متطلبات تحويل جمس سوبربان الى حوض

[ابوو مناور]

السلام عليكم ورحمه الله وبركاته

كيف حالكم يالربع

الموضوع واضح من عنوانه

بحثت في اغلب مواقع الانترنت وما لقيت اللي ابيه

ووجت منتداكم بمحض الصدف وبصراحه ما شاء الله مواضيع واعضاء توب التوب

واتمنى اجد ضالتي عندكم

انا عندي جمس سوبر بان مديل 87 وخاطري اقلبه حوض وهذي صورة

هذي الصور وزي ما قلت لكم وش رايكم اقلبه غمارة والا غمارتين

وهل فيه ورشه بالدمام لانه اقرب لي متخصصه بالقص او تعرف طريقه التحويل الى حوض

وش المتطلبات وكم تكون التكلفه الاجماليه

واللي عنده تجربه او يعرف احد لا يبخل علينا

ودمتم سالمين

[تناهيت]

كانك تبيه شغل ميه ميه ومتحسف على الميكانيكا ...الخ مالك الا تشيل البدي كامل وتنزل عليه بدي جمس حوض وهالموديل افضل يكون حوض غمارة وماراح تستفيد الا من الكبوت والرفارف والبيبان

اما القص ما يضبط الا اذا كان في بالك طريقه خاصه فيك
سبق وان شفت جمس مقصوص وقالبه راعيه كشف لاكن للأسف ما ودك تناظر فيه ما مثل الشد بلد

لاكن تبي نصيحتي لا تلعب في الجمس باين انه نظيف ما يستاهل تلعب فيه
ولا تنسى مشاكل المرور .......والأستمارة
اشتر لك جمس حوض بــ10000 وضبطه على كيفك اوفر بكثير

[عشقي الباترول]

زي ماقللك اخوي الي قبلي

حاول تركب بدي جمس حوض اوانك تشتري جمس حووض وتبيع هذا

واذ انك متحسف على المكينة فكها وركبهاا اوفرلك

[مسير عليهم]

اذكر واحد في حي الشفا بالرياض قاصه من بعد الباب الخلفي

مقارب لشكل الافلانش لكن الشغل وسع صدرك

واذكر شايب قابلني في ورشة ويبي يطبق نفس فكرتك والله اعلم هو طبقها او لا

لكن وش الحاجة للصندوق ومعك صالون

على قوله الوالد ابيع جيب واشتري ونيت وقشي ويطير به الهوا ويلعب فيه المطر

[يتيمة الدهر]

مسيتم بالخير

نفس المشكلة تراودني عندي جيب نيسان قديم صالون وأريد أقلبه حوض ومتردد كثيراً
أخاف مايضبط القص خاصة من خلف مقعدة السائق كيف راح تقفله والمشكلة بعد القص يمكن تدخل في مشاكل مع الغمارة بعد القص أصوات وحركة ودخول غبار وغيرها لم تكن بالحسبان وشوري عليك لا تغامر وتقص إلا إذا رأيت مثله بعينك مقصوص تمام وبدون مشاكل

[ن م ر]

إذا فكرنا اقتصاديا فتكلفة التعديلات بتفوق قيمة الموتر حالياً

وإذا فكرنا من ناحية الشكل فأتوقع ( حسب نظرتي الشخصيّة ) انه بيطلع شكله بشع


والنهاية خسرت دراهم وخسرت الموتر


وانت حر بموترك وقرارك
وكلامي هذا مجرد رأي وليس تحطيم و إحباط

وبالتوفيق

[ملقاط بن جمر]

وجهة نظر :

ورى ما تبيع موترك وتاخذ لك حوض ؟؟

[باترول 82]

ماشاء الله تبارك الله شكل الموتر نظيف الله يعطيك خيره ويكفيك شره

كثير من الناس يتمنى يملك مثل هذا الموتر ويكون نظيف

رأيي تشتري جمس حوض أوفر وأحسن حسافه تلعب بهذا الموتر والأمر يعود لك أخي الغالي هذا مجرد رأي

[ابوو مناور]

يعطيكم العافيه وما قصرتوا

[GS5]

اسمعن بس كانك تبي حوض وكانك راعي بر و محتاج للشد و قشه
بدال ماتقلبه حوض القزاز الجانبي اللي ورا اللي مايفتح ركب له فصالات و ضبطه خله يفتح على جنب مثل بيبان الشد
والمرتبه الثالثه شله هي والمكيف وكلل القش الي ورا و فصل لك اكا العزبه اللي ماينقصه شي و رتبه ترتيبهمن اقطع عليه و فوقه تقدر تحط عفشك من خيام و فرش و هاللي تنزلهن اول شي و لابغيت اللي تحت الغطا اللي فوقهن تقدر تسفطه للجهه الثانيه و تصير مقسم اللي تحت و تعرف وين مكان الغرض اللي تبيه و تفتح القزازه مع جمب و تاخذه و قضينا
والتنده حط به شبك و حط به السبير و العده و اللي تبي
وتانكي الما تحت العزبه من داخل ولو تحسبه صح و تزينه بيصير ازين من الونيت كانك تبيه للبر
والقزاز اللي يمين و يسار و حق الركاب اللي ورا فكه و ركب لك بلاستك اللي مثل القزاز اخف و الكبوت ركب المنيوم و البيبان الخلفيه يعني حاول انك تخفف الموتر و انت راعيه و خابرن الثقل وشلوون

وان كنت تبيه شكل تقدر تشري لك غماره و حوض و تفك بدي موترك , الرفارف و الكبوت و البيبان و الديكورات موجوده عندك و قضينا , اللهم اشياء بسيطه بس ..
وانت زين اللي تبي و الله يكتب لك الخير و يوفقك ..

[عصاقيل الدخله]

فيه ورشة بن مرضاح بالصناعيه القديمه بالرياض ومعروفين بالشغل اللي زي كذا وانا شايف عندهم كذا سياره شغلهم تمام بس سعرهم غالي ،،، اذا حبيت راسلني واعطيك الوصف والاحداثيه

[حان الرحيل]

السلام عليكم
الجمس حلو ويخدم...شيل المرتبه الخلفيه وفص دروج وتانكي وكذا يصير معك جمس +ونيت .......غير كذا
ماراح يجي شكله مقبول ناهيك عن ان المرور يمنع ذلك

[ابوو مناور]

كم تتوقعون تكلف يا اخوان ؟؟؟

[السنع كله]

شوف يالوجه الطيب:قيمة سيارتك على حالتها والتي مهما غليت عندك فقد تعداها الموديل +تكاليف التحويل المشكوك بانضابطها :::تشتري بها حوض موديل حديث ودعك من التمسك بالقديم ترى كبر السن شين

[((القناص))]

وجهة نظر :

ورى ما تبيع موترك وتاخذ لك حوض ؟؟

كلام في محله