي علم غيبي ومكنوني=اللي من الماء المهين النطف سواني
    وذا نوى بالفرج لو حيل من دوني=يفرج لي اللي ليا موتني احياني
    مخرج من الحوت جوف البحر ذا النوني=وجاعل ولد نوح بالتنور غرقاني

  15. #15
    تاريخ التسجيل
    Dec 2007
    الدولة
    الرس
    المشاركات
    11,605

    رد: ديوان الشاعر / غيث داورد


    ياللي على الشاشه تحلل فالارقام=السوق ماظني قريب رجوعه
    السوق في موت دماغي من العام=متلون بالدم شكله ونوعه
    السوق صادر له شبه حكم الاعدام=والسوس ينخر في محاني ضلوعه
    والخوف يصدر به مثل حكم صدام=في كل يوم يجيه حكم يروعه
    سوق بلع رزق الارامل ولايتام=منه اغتنى الهامور بقعا تصوعه
    بقفل الشاشه وبرتاح وانام=واطلب من المولى يعجل طلوعه

معلومات الموضوع

الأعضاء الذين يشاهدون هذا الموضوع

الذين يشاهدون الموضوع الآن: 1 (0 من الأعضاء و 1 زائر)

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •