قصة ولد الشيخ وخاين الامانة عمة

[(( ابن الحياة ))]

لكل من بطيبة وسمو اخلاقة جعل قليل مايأتى بة اخيهم كالكثير وامتدحوا ماصغتة للأبداع بة ولكنها الأنفس الابية السامية التى تأبى الا تفضلا على المقل بمدحا يرفعة الى عنان السماء
فهذة قصة اكتبها اللحظة لكم انتم اخوانى الكرام ولتعذرونى ان قصر معناها وقل فحواها عن مانصبوا الية وهو التحصل على قليلا من رضاكم ولكم مطلق الحرية فى اختيار كلماتها سواء الاكمال باللغة العامية او الفصحى
=======================
قصة قرأتها او سمعتها تخوننى الذاكرة فى مصدرها ولكنها ومن قوة معناها حفرت احداثها على جدار الذاكرة نقوشا تسلى النفس حين تبرمها وتجلى هموم قلب ادماة تضجرة وتبعث الهمة بروحا اثخنتها جراحا غدر قريبا تخلص لة


القصة
بيت شعر . قطيع غنم, رجال تغدو وتروح كلا لما يشغلة , وبذلك البيت رجلآ يجلس بصدرة وعلية قسمات الهيبة والوقار تنبئ الناظر الية بمكانتة بقومة وقوة مركزة وانة شيخ هذة القبيلة المترامية الاطراف وأمامة صانع القهوة يحرك الصاج ليحمر القهوة ويجعلها صالحة للطحن والغلى فى دلة القهوة التى اخذ الماء يخرج بخارة منها معلنا قرب فورانة

وان هى الا لحظات واذا بالمتقاطرين على مجلسة يتوافدون تباعا وهو بدماثتة وطيبتة يرحب بهذا ويسأل عن حال ذاك والتفت الى خادمة وقال لة : ادر القهوة على الرجال
ينهض الرجل وبيدة الدلة ويمثل لأمرة
وبعد ان شرب الرجال قهوتهم وهموا ان يستأذنوا الشيخ فى قضاء شئونهم قال لهم انتظروا قليلا فانا اريدكم فى امر فامتثل الرجال وجلسوا وهم يقولون نحن تحت امر الشيخ

يتبع
وانا لازلت على كلمتى تبونها بالعامية ولاا اكمل بالفصحى تامرون

[عبدالاله 123]

اللي تبي ماعلى كريما تشرط
يعطيك العافيه

[محمد الظاهري]

حياك الله ياغالي
وما قصرت مواضيعك جميله
وسرد رائع
والله لايهينك
نتمنى ان تكون في العاميه
لئن القصص الشعبيه ما تحلا إلا في
العاميه والشعبيه
وشاكر تواجدك في الخيمه
تقبل مروري
اخوك

[أبوعبدالرحمن الأسعدي]

شكرا لك اخي الكريم

[بوابراهيم ع]

يا خوي بتكمل بالعامي بتكمل بالفصحى
أنت بس كمل الله يرحم والديك
أنت كل قصصك روعه وتراك علقتنا
بس ياليت تجيب القصه متواصله بدون فواصل

[حياتي البحر]

لله يعطيك العافية
قصة جميلة

كمل بالعامية

[(( ابن الحياة ))]

اللي تبي ماعلى كريما تشرط
يعطيك العافيه

ابشر بالطيب يالطيب

نتمنى ان تكون في العاميه
لئن القصص الشعبيه ما تحلا إلا في
العاميه والشعبيه

ابشر بالخير ان شا الله وانا باعيد صياغتها لأنى اصدقك القول قد كتبت معضمها بالفصحى

شكرا لك اخي الكريم

العفو اخى العزيز

يا خوي بتكمل بالعامي بتكمل بالفصحى

أنت بس كمل الله يرحم والديك
أنت كل قصصك روعه وتراك علقتنا

بس ياليت تجيب القصه متواصله بدون فواصل

ابشر بالخير ولكن عامل التشويق يحكم القصة يعنى لو سردتها كلها وبدون فواصل لمل القارئ ولكن هذة المرة ولأجل خاطرك ساأحاول ان اختصر واجعلها فى مقال واحد تامر انت

لله يعطيك العافية

قصة جميلة

كمل بالعامية

والله يعافيك وابشر

[بنت الوشم511]

الله يعطيك العافيه
كمل بالعاميه ونحن في انتظارك

[(( ابن الحياة ))]

ولاخذوا الرجاجيل دقايق الا وكل واحدا منهم ماخذا مكانة ويناظرون فى الشيخ ايتحرون منه العلم الى بخاطرة والشيخ ساكت ويتلفت فى وجية ربعة كنة يتعرف عليهم واحدا بعد الاخر ويقوم هنا شايب ويقول له وش العلم يبو مستافى ترانا عصاك الى ماتعصاك وان كان حدا مزعلك ولامضيقا صدرك ابشر بنا لك اليوم ودوم

الشيخ : تحيا وادوم يابو ضارى لكن العلم ماهو بالى جا فى بالك وان كنت متضايق شوى مهو على لكن على القبيلة وعلى حالها من بعدى وولدى مثل مانتوا خابرين غرو عودة ماقسى ولاحتى تزوج الى هالحين

ابوضارى : توكل بالله يابو مستافى العلم هين والشور عندى ولا يهونون الربع
المجلس فى صوت واحد مطلق يابو ضارى تمون

ابوضارى:مستافى الله العالم انى ما أجامل من خيرة شبابنا وفارس وكفو صحيح انه ينقصة بعض الخبرة لكنة سبع وربيت لك ولد

الشيخ: الله لايقصر بك وانا ماقول الكلام ذا عشان تمدحونة قدامى لانى عارف منهو ولدى ومجربة ووقفاتة تشفع لة عندى بس الرجال ان ماحس انة مسئول وبرقبتة ناس يناظرون رحمة الله ثم يناظرونة ما فرقت الدنيا عندة

ابو ضارى: كلامك صحيح وحلها عندى ان شا الله

الشيخ: اسلم

ابوضارى: الولد شيخ ولد شيخ ولا تعداه المشيخة سوا كان صغيرا ولا كبير لأنها فيكم من سابع جد اما من صوب الى مضيقا صدرك فانا اشور عليك لاجا مستافى من القنص تخطب لة بنت الحلال الى تستاهله وانا باقول على ابوسند وانا عارف انى امون ان بنت عمه حصة هى الى تناسبة بنت حسب ونسب ولابيلاقى أخير منها
واما من ناحية المشيخة وخوفك على القبيلة فاالله يعطيك طولة العمر وتشوف عيال عيالة وتعلمة وتعطية من خبرتك وفيها سلامتك

الشيخ: والله الشور الطيب ها ويش رايك ياخوى يابوسند

ابوسند: انت تقول على رقبتى ياخوى وترى بنتى جاتك عطية ماوراها جزية

الشيخ : كفو والله ياخوى اشهد ان بطن شلنا مافسل

ابوسند:والله ان دورت لبنتى ما لقيت لها اخير من مستافى حليلأ لها

الشيخ:على بركة الله وخير البر عاجلة انا بخلى واحدا من الفرسان ينهج لم مستافى ويجيبة من القنص واول خميس بعد ماياصل نسوى العرس واطلب المهر الى تبى يبو سند

ابو سند: ان قلتها كلمة ولابرجع فيها بنتى لمستافى عطية مامن وراها جزية ياخذها بثوبها
المجلس فى صوت واحد ونعم يابوسند تقول وتطول وانت كفو وابو مستافى يستاهل

ورجع مستافى وهو عندة طرف علم بالاجتماع الى صار وهو بالقنص وقلبة يبى يخرج من فرحتة ان بنت عمه الى يحبة ويريدها بتصير حليلة لة كذا وبها السرعه الى ماتوقعها المهم تزوج مستافى وبنى له بيت جنب شق الشيخ ومرت الايام وهو متهنى ومستانس ماعنده للشر طارى ولاخذوا فترة فوق الشهرين الا والشايب يوم صار طريح فراشه ولايقدر لايقوم ولايتحرك وحس ان منيتة قربت وولدة مستافى ماهنالة لاعيش ولاشرب وهو طاير جايب الطبيب ولا مرسل وراء طبيب وكلهم اجمعوا ان مافية حيلة وفى يوم وهو جالس عند راس ابوة ويلتفت له بعد مافاق من اغمائة بسيطة ولاولدة قاعد يغط يدة يبى يحرك الدم فيها وهو يسكب من ها الدموع

ويرفع راسة ويقول :لاياولدى انا مابيك تكون ضعيف ولاتنزل دمعتك لن دمعه الرجال غالية بالحيل وانا ابوك وابيك تكون شديد وتمسك نفسك حتى لو مت لأن الموت وانا بوك علينا حق ولا منة مهرب ولا هو مصيبة ولا كارثة لكن المصيبة وانا ابوك لاضاعت هيبة الرجال وصارت دموعه مثل راعيت الحجول الى على دقة الشوكة تنزل دموعها

مستافى: يمسح دموعه ابشر يابوى لكن والله انها رحمة بك وبى من لى غيرك فى ها الدنيا يابوى

الشيخ:لك الله وانا ابوك ثم ربعك وجماعتك الى ان عرف قدر الكبير ورحمت الصغير صاروا مثل الخاتم باصباعك ولا يلحقك ضيم باذن الله دامك مع ربعك تكرم ضيفهم وتعطى فقيرهم وتواسى مصابهم

مستافى ابشر بالى يسرك يبوى

الشيخ: ها قم وانا ابوك وخل الفداوى يزهم لى شيبان القبيلة وارجع بساع عشان تساعدنى ادخل للشق

مستافى يقوم وينادى على فرج ويقوله بكلام الشيخ ويسرع فرج يزهمهم ومستافى فى اللحظة هذى رجع لبوة وسندة لحد ماقام وفرش لة فى الشق وسدحة وجهزة وشوى والا الشيبان يوم لفوا واحد ورى الثانى ويقوم فرج ويصلح لهم القهوة ويصبها لهم وبعد ان تطمنوا كل واحد على حالة الشيخ وهو الى يقول لهم : توكلوا على جود الله يالربع انا جمعتكم الليلة لجل امرا مهم وهو انى حاس ان منيتى قربت
يقاطعه اصوات بالمجلس العمر الطويل ان شا الله وازمة وتزول يابومستافى

الشيخ: اسمعوا يالربع ولاتقاطعونى وين ابو ضارى

ابو ضارى : موجود ياطويل العمر

الشيخ: وين ابو سند

ابوسند: موجود ياخوى

واخذ الشيخ يسال عن الشيبان الى عليهم الكلام فى القبيلة الى كلمتهم مسموعه وكانوا ذراعه اليمين فى شبابة وفترة مشيختة للقبيلة وكل واحد منهم يقول موجود ويوم تأكد من الناس الى يبيهم قال: انتوا تعرفون ان مالى وريث الا ولدى مستافى وان المشيخة لى ولولدى من بعدى اب عن جد ولا لاحد فيها معه شى

صوت من المجلس يؤكد كلام الشيخ الذى قاطعه الشيخ وقال : وانتوا تعرفون ان ابو سند اخوى وذراعى اليمين وسندى لكن اخوى من امى يعنى ماله فيها

اصوات بالمجلس ولغط والانظار تتجة لبو سند تشوف وش وقع الكلام علية والى امتقع لونة بعد ها الكلام لكن سكت الشيخ الناس يوم كمل وقال : لكن ان بسوى الى ماحداٌ سواة قبلى وان ابيكم توافقونى علية وتكونون شاهدين على ذا الاتفاق

ابوضارى: ابشر بعزك

الشيخ : تسلم يالربع مستافى مافية قول ولاتعداه المشيخة لكن يبيلة شوى وانا اوصى علية ابو سند يكون هو الشيخ من بعدى على القبيلة عارية وامانة يرجعها لمستافى لاوصل سن العقل والحكمة ولا فى الوقت الى تشوفونة يصلح انه يقود القبيلة وابيكم تحلفون قدامى وتعطونى عهود الله ومواثيقة ان ماتختلفون من بعدى ولاتخلون ولدى يضيع من بعدى

المجلس مثل الى شبت بة النار كلا من صوب يطلب لة طولة العمر ولايخليهم الله منه

الشيخ: صلوا على النبى يالربع وتعالوا ياشيبان وحد وراء الثانى عطونى ايديكم لجل اخذ عليكم عهد الله وميثاقة ويقوم ابوضارى اول واحد ويتبعه الشيبان واحد بعد الاخير الى حد ماوصل الدور على ابوسند وهو يجي ويحط يدة بيد اخوة ويعطية العهد والوعد ان ولدة ومشيختة فى عيونة وانة مايخلف شى من الى يسرة

المهم بعد الكلام هذا تقول ان كأن الشيخ كان مستنى الى حد مايسوى ها الحل الى يضمن ان القبيلة ماتنقسم بعده ولايضيع حق ولدة لأن بعد ماسرى الشيبان من عندة ماطلع علية الفجر الا والعلم ينتشر بالقبيلة الشيخ يطلبكم الحل

المهم مرت الايام وهى على خير مستافى لجل ينسى ابوة سندة وعضيدة صار يسج بهاالبر يقنص ويشعر ويتوجد لحد مايرد لة عقلة ويعود للديرة والا الناس ماعاد هى بالناس وعمه ماهوب الاول لايحتفى بة لااقبل ولايرحب ومرة ورى مرة صار يقومة من صدر المجلس لاجا شايب اثارى الرجال اخلف العلم الى حلف علية لبوة ومبيت النية مايرجع له الشيخة الى كان يحسد اخوة عليها ولاعاتبوة الشيبان الى فيهم خير ولا هم من الى لفهم بالعطى من وراء مستافى لاشافوة يعاملة بها المعاملة قال لهم خلوة يتعلم ويقسى لأن المرجلة ما لها الا الخشونة ومرة وراء مرة دخل مستافى على شق عمة الشيخ الى كانوا مجتمعين عشان يتشاورون فى امر من امور القبيلة ويوم بغى يجلس قال لة عمة يامستافى رح جب لنا ذبيحة وعطها مرتك تطبخها للرجال الى فى المجلس وبعد ها الكلام وهى تدور بة الدنيا خاصة يوم شاف نظرات الشماتة فى اعيون بعض العرب الى حاقدين علية وهو ينفض ثوبة ويخرج من الشق ويرجع لبيتة يرغى ويزبد مثل البعير الهايج مايدرى وش يسوى ونفس تقول له يروح ويذبحة ويشرد ونفس ترده لوصية ابوة انة مايقسم القبيلة نصين ويوم شافتة زوجتة بها الحالة وهى تطيح تحت رجولة وتدخل علية مايسوى بنفسة كذا ولايتهور بشى يندم علية طول حياتة ويوم شاف دموع حبيبتة ومنظرها بها الشكل ويرجع لة عقلة ويقولها بالسالفة من اولها لاخرها وبعد ماكمل قال لها : على ملامة لو حطيت السيف بين ضلوعه

زوجتة : تكفى داخلة على الله ثم عليك لاتفجعنى فيك وفى ابوى ولا فى قبيلتنا لنك ماراح تاصل لة الا بعد ماتاطى رقاب فرسان القبيلة ولاذبحتة ولا انت خسر قبيلتك وخسرتنى ولا استفدت شى ولكن الحل انك تجلى عن العرب وتروح ترزق الله يمكن يحلها ربى وانت ماتدرى وبعدين لاتنسى ان ابوى رجل فى الدنيا ورجل بالقبر ولا له وريث الا انا وانت

وفكر مستافى فى كلام زوجتة ولا هو عين العقل لنة لو قتل عمة فى ها الوقت بالذات قلبوا علية القبيلة ولا واحدا منهم بياقف بصفة المهم اخذ فرسة وبندقة وزوادتة وسيف ابوة وسرى بعد ماتوادع من حرمتة وطلب ربا كريم وساح فى ارض الله الواسعه بلا وجهه ولاهدف ولاوعى مع ثامن يوم وهو بالبر ولان المقادير ومشيئة الله جابتة الى رجم قعد فوقة يتفيا ويسوى لة قهوة تحتة ويشوى صيدة والا بهاك العجة الى مقبلة صوبة ولايبين تحتها شى وهو يلتفت ويركز ولاخذ لة شوى الا ويخرج من تحتها فارس لا اله الا الله اسود باسود ماتشوف منه الا عدة الحرب الى لابسها وبندقة الى على جنبة ولاعلى بالة مستافى ولا يبية لكن حب البقا خلاه يعمر بندقة ويخرج سيفة من خباة ويوقف منتظر وش يصير وفى نفسة اقل حركة منه ينيشن على عيونة الى بدت تظهر لة معتمد على الله ثم على يدة الى ماتخيب المهم يوم صار على مرمى فشق من سنافى وهو الى يلتفت له الفارس ويشوفة ويوجة له ويوم قرب منة وهو الى يعسف مهرتة ويمشى على هونة وسنافى متجهز ومصوب بندقة والفارس ولا على باله ويوم صار على مسمع الصوت قال الفارس سلام عليكم يابن الاجواد القى عندك ماء هلكنى العطش

سنافى:انت انس ولا جن

الفارس: لاانس وعليك امان الله مايجيك منى شر يابن الاجواد بس ان كان عندك ماء اشرب ولا خلنى اتسهل بطريقى

وبلمحة بصر وبعد ماسمع سنافى كلامة وسبحان الله دخل قلبة وحس ان مامنة نية غدر وهو يحط بندقة ويسحب القربة من على فرسة ويمدها للفارس وهو يقول تعال اشرب خير الله واجد ويقرب منة الفارس وياخذ منه القربة ويصد بوجهه عن سنافى ويرفع طرف لطمتة عن ثمة ويشرب شرب من لة من الما عشر سنين ويوم خلص كثر بالخير وشد لجام فرسة يبى يتسهل ولاسنافى يوم يمسك العنان ويقول :افا تراها عيبة بحقى يابن الاجواد تاصل عندى ولا تشاركنى زادى وصيدى وانت من شوفك راعى مقناص وتعرف علوم الرجال

الفارس:مكثور الخير ياخوى والله انى عجل وعندى ماضوع لازام انهية بساع

سنافى : ابشر بالخير وزال همك وابشر بى خوي يسندك ويعضدك فى العلم الى انت تبية بس لاتعيبنى بين العرب

الفارس: مطلق ولافيك شك بس هذا امر لازم اخلصة لحالى ولكن عشان كلامك الى يبين انك فارس ومن بيت عز ومشيخة بنزل واتغدى من صيدك بس على شرط

سنافى:ابشر به تام من غير ماتقولة

االفارس : انك ماتسالنى عن شى اسوية ولا بسوية

المهم مرت اللحظات وسنافى يقوم بالشوى وتقريب اطيبة للفارس ويتحين الفرصة الى يشيل الفارس فيها اللطمة عن وجهه ولكنة تفاجئ ان الفارس ومع جوعه الى كان واضح كان ياكل من تحت اللطمة الى يرفع طرفها التحتى وهو ساد بيدة عشان مايبين وجهه صراحة لعب الشيطان بقلب سنافى وبغى يسالة بس ردة شرطة الى قال لة عليه المهم تغدوا ومرحوا الاثنين وعينوا من الله خير ويكثر له الفارس بالخير ويوم ركب فرسة قال له سنافى :ياوجه الخير انا والله ارتحت لك وان كان تقبل وانت رايح للمدينة الفلانية ودى اخاويك لأن اثنين اخير من واحد فى ها الصحراء

الفارس :انا طريقى من وسطها وانا ودى بخوتك بس على شرطنا

سنافى :وعلى شرطنا
المهم مرت اللحظات والايام وهم مع بعض وسنافى ملتزم بالشرط حتى السوالف والصيد مايسالة وش يبى وش مايبى ومخلية على راحتة حتى فى النوم لاتوزى وابعد منه مايلحقة ولايشوف وينة المهم وصول للمدينة والا سنافى يشوف شى اغرب من الى صادفة مع الفارس يوم دخل السوق ويشترى له فشق وخمس بكرات وحمارين اكرمكم الله ويمر على سوق القماش ويشترى لة اربع طاقات قماش ويحطها على الحمير ويمر على الحداد ويخرج من تحت سرجة قطعه قماش ملفوفة على شى ويوم فكها ولا داخلها سيف شكلة قديم وهو يخرج السيف من خباة ويعطيه الحداد عشان يحدة وبعد ماخلص وهو يمسك شعرة من راسة وينتفها ويمررها على حد السيف وهى الى تنقسم نصين وكل هذا ومارفع لطمتة وهو الى يسوق البل والحمير اعزكم الله ويخرجها من السوق وسنافى معه مايدرى وش السالفة لكن حس ان الرجال عنده علم وعلم كايد بعد المهم وصلوا لطراف المدينة وايوقف الفارس ويلتفت لسنافى ويقول له:اشهد بالله انك خوى خويك وانك من رجال تعرف قيمة الخوى والسير والحين انا استاذنك ابى اروح للى جيت على شانة فاأن قدر الله ورزقنا الحياة بنتلاقى ولا اطلبك السموحة والعذر كان اخطيت عليك بشى

وكان وقع الكلام هذا على سنافى كبير لأنة حس ان الرجال مودع ويغلى الدم فى عروقة ويصيح خيال البل وانا ابو عويد والله ياوجه الخير انى ما أتركك ولا اخليك الين ناصل للى تبى وانا مانى من الى يخلون سيرهم وخويهم مهما كان وانا معك ولا نى بتاركك لين تاصل مامنك

الفارس :لكن انا رايح لشى اما فية حياتى ولا مماتى

سنافى : ابشر بعزك ولو كان غريمك قوم ماخليك لين اتطمن عليك
ورضخ الفارس للأمر الواقع وان كان فى نفسة انبسط ان سنافى بيكون معه ويساندة المهم مشوا الرجاجيل ايام لحد ماوصلوا قرية وهو الفارس يفرع يمين منها ويمشى لحد ماوصل لمزرعة على اطراف القرية ماحولها لاحنيس ولاونيس وهو ينوخ البل ويربط الحمير تكرمون ويشل سيفة وبندقة ويعمرها ويلتفت لسنافى ويقول له انا بادخل لهاك البيت الى فى طرف المزرعة وباغيب وارجع لك لكن ان غابت الشمس ولاجيتك فاعرف انى ميت فخذ البل والحمير حلال عليك ويفز سنافى ويقول خلنى ادخل معك اساندك
الفارس: لا تكفى هذا شى لازم انا الى اسوية ولاغيرى يسوية وتذكر الشرط الى بينا وعطيتنى
المهم راح الفارس وزولة يغيب عن عيون سنافى الى ااحرقت قلبة غبينة الشرط وقهر خوية الى راح وهو مايدرى وش سالفتة ولية دخل هاك القصر وشوى ولا يسمع سنافى الا ابواب تصافق وصراخ وبندق ثارت ولامسك نفسة وهو يخطف بندقة وسيفة ويجرى ولاوصل للبيت ودخل الا وبزران عبيد منثرة جثثهم بالحوش وهو الى يعمر بندقة ويدف الباب يبى يعرف صوت الصياح من وين ولاوصل للصالة الا بجثة هاك العبد الى متحضن هاك البنت البيضا وهى ميتة وراسها بعيد منها ويتسمع والا خوية ينتخي سنافى ياعصابة راسى وهو يكسر الباب والا خويه قاعد يتعاطن مع ذاك العبد الى عن عشرة وقرب العبد انه يغلبة ويقفز لة سنافى ويظربة بمخمس البندق على وجهه والا العبد فاك خوية واهتز من قوة الضربة ومع ان فية جروح من الفارس الا انة طمر على سنافى يبى يقتلة لكن كان سنافى اسرع منه ونزع سيفة وسدد لة ضربة خلت جسمة يطيح بجهه وراسة فى جهه ولاامداه يلتفت لخوية الفارس الا وهو متعنز على سيفة ويفتح دولاب فى الغرفة ويخرج منه مرة بيضا على وجهها كل معانى الخوف والجزع وهى تنتخى وتقول تكفون خذوا الى تبون الفلوس بعلمكم وين هى بس خلونى اعيش انا وعيالى ولاقالت ها الكلام واذكرت عيالها والا الفارس تطايرت من عيونة الشرار وهو يصيح يالفاسقة حتى فى الموت تبدين عيال الحرام عليك وهو يعطيها ها الضربة الى فصلت راسها من جسمها ويفزع للعيال الى متوزين بالزاوية من الخوف ويلحقهم امهم وسنافى مندهش من الى قاعد يصير واصابة مثل الشلل ليش الفارس قاعد يسوى كذا لكن الى خلاه مايتدخل يوم سمع كلامة مع المرة عرف ان الامر فية شى ولاامداة يفكر الا الفارس قد خرج من الغرفة ودخل غرفة ثانية ويوم تأخر دخل عليه والا الفارس قاعد متحضن لة عجوز ذبحها وقاعد عند راسها يبكى ويوم شاف سنافى والى مثل المنوم مغناطيسيا ماهو دارى وش يسوى والا الفارس يوم رفع سيفة بعد مامسك شعر العجوز واقطعه ولفة فى خرقة وخذة معه وكل هذا وسنافى ماشى ماهو دارى وش العلم ولااخذ الفارس شوى الا وهو جايب البل والحمير ونزل الطيق منها ولف جثث الحريم الثلاث فيها وحفر لهم وسنافى معه واقبروهم اما العبيد واعيالهم حطهم بحفرة فيها حطب واحرقهم وهو يقوم بعدها ويفك الحمير ويدخل البيت ويشيل من هالصناديق ويحط على البل وسنافى معه وبدون اى كلمة بس يشوف وش يسوى ويسوى مثلة المهم خذوا الصناديق ومشوا ولاخذوا لهم وقت والفارس باقى متحضن هاللفة الى فيه راس العجوز وكل فترة يفتش عن الراس ويبكى وهو يمشى مثل المخدر وراء سنافى الى بعد مارجع لة عقلة وحس انه وقع نفسة فى مصيبة مايدرى وش هى وكيف ايتخلص منها ولكن كان كل ماشاف منظرة وهو يبكى على راس العجوز يرحمة ويقول اكيد عنده علم كايد اجبره على فعلتة ذى المهم مرت ثلاثة ايام وهم ماشين بلاهدف ولاوجهه ولا وعى سنافى الا والفارس يوم قال له اصبر شوى ويبعد منه ويروح لم شجرة ويحفر للراس الى بيد ويخرجة من اللفه ويبوسة على جبينة ويدفنة ورجع ومشوا واليوم الثانى يوم قربوا يطلعون من حدود المدينة والقرية الى راحوا لها وصار ماعليهم خوف وقف الفارس
وقال:والله ياسنافى ياوجه الخير ماودى افارقك ولااتركك لن خوتك عز وعزوة لكن انا طريقى غير طريقك وانا بروح للعرب الفلانية وبازبن عندهم وانت الله عطاك هالبكرتين بالى عليها من صناديق مليانة ذهب وليرات

سنافى :يحرم على شى منك وانا ماأبى شى عندى فية شك ولاخاويتك الا لأنى ارتحت لك وحسيت انك صاحب علم ومظلوم مثلى ولكن الضاهر انى اخطيت والسالفة ماهى الا سالفة نهيبة

الفارس : لا تكفى لاتقول ها الكلام والله ان ظنك ماخاب فينى وانا صاحب ظليمة وشينة وثلاث سنين وانا احترق بنارها الين الله قدرنى وخذت بثارى وسترت عارى

سنافى :وش تقول

الفارس :انا ياوجه الخير قصتى قصة بقولها لك وان تحكم
ولاامدى سنافى يرد علية الا والفارس نزل من على فرسة وقام ينزع اللطمة من على وجهه وبعد ان شال غترتة من على راسة شهق سنافى من هول الى شافة ولا توقعه او دار فى راسة واذا بالفارس ماهو الا بنت ضفاير شعرها تطايرت يوم حركت راسها وماخلتة البنت فى الدهشة كثير الا وقالت له بعد ماشافتة يحك عيونة يبى يتأكد هو حلم ولاعلم اية ياسنافى انا بنت واسمى وضحا والى شفتنى قتلتهم هذولا خواتى من امى وابى والعبيد الى قتلتهم هذولا عبيد ابوى الى خانوا الامانة ومرغوا شرف ابوى فى التراب بعد مامات الله يرحمة وانا كنت وقتها صغيره عمرى سطعشر سنة والعجوز الى شفتنى ذبحتها هذى امى ومع انها مافسقت مثل خواتى الا انها كانت تشوف العبيد يلعبون بشرف بناتها ولا سوت شى او تحركت اما انا بعد ماشفت ان مافى يدى شى اسوية خاصة ان واحد من العبيد حاول انه يغتصبنى وفقعت عينة وشردت ورحت ارض تحطنى وارض تشيلنى الين ماوصلت عند عرب استضافونى واكرمونى بعد ما أنتخيت بشيخهم وطلبتة يعلمنى الفروسية صحيح انه ضحك اول ماقلت لة لكن يوم الحيت علية ونخيتة قال خلاص يابنتى روحى لهاك الفرس ان قدرتى تعسفينها وتركبينها عطيتك ياها وباعلمك الفروسية ومرة ورى مرة وان اطيح واقوم لحد ماقدرت فى يوم انى اجية وانا راكبه ضهرها وعنانها بيدى تمشى على كيفى وهو الى ينتخى ويقول اشهد بالله انك بنت رجال ورضى بعدها يعلمنى الفروسية والقتال بالسيف والرمى بالبندق وانا اتعلم منه بحماس المغبون وكل ما وهنت ولا حسيت بتعب تذكرت الى وراى وشرف ابوى الى مرغوه العبيد وحلالة الى تناهبوة ولعبوا فية تزيد النار فى قلبى وتجينى قوة مدرى من فين لحد ماصرت زي مانت شفت وبردت النار فى قلبى وخذيت بثارى وثار ابوى والحين ابى اروح واشوف لى حد ازبن عنده ويستضيفنى

وبعد كل ها الكلام الى سمعه سنافى من البنت وهو الى ينتخى ويتوجد ويبكى على حالة من القهر ان كيف بنت تصير احسن منه وتاخذ بثارها وهو الفارس الشجاع يضيع حقة وتتمرغ كرامتة بالارض ولايسوي سواتها ويوم شافت وضحى سنافى بالوضع وهى تحن علية وتجلس تواسية وتقول له ابشر بالخير كانك مطلوب انا معك وان كانك مظلوم انا اروح معك وانصرك من الى ظلمك لو ادرى ان موتى قدامى وسبحان الله كان المحبة واالعاطفة زرعت بقلوب الاثنين لأن الحب والعشق مالة طريق الا من باب الرحمة المهم قال لها سنافى على السالفة كلها من البداية الى النهاية وهى تقول له ما لك حل الا ان حنا نرجع لعربك وناخذ الى اخذ منك بالقوة وهم مايكذبون خبر ويركبو خيولهم ويسوقون ابلهم الى حد ماوصلوا لديرة سنافى ويبنى سنافى لهم بيتين واحد له وواحد لها عشان تاخذ راحتها ولا بزغ نور الفجر الا وهى عند شق سنافى لابسة عدة الحرب ومتلثمة وسنافى مثلها وهم ينهجون صوب المرعى ويغيرون على حلال الشيخ بو سند الى كان فى الاساس ورث سنافى من ابوة ويسوقونة ويضربون الرعيان الى تشاردوا يوم شافوهم ويبعد بها لين وصلها عند بيته ويبرك البل ويربط ارجيلها لأنة عارف ايش الى بيصير ولا وعوا الا الغبار يوم قبل عليهم وهو ينتخى ويقابلهم ويصيح فى وضحى لاتذبحين ربعى ياوضحى نازليهم بخبى السيف المهم يوم قربوا منه وعرفوة وهم الى يوقفون ويسئلونة وش الى حده على ها الفعله الشينة قام يناديهم واحد ورى الثانى اقلدك الله ان كان تعرف ان الحلال الى خذتة هو حلالى وحلال ابوى واغتصبة عمى سويد الوجة مع المشيخة واليوم انا رديت حلالى والمشيخة له لنى ماتشرف اكون شيخ على ناس ماتعرف الحق من الباطل ولا قال ها الكلام الا وخمسة منهم مافيهم خير يهجمون علية هو وخوية وينازلهم وهو مخلى السيف فى خباة مانزعه ويطيح الاول والثانى والبقية كملت عليهم وضحى الى تقول كنها جنية تشيل الرجل من على فرسة وترمية بالقاع ولاقعدوا شوى الا وسنافى طامرا عليهم ويربطهم وبلمح البصر وهو على ظهر فرسة وقعدوا نهارهم كله وهم على هالحال هو وياها ينازلون الفرسان ولايصوبونهم وكل ماطاح منهم رجل ربطوة وحطوة جنب اخوياة لين اكتمل عددهم عشرين رجال اما الباقى يوم شافوا الوضع كذا وهم اصلا ماودهم يقاتلون سنافى خويهم وابن قبيلتهم ويرجعون للقبيلة يبلغونهم الى صار ولا أمداهم ياصلون لشق الشيخ وقالوا له بالى صار الا والصايح من بعيد يابوسند ياخاين الامانة ويالربع يالى باقى فيكم خير ونخوة وعزة نفس هذولا عيالكم رديتهم لكم وانا ماخذت الا حلالى واما الشيخة الى سرقها شيخكم فمايصلح لكم الا هو واليوم انا نازلت عيالكم يخبى السيف ولا صوبت منهم احد ولكن انا نذيركم انكم تعيدونها لأن الى بيجينى ويبى ياخذ حلالى وحلال ابوى مالة عندى الا السيف وقد اعذر من انذر وبعد ماقال كلامة فك رباط اسراة وقال لهم ماهو كل مرة تسلم الجرة انا اعتقتكم لجل انه كان بينا عيش وملح وخوة لكن بعد اليوم مايعتدى على الثانى منا الا البايق وخاين العيش والملح
ويروح سنافى ويرجع لبيتة ولوضحى وجلس وهو ينتظر وش بيصير فى العرب بعد الى سواة ولكن العرب اصبحت بحال وامست بحال والشيخ تغيروا علية العرب يوم قام ينتخى بهم ويامرهم انهم يردون الحلال مع انه عارف ان الحلال حلال سنافى وابوة يعنى يبي يجرهم على العيبة والباطل ويتفرقون منه ولابقى معه الا الشياب الى منتفعين من وراة اما الى فيهم خير وماهم براضين اصلا بالى صار طلعوا من عنده ولا اصبح الصبح على الشيخ ابو سند الا ويتفاجاء ان العرب راحلين ولاعاد من عربة الا بيت او بيتين من المنافقين اما بقية العرب ما اضحى الضحى عليهم الا وأخرهم ناصب خيمتة قرب بيت سنافى وهم يجونة ويتعذرون منه ويلومونة انه خرج من الديار ولا تشاور معهم ولارد لأحد منهم الشور خاصة ابو ضارى خوى ابوة وصديقة وبعد العتب واللوم قالوا الشيبان بصوت واحد بعد ماقال لهم عن قصتة مع وضحى نشهد بالله ان فعلك يبيض بالوجة ولايفعلها الا عيال الشيوخ ومن اليوم وساير انت شيخنا وجابوا وضحى وطلبوها حليلة لسنافى فوافقت على شرط انه مايطلق زوجتة الاولة اما ابو سند فحتى المنافقين تركوة لحالة وبقى منبوذ مكروة من الكل ومات بحسرتة وقهرة

[الضرغامي]

بيض الله وجهك على هالقصه ما قصرت ياخوي

[(( ابن الحياة ))]

بيض الله وجهك على هالقصه ما قصرت ياخوي

ووجهك ابيض

[بوابراهيم ع]

الله يعطيك الصحه و العافيه
ويبارك فيك على القصص الطيبه

[-ظل الجزيرة-]

جزاك الله خير اخوي وتسلم يمينك

[ولد عم هتلر]

جزاك الله خير وفيت وكفيت

[tahoe_120881]

بيض الله وجهك قصه شهامه ورد حق المظلوم

الله يعطيك العافيه